Tuite Tungah Anlum
11
1 Tuite tungah na anlum lawn lecinni tampi khit ciangin na mu kik na ding hi.
2 Leitungah bang siatna piang ding cih thei lo na hi manin
khen sagih khen giat dong suahin mi tungah pia in.
3 Meiite ah tui dim leh,
leitungah guah buasuk hi.
Singkung khat leilulam ahikeh leitawlam a puk nading munah puk a,
a pukna munah lumcip pah hi.
4 Huih nunzia a cing peuhmah in suan lo dinga;
meiikaizia a cing peuhmah in a at kei ding hi.
5 Huih paina lampi le
a nu sungah pumpi bangci kibawl aa cih na theih loh bangin
na khempeuh Bawlpa Pasian nasepna
na theitel kei ding hi.
6 Na Khaici zingsangin vawh in,
nitak in zong vawh inla na khutte zawsak in,
ahang in hih pen maw, hua pen maw,
a nih-in hoih tuak ding maw,
cih na thei kei hi.
Na Khangmoi Lai-in Hong Piangsak Pa Phawk In
7 Khuavak nuam a,
mit in ni a muh ciangin nuamsak hi.
8 Mihing khat a nuntak sung kum tampi ahi zongin
tuate khempeuh nuamtakin zang ta hen.
Ahi hangin amah in khuamial ni ding thei ta hen,
ahang in, tuate tampi pha ding hi.
Hong tung ding na peuhmah a mawknapi ahi hi.
9 Khangmoipa aw, na moi lai-in lungnuam inla,
na khangno hun sungin na lungsim nopsak bangin om in.
Na lungsim hong pina le
na mita na muh bang zui in;
ahi hangin Pasian in na khempeuh ah
thu hong khen ding ahilam thei in.
10 Tua ahitak ciangin na lunghimawhna beisak inla,
na pumpi adingin na lungkhamna paikhia in;
ahang in, khangmoina le kithatang-muanna a mawknapi ahi hi.