David’ Khuapi’ Gimna
29
1 Ariel, David tenna khuapi Ariel tungahgimna tung ta!
Kum khat tungah kum khat gawm toto unla,
a kot paipai na pawite uh bawl toto un.
2 Tua hi taleh zong Ariel ka umcih ding hi;
tua khua thumin taamlo dinga
kei adingin biakna-tau tap suangpek aa ahi ding hi.
3 Na kimkotah giahphual ka sat dinga;
tausang-in hong ki-umcihin
nang langah umcihna ka bawl ding hi.
4 Hong kiniamkhiatin, leitual panin na pau ding hi;
leivui lak pan na phun mualmual ding hi.
Lei sung pan sikha’ aw bangin ging khia dinga;
leivui lak pan hong huau siausiau ding hi.
5 Ahi hangin na gal tampite leivui tawh kibang dinga,
a kheltat honpite huihlet ansi leng a bang ding uh hi.
Thakhatin
6 Thahatpen TOPA
vanging, zinling le awging lianpi-in,
pingpei le huihpi le a hultum meikuangin hong pai vat ding hi.
7 Tua ciangin Ariel a do minam khempeuh mihon tampite,
amah le a mun muanhuai do-a
a umcihte zana mangmat bang,
zana mangmuh bang dinga -
8 gilkial khat in a mangin an ne napi
a khanlawh ciangin a gil a kiallai veve bang;
dangtak khat in a mangin tui dawn napi
a khanlawh ciangin gimsa-in khang lo a,
a dangtak a phattuam loh tawh kibang ding hi.
Zion Vum a do minam honpi khempeuh tua tawh kibang ding hi.
9 Kiphawngsak unla lamdang sa un,
na mit uh tun unla khua mu kei un;
zu dawn lopi-in zu kham unla,
zucil dawn lopi-in hoi un.
10 TOPA in hong ihsipsak zo a:
na mitte khakcipin (kamsangte);
na lu a tuncip zo hi (thumu kholte).
11 No adingin hih in mangmuhna bangmah hi lo a, laizial sunga kizialcip bang ahi hi. Tua hi a laisim thei mi khat tungah tua laizial pia-in ama kiangah, "Hehpihna-in hih sim dih in," ci lecin, "Kibelhcip hi, sim thei keng," ci-in hong dawng ding hi. 12 Ahikeh a sim thei lo mi khat laizial pia in, "Hih sim dih in," ci lecin, "Ka sim zia ding thei keng," ci-in hong dawng ding hi.
13 Topa in,
"Hih mite in a kam uh tawh kei hong nai uh a,
a muk un kei hong pahtawi uh hi;
ahi hangin a lungtang uh kei tawh kigamla hi.
Amaute in kei hong biakna uh
mihingte bb hilhsa ngeina-a kibawl hi lel hi.
14 Tua ahi ciangin hih mite
a lamdang sanga a lamdang zaw ka lak lai ding hi;
a pilte pilna ka mangthangsak dinga,
a teite teina ka mangsak ding hi," a ci hi.
15 A ngimna uh TOPA panin a thuk mahmahna ah
sel dingin pai uh a,
khuamial sungah na semin,
"Eite kua’n hong mu ding hiam? Eite kua’n hong thei ding hiam?" ci-a a ngaihsunte in gimna thuak ta hen.
16 Bel seekpa, a tungman banga ngaihsut bangin
nate na lumlet uh hi!
A kibawl penin a bawlpa kiangah,
"Ama bawlsa ka hi kei hi" ci in,
Beel in a seekpa tungah,
"Bangmah na thei kei hi," ci thei ding ahi hiam?
17 Hun tomno sungah Lebanon, lo leihoih suakin,
tua lo leihoih pen tulak tawh kibang hi lo hiam?
18 Tua ni ciangin bilngongte in laizial-a thute za ding uh a,
lungzinna le khuamialna ah
mittawte in a mu ding uh hi.
19 A kiniamkhiatte khatvei TOPA sungah lungnuam kik ding uh a;
a tasamte Israel-te Siangtho Pa sungah a lungnuam ding uh hi.
20 A kheltat mite mangthang ding uh a,
mi simmawhte kilang nawn loin
gitlohna mit a nei khempeuh -
21 mi mawhna zonga kammal khat tawh
zum sunga mi thangsiahte le
mawhpengte thutangna zuau teci panna tawh a lakkhiatsakte khempeuh kisusia mang ding hi.
22 Tua ahi ciangin Abraham tankhiapa TOPA in Jacob innkuante tungah:
"Jacob a maizum nawn kei ding hi;
amaute’ mai a daang nawn kei ding hi.
23 Amaute in ka khuta ka bawlsa
a tate uh amaute lakah a muh uh ciangin
ka min siangthosak ding uh a;
Jacob’ Siangtho Pa Sianthona kipsanin
Israel-te Pasian a kihta ding uh hi.
24 Lungsim vakzaute in theitel ta ding uh a;
mi phunhatte in a kihilhna sang thei ta ding uh hi," a ci hi.