Olwaandiko lwa kásatu lwa
Yohana
Enyaángalucha
1
1 Iinye omunyaampala we ekelezia, niinkwaandikila iiwe Gayo engoonzi yaanze. Mazima nkweénda.2 Óobu, mudugu wáanze, niinsaba nka nikwo obonese omu bigaambo byóona no kuzila enziingo zaawe nzima nkokwo omwooyo gwaawe ku guteekanisizwe. 3 Nkanulilwa bwooli, obuchilo abeekiliza badugu béetu bunaanka óobu bakéeza áaha no kuunnyatulila habwa amazima gaawe nka nikwo iiwe nozeendelela buchiile omukweékomya amazima. 4 Tihaliho chiintu echilikuunnuliza kusaaga okuhuliza nka nikwo abaana baanze nibazeendelela kutuula omumazima.
Obweésigwa Bwa Gayo
5 Owe engoonzi záanze, iiwe oli omweésigwa habwa áago go olikubakolela abeekiliza badugu béetu, noolu boónyini bali abazenyi hali iiwe. 6 Bazeenzi béetu áabo bakakwaátula ha abaantu be ekelezia ya áaha habwe engoonzi záawe. Niinkusaba, ozeendelele kubahweela omuluzeendo lwa akazeendele áako akalikumunuliza Múungu. 7 Kuba bakabaanza oluzeendo lwaabo lwo kumuheéleza Yeézu Kristu batéena kwiinaankula choóna chóona echo kubazuna kuluga aha baantu abatakwiikiliza Múungu. 8 Mbweenu, íichwe nitweendelwa tubahweele abaantu nka áabo. Habwo kukola tútyo, nitubona kukoba nabo omu milimo habwa amazima.
Diotireefe
9 Nkaandikila ebigaambo bíche ekelezia yáabo Diotireefe, náho weényini Diotireefe ogwo ayeénda kuba omwiíbeembezi wáabo, naayaanga kwiikililizana no obuzizi bwéetu. 10 Habwéecho, obuchilo ndeeza óokwo, ndaábita habweelu ebikolwa éebyo, amagaambo mábi ago alikutugaamba ne ebisuba éebyo alikutubeéheleza íichwe habwa amagaambo go obuzilwa. Tibyo éebyo byoónka, kaandi naayaánga kwaángisa abeekiliza badugu béetu áabo bali omu luzeendo. Na abaantu áabo abalikweenda kubanyegeza, weényini nabaangila no kubabiinga baluge omu kelezia.
Demetiriusi
11 Óobu Gayo, engaanzi yaanze, otaákutoólela entuungwa ezili mbi, náho éezo ezili nzima. Buli ogwo alikukola ebizima, óogwo no omuuntu wa Múungu. Náho ogwo alikukola amabi, óogwo takumusoombookelwa Múungu.
12 Buli muuntu akaátula nka nikwo Demetiriusi no omuuntu omweésigwa, bityo na áago mazima goómwe nigeekililizana náze. Ne echwe nitwaatula tútyo, neewe noomanya nka nikwo okwaátula kwéetu no kwa amazima.
Ebigaambo Byo Kulaga
13 Nyina amagaambo meenzi go kukugaambila, náho tiínkweenda kugaándika áago góona kwe ekalamu no obwiino. 14 Niintegeza nka nikwo zúba zuba óobu niinyiza kukuyeélela no kuhooya neewe butúnu.
15 Obuhóolo bube hamo neewe. Banywáani baawe nibakwaangalucha. Neewe, obanyaángaluchize banywáani béetu abo óokwo, buli oómo omwi izíina.