27
1 Tuateh Job in a thugen zomlai-a:2 "Ka thutanna a nialpa Pasian,
kha khamveina hong ciamsak a Thahatpenpa’ a nuntakna lo in,
3 ka sungah nuntakna ka neih laisiah
Pasian huu ka nakin ka dik laisiah
4 ka muk in gitlohna a gen kei ding a,
ka leii in zuauthu a genkhia kei ding hi.
5 Note a maanin kong sang ngei kei ding a;
ka sih dongin ka cihtakna ka khah kei ding hi.
6 Ka thumaanna ka len cinten ding a, ka khah ngei kei ding hi;
ka lungsim in ka nuntak laisiah hong mawhsak kei ding hi.
7 "Ka galte migilote bang henla,
kei hong dote thutang lote bang uh hen!
8 Pasian in a nuntakna a laksak khit ciang,
amah a kikhenkhiat khit ciangin pasian nei lote adingin bang lametna om lai ahi hiam?
9 Lungdonna a tuah ciangin
a kikona Pasian in ngai ahi hiam?
10 Thahatpenpa’ kiangah nopsakna a mu ding hiam?
Hun khempeuh ah Pasian a sam ding hiam?
11 "Pasian vangliatna kong hilh ding hi;
Thahatpenpa lampi ka imkei ding hi.
12 Note in a vekin na mu khin uh hi.
Tua ahileh bang hangin khiatna nei lopi kampau na hi uh hiam?
13 "Hih lai-ah Pasian in migilote a piaktuam,
a ngongtatte in Thahatpenpa tung pana a luah uh a om hi.
14 A tate tam taleh amau lawhtak namsau ahi hi;
a suan a khakte in an khamkhop a nei kei ding uh hi.
15 A nungtasunte pulpi-in kivui dinga,
a meigongte un a kah kei ding uh hi.
16 Amah in ngunte leivui bangin a khol venvan a,
buan bangin puansilh a cian venvan hangin
17 a khol venvan teng thumaante in silh ding uh a,
mawhpengte in ama ngunte a hawm ding uh hi.
18 A inn lamte lungbu bangin,
bukkhel tawh kibang lel ding hi.
19 Amah a hausa-in luma a ban a zom nawn kei hi;
a mit hak kik a, na bei khinta hi.
20 Tuikhang bangin launa in amah tuamcip a,
zanin huihpi in a mutmang hi.
21 Nisuahna huih in amah puakhia a, a beimang hi;
a omna mun panin phiatkhiamang hi.
22 A vangliatna pan luhumsa in a tai kawmkawm mah
lainat loin amah munkhat a denna ding hi.
23 Tua in khut betsan in zahnuihsan dinga,
a omna mun pan a mutkhia ding hi.