Babylon Langah Genkholhna
13
1 Amoz tapa Isaiah in Babylon tawh kisai thusuak a muhna:2 Mualdawn kui ah dialkhai khat khai inla,
kongpi-ah uliante a lut nadingin
otsan-in
amaute khutvan un.
3 Ka misiangthote ka sawl khin hi;
ka thangpaihna a suahkhia dingin
ka gualzawhna nuam a sa -
ka galte ka sam khin hi.
4 Mualtunga mihon tampi gamlumna tawh
a kibang ngai dih un!
Ngai un, kumpi-gamte laka kikona
minamte kikaikhawm tawh kibang veh!
Thahatpen TOPA in gal sim dingin
galkap kaikhawm hi.
5 Vante mong pan -
gamlapi-a gamte panin
TOPA le ama thangpaihna galhiamte tawisa in
gambuppi susia dingin amaute hong kuan uh hi.
6 TOPA ni naita ahi manin kap vangvang un;
Thahatpen ca pana suksiatna hong tung ding hi.
7 Hih thu hangin khut khempeuh zaw dinga
mihing lungsim peuhmah tuisuak khin ding hi.
8 Lauthawngna in amaute man dinga,
lunggimna le a na valval in amaute mekcip ding hi;
amaute numei nausuahnat thuak a bang ding uh hi.
Lamdang sa-in khat le khat kisal gega ding uh a,
a mai uh a san lela ding hi.
9 En in, thangpai lua-a hehna tawh
leitung gamkhing suaksakin
a sunga om mawhneite a susia dingin TOPA ni -
a gilo ni hong tungta hi.
10 Vantunga aksite le amau vuklamte
a tang kei ding uh hi.
Nisuak kimlai kimialsak dinga
khapi zong a tang kei ding hi.
11 Leitung-a tatsiatna hang le
migilote mawhna hangin dan ka thuaksak khawm ding hi.
Mi kiphasakte’ ki-uatsakna beisakin,
mi gamhtatte kisaktheihna ka niamkhiat ding hi.
12 Keimah in kham citak sangin a ciimzaw,
Ophir kham sangin a citawmzaw in mihingte ka bawl ding hi.
13 Tua ahi ciangin Thahatpen TOPA thangpai a,
ka hehna a kuan ciangin
vante ka lingsak dinga
leitung a omna munah a kilok ding hi.
14 A kidelh sanang bang le
a cing om lo tuu bangin mite,
amau mipihte kiangah ciah kik ciat ding uh a,
amau pianna gam ciatah a tai ding uh hi.
15 A kiman peuhmah kidawtlet dinga,
a kikhutmat peuhmah namsau-in a puk ding uh hi.
16 A tangeekte uh amaute muhin kidengzan dinga;
a innte uh kiluhsakin a zite uh a kibuansak ding hi.
17 En un, amaute do dingin ngun a thudon lo,
kham a lungkimpih lo
Midia-te ka hanthawn ding hi.
18 A thalte un khangnote khatuk dinga;
naungeekte lainat loin naupangte
a khuatuah tuan kei ding uh hi.
19 Kumpi-gamte’ suangmanpha Babylon,
Babylon-te ab kisaktheihpih minthanna,
Sodom le Gomorrah bangin
Pasian in a lawnthal ding hi.
20 Ama sungah kiteng ngei nawn loin
khang tawntung kuamah a teng kei ding hi;
Arabia-te in tua lai-ah a puanbuk uh lam loin,
tua lai ah a tuu uh a khawlsak tuucing a om kei ding hi.
21 Ahi hangin sehnel gam ganhingte tua lai-ah lumin,
se-al in a bu a dimsak ding hi;
tua lai-ah simbute giakin
sathakte a diang ding uh hi.
22 Gam-uite a kua muanhuai sunguah kual ding uh a,
se-alte amau kumpi inn nuam sungah a kual ding uh hi.
Tuanu hun nai mahmah a,
ama nite a kisot nawn kei ding hi.