Israel ah Singkuangpi Kipuakkik
6
1 Philistia-te gam sungah TOPA singkuangpi kha sagih sung a om ciangin 2 Philistia-te in siampite le aisante sam uh a, "TOPA singkuangpi bang cih ding ka hi uh hiam? a omna ngei-a ka puak nading zia uh hong gen un," a ci uh hi.3 Amaute in, "Israel’ pasian singkuangpi na puak kik uh leh a hawm guakin puak kei un; khialhna hanga biakna ama tungah khak tektek un. Tua ciangin na ci uh dam dinga, note tungah a khut a liik nawn loh lam na thei ding uh hi," ci-in a dawng uh hi.
4 Philistia-te in, "Ama tungah bang khialhna hanga biakna khak ding ka uh hiam?" ci-in a dong uh hi.
Amaute in, "Note le na upate un a kibangin gimna thuakna hi manun Philistia-te upate a phazah tawh kizui-in kham meimatum nga le kham zusa nga khak un. 5 Na gam sung uh a susia zusa le meimatum lim bawl unla, Israel’ pasian pahtawina-in bawl un. Amah in note le na pasiante uh le note gam tungah a khut liik nawn lo kha ding hi. 6 Bang hangin Pharaoh le Egyp-te bangin na lungsim uh khauhsak na hi uh hiam? Amah ba in amaute khauhtaka a gawt ciangin amaute pai nading ah amaute in Israel-te paisak uh hi lo ahi hiam?
7 Tua ahi ciangin tu-in, kol a kisuan nai lo bawngpi no nei nih leng thak khat bawlsa in koih un. Tua bawngpite lengah vawh unla, a note kaikhia-in mun khatah khumcip un. 8 TOPA singkuangpi la unla lengtungah suanin khialhna hanga biakna na khakkik uh khama kibawl nate a gei-ah singkuangto khat sungah koih un. A pai nading lamah paisak unla 9 ahi hangin cing un. Tua in ama gam lam a manawh a, Beth Shemesh lam a zuat leh ei tunga gimna lianpi hong tungsak TOPA ahi hi. Ahi hangin a zuat kei leh ama khut a thuak i hi lohlam i thei dinga a hun tungin ei tungah hong tung lel hi ding hi," ci-in a dawng uh hi.
10 Amaute in tua bangin a hih uh hi. Amaute in tua bang bawngpi nih kai uh a leng ah vawhin a note a khumcip uh hi. 11 Amaute in TOPA singkuangpi leng tungah koih uh a, kham zusa lim le meimatum limte guanna singkuangto zong a gei-ah a koih uh hi. 12 Tua ciangin bawngpite Beth Shemesh lam manawhin tangtakin pai uh a, lam khial het loin lam tawntungah a hamham uh hi; veilam ahi-a taklam ahi zongin a pial kei uh hi. Philistia upate in Beth Shemesh gamgi dong a zui uh hi.
13 Tua hun laitak, Beth Shemesh mite in kuam sungah mangbuh a lak laitak uh ahi hi. A ettoh uh ciangin singkuangpi mu uh a tua a muhna uh hangin a lungdam mahmah uh hi. 14 Tua bawngleng Beth Shemesh a Joshua lo ah pai-a, suangpi pang khatah a khawl hi. Mite in a leng singte eknenin TOPA tungah meihal biakna-in bawngpite a pia uh hi. 15 Levi-te in TOPA singkuangpi le khama a kibawl nate kikoihna sing-kuangto sangkhia uh a, tua suangpi lian tungah a nga uh hi. Tua ni mah in Beth Shemesh mite in TOPA tungah meihal biakna le biakpiaknate a pia uh hi. 16 Philistia upa ngate in hihte khempeuh mu uh a, tua ni mahin Ekron ah a ciah kik uh hi.
17 Philistia-te in khialhna hanga biakna-in TOPA a khak uh kham meimatumte - Ashdod, Gaza, Ashkelon, Gath le Ekron - te khat ciat aitang ahi hi. 18 Tuateh kham zusa a phazah ahileh upa nga tawh kisai khuapi - kulha ki-um khuapite le a khuaneute a phazah tawh kizui ahi hi. Beth Shemesh mi Joshua lo a TOPA singkuangpi kitunna suang lianpi cb -tuni dongin teci ahi hi.
19 Ahi hangin Beth Shemesh mite pawlkhat in TOPA singkuangpi sung en uh ahi manin Pasian in amaute lakah sawm sagih dc a that hi. TOPA in amaute nak thuaksak lua ahi manin mite thum uh a, 20 Beth Shemesh mite in, "Hih a siangtho Pasian, TOPA omna ah kua om zo ding ahi hiam? Hih mun panin kua in puakto ding ahi hiam?" ci-in a dong uh hi.
21 Tua ciangin amaute in Kiriath Jearim mite kiangah kamtai sawl uh a, "Philistia-te in TOPA’ singkuangpi hong puak kik uh hi. Hong paisuk unla no omna ah lato un," a cisak uh hi.