ɄPaulo ihɨgwa kʉ mbaha va kɨlʉnga ʉFeliki
24
1 Wʉ silʉtɨngʼiinie isigono sihaano,
ʉnteeketsi ʉmbaha ʉAnaniya,
akasika mu vʉtsenge wa Kaisaliya paninie na vanzagɨla avange va Vayahudi,
nʉ muunu mpamato va kʉjyɨmɨla inongwa ʉlʉvasu lwa veene,
ɨlitaawa lya mwene aatambʉlwagwa Telitulo.
Avo vakalʉta kukʉmbʉʉla ʉmbaha va kɨlʉnga ʉFeliki amamenyu ʉgwʉ vaammɨgaga ʉPaulo.
2 Wʉ ʉPaulo ɨlangilwe,
pwʉ ʉTelitulo akatengʉla ʉkʉtsova amamenyu ga kʉmmɨga akata,
“Gwe Feliki vɨ mwɨmɨkiwa,
ʉvʉlongotsi waako ʉvʉnonu wʉ weene vʉtʉpelye tʉve nʉ nsɨkɨ ntale gwa lʉnotsehetso.
Kange paasi pa vʉlongotsi waako imbombo imbiivi vukʉtsilɨngʼaania tsigoloke mu kɨlʉnga ɨkɨ.
3 Tukʉtsyʉpɨlɨla itso nʉ lʉhekelo sikutsooni,
nʉ kʉhʉmya ʉlʉsaano lwongosu kwave apoonu apaveetsaga,
na kʉ nzɨla ɨjɨveetsaga.
4 Lɨno nandinogwa ʉkʉta ndɨgendelele ʉkʉkʉgatatsa.
Ndikʉkʉdoova ʉkʉta ʉtʉsipilile pa kʉtʉpʉlɨhɨtsa amamenyu giitu madebe.
5 “Ʉmuunu ʉjʉ,
tʉweene insongelengʼanie siitso.
Itengʉlɨtsa ʉkʉsambʉkɨlanila aVayahudi va mu silʉnga syoni.
Paninie nɨɨlyo ʉmwene vɨ mbaha va mpelela gwa vʉnuasi gwa Vanazaleti.
6 Wʉ inogwa ʉkʉjɨkolelania najɨ tembile,
tʉkamwibiite ngʼaningʼaani.
Tʉkanogwagwa ʉkʉmmɨga kʉ nzɨla jya ndagɨlo tsiitu,
7 lɨno ʉjoojolo va vasikali ʉLusiya akiitsile akampoka kwawe kʉ maka mongosu.
8 Akavalagye avaanu ava avikʉmmɨga viitse vatsove kwave ɨlyʉ vikuuta pa kulongwi jya muunu ʉjʉ.
a Ʉve jyʉve wʉ vukʉmbʉʉtsambʉʉtsa,
jʉvukʉlʉmanya ʉkʉhʉma kʉkʉ mwene ikulongwi itsi tsyoni itsʉ tukuuta.”
9 Kʉ mamenyu ga Telitulo ago,
aVayahudi vakɨɨdɨka vakata gooni ga jɨlweli.
ɄPaulo ikɨtetela kwa Feliki ʉmbaha va kɨlʉnga
10 Wʉ ʉmbaha va kɨlʉnga apʉliike ago,
akatinitsa nɨ kɨvoko kwa Paulo pakʉta namwene atsove.
Pwʉ ʉPaulo akatengʉla ʉkʉtsova akata,
“Ʉne ndɨlʉmanyile ʉkʉta ʉve ʉlɨ mmɨgi va nongwa va myaka myongosu mu kɨlʉnga ɨkɨ.
Ɨlyo likʉmmelela ʉkʉta ndyɨtetele pavʉlongolo paave nʉ lʉhekelo.
11 Ʉve jyʉve vuweesa ʉkwolela ʉgwʉ ndihɨgwa,
manya silʉtɨngʼiinie isigono kɨtsigo na sivɨlɨ (12) vʉvʉle ʉkʉhʉma ʉnsɨkɨ ʉgwʉ ndɨkalʉtile kʉ Yelusalemu kukɨsaja.
12 Avaanu ava avikʉnnyɨga,
navakambone nditsova nʉ kwandɨngʼana nʉ muunu ʉvaveetsaga,
pange kʉsongelengʼania ɨlipʉga lya vaanu mu tembile evo mu masinagogi evo apoonu apange apaveetsaga mu vʉtsenge ʉwa.
13 Ikange amamenyu aga ʉgwʉ vikʉnnyɨga ʉnsɨkɨ ʉgʉ,
navakaweese ʉkʉvonia ʉkʉta ga jɨlweli.
14 “Apeene ɨlyʉ ndikwɨdɨkɨla pavʉlongolo paave,
lyʉ ɨlɨ ɨlya kʉta,
ʉne ndikɨsaja kwa Ngʉlʉve va vanyienya viitu,
ndikonga ɨNzɨla jya Ntwa ʉYɨɨsʉ nʉpwʉ jɨngave avaanu ava viita ʉgwa mpelela gwa vʉnuasi.
Paninie naago,
ndikʉgɨɨdɨka gooni agaavɨgilwe mu ndagɨlo tsa Moose,
na mu sitabu sya vanyamalago.
15 Ʉne ndɨvɨɨkile ɨnyʉʉve jyango kwa Ngʉlʉve,
ndʉwʉ naveene avaanu ava vavɨɨkile ɨnyʉʉve kʉ mwene,
ʉkʉta ʉNgʉlʉve alavatsʉʉsa avaswe vooni,
kwʉ kʉta avaswe avagolosu na vaswe avatulanongwa.
16 Ɨkɨ kyʉ mene ndikɨtanga isigono syoni ʉkʉva nɨ numbula ɨmbalasu pamiiho ga Ngʉlʉve na pamiiho ga vaanu.
17 “Wʉ ndɨtaamile kʉvʉtale ɨmyaka myongosu ndɨkakiliwiike kʉ Yelusalemu,
pakʉta ndɨhɨlɨke indalama tsa kʉvatanga avagatsu mu kɨlʉnga kiitu nʉ kʉhʉmya ɨneekelo kwa Ngʉlʉve.
18 Wʉ avaanu ava vikʉmbona ndivomba itso mu tembile,
ʉne ndɨkamalile ʉkwɨvalatsa.
Kange nandɨkaave nɨ kɨpʉga kya vaanu,
pange kʉvomba kɨninie ɨkikʉvapelela avaanu ʉkʉsambʉngʼana.
Apeene vakaalepwo aVayahudi vaninie ʉwʉ vakahʉmile kʉ Asiya,
19 avo wʉ vanogelanie vave pavʉlongolo paave apa,
nʉ kʉtsova itsa kʉnnyɨga,
ɨngave valɨ nɨ limenyu ɨlɨveetsaga kwane.
20 Evo ndajɨve vaava ʉwʉ pwʉvale apa,
vatsove vaveene ʉvʉviivi ʉwʉ vakavʉweene kwane,
palya ʉpwʉ ndɨkɨɨmile pavʉlongolo pa lʉlʉndamano lwa veene lwa vavaha va kɨvʉmbʉkʉ kyoni kya Vaisilahɨli.
21 Ipange ɨkyʉ vakakɨweene kɨviivi lwʉ lʉkuuto ʉlwʉ ndɨkakuutile wʉ ndɨtotsiitse siitso ɨlimenyu pavʉlongolo pa veene ʉkʉta,
‘Ɨkyʉ kikʉnnyambʉtsa ɨleelo ndɨhɨgwagwe kʉ nzɨla jya ndagɨlo pavʉlongolo paanyie,
jyʉ nyʉʉve ɨjyʉ ndihʉʉvɨla ʉkʉta,
avaswe valatsʉʉka.’ ”
22 ɄFeliki aajɨmanyile vʉnonu ɨkulongwi jya Nzɨla jya Ntwa ʉYɨɨsʉ ʉkʉlʉtɨɨlɨla valya avaammɨgaga ʉPaulo.
Ɨlyo lɨkampelela avʉlɨse kʉ nsɨkɨ ɨnongwa ɨjyo.
Akavavʉʉla akata,
“Jʉndihʉmya ʉvʉlamutsi wa nongwa jiinyo wʉ ʉjoojolo va vasikali,
ʉLusiya itsile apa.”
23 ɄFeliki akandagɨla ʉmbaha va vasikali ʉkʉta ambɨɨke ʉPaulo mu kɨkʉngwa,
nʉ kʉta andekesaage padebe.
Ikange akandagɨla ʉkʉta aleke ʉkʉvasiga avamanyaani va Paulo ʉkʉmpa isiinu isyʉ ilonda ave nasyo ʉPaulo.
ɄPaulo itsova nʉ mbaha va kɨlʉnga ʉFeliki
24 Wʉ silʉtɨngʼiinie isigono sidebe,
ʉFeliki akiitsa paninie nʉ nʼdala va mwene ʉDulusila ʉvɨ aale Nʼyahudi.
Akalagɨla ʉkʉta viitse nave ʉPaulo.
ɄPaulo wʉ itsile,
akatengʉla ʉkʉvavʉʉla ikulongwi tsa kʉmwɨdɨka ʉYɨɨsʉ ʉvɨ vɨ Mesiya.
25 Wʉ ʉPaulo igendelela ʉkʉtsova navo gooni ʉgwʉ ganogelanie pamiiho ga Ngʉlʉve,
ikulongwi tsa kwɨsiga mu mbiivi,
nʉ kʉta ʉNgʉlʉve alavahɨga avaanu,
ʉFeliki lʉkamwitsila ʉlʉdwado.
Akambʉʉla ʉPaulo akata,
“Lɨno ʉhege,
jʉndikʉkwɨlanga ikange ndɨpya ndiiva nʉ vʉlegeesu.”
26 Paninie naago,
ʉFeliki aale nʉ lʉhʉʉvɨlo ʉkʉta ipange ʉPaulo aale ikʉmpa isiinu sya kʉntemeka.
Pwʉ alɨkʉmwɨlanga kavɨlɨ kavɨlɨ ʉPaulo nʉ kʉtsova nave.
27 Wʉ gɨlʉtɨngʼiinie ɨmyaka gɨvɨlɨ,
b ʉPolikiyo Fesito akapyanila ʉvʉlongotsi pa Feliki.
Lɨno ʉlwakʉva ʉFeliki aanogilwe ʉkwɨvoniavonia ʉvʉnonu kʉ Vayahudi,
akandeka ʉPaulo mu kɨkʉngwa.