Job
12
1 Tua ciangin Job in dawng a:2 "No mihingte le pilna a sihkhawm ding
lunghei neih huai lo hi.
3 Ahi zongin note aa zah lungsim ka nei hi;
note sangin ka niamzaw tuan kei hi.
Hihte khempeuh kuan thei lo ding sa na hi uh hiam?
4 Ka lawmte in kei hong nuihsan zongin,
Pasian ka ko a, ama’n hong dawng hi;
thumaan le paubaang lo hi napi kimawk nuihsat lailai!
5 Lunghimawhna a nei lo mite in a khe tala tukte tuah bangin
tuahsiatna a nuihsan uh hi.
6 Guta buluhte buk kinawngkaisak lo a,
Pasian a hehsakte’ buk kibitsak hi-
amaute in a pasiante uh a khutun aa tawi uh hi.
7 "Ahi hangin gamsate dong un, amaute in hong hilh ding uh hi;
ahikeh huihlak vasate dong un, amaute in hong gen ding uh hi.
8 ahikeh leitung hopih un, tua in hong hilh ding hi;
ahikeh tuipi sunga ngasate kigensak un.
9 Hihte khempeuh in, TOPA khut in
hihte a sepsa ahilam a thei lo om ding ahi hiam?
10 A nungta ganhing peuhmah nuntakna le
mihing khempeuh naksuk naktohna ama khut sungah om hi.
11 Leii in an a ciap bangin bil in
thu sittel hi lo ahi hiam?
12 Khanghamte lakah pilna kimu hi lo ahi hiam?
Sawtpi nuntakna in hong theitelsak hi lo ahi hiam?
13 "Pilna le vangliatna Pasian aa ahi hi;
thukuppihna le theihtelna ama aa ahi hi.
14 Ama phelkeksate kilam kik thei nawn lo a,
thonga a khiatsa mipa kikhahkhia thei lo hi.
15 Tui a khaktan ciangin guah haanga,
tuate a khah ciangin leitung a tuamcip hi.
16 Thahatna le gualzawhna ama aa hi a,
a kikhemte le a khempa ama aa hikhawm hi.
17 Thudotte hawkkhia-in pimanga,
thukhente a haisak hi.
18 Amah in kumpite khihna kolkhau phelkhia a,
amau kawngah dialkaih bb a tengsak hi.
19 Amah in siampite hawkkhia in pimanga,
a tengtulte a lawnthal hi.
20 Amah in thu kidong mi muanhuaite sipsak dide a,
upate thupilna a lakmangsak hi.
21 Amah in mi nampite mindaisak a,
a thahatte guallelsak hi.
22 Amah in khuamialna sunga thuthukte mukhia a,
niliap thukpi khuavak suaksak hi.
23 Amah in minamte liansak a, amaute a susia hi;
minamte khangsaka amaute a thehthang hi.
24 Leitung makaite ngaihsut theihna lakkhiatsak a,
lampi omlohna gamlak ah vakvaisak hi.
25 Mei lo in khuamial zawt uh a,
zukham bangin a hoisak dawidawi hi.