Ʉlwɨdɨngʼano lwa kʉvʉʉpɨlɨla mu mpelela avatava Vayahudi
15
1 Ʉkʉ kʉ Antiokiya vakiitsa avaanu vaninie ʉkʉhʉma kʉ Yuuda.
Vakatengʉla ʉkʉmanyiisa avɨɨdɨki valɨkʉta,
“Mungave namutahiliwi ndʉwʉ tsitsova inyiiho itsʉ ʉMoose aatʉlekye,
namukakave ʉvʉpoki mwa Kɨlɨsiti.”
2 ɄPaulo nʉ Balinaba navɨɨdɨngʼane na vanzagɨla va Vayahudi avo,
vakatengʉla ʉkʉkaningʼana siitso navo.
Kʉ vʉmalɨlo,
avaanu va mpelela gwa Antiokiya vakɨɨdɨngʼana ʉkʉta ʉPaulo,
ʉBalinaba na vajyavo vaninie valʉte kʉ Yelusalemu,
pakʉta vakɨvʉʉtse kʉ vapositili na kʉ vandyakoni kʉ mamenyu ago.
3 Pwʉ avaanu va mpelela gwa Antiokiya vakavadomeeletsa valʉtage kʉ Yelusalemu.
ɄPaulo na vanine vakahega,
vakalʉtɨngʼania mu kɨlʉnga kya Foinike,
nɨ kya Samaliya,
valɨkʉgenda vikʉvapangɨla avɨɨdɨki ʉmwʉ avaanu ʉwʉ vatava Vayahudi vaamwɨdɨkye ʉYɨɨsʉ.
Ikulongwi itso tsikavahovosa siitso avɨɨdɨki vooni.
4 ɄPaulo na vanine,
wʉ vasiike kʉ Yelusalemu,
vakʉʉpɨlɨlwa vʉnonu na vapositili,
avandyakoni na vampelela.
Pwʉ ʉPaulo na vanine vakavavʉʉla tsyoni itsʉ ʉNgʉlʉve aavombile ʉkʉgendela mu veene.
5 Pwʉ avɨɨdɨki vaninie mu kɨpʉga kya Vafalisayo vakɨɨma,
vakata,
“Naveene avɨɨdɨki avatava Vayahudi,
ndajɨve ndeeti,
vatahiliwe,
ikange muvalagɨle ʉkʉta vakongage indagɨlo tsyoni tsa Moose.”
6 Pwʉ avapositili na vandyakoni vakɨɨlanga ʉlʉlʉndamano lwa kwɨtsosanza,
pakʉta valole vʉnonu ɨlimenyu ɨlyo.
7 Wʉ avaanu avo vɨtsosanziitse kʉ nsɨkɨ ntale,
ʉPetulo akɨɨma,
akavavʉʉla akata,
“Vɨɨdɨkivajyango,
ʉnyie mulʉmanyile ʉkʉta ʉnsɨkɨ ntʉnga ʉgʉlʉtɨngʼiinie ʉNgʉlʉve aannyalile ʉkʉhʉma pagati paanyie,
ʉkʉta ndɨlʉmbɨlɨlage kʉ vaanu avatava Vayahudi pakʉta vapʉlɨke ɨLivangɨli ʉkʉgendela kwane,
vamwɨdɨke ʉNtwa ʉYɨɨsʉ Kɨlɨsiti.
8 ɄNgʉlʉve ʉvatsimanyile tsyoni itsilɨ mu numbula tsa vaanu,
avoniitse ʉkʉta avʉʉpɨlye avaanu avatava Vayahudi kʉ nzɨla jya kʉvapa ʉMepo ʉMbalatse,
ndʉwʉ aatʉpye najyʉwe,
9 manya navʉkʉli ʉvʉpadʉle ʉwʉ ʉNgʉlʉve avombile pagati paawe na veene.
Ava naveene avaliitse inumbula tsa veene kʉ nzɨla ɨjyo ɨjya kʉmwɨdɨka ʉNtwa ʉYɨɨsʉ.
10 Lɨno!
Kɨki muvomba ɨkɨɨnu ɨkyʉ ʉNgʉlʉve ninogwa ʉpwʉ mukʉvatwɨka avakongi va mwene ʉntsigo ʉgʉ ʉgwa kʉkonga indagɨlo,
ʉgwʉ avanyienya viitu paninie nʉʉwe gʉtʉlemile!
11 Tukwɨdɨka ʉkʉta kʉ lʉhʉngʉ lwa Ntwa viitu ʉYɨɨsʉ kwene tupokwa,
ndʉwʉ naveene vipokwa.”
12 Pwʉ avaanu vooni avaale pa lʉlʉndamano lʉlya vakanuunala,
vakavapʉlɨhɨtsa ʉPaulo nʉ Balinaba wʉ vikʉvavʉʉla ʉmwʉ ʉNgʉlʉve,
ʉkʉgendela kʉ veene,
aavombaga isidego ni simanyilo syongosu kʉ vaanu avatava Vayahudi.
13 Wʉ vamalile ʉkʉtsova,
ʉYakobo namwene akoongeletsa ʉkʉtsova akata,
“Vɨɨdɨkivajyango,
ndidoova mummʉlɨhɨtse!
14 ɄSimonia atʉvʉʉlile ʉmwʉ ʉNgʉlʉve,
ʉkwa kʉnsana,
aavahangajɨkye ʉwʉ vatava Vayahudi,
akahala avange vave vaanu va mwene.
15 Ago gikwɨdɨngʼana na mamenyu ga Ngʉlʉve agaavɨgilwe na vanyamalago ʉkʉta,
16 ‘ɄNgʉlʉve aatsovile ndee,
“Galaava galʉtɨngʼiinie ago,
ndɨlakilivuka,
ndɨlatsenga ikange ɨnyumba jya Davʉdi ɨjyʉ jɨgue.
Ndɨlatetengʼania vʉpya ɨlipagale ɨlyo,
nʉ kʉlyɨmɨka.
17 Pwʉ avaanu avange vooni,
valya avatava Vayahudi ʉwʉ ndɨvɨɨlangile ʉkʉta vave vango,
valankonga ʉNtwa.”
Ewo wʉ iita ʉNtwa ʉNgʉlʉve,
ʉvɨ aavɨɨkile ʉkʉta
18 aga gamanyikiike ʉkʉhʉma katale.’b”
19 ɄYakobo akagendelela ʉkʉtsova akata,
“Ʉne ndɨlamwe ʉkʉta,
avaanu avatava Vayahudi avigalamuka kwiva vɨɨdɨki va Ngʉlʉve,
ʉne ndivona natʉnogiili ʉkʉta tʉvagatatsaage.
20 Apeene tʉnogye ʉkʉta tʉvavɨgɨle ɨkalata jya kʉvavʉʉla ʉkʉta,
valeke ʉkʉlya isiinu isyʉ vateekye kʉ mingʉlʉve.
Ikange valeke ʉkʉvomba ʉvʉligu,
valeke ʉkʉlya ɨnyama jya sikanu isyʉ vatʉliise,
c evo ʉkʉlya ʉgwalonda,
21 manya ʉkʉhʉma katale,
avaanu valɨkʉlʉmbɨlɨla indagɨlo tsa Moose mu vʉtsenge wooni,
valɨkwɨmba mu masinagogi isigono syoni sya Sabato.”
Ɨkalata kʉ vɨɨdɨki avatava Vayahudi
22 Pwʉ avapositili,
avandyakoni,
nʉ mpelela gwoni gwa Yelusalemu vakahʉmya ʉvʉlamutsi paninie,
ʉkʉta voomole avaanu vaninie mu veene valʉte paninie nʉ Paulo nʉ Balinaba kʉ Antiokiya.
Vakavoomola avaanu vavɨlɨ ʉkʉhʉma mu kɨpʉga kya vɨɨdɨki,
mpamato aale vɨ Yuuda (ɨlitaawa ɨlɨnge aale vɨ Balusaba),
ʉjyʉnge aale vɨ Sila.
Avo vaale valongotsi mu vɨɨdɨkivajyavo.
23 Vakavasuungʼa nɨ kalata ɨjiita,
“Ʉwe vapositili paninie na vandyakoni,
twɨ vɨɨdɨkivajiinyo,
tukʉvapembetsa ʉnyie vɨɨdɨkivajiitu nyɨ mutava Vayahudi nyɨ mulɨ kʉ Antiokiya,
mu kɨlʉnga kya Siliya,
na mu kɨlʉnga kya Kilikiya.
24 Tʉpʉliike ʉkʉta avajiitu ʉkʉhʉma kwawe vavavʉʉlile ikulongwi itsikʉvajatsɨlɨngʼania ʉnyie nʉ kʉnanga amasaago giinyo.
Baako,
ʉwe natʉkavasuungʼe.
25 Lɨno,
ʉkʉkongana naago,
twɨdɨngʼiine ʉkʉvoomola avaanu nʉ kʉvasuungʼa kwanyie,
valongotsanie paninie na vagane viitu ʉBalinaba nʉ Paulo.
26 Avo vavɨlɨ vɨhʉmiitse siitso ʉkʉmbombela ʉNtwa viitu ʉYɨɨsʉ Kɨlɨsiti,
ikange vamwɨdiike ndakʉve kʉswa kʉ nongwa jya mwene.
27 “Lɨno,
avaanu ʉwʉ tʉvasuungʼile kwanyie vɨ Yuuda nʉ Sila.
Avo wʉ veene jʉvikʉvavʉʉla gaagalya ʉgwʉ tʉvɨgile,
28 manya kʉmmowiise ʉMepo ʉMbalatse paninie nʉʉwe ʉkʉta,
tʉleke ʉkʉvatwɨka ɨmitsigo ɨgɨnge,
pakyanya pa ndagɨlo indʉti itsi:
29 Mwɨlekelwe ʉkʉlya ɨnyama ɨjyʉ vateekye kʉ mingʉlʉve,
muleke ʉkʉlya ʉgwalonda,
evo ɨnyama jya sikanu isyʉ vatʉliise,
ikange muleke ʉkʉvomba ʉvʉligu.
Ɨngave mukonga ʉgwʉ twitsova,
pwʉ mwiva muvomba vʉnonu.
Mwalɨmi,
mugonage.”
30 Wʉ vɨɨtawe kʉ valya avaavasuungʼile,
ʉPaulo na vanine vakalʉta kʉ Antiokiya.
Wʉ vasiike ʉkʉ,
vakɨɨlanga ʉlʉlʉndamano lwa vɨɨdɨki,
vakavapa ɨkalata ɨjyo.
31 Ʉmuunu mpamato akɨɨmba ɨkalata jɨlya.
Avɨɨdɨki avo wʉ vapʉliike itsyavɨgilwe mu kalata ɨjyo,
vakahovoka nʉ kʉkimaana.
32 ɄYuuda nʉ Sila ʉwʉ naveene vaale vanyamalago,
vakavavʉʉla avɨɨdɨkivajyavo ikulongwi nyongosu tsa kʉvahovosa nʉ kʉvanywilitsa mu lwɨdɨko.
33 Wʉ vamalile ʉkʉtaama ʉkʉ kʉ nsɨkɨ,
avɨɨdɨki vakavatavʉla ʉYuuda nʉ Sila ʉkʉta vakilivuke kʉ valya avaavasuungʼile.
Vakavalaga vakata,
“Vujagi nʉ lʉnotsehetso kʉ valya ʉwʉ vakavasuungʼile.”
34 Napeene,
ʉSila akavona lʉnonu asigale kʉʉkʉ ʉkʉ.d
35 ɄPaulo nʉ Balinaba vakagendelela ʉkʉtaama kʉ Antiokiya,
aveene na vaanu avange vongosu vaamanyiisaaga nʉ kʉlʉmbɨlɨla ikulongwi tsa Ntwa ʉYɨɨsʉ.
ɄPaulo nʉ Balinaba vilekengʼana
36 Wʉ silʉtɨngʼiinie isigono sidebe,
ʉPaulo akambʉʉla ʉBalinaba akata,
“Tʉkilivuke kʉ vʉtsenge vʉlya ʉmwʉ twalʉtile tulʉmbɨlɨla ikulongwi tsa Ntwa ʉYɨɨsʉ,
pakʉta tʉlole avɨɨdɨkivajiitu ʉmwʉ vibɨhɨla.”
37 ɄBalinaba aanogilwe ʉkʉta valongotsanie nʉ Yohana Maliko.
38 Lɨno ʉPaulo akavona nalʉnonu ʉkʉta valongotsanie nave,
ʉlwakʉva ʉjʉ aavalekile kʉ Pamufiliya,
akabeela ʉkʉgendelela ʉkʉvomba ɨmbombo paninie na veene.
39 Pwʉ kʉkahʉmɨla ʉkʉkaningʼana siitso.
Baaho vakapatsɨngʼana.
ɄBalinaba akantoola ʉYohana Maliko ʉjwa,
vakatoga ɨmeeli vakalʉta kʉ Kipulo.
40 ɄPaulo namwene akantoola ʉSila alʉte nave.
Wʉ avɨɨdɨkivajyavo vamalile ʉkʉnʼdoova ʉNtwa ʉYɨɨsʉ ʉkʉta agendelele ʉkʉmpa ʉlʉhʉngʉ lwa mwene,
akahega.
41 Akalʉtɨngʼania mu mpandʉlʉ gwa Siliya nʉ gwa Kilikiya,
alɨkʉgenda inywilitsa ɨmipelela.