Mawhna, Kipulakna le Tatkhiatna
59
1 A honkhia zo lo dingin TOPA khut tom lua lo a,a za lo dingin a bengngong lo hi.
2 Ahi hangin na khialhnate in
na Pasian kiang panin hong khenkhia khin hi.
Amah in hong zak loh nadingin
na mawhnate in ama maitang a liah hi.
3 Ahang in, na khutte sisanin nin a,
na khutmete khialhna-in a nin hi.
Na kam un zuauthu gen a,
na leii un gitlohna nate a gen ziahziah hi.
4 Kuamah in thutang zong lo a,
kuamah in citakin a thu a sung kei hi.
Amaute in kisel mawkmawkna muangin zuau a gen uh hi;
haksatna paii-in gitlohna a suakkhia uh hi.
5 Thangtom tui op uh a,
maimom khau a phan uh hi.
Amaute tui a ne peuhpeuh si dinga,
khat a kitap ciangin thangtom khat a keuh ding hi.
6 A maimom khau uh puan in kimang lo a;
amau bawlsa tawh a kituam thei kei uh hi.
A nasep uh gitloh nasep hi-a,
a khutun gamhtatna bek a sem hi.
7 A khe uh mawhna bawl dingin manlang a,
mawhpengte sisan luansak ding a kin uh hi.
A ngaihsut uh gitloh ngaihsutna hi a;
amau lampi ah kisiatna le siatna sul a pai hi.
8 Amaute in lemna lampi thei lo uh a;
amau lampi-ah thutang a om kei hi.
Amaute lamkawi-ah kihei khin uh a,
amaute a zui peuhpeuh in lemna a thei kei hi.
9 Tua ahi ciangin eite thutang tawh i kigamla a,
thumaanna in eite hong ban kei hi.
Eite in khuavak i zon hangin khuamial bekbek ahi hi;
A tanphatna i zon hangin a mial bikbek ah i pai hi.
10 Mittaw bangin kawm zui teng i zawtzawt a,
mittang nei lo bangin lampi i zawt hi.
Khua khalvak-a pai bangin suntangpi-in i muktu a;
a thahatte lakah misi i bang hi.
11 Eite khempeuh vom bangin i humham a;
kawl vakhu bangin i thum ngutngut hi.
Thutang i zon hangin khatbeek i mu kei a;
i kihut nading a gamla mahmah hi.
12 Ahang in, nangma muhna-ah ka mawhna uh tam a,
ka mawhna un kote langah teci a pang hi.
I mawhnate ei tungah omden a,
i tatkhialhnate i thei hi;
13 Lehdona le kitheihmawhbawlna-in TOPA i langpan a,
Pasian i nungngatsan hi.
Netniamna le lehdona tawh kisatsuahin
i lungsim ah zuauthu i paii hi.
14 Tua ciangin thutang kithalsawn kik a,
thumaan a gamla hi;
lampite ah thutak muktu a,
thudik a tum thei kei hi.
15 Koimah ah thutak kimu lo a,
gitlohna a pel peuhmah a kiman zawsop hi.
TOPA in en a, thutang mu lo ahi manin
a lungkim kei hi.
16 Amah in khat beek a om loh lam mu a,
amau tanga ngetsak ding khat beek a muh loh ciangin lunghimawh a,
ama khutin ama hotkhiatna semin,
ama thumaanna in amah lenkip hi.
17 Amah in thumaanna awmdalin bulh a,
a lu ah hotkhiatna sik lukhu a khu hi;
amah in phulakna puan silh a,
deihluatna-in kituama puantualpi-in a nei hi.
18 Amaute sepnasa tawh kizui-in,
amah in thuk kik dinga,
ama galte tungah thangpai-in a langte dan a thuaksak ding hi;
tuikulh mite amau thuak ding bangin
a thuk ding hi.
19 Nitumna lamah mite in TOPA min kihta ding uh a,
nisuahkhiatna lamah ama minthanna a zahtak mahmah ding uh hi.
Ahang in, TOPA huu in a mut
tuikhang vat tawh kibang zui-in aa amah hong pai ding hi.
20 "A mawhna uh a kisik Jacob-te kiangah
Zion ah Tanpa hong pai ding hi,"
TOPA in cikhia hi.
21 "Kei adingin ahi leh hih in amaute tawh ka thukhun ahi hi" TOPA in a ci hi. "Note sunga om ka Kha le note kam tunga ka guansa kammalte na kam uh tawh kikhenkhia lo dinga, na tate kam, a suan le khakte kam tawh tu le a tawntungin a kikhenkhia kei ding hi," TOPA in a ci hi.