Philistia-te Lakah David
27
1 Ahi hangin David in ni khat ni ciangin Saul khutlumin ka sia kha thei ding hi. Kei hih theih a hoih penpen, Philistia-te gamah pai-a ka suahtak ding ahi hi. Tua hileh Israel gam sungah Saul in hong zong nawn lo dinga, a khut pana kitolkhia ka suak ding hi," ci-in a kingaihsun hi.2 Tua ciangin David le a ompih mi zagukte paikhia uh a, Gath kumpipa Maoch’ tapa Achish kiang a tung uh hi. 3 David le a mite Gath ah Achish tawh a tengkhawm uh hi. Amite amau zi ciat tawh teng uh a, David in a zite gel: Jezreel a Ahinoam le Carmel-a Nabal meigongnu Abigail a nei hi. 4 Gath ah David a taina Saul tungah a kikoh ciangin amah a zong nawn kei hi.
5 Tua ciangin David in Achish kiangah, "Nong angvan zawh leh gamsung khuate khatah ka ten nadingin mun khat hong sehsak in. Bang hangin na nasempa nang tawh kumpi khuapi ah tengkhawm ding ahi hiam?" a ci hi.
6 Tua ciangin tua ni mah in Achish in Ziklag pia-a, tua-a kipan Judah kumpite neih ahi den hi. 7 Philistia-te gam sungah David kum khat le kha li a teng hi.
8 Tu-in David le a mite kuanto uh a, Geshur-te, Girz-te le Amalek-te a sim uh hi. (Tanglai pekin hih mite Shur le Egypt gam dongah a teng uh hi.) 9 David in gamhuam khat a sim nak leh numei pasal a hingin nusia lo a, ahi hangin tuu, bawng, laa le kalaoh le puante a la hi. Tua ciangin Achish kiangah a ciah hi.
10 Achish in, "Tuni-in kua va sim na hiam?" ci-a a dot ciangin David in, "Judah-te Negev gam, a cih kei leh Jerahmeel-te Negev gam a cih kei leh Ken-te Negev gam," a ci hi. 11 Amah in numei ahi a pasal ahi zongin a hingin Gath ah a tunpih kei hi. Ahang in, "Kote thu amaute in ko in, ‘Hih in David hih ahi hi,’ ci kha ding uh hi," ci-in a ngaihsun hi. Philistia-te gam sungah a ten lai teng tua bangin a hih hi. 12 Achish in David muanga," A mipih Israel-te in amah mudah uh ahi manin amah a tawntungin ka nasem a suak ding hi," ci-in a ngaihsun hi.