21
1 Tua ciangin Jehoshaphat a pate tawh tawlnga a, David Khuapi sungah amaute tawh a kivui hi. Tuateh a tapa Jehoram in a kumpi za a luah hi. 2 Jehoshaphat tapa Jehoram sanggamte, Azariah, Jehiel, Zechariah, Azariahu, Michael le Shephatiah ahi uh hi. Hihte khempeuh Israel fa kumpi Jehoshaphat tapate ahi hi. 3 A pa un amaute ngun le kham le van manpha tampi tawh Judah gama kulh a ki-um khuapite piakhawm a, ahi hangin a kumpi gam Jehoram a pia hi, bang hang hiam cih leh amah a tapa upa pen ahi hi.Judah Kumpipa Jehoram
4 A pa kumpi-gam ah khotakin Jehoram a kikipsak khit ciangin a sanggamte khempeuh le Israel uliante pawlkhat namsau-in a that hi. 5 Jehoram kumpi a suahin kum sawmthum le nih pha a Jerusalem ah kum giat a uk hi. 6 Amah in Ahab tanu tenpih ahi manin Ahab innkuan bangin Israel kumpite lampite a zui hi. TOPA muhna ah amah a sia-in a gamta hi. 7 Ahi ta zongin TOPA in David tawh thukhun a neihna hangin TOPA in David innkuan a siatsak ding a ut kei hi. Amah in David le ama suante neih den dingin meivak khat a piak ding a ciamsa ahi hi.
8 Jehoram hun sungin Edom in Judah lehdo a, ama kumpi tuam a phut hi. 9 Tua ciangin Jehoram a uliante le a sakolleng khempeuh tawh tua lai-ah a pai hi. Edom-te in amah le a sakolleng ukte umcih uh a, ahi hangin amah kuanto-a zanin a phulet zo hi. 10 Tuni dong Edom in Judah a lehdo hi.
Jehoram in TOPA a pate Pasian nusia ahi manin tua hun mah in Libnah in a lehdo hi. 11 Amah in Judah mualtungte ah munsang zong bawl a, Jerusalem a mite amau le amau kizuaksakin Judah lam a khialsak hi.
12 Jehoram in kamsangpa Elijah kiang panin laikhak khat ngah a tua sungah:
"TOPA na pa David Pasian gen ahi hi: ‘Nang in na pa Jehoshaphat ahikeh Judah kumpi Asa lampi na zui kei hi. 13 Ahi hangin Israel kumpite lampi na zui-a, Ahab innkuante hih bang tektekin Judah-te le Jerusalem a mite amau le amau na kizuaksak hi. Nang in nang sanga hoihzaw na pa innkuan sung mi nangma sanggam pasalte zong na that hi. 14 Tua ahi ciangin tu-in TOPA in na mite, na tapate, na zite le nangma neihsa na peuhmah khauhtakin hong sat ding hi. 15 Nang mahmah gilsung natna-in sawtveipi na ci na dinga na natna in na ngoi a tolhkhiasak ding hi,’" a ci hi.
16 TOPA in Cush-te kianga teng Arab-te le Philistia-te Jehoram tawh a kigalneihsak hi. 17 Amaute in Judah sim uh a luhgawpin kumpi inn sunga a muh uh vante khempeuh le a tapate le a zite tawh a puakhia uh hi. A tapa moi pen Ahaziah ab longal tapa khat beek a nusia kei uh hi.
18 Hihte khempeuh khit ciangin TOPA in a kidamsak thei lo gilpi natna tawh Jehoram a hingimsak hi. 19 A hun a cin ciang a kum nihna ciangin a natna hangin a ngoi tolhkhia a, na sa lua mahmah in a si hi. A mite in a pa tungtanga a hih uh bangin pahtawina meiphual a cih kei uh hi.
20 Jehoram kumpi a suahin kum sawmthum le nih pha a, Jeruslaem ah kumgiat sung a uk hi. Kuama hehpih lohin amah beimanga David khuapi sungah kivui napi kumpite han ah a kivui kei hi.