Jesse Pana Hiang
11
1 Jesse bulpi panin hiang khat selkhia dinga,a zungte lak pan a Hiang khat in gah a gah ding hi.
2 Ama tungah TOPA Kha om dinga-
pilna Kha le theihtelna Kha,
lamlahna Kha le vangliatna Kha,
theihna Kha le TOPA kihtakna Kha a tungah om dinga -
3 amah in TOPA kihtakna nuam a sa ding hi.
A mita a muhna bangin thu khen loin
a bila a zak bangin thu khen lo dinga;
4 ahi hangin a tasamte tungah thumaanin a thu uh khensakin
leitung mizawngte adingin thutangin thu a khensak ding hi.
A kama cianggolh-in leitung sat dinga;
a muk pana husanin migilote a that ding hi.
5 Thumaanna kawnggakin nei dinga,
muanhuaina dialpek a kawng kimkotah a vial ding hi.
6 Keivom le tuuno omkhawm dinga,
keel tawh gialbem lumkhawmin
bawngno le humpinelkai le kumkhat a pha ganhingte ca omkhawmin
naupangnote in tuate a makaih ding uh hi.
7 Bawngpi tawh vompi gamta dinga,
a note uh lumkhawmin,
humpinelkai in bawngtal bangin buhtu a ne ding hi.
8 Thangtom kua gei-ah naungeekte kimawl ding uh a,
naupangnote in ngan bute a sawk ding uh hi.
9 Tui in tuipi a tuam bangin
TOPA theihna leitung dim ding ahi manin
amaute in ka mual siangtho tungah
bangmah liamsak loin a susia kei ding uh hi.
10 Tua ni ciangin mite dialkhai bangin Jesse Zungpi ding dinga, minam khempeuh in amah beelin ama khawlna mun a minthang ding hi. 11 Tua ni ciangin Topa in Assyria pan, Egypt khanglam pan, Egypt db saklam pan, Cush ec pan, Elam pan, Babylonia fd pan Hamath pan, le tuipi tuikulhte panin a baanglaite a kinusia ama mite a ngah kik nadingin a nihveina a khut a zankhia ding hi.
12 Amah in minamte adingin dialkhai khat khai dinga,
Israel saltangte a kaikhawm ding hi;
amah in a kithehthang Judah mite
lei kiuli panin a kaikhawm ding hi.
13 Ephraim’ hazatna bei dinga
Judah’ galte ae kibeisakin;
Ephraim in Judah haza nawn loin
Judah in Ephraim a galbawl nawn kei ding hi.
14 Amaute in nitumna lam Philistia mualdungte ah duang lensuk ding uh a,
nisuahna lama om mite a lawk khawm ding uh hi.
Amaute in Edom le Moab tungah a khut uh nga ding uh a,
Ammon-te in a thu uh mang ding uh hi.
15 TOPA in Egypt tuipi-gek
kangsak ding hi;
Euphrates Gun bf tungah
huihsa tawh a khut a van ding hi.
Mite in khedapkaih tawh a kantan theih nadingun
lui sagih-in a khenkham ding hi.
16 Egypt pan Israel-te a paitoh lai-un a hih bangin
Assyria pana kinusia
a baanglaite adingin
lam lianpi a suak ding hi.