Naungek Khat Hong Suak
9
1 Ahi ta zongin lungdonna sunga a ommite adingin lungkiat nading a om kei hi. A beisa hunin amah in Zebulun gam le Naphtali gam, a niamkhiat hangin mailam hunah Jordan dunga om tuipi zuatna lampi gei-a Gentile-te tenna Galilee ah a pahtawi ding hi-2 Khuamial sunga lampai mite in,
khuavak lianpi a mu zo uh hi;
sihna aa liim guam sunga teng mite tungah
khuavak tang khin ta hi.
3 Tua minam na khangsaka,
a lungdamna uh na khangsak hi;
anlak cianga mite a lungdam bang le
van kisutte a kihawm cianga
a lungdam bangin
na mai-ah mite a lungdam uh hi.
4 Bang hang hiam cih leh Midian-te
a kizawh ni-a bangin
nangmah in amaute vangik puakna hakkol
le a liangko-ua kikham singzawl,
amaute a kinetniamna ciangkhut na nuaizansak hi.
5 Galkap hangte in gal sunga a zat uh khedapte le
sisan a bang niaunuau puansilh khempeuh
hal dingin kikoih dinga,
mei in a kicih ding hi.
6 Ahang in, eite tungah naungek khat hong suaka,
tapa khat hong kipia hi;
a liangko tungah ukna a tuang ding hi.
Tua hi-a, amah
Lamdang Thulakpa, bb Thahat Pasian,
Tawntung Pa, Lemna Kumpi, kici ding hi.
7 Ama ukna le kilemna khangin
bei hun a nei kei ding hi.
Amah in David tokhom luah dinga,
tua huna kipan a tawntungin
thumaan le thutang tawh
a gam phutin
a lenkip ding hi.
Thahatpen TOPA deihluatna in
hih thu a tangcingsak ding hi.
Israel Tunga TOPA’ Hehna
8 Topa in Jacob langah thukhat puak a,
tua thu Israel tungah a tu ding hi.
9 Mite khempeuh
Ephraim le Samaria a tengte khempeuh
kiphasak uh a,
amaute lungsim ah ki-uangsakin,
10 "Leisekte a kicip khit hangin
suangsuih tawh i lam ding hi;
thei-singte a puk khit hangin
tamtaakin i khek ding hi," a cite in a thei ding uh hi.
11 Ahi hangin TOPA in Rezin’ galte amau langkhatah thakhauhsakin
amau tungah a hahkatsak teitei hi.
12 Nisuahna pan Aram mite le nitumna pan Philistia-te
kamka-in Israel-te a nawmvalh uh hi.
Hihzahta hi khin napi a hehna dai tuan loin
a khut liik lai hi.
13 Ahi hangin amaute a satpa lam nga tuan lo uh a,
Thahatpen TOPA a zong tuan kei uh hi.
14 Tua ahi ciangin TOPA in ni khat sungin Israel pan a lu le a mei -
nisuh hiang le pumpengte a bantan khawm ding hi;
15 a upate le a zahtak baangte a lutang hi-a,
zuauthu a hilh kamsangte a mei ahi hi.
16 Hih mite a lamlakte un lam khialhpih uh a,
a mapite un a gammangsak uh hi.
17 Tua ahi ciangin khangnote tungah Topa lungkim lo dinga,
pa nei lote le meigongte a hehpih tuan kei ding hi;
ahang in, mi khempeuh in pasian nei loin gilo uh a,
kam khauh vive a pau uh hi.
Hizahta hi khin napi a hehna dai tuan loin
a khut liikto lailai hi.
18 Gitlohna mei bangin kuang takpi a,
lingte le thanglingte hultumin
tulak gam phapi lawh a,
tunglam ah meikhu lompi-in a kizial to hi.
19 Thahatpen TOPA thangpaihna hangin
leitung kangzul dinga
mite mei-a cih ding sing suakin
kuamah in a sanggampa a hawi kei ding hi.
20 A taklama omte a valh uh hangin
a gil uh kial lai-a,
a veilama omte a nek uh hangin
a kham zo kei uh hi.
Mite, amau suan-le-khakte ac-in a kivak ding uh hi.
21 Ephraim-in Manasseh kivak dinga,
Manasseh-in Ephraim a kivak ding hi;
amaute in Judah a langpan khawm ding uh hi.
Hizahta hi khin napi a hehna dai tuan loin a khut liikto lailai hi.