28
1 Migilote kuama delh lohin tai-a,mi thumaante ahileh humpinelkai bangin
kihtak a nei kei hi.
2 Gam khatah kilehdona a om ciangin gam-uk tampi a nei hi-a,
theihtelna le theihna nei mi khat ahileh gam khat a uk zo hi.
3 Mizawngte ba a nuainet gam-ukpa
ankungte a hawkmang guah tawh kibang hi.
4 Thukham a thusimlote in migilote pakta a,
thukham zuite’n ahileh amaute dal hi.
5 Mi tatsiate in thutang theitel lo uh a,
TOPA a zongte in ahileh a cingin theitel sinsen uh hi.
6 A lungsim kawi mihau khat sangin
kawkbaang lo-a gamta mizawng khat hoihzaw hi.
7 Thukham a zuipa thu theikak tapa hi-a,
ahi hangin anhaite tawh kithuahpa in,
a pa mindaisak hi.
8 Summet sangsak lua-a a hau totote,
a zawngte tungah a migi ding midang khat ading a kholsak ahi hi.
9 Thukham a za nuam lo peuhmah
a thungetna nangawn kihhuai hi.
10 Mi thutang khat gitlohna lam a zuisakpa
ama thang mah ah awk dinga,
kawkbaanna om lopa in ahileh gou hoih a ngah ding hi.
11 Mihaupa ama mitin pil kisa thei dinga,
ahi zongin thu theikak mizawngpa in amah a teltheih ding hi.
12 Mi thumaante a gualzawh ciangin kithalawp mahmah a;
migilote vang a liat ciangin mite bu uh hi.
13 A mawhnate a impa daupai lo a,
pulaaka a tawpsan peuhmah ahileh kilainat hi.
14 TOPA a kihta tawntung mi thupha ngah hi-a,
a lungtang khauhsakte ahileh a lungkham hi.
15 Mi cimawhte a uk migilo in
humpi hawk le vompi hang mi delh tawh kibang hi.
16 Thumaan lo-a gam ukpa thukhentel thei lo hi-a,
amaan lo-a ngah a mudah mi ahileh khansawt nuam a sa ding hi.
17 Tualthah khialhna hanga lunggim mi
a sih mateng taitai ding hi;
kuamah in huh kei hen.
18 Kawkbaang lo a nungtate kihonkhia dinga,
a lungsim kawi mi ahileh thakhatin puk ding hi.
19 Ama leitang a kho mi in an tampi nei dinga,
sunmang sansanpa zawng teitei ding hi.
20 A muanhuaite thupha tampi kipia dinga,
hauhpah a sawmte dan tuak loin a om kei ding hi.
21 Deihsak tuam neih hoih lo hi -
anlum them khat hang nangawnin mi khial thei hi.
22 A iiksiik mi a haupah nuam hi-a,
zawnna in a ngak lam a phawk kei hi.
23 Maitang phat mi sangin a taihilh mi
a nung ciangin kipaktazaw ding hi.
24 A nu ahikeh a pa neihsa suta,
"Khialhna hi kei," a cipa -
amah a siasakpa tawh kipawl ahi hi.
25 A huaiham mi in kiselna sosak hi;
TOPA a muang mi ahileh a daupai ding hi.
26 Amah le amah kimuangte mihai hi a,
pilna tawh kalsuan mi ahileh kisuaktasak ding hi.
27 Mizawngte tunga a piate bangmah tasam lo dinga,
amau a kimuhmawh-bawlte ahileh hamsia tampi khu ding hi.
28 Migilote vang a liat ciangin mite bu a,
migilote a manthan ciangin ahileh a thumaante khangto ding hi.