Joash in Biakinnpi Puah
24
1 Joash kumpi a suahin kum sagih pha a, Jerusalem ah kum sawmli sung a uk hi. A nu min Zibiah hi; amah Beersheba pan ahi hi. 2 Siampi Jehoiada a nuntak sung teng Joash in TOPA muhna ah amaanin na a sem hi. 3 Jehoiada in ama ading zi nih teelsak a, tanute tapate a nei hi.4 Hun tomvei khit ciangin Joash in TOPA biakinnpi a ngei batsak kik dingin a khentat hi. 5 Amah in siampite le Levi-te samkhawm a, amaute kiangah, "Judah khuapite ah pai unla Pasian biakinnpi puah nadingin Israel khempeuh tungah sum kaikhawm un. Tu mahmah in hih pah un," a ci hi. Ahi hangin Levi-te in a hih pah kei uh hi.
6 Tua ahi ciangin kumpipa in siampi ukpa Jehoiada samin ama kiangah, "Bang hangin TOPA nasem Moses in Tecipanna Puanbuk adingin a kikhawm Israel mipite tung panin siah kikhon, Judah le Jerusalem-te tung pan Levi-te ngensak lo na hi hiam?" a ci hi.
7 Tu-in tua migilonu Athaliah tapate in Pasian biakinnpi tokhamin a siangtho nate nangawn Baal-te adingin a zang zo uh hi.
8 Kumpipa thupiakna tawh singkuang khat kibawlin TOPA biakinnpi kongpi pualam ah a kikoih hi. 9 Tua ciangin Pasian nasempa Moses in sehnel-gam sungah a om lai-un Israel-te tunga a ngetsa siah TOPA tungah a puak nadingun Judah le Jerusalem sungah tangkona khat a bawl uh hi. 10 Uliante khempeuh le mipite khempeuh in amau sik ding zah lungkimtakin puak uh a, singkuang a dim mateng tua sungah a khia uh hi. 11 Levi-te in kumpi uliante kiangah singkuang a paipih simun sum tampipi a om lam mu uh a, kumpi thuvanpipa le siampi ukpa zum nasempa va pai-in singkuang teikhia uh a, a munah a puak kik uh hi. Amaute in a hun maanin sem uh a, sum tampitak a khawm uh hi. 12 Kumpipa le Jehoiada in TOPA biakinnpi a nasemte a kisapna bangun a pia hi. TOPA biakinnpi a ngei a bangsak dingin suang ciangte le khutsiamte cial uh a, biakinnpi puah dingin sik le sumngo semte zong a cial uh hi.
13 Nasepna uk mite ngentel uh a, a nasemte in a telh mahmah uh hi. Amaute in Pasian Biakinnpi a tunga bangin lam kik uh a, a kipsak kik uh hi. 14 Amaute in a zawh uh ciangin a sum vallai teng kumpipa le Jehoiada tungah puak uh a, tuate tawh TOPA biakinnpi vanzatte: nasep nading vante, meihal biakna-a zat dingte le sikkeu liangsaute le ngun le khama kibawl vanzatte a bawl uh hi. Jehoiada a nuntak sungteng TOPA biakinnpi ah meihal biakna a kizom denin kipia hi.
15 Tu-in Jehoiada tek ta in a kum zong kicing ta-a kum za le sawmthum a phakin a si hi. 16 Amah in Israel sungah Pasian le a biakinnpi adingin na hoih sem ahi manin David Khuapi sungah kumpite tawh kivui khawm hi.
Joash Gitlohna
17 Jehoiada a sih khit ciangin Judah uliante va pai-in kumpipa tungah tokaina pia uh a, amah in amaute thu a ngai hi. 18 Amaute in TOPA a pate uh Pasian biakinnpi nusia uh a, Asherah khuamte le milimte a bia uh hi. Amaute khialhna hangin Judah le Jerusalem tungah Pasian hehna a tung hi. 19 TOPA in ama kiang a tun kik dingin in kamsangte sawlin amaute langah teci a pan uh hangin a ngai nuam kei uh hi.
20 Tua ciangin siampi Jehoiada tapa Zechariah tungah Pasian Kha a tung hi. Amah mite mai-ah dingin, "Hih in Pasian gen ahi hi: ‘Bang hangin TOPA thupiakte mang lo na hi uh hiam? Na mavang kei ding uh hi. TOPA nusia na hi manun amah in no hong nusia hi,’" a ci hi.
21 Ahi hangin amaute in amah sawmsim uh a, kumpipa thupiakna tawh TOPA biakinnpi tual ah suangin a denglum uh hi. 22 Kumpi Joash in Zechariah pa Jehoiada in ama tungah a migitna a lah phawk nawn lo ahi manin a tapa thahsak a, a sih ding ciangin, "TOPA in hih mu henla nang tungah thukhen ta hen," a ci hi.
23 Tua kum aa a bei ciangin, Joash sim dingin Aram galkapte a kuan uh hi; Judah le Jerusalem luh uh a, mipite makaite khempeuh a that uh hi. Amaute in a vanlakte uh Damascus a, a kumpipa uh tungah a khak uh hi. 24 Aram galkapte mi tawmkha bek a kuan uh hangin TOPA in galkap a tamzaw thamte amau khut sungah a pia hi. Judah in TOPA a pate uh Pasian a taisanna hangin Joash tungah thukhenna a tung hi. 25 Aram-te a nung kik uh ciangin nasiataka liamsa in Joash a nusia uh hi. Ama uliante in siampi Jehoiada tapa a thahna hangin sawmsim uh a, a lupna tungah amah a that uh hi. Tuaci-in amah si-a David Khuapi ah a kivui hangin kumpite han sung hi lo hi.
26 Amah a sawmsimte Ammon numei khat Shimeath tapa Zabad le Moab-te numei khat Shimrith bb tapa Jehozabad cc ahi uh hi. 27 Ama tapate thute, ama thu a kigenkholhna tampite, le Pasian biakinnpi a ngei a batsakna ciamtehna, kumpite khangthu ciamtehna sungah kigelh hi. Tuateh a tapa Amaziah in a kumpi za luah a kumpi a suak hi.