13
1 Tapa pil in a pa lamlahna thusim a,mi simmawhte in ahileh taihilhna a ngai kei uh hi.
2 Mihing in a muk gah pana na hoihte nopsakpih a,
mi muanhuai lote in ahileh ngongtatna bek nuam sa uh hi.
3 A kam a kem zote a nuntakna kem hi-a,
a mawk paute ahileh a kisia ding hi.
4 Thadah mi in lunggulh mahmah napi bangmah ngah lo a,
thanuamte deihna ahileh cingtakin kipia hi.
5 Thumaante in zuauthu mudah a,
migilo in ahileh maizumna le mindaina a tun hi.
6 Thumaanna in a citak mi cinga,
gitlohna in mimawhpa a lawnthal hi.
7 Mi khat zawng napi ahau kineih om a,
mi dang khat hau mahmah napi, a zawng kineih om hi.
8 Mi khat a hauhna in a nuntakna tankhia thei a,
mizawng khat in ahileh a kitawnna kam a za kei hi.
9 A thumaante’ khuavak tangpha a,
migilote’ meivak ahileh kisumit hi.
10 Kisaktheihna in kitotna bek piangsak a,
pilna ahileh mi ngaihsutpihna a sang thei mi sungah kimu hi.
11 A maan lo sum kiamkiam a,
tawmtawma kholte’ sum khangkhang hi.
12 A tungpak lo lametna in lungsim nasak a,
lunggulhna tangtunna ahileh nuntakna singkung ahi hi.
13 Lamlahna a simmawh mi in thuak dinga,
thupiakna a zahtak mi ahileh pahtakman kipia hi.
14 Mipilte hilhna in nuntakna tuikhuk hi-a,
sihna thang panin mi khat kipelhsak hi.
15 Theihtelna hoih in angvanna lawhtak a,
muanhuai lohna lampi ahileh haksa ca hi.
16 A kidawm thei mi peuhmah theihna tawh gamta a,
mihai in ahileh a haina pholak hi.
17 Migilo kamtaipa in buaina tuak a,
a muantak palai in damna a puak hi.
18 Sektatna a awlmawh lo mi tungah zawnna le maizumna tunga,
puahphat ding a thudon peuhmah kipahtawi hi.
19 Lunggulhna tangtutna in lungtaina hi-a,
mihaite in ahileh gitlohna kiheisan ding kih uh hi.
20 A pilte tawh kikhawlte pil a,
mihaite kithuahpihpa in natna thuak hi.
21 Kamsiatna in mimawhpa delh a,
daupaina ahileh a thumaante’ pahtakman ahi hi.
22 Mi hoihpa in a tate’ tate gouluah ding nusiat a,
mawhneipa hauhna ahileh a thumaan mi adingin kikhol hi.
23 Mizawngpa lo ah an tampi piang thei a,
ahi hangin thutan lohna in a siakmang hi.
24 Ciangduai a zang lo mi a tapa mudah hi-a,
a tapa a it mi in limtakin sek hi.
25 A thumaante in a lungkim zah ne a,
migilote ahileh gilkial uh hi.