Eliphaz
4
1 Tua ciangin Teman mi Eliphaz in dawng a:2 "Mi khatpeuh in hong hopih le ung na thuak ngap hiam?
Ahi zongin kua ki-ip zo mawk ding hiam?
3 Mi tampi na lamlahnate
khutkha bankhate na thakhauhsaknate ngaihsun dih in.
4 Na thugente in a muktute phong a,
khuk zawte na thakhauhsak hi.
5 Ahi zongin tu-in nang tungah gimna hong tunga, na lungkia hi;
tuate in nang hong su a, na lungmang hi.
6 Na biakna-mina pen, na ngaihmuanna,
na paubaan lohna, na lametna hi lo ding ahi hiam?
7 "Tu-in ngaihsun in: Mawhpeng kimlai kua sia ngei ahi hiam?
A thutang kimlai kua kisusia ngei hiam?
8 Gitlohna lo-a khote le buaina a vawhte in
tuate mah a at lam ka thei hi.
9 Pasian husan-in amaute kisia uh hi.
A hehna mutin a mangthang uh hi.
10 Humpinelkaite thamvakin hawk thei ta leh,
humpinelkai lianpite ha zong kitan zo hi.
11 Sa mat ding nei loin humpinelkaite mangthang a,
humpinelkai note a kithehthang uh hi.
12 "Kei tungah thu khat hong kitun sim a,
tua hong kihuau ka bilin ka za hi.
13 ‘Zankim laitak, mite ihsip hunin
lungsim patauhna mangte manin,
14 launa le linna in kei hong mancip-a,
ka guh khempeuh a lingsak hi.
15 Kha khat in ka mai hong mut hiauhiau a,
ka khuasik mul suak hi.
16 Tawpta napi,
bang hiam ka gen thei kei hi.
Milim bang khat ka mai-ah hong dinga,
hong huau khiankhian aw khat ka za hi.
17 Pasian sangin mihing thumaanzaw thei ding ahi hiam?
Mi khat amah Bawlpa sangin siangzaw thei ding ahi hiam?
18 Pasian in a nasemte muang lo a,
a vansawltakte mawhsak ahileh,
19 buan inn sunga tengte
leivui laka khuambul phutte
nget nek sanga siazaw a bawlte nak mawhsak zaw lo ding ahi hiam?
20 Phalvak le khuamui kikalin amaute kitamzan uh hi;
a kiphawkkha loin mangthang suak uh hi,
21 Amaute pilna lo tawh a sih nadingun
a puanbuk khau uh kikai to hi lo ahi hiam?’ aa hong ci hi.