A Dangtakte Sapna
55
1 No a dangtakte khempeuh aw, hong pai un,tui hong zuan un;
no sum nei lote aw,
hong pai-in lei unla ne un!
Hong pai unla sum pia lo man nei loin
bawngnawi le lenggahzu lei un.
2 Anlum leina loin bang hangin sum zanga,
gilvahna ding lopi-in na sem na hi uh hiam?
Ngai un, ka thu ngai-un, anlim ne un,
na hinna un anlim pen ne-in a tai ding hi.
3 Na bil uh hong ngat unla kei hong zuan un;
na nuntak theih nadingun ka thu ngai un.
David tungah a muanhuai itna ka ciam bangin
note tawh tawntung thukhun ka bawl ding hi.
4 En un, mite tungah amah teci suaksakin
mite makai le ukpa ka hisak ding hi.
5 Note in na theih loh uh minamte na sam ding uh a,
TOPA note Pasian Israel-te Siangtho Pa in
note hong thupisak khin ahi manin
note hong thei lo minamte in
kintakin note hong zuan taktak ding uh hi.
6 A kimuh theih lai-in TOPA zong un,
amah a nai lai-in sam un.
7 Tatsiapa a gamtat nusiasak unla,
a gilopa a lungsim kheelsak un;
TOPA lamah kiheisak le uh cin amah in lainat dinga,
eite Pasian lamah na kiheisak uh leh amah in a mawhna maisak pha mahmah ding hi.
8 "Ahang in, no ngaihsutte kei ngaihsutna hi lo a,
no zialetongte kei zialetongte a hi kei hi,"
TOPA in cikhia hi.
9 "Leitung sangin vante a sanzawk bangin
no zialetongte sangin kei zialetongte sangzaw a,
no ngaihsutnate sangin kei ngaihsutna sangzaw hi.
10 Khaici vawhpa khaici ding le
a ne pa anlum ding
a piansak theih nadingin
vantung panin guah le vuk kiasuka,
leitung buakkawtin kungnote mengin
selsak loin a kileh loh bangin
11 ka kam pana pusuaksa ka kammal zong tua bang ahi hi;
a hawmin kei kiangah hong kileh lo dinga,
ahi hangin ka deih bangin
tungsakin ka sawlna ah lawhcing ding hi.
12 Gual nuamin na kuankhia ding uh a,
lungnuamin hong kipaikhiatpih ding hi;
note mai-ah mualliante le mualneute
la sa in awng ding uh a,
lo lai-a singkung khempeuh in
khut beng ding uh hi.
13 Lingkung tangin takkung po dinga
thangling kung tangin muikung a po ding hi.
Hih in a tawntunga
TOPA kiphawkna
a kisusia ngei lo a kipden lim hi ding hi.