Israel in Rehoboam Lehdo
12
1 Shechem ah amah kumpi suaksak dingin Israel khempeuh pai zo uh ahi manin Rehoboam a pai hi. 2 Nebat tapa Jeroboam in hih thu a zak ciangin (amah Kumpi Solomon kiang pana tai-in Egypt a om lai ahi hi.) Egypt panin aa a ciah kik hi. 3 Tua ciangin amaute in Jeroboam vaikhak in, amah le a kikhawm Israel buppi Rehoboam kiangah pai uh a: 4 "Na pa in hakkol gik kote hong suan hi. Ahi zongin tu-in a haksa nasepte le hakkol gikpi hong suatte na zansak leh na na ka sem ding uh hi," a ci uh hi.5 Rehoboam in, "Ni thum sung na kihemkhia phot unla tua ciangin hong pai kik un," ci-in a dawng hi. Tua ciangin mipite a paikhia uh hi.
6 Tua khit ciangin Kumpi Rehoboam in a pa Solomon a nuntak lai-a a nasem upate thu a kuppih hi. Amah in, "Hih mite ka dawn nading bang hong ci ngaihsutpih na hi uh hiam?" a ci hi.
7 Amaute in, "Tuni-in hih mite nasem suakin, a na uh sema amau lungkimna bangin na dawn leh amaute na nasem hi den ding uh hi," ci-in a dawng uh hi.
8 Ahi hangin Rehoboam in tua upate piak ngaihsutna nial a, ama nasem amah tawh a khangkhawm khangnote thu a kuppih hi. 9 Amah in amaute kiangah, "Bang na ci ngaihsut uh hiam? Kei kiangah, ‘Na pa hong suat hakkol zangsak in,’ hong ci mipi tungah bangci dawn ding i hi hiam?" a ci hi.
10 Ama khanpih khangnote in, "Nang kiangah, ‘Na pa in kote hakkol gik hong suan hi, ahi hangin ka hakkol uh zangsak in,’ hong ci hih mite tungah - ‘Ka pa kawng sangin ka khutmeno lianzaw hi. 11 Ka pa in hakkol gik note hong suan hi; Ke’n ka giksak zaw lai ding hi. Ka pa in note khauteep tawh hong sat hi; ke’n note aikamte tawh kong sat ding hi,’ ci in," a ci uh hi.
12 Tua zawh ni thum ciangin kumpipa in, "Ni thum ciangin hong pai kik un," a cih bangin Jeroboam le mite khempeuh Rehoboam kiangah a pai kik uh hi. 13 Kumpipa in mipite khauhtakin a dawng hi. Upate ngaihsutpiakna nialin, 14 khangnote ngaihsutpiakna zui a, "Ka pa in na hakkol uh giksak hi; ke’n ka giksak zaw lai ding hi. Ka pa in khauteep tawh hong sat hi; ke’n aikam tawh kong sat ding hi," a ci hi. 15 Tua bangin kumpipa in mipite thu a ngai kei hi; ahang in, hih thute a kiheina TOPA kiang pan ahi hi; TOPA in Shilon-te Ahijah tungtawna Nebat tapa Jeroboam tungah a gensa thu a tangtun nading ahi hi.
16 Kumpipa in amaute thu ngaih ding a nialna a theih uh ciangin Israel khempeuh in kumpipa kiangah:
"David ah ko tanh bang nei a,
Jesse tapa ah bang kihelna nei ka hi uh hiam?
Israel aw, na puanbuk uah ciah uau!
David aw, na inn nangmah’n cing ou!" ci-in a dawng uh hi.
Tua ciangin Israel-te a inn uah a ciah uh hi. 17 Ahi hangin Judah khuapite sunga teng Israel-te ahileh Rehoboam mah in a uk lai hi.
18 Kumpi Rehoboam in aana a nasemte ukpa Adoniram bb a sawl hangin Israel khempeuh in amah suangin a denglum uh hi. Ahi zongin Kumpi Rehoboam a sakolleng tungah tuangin Jerusalem ah a suakta liailiai hi. 19 Tua hangin Israel in tuni dong David innkuan a lehdo uh hi.
20 Israel-te khempeuh in Jeroboam tun kik a zak uh ciangin mi sawlin mipi kikhopna ah amah samsak uh a Israel khempeuh adingin kumpi a suaksak uh hi. David innkuan tungah Judah behbek a citak hi.
21 Jerusalem ah Rehoboam a tun ciangin Solomon tapa Rehoboam in a kumpi-gam a ngah kik theih nadingin Israel innkuante sim dingin Judah innkuan bup le Benjamin beh pan - galdo thei mi tul za le tul sawmgiat a kaikhawm hi.
22 Ahi hangin Pasian mipa Shemaiah tungah hih Pasian thu tung a: 23 "Judah kumpipa Solomon tapa Rehoboam tung, Judah le Benjamin innkuan bup le a om lai mi khempeuh tungah, 24 "TOPA gen hih ahi hi: Na sanggamte uh Israel-te sim dingin kuanto kei un. Hih in kei ma sep ahi hi; note inn ciatah ciah un, ci hi,’ a ci hi. Tua ciangin amaute in TOPA thu mang uh a, TOPA thupiak bangin inn ah a ciah kik uh hi.
Bethel le Dan ah Kham Bawngno
25 Tua ciangin Jeroboam in Ephraim mualtung gama Shechem kulhin um a, tua lai-ah a teng hi. Tua panin amah paikhia a, Peniel cc a lam hi.
26 Jeroboam in a lungsimin, "Tu-in kumpi-gam David innkuante tungah kihei kik leh kilawm hi. 27 Hih mite Jerusalem a TOPA biakinnpi ah biakna pia dingin a paitoh uh leh a topa uh, Judah kumpipa Rehoboam lamah a kihei kik ding uh hi. Amaute in kei hong thatin Kumpi Rehoboam lamah a ciah kik ding uh hi," ci-in a ngaihsun hi.
28 Ngaihsutna a dot kawikawi khit ciangin kumpipa in kham bawngno nih a bawl hi. Amah in mite tungah, "No adingin Jerusalema paitoh haksa lua mahmah hi. Israel aw, Egypt pana hong paikhiatpih to na pasiante uh hih lai-ah om hi," a ci hi. 29 Amah in khat Bethel ah koihin adang khat pen Dan ah koih hi. 30 Tua hi a, hih na pen mawhna suakin; mite tua na bia dingin Dan ciang dong nangawn ah a pai uh hi.
31 Jeroboam in munsang tungte ah biakbuknote lamin, mi peuhpeuh Levi mi a hilote nangawn siampi in a koih hi. 32 Amah in a kha giatna a ni sawm le ngana ni-in Judah a kibawl pawi tawh a kibang khat phuantawm a, biakna-tau tungah biakpiakna a pia hi. Hih pen Bethel a, a bawl hi-a, ama bawlsa bawngnote tunga a piak ahi hi. Tuateh Bethel a ama bawlsa munsangte ah siampite a koih hi. 33 Ama deihtel kha ahi a kha giatna a ni sawm le ngana ni-in Bethel a ama dawhsa biakna-tau tungah biaknate a pia hi. Tua bangin Israel-te adingin pawi phuantawma, biaknate pia dingin biakna-tau ah a paito uh hi.