A Lungkhauh Israel
48
1 No Jacob inkuan,Israel mina kilo,
Judah suan pana piangte -
TOPA minin tomlo a,
Israel Pasian min lo napi
thumaan thutaka ding lote -
2 no le no khuapi siangtho tualsuak ka hi uh hi,
a kici Ama min Thahatpen TOPA ahi
Israel Pasian tunga kingate aw, hih thu ngai un:
3 A masa nate sawt pekin kong gen khin a,
ka kamin hong zasakin tuate kong theisak khin hi;
tua ciangin ka gamtang pah a, tuate hong tung hi.
4 Ahang in, note na lungkhauh lam uh,
na ngawng thagui uh sik ahilam,
na taltang uh sumngo ahilam ka thei hi.
5 Tua ahi manin hih nate sawtveipi in kong gen khin zo hi;
note in, ‘Ka milimte uh sep ahi hi;
ka sing milimte uh le a kisung ka pasiante un thu a piak ahi hi,’
na cih theih loh nadingun tuate a pian ma-in
no tungah kong zasak khol khin hi.
6 Hih nate na za khin uh hi; a vekin en dih un.
Sang nai lo ding na hi uh hiam?
"Tu-a kipan mailam hun ah a thak nate,
na theih loh uh a kisel nate kong gen ding hi.
7 Tu-in amaute kipiangsak khina, a sawtvei nai kei hi;
tuni ma-in tuate na za nai kei uh hi.
Tua ahi ciangin, ‘Hi mah ei, ka theihsate hi ei,’
na ci thei kei ding uh hi.
8 Na za ngei nai kei uh a zong na theitel ngei nai kei uh hi;
khanglui hun lai-in na bil uh a kihong kei hi.
Mi muantak na hi lo lam uh kong thei a;
na suah tungua kipan lehdote hong kici hi.
9 Ka min ka khualna-in ka thangpaihna diah in;
kei hong kipahtawina ka khualna-in
note kong thahmang loh nadingin note panin ka ki-ip hi.
10 En in, ngun siansak na bang zo kei uh zongun note kong siangsak hi;
gimna pummei-in note kong zia-et hi.
11 Keimah ka kikhualna, keimah ka kicihna-in hih ka sem hi.
Kei le kei kiminsiasak buang ding ka hi hiam?
Ka minthanna midang tungah ka pia kei ding hi.
Israel Kikhah
12 "Jacob aw, ka thu ngai in,
kong sapsa Israel aw:
Amah keimah ka hi hi,
ka cihpa a masapen le a tawpnapen ka hi hi.
13 Ka khutin leitung bulpite ka phut a,
ka khut taklamin vante ka zal hi;
amaute ka sapkhawm ciangin
a vekun a dingkip khawm uh hi.
14 "Note khempeuh hong kikhawm unla ngai un:
Hih nate milimte a koi pen in hong genkhol ahi hiam?
TOPA koppih mipa in Babylon tungah
ama sawmna semkhia dinga,
a khutin Babylon mite aa a langpan ding hi.
15 Keimah, kei tektekin ka gen khin hi;
hi hi, amah ka sam khin hi;
keimah in ka paipih a,
a nasepna a zo ding hi.
16 Ka kiang hong naih unla hih thu ngai dih un:
"Ka zaksak masa pena kipan a simthamin ka gen kei hi;
tua hun mah in pianga, tualai ah kei ka om hi."
Tua hi a tu-in Thupipen TOPA in
ama Kha tawh kei hong sawl hi.
17 Hih in TOPA gen ahi hi -
nangma Tanpa Israel Siangtho Pa in:
"Kei mah TOPA na Pasian -
nang ading a hoihpen hong hilhpa,
na pai nading lampi hong lakpa ka hi hi.
18 Ka thupiakte na thusim nak leh
na lungmuanna gunpi bang dinga
na thumaanna tuipihual a bang ding hi.
19 Na suan na khakte sehnel bang dinga
na tate sim zawh loh sehnel tang zah a pha ding hi;
keima mai-ah amaute min kiphiat loin
zong a kisusia kei ding hi," a ci hi.
20 Babylon paisan un,
Babylon mite taisan un!
Lungdamna tawh kiko-in,
leimongte dongin puak unla,
"TOPA in a nasempa Jacob tankhia khin hi,"
ci-in tangko un.
21 Amah in sehnel-gam kantanin a mite a paipih ciangin, a dangtak kei uh hi;
amah in amaute adingin suangpi panin tuiluang bawl a;
amah in suangpi khangkhamsak a,
tui a phulkhia hi.
22 "Migilote adingin lungnopna a om kei hi," TOPA in a ci hi.