10
1 Ka nuntakna mahmah ka cimtak hi;tua ahi manin ka ututin ka phun dinga
ka lunggimna ka genkhia ding hi.
2 Pasian kiangah: Kei hong mawhpaih kei inla
nong mawhsakna hong gen in, ka ci ding hi.
3 Kei hong kinengniam a,
na bawlsate kisimmawhbawlin
migilote ngimna na maitaipih ciangin na lungkim ahi hiam?
4 Ci-le-sa mit nei na hi hiam?
Mihing muh bangin mu na hi hiam?
5 Na nite mihingte aa bang,
ahikeh na kumte mihingte aa bang ahi hiam?
6 Ka khialhnate zongin bang hangin
ka mawhna hong sulzuih na hi hiam?
7 Mawhna ka neih loh lam,
na khut panin hong honkhia zo kuamah a om loh lam, thei hi lo na hi hiam?
8 "Na khut in kei hong geelin nong bawl hi.
Tu-in kei hong susia zel ding na hi hiam?
9 Tungman bangin kei nong seek lam phawk in.
Tu-in leivui hong suaksak zel ding na hi hiam?
10 Nawitui bangin kei nong sungkhia a,
nawikhal bangin nong khalsak a,
11 vun le satakin nong tuam a,
guh le thagui-in hong khuituah hi lo na hi hiam?
12 Hong nungtasakin, migitna nong lak a,
nangma huaina sungah kei ka nungta hi.
13 "Ahi hangin hih in na lungsima na selsiah hi a,
hih pen na lungsim ahilam ka thei ta hi:
14 Ka mawh leh nong vil gige a,
ka mawhna dan pan nong pengsak kei ding hi.
15 Ka khialhkhak leh thuak mah ning!
Mawhpenga ka om nangawnin ka lu ka phong thei kei hi;
ahang in, ka mai zum lua a,
gim thuakna sungah aa ka kia hi.
16 Ka lu phongkaang pan leng humpinelkai bangin nong gem khiankhian a,
a kihtak huai na vangliatna nong tungsak hi.
17 Kei hong langpan ding teci thak nong puak a,
kei tungah na heh semsem hi.
Kei lamah na hatna a hualhualin hong tung hi.
18 "Bang hangin sul sung pan hong pusuakkhiasak peuhmah na hi hiam?
Kuama hong muh ma-in si leng ka ut hi.
19 Mihinga piang vet lo, ahikeh sul sung panin
han a zuanpah hizaw leng maw!
20 Ka hun tomno beikuan ta hi lo ahi hiam?
Tomno sung nuam ka sak theih nadingin kei kiang pan kihemkhia in.
21 Kuamah a kileh kik nawn lohna mun,
khuamial le niliap bb thukpi in a tuamcipna mun,
22 zan khuamial penpenna mun, niliap thukpi,
khuavak nangawn khuamial tawh a kibatna mun ka tun ma-in
tomvei sung ka lungnop nadingin kei hong nusia in," a ci hi.