Ɨnzoka jiluma ɨkɨvoko kya Paulo kʉ Malita
28
1 Wʉ tʉsiike vʉnonu kʉ kɨlʉnga ɨkɨlɨ pagati pa nyanza,
pwʉ tʉkavʉʉlwa ʉkʉta ɨlitaawa lya kyene kyatambʉlwagwa Malita.
2 Avenekɨlʉnga va palya vakatwambɨlɨla vʉnonu siitso,
nʉpwʉ jɨngave navaatʉmanye.
Vakatʉkotsehetsa ʉmwoto,
pakʉta twɨ vooni twotage,
ʉlwakʉva kwale kʉtsitsimu,
ikange ɨsula jyatimile.
3 ɄPaulo akaholelela inyagala ndebe.
Wʉ ivɨɨka mu mwoto,
ɨnzoka jɨkahʉma mu nyagala itso pakʉva paale masuke ga mwoto,
jɨkaluma nʉ kwʉmɨɨlɨla pa kɨvoko kya Paulo.
4 Avenekɨlʉnga va palya,
wʉ vaweene ʉkʉta ɨnzoka jɨlya jilembeela mu kɨvoko kya Paulo,
vakɨtsosanza vakata,
“Jivoneka jɨlweli ʉkʉta ʉmuunu ʉjʉ vɨ mʼbudi!
Nʉpwʉ jɨngave aponile mu nyanza,
ʉngʉlʉve viitu ‘ʉNʼgolosu’a namwɨdiiki ʉkʉta atsige mwʉmi.”
5 ɄPaulo akakungʼuunila ɨnzoka jɨlya mu mwoto,
ʉmwene akatsiga inʼgʉge.
6 Avaanu valya valɨkʉndola ʉPaulo,
valɨkʉhʉʉvɨla ʉkʉta jiisimba evo jiidimadimaga paasi nʉ kʉswa.
Vakamala ʉnsɨkɨ ntale vipilola ʉmwʉ jʉtsiveela.
Wʉ vaweene ʉkʉta nakɨhʉmɨla ɨkɨveetsaga,
vakaandʉka amasaago ga veene.
Vakatengʉla ʉkʉta ʉjwa namwene inninie va mingʉlʉve gya veene.
ɄPaulo ikʉmponia ʉdadaaje va Pubuliyo
7 Apoonu apo paale piipi ni silɨmɨla sya mbaha va kɨlʉnga ɨkyo,
ɨlitaawa lya mwene aatambʉlwagwa Pubuliyo.
Akatwambɨlɨla vʉnonu,
akatʉvombela ʉwiipa kʉ sigono sidatu.
8 Ʉnsɨkɨ ʉgwa,
ʉdadaaje va Pubuliyo aagonaga pa kɨtanda,
ʉlwakʉva aale nɨ mʉngʉ,
ikange aahalɨsaaga ʉnkisa.
ɄPaulo akiingila mu nʼgati ʉmwale ʉntamu.
Akanʼdoovela kwa Ngʉlʉve,
akavɨɨka isivoko pa mwene,
akamponia.
9 Wʉ amponiitse ʉmuunu ʉjwa,
ɨlyo lɨkavapelela avatamu avange vooni va mu kɨlʉnga ɨkyo vamwitsilage ʉPaulo.
Pwʉ ʉmwene alɨkʉvaponia.
10 Avaanu va palya valɨkʉtʉpa ʉwɨɨmɨkiwa kʉ nzɨla itsilɨ pongosu.
Wʉ tukɨsaavʉla ʉkʉhega nɨ meeli ɨjyɨnge,
vakatʉpa nʉ kʉtʉpakɨlɨla mu meeli isiinu syoni isyʉ twale nʉ vʉsumbe nasyo.
ɄPaulo isika mu vʉtsenge wa Looma
11 Wʉ tʉmalile ɨmyetsi gɨdatu mu kɨlʉnga ɨkyo,
tʉkahega nɨ meeli ɨjyapʉlɨkɨlaga ʉkʉta ʉnsɨkɨ gwa ngʼaala gʉlʉtɨngʼanie.
Ɨmeeli ɨjyo jyale jya kʉ vʉtsenge wa Alekisanduliya.
Pavʉlongolo pa jyene vaavɨɨkile ɨkɨhwani kya mingʉlʉve ɨMinyavʉngʉngʉ.
12 Kʉmbele,
tʉkasika mu vʉtsenge wa Silakusa.
Wʉ tʉmalile isigono sidatu ʉmwa,
tʉkahega,
13 tʉkalovoka tʉkasika mu vʉtsenge wa Legiyo.
Wʉ kʉkie,
ɨmepo jyapuulaga ʉkʉhʉma Kʉsika.
Pwʉ tʉkahega,
tʉkagendelela nʉ lʉgendo lwitu,
ɨmepo jɨlɨkʉtʉtanga.
Ɨkɨgono ɨkyakongile,
tʉkasika mu vʉtsenge wa Puteoli.
14 Apo tʉkaagana na vɨɨdɨkivajiitu vaninie,
vakatʉdoova ʉkʉta tʉtaame paninie navo isigono lekelakʉpamato (7).
Kʉmbele,
tʉkalamula ʉkʉgendelela nʉ lʉgendo.
Tʉkahega apo,
tʉlɨkʉkada ʉkʉbɨha kʉ vʉtsenge wa Looma.
15 Avɨɨdɨkivajiitu va pa Looma,
wʉ vapʉliike ʉkʉta tʉlɨ mu nzɨla ʉkʉbɨha kʉ veene,
vakiitsa.
Avange valɨkʉtʉpʉlɨkɨla pa Soko jya Apiyo,
avange valɨkʉtʉpʉlɨkɨla apoonu apaatambʉlwagwa Nyumba iDatu tsa Vahenza,
pakʉta vatwambɨlɨle.
Wʉ ʉPaulo avaweene,
akasaana kwa Ngʉlʉve,
akakava amaka,
akagangamuka.
16 Wʉ tʉsiike kʉ Looma,
ʉPaulo akatavʉlɨlwa ʉkʉtaama mu nyumba jya mwene paninie nʉ nsikali va kʉndoleela.
ɄPaulo itsova na Vayahudi va kʉ Looma
17 Wʉ ataamile apo isigono sidatu,
akavɨɨlanga avavaha va Vayahudi.
Wʉ valʉndamiine,
akavavʉʉla akata,
“Ʉnyie valʉkololwango,
nakʉli ʉmuunu va kɨvʉmbʉkʉ kiitu ʉvɨ ndɨnnangye itsiveetsaga.
Kange mu nyiiho itsʉ vaatʉlekye avanyienya viitu,
nakɨkʉli ɨkyʉ ndɨnangile.
Paninie nɨɨlyo,
vaannyʉvʉkye mu Yelusalemu,
vakannyɨlɨka ndɨkahɨgwe na Valooma.
18 AValooma valya wʉ vambʉʉtsiitse vʉnonu,
vaanogilwe ʉkʉmbopola,
ʉlwakʉva navaavʉvone ʉvʉviivi ʉvʉveetsaga ʉwʉ ndyavombile,
wa kʉta vambude.
19 Lɨno aVayahudi vaninie vakabeela ʉkʉta ndɨvopolwe.
Pa kulongwi ɨjɨ,
ndyalemilwe ɨlya kʉvomba.
Pwʉ ndɨkadoova ʉkʉta ɨnongwa jyango jiitse kʉnʉ jɨhɨgɨlɨlwe kwa Kaisali.
Apo nakwʉ kʉta pange ndɨkanogilwe ʉkʉvahɨlɨka pa vʉhɨgi avajyango aVayahudi,
baako.
20 Lɨno ʉkʉkongana naago,
ndɨvadoovile twaganile nʉ kʉtsova nʉʉnyie.
Ʉne apa ndɨlɨ mu nyololo ʉgʉ ʉlwakʉva ndikʉmwɨdɨka ʉMesiya ʉvɨ nyʉʉve jya Vaisilahɨli vooni.”
21 Pwʉ avavaha va Vayahudi vakamwanda ʉPaulo vakata,
“Ʉwe natʉlɨ natso ikalata itsʉ twʉpɨlye ʉkʉhʉma kʉ Yuuda itsʉ tsikʉkʉtsova ʉve.
Kange nitsili ʉlʉkololwitu ʉvaveetsaga ʉkʉhʉma ʉkʉ nʉ kʉkʉtsova ʉve amaviivi agaveetsaga.
22 Lɨno tupʉlɨkɨla ʉkʉpʉlɨka itsʉ vusaaga ʉve,
manya ʉmpelela ʉgʉ ʉgwʉ vukʉgʉkonga,
tʉlʉmanyile ʉkʉta gutsowa sivi kwoni kwoni.”
23 Pwʉ vakɨɨdɨngʼana nʉ Paulo ɨkɨgono kya kʉlʉndamana mu nyumba ɨjyʉ aataamaga.
Ɨkɨgono ɨkyo wʉ kɨsiike,
aVayahudi avo vakalʉndamana va vongosu ʉkʉlʉtɨɨlɨla pa kɨgono ɨkyatalile.
Ʉkʉhʉma pavʉsiku ʉkʉsika kʉmihe,
ʉPaulo aavamanyiise mongosu.
Aavalʉmbɨlye ikulongwi tsa Lʉdeeva lwa Ngʉlʉve.
Alɨkʉsimiilitsa ʉkʉta naveene vamwɨdɨke ʉYɨɨsʉ kʉnʉ ivonia amamenyu ʉgwʉ gaatsovaga ikulongwi tsa mwene mu ndagɨlo tsa Moose,
na mu sitabu sya vanyamalago.
24 Amamenyu ago ʉgwʉ ʉPaulo aatsovile,
aVayahudi vaninie vakagɨɨdɨka,
avange vakagabeela.
25 Pwʉ vakalemwa ʉkwɨdɨngʼana vaveene pa mamenyu ʉgwatsovile ʉPaulo.
Wʉ vinogwa ʉkʉlekengʼana,
wʉ kʉnʉ vipikaningʼana,
ʉPaulo akoongeletsa ʉkʉvavʉʉla akata,
“ɄMepo ʉMbalatse aatsovile itsa jɨlweli,
palya ʉpwʉ aavavʉʉlile avanyienya viinyo kʉ nzɨla jya nyamalago ʉYesaya ʉkʉta,
26 ‘Ʉbɨhage kʉ vaanu ava,
ʉkavavʉʉle ndee,
“Jɨlweli ʉkʉpʉlɨka mulapʉlɨkaga,
lɨno namulatsimanyage.
Jɨlweli ʉkʉlola mulalolaga,
lɨno namulatʉgage.
27 Lola,
inumbula tsa vaanu ava tsikiliitye,
imbʉlʉkʉtʉ tsa veene natsipʉlɨka,
amiiho ga veene gadosoliiwe,
pakʉta galeke ʉkʉlola,
imbʉlʉkʉtʉ tsa veene tsileke ʉkʉpʉlɨka,
ikange inumbula tsa veene tsileke ʉkʉlʉmanya,
vagela vikwandʉka pakʉta ndɨvapoke.” ’b”
28 ɄPaulo akagendelela ʉkʉtsova akata,
“Lɨno!
Jɨmanyikike kwanyie ʉkʉta,
ikulongwi tsa vʉpoki ʉvʉ ʉvʉhʉmile kwa Ngʉlʉve,
tsilʉtile kʉ vaanu avatava Vayahudi,
aveene wʉ vigendelela ʉkʉtsyʉpɨlɨla.”
29 Wʉ ʉPaulo amalile ʉkʉtsova amamenyu ago,
aVayahudi avo vakahega kʉnʉ vikaningʼana siitso.c