སོ་མ་ ཡེ་རུ་ཤ་ལེམ་།
21
ཏེ་ནི་ ང་ ཛམ་ལིང་ སོ་མ་ རྡང་ འཇིག་རྟེན་ སོ་མ་རྒུན་ ཐོང་། ངུལ་ལ་ ཡོ་ཀ་ནེ་ ནམ་ཀ་ རྡང་ འཇིག་རྟེན་ མེ་ཀན་ སོང་, ཡང་ རྒྱམ་ཚོ་ལ་ ཏོག་རྐྱལ་རྡེ་ མི་འདུག་། 2 པག་མ་ ཁོ་རང་ངེ་ མག་པེ་ཕི་ ཟབ་ཏེ་ རྡེ་མོ་ ཅོ་ཀན་ ཙོག་སེ་ ངེ་ རྒྱལ་ས་ ཏམ་པ་, ཡེ་རུ་ཤ་ལེམ་ སོ་མ་ རྡེ་བ་ཅན་ནེ་ ཀོན་འཇོག་རྒེ་ ཧུ་འདུན་ནི་ པབ་རྦེན་ ཐོང་། 3 ཡང་ ང་ ཞུ་ཁྲིའི་ཀ་ནི་ ཧད་ ཆོན་མོ་ཞིག་རྒེ་ མོལ་ལེན་ ཚོར་, “ཏ་ ཀོན་འཇོག་རྒེ་ ཞུ་སེ་ མལ་རྦོ་ མི་རྒུ་ནི་ ཕྲོ་ འདུག་, ཡང་ ཁོང་ མི་རྒུན་ ཉམ་པོ་ ཞུ་རྡེན་། ཁོང་རྒུན་ ཀོན་འཇོག་རྒེ་ མི་ རྡང་ ཀོན་འཇོག་ ཁོང་རྒུ་ནི་ ཀོན་འཇོག་ འགྱུ་རེན་, ཡང་ ཀོན་འཇོག་ ཁོ་རང་ ཁོང་རྒུན་ ཉམ་པོ་ ཞུ་རྡེན་། 4 ཁོང་ངེ་ ཁོང་རྒུ་ནི་ མིག་ནི་ ཆི་མ་རྒུན་ཕི་ ཛེད་རྡེན་། ཏུ་རུ་ ཤི་ཅེ་, ཡང་ རྡུ་ངལ་, ཡང་ ངུ་ཅེ་, ཡང་ ཟུག་ཟེར་ མི་ཡོང་, ཅེ་ཟེར་ནི་ འི་ ཚང་མ་ མ་ནི་ མེ་ཀན་ སོང་འདེ་ ནོག་།”5 ཞུ་ཁྲིའི་ཀ་ ཞུ་རྡེ་ ཡོ་ཀན་ ཀོན་འཇོག་རྒེ་ མོལ་ལེ་ ཛེད་, “ལྟོའེ་རྡང་ ངེ་ ཅི་ཚང་མ་ སོ་མ་ ཅོའེན་།” ཡང་ ཁོང་ངེ་ ང་ མོལ་, “འི་རྦོ་ འབྲི་ ཅེ་ཟེར་ནི་ འི་ སྤེ་ར་ ཚང་མ་ ལོ་ཁྱེལ་ཅེན་ འདང་ ཀྲང་པོ་ ནོག་།”
6 ཁོང་ངེ་ ང་ ཡང་ མོལ་, “ཏ་ ཅི་ཚང་མ་ ཀྲུཔ་ ཚར་། ང་ནི་ ཨལ་སྤ་ རྡང་ ཨོ་མེ་འགཱ་ ཟེར་ཧན་འབོ་ འིན་, འགོ་ཟུག་ནི་ཕ་ལ་ ཡོ་ཀན་ ཡང་ ཐ་མ་ཚུག་པ་ ལུའི་ཧན་། ཧོམ་འདེ་ ཡོ་ཀན་རྒུན་ལ་ ངེ་ སོན་པོ་ མི་ཙེ་ ཏང་ཀ་ནེ་ ཆུ་མིག་རྒེ་ ཆུ་ ཆོན་ལ་ ཏང་ངེན་། 7 རྒྱལ་ཁ་ ཐོབ་ཀན་རྒུན་ལ་ འི་ ཅིན་ལབ་ ཚང་མ་ ཐོབ་རྦེན་, ཡང་ ང་ ཁོང་ངེ་ ཀོན་འཇོག་ ཏང་ ཁོང་རྒུན་ ངེ་ ཕྲུ་རྒུ་ འགྱུ་རེན་། 8 འིན་ན་ འཇིའི་ཧན་, ཏེཏ་པ་ མེ་ཀན་, ཀྲིཔ་ཤོད་པ་, མི་སེད་, ལུའི་འབྲེལ་ ངན་པ་, ངན་ཆོའེ་ ཅོ་ཀན་, ཧུ་འདྲ་ ཅོལ་ཧན་, ཟུན་ ཏང་ཀན་ ཚང་མ་ མུ་ཟི་ མེ་ལ་ ཞེ་ནེན་ ཡོ་ཀ་ནེ་ ཚོའེ་ན་ ཕང་ངེན་, ཀ་འབོ་ལ་ ཤི་ཅེ་ ཉི་སྤ་ ཟེ་ཡོད་།”
9 ཡང་ ཐ་མེ་ རྡུ་ངལ་ རྡུན་ནེ་ ཀང་ཀན་ རྒོར་མོ་ ཁུར་རྡེ་ ཡོ་ཀན་ ཕོ་ཉ་ རྡུན་ནེ་ ནང་ནི་ ཅིག་ ཡོྃ་རྡེ་ ང་ མོལ་ལེ་རག་, “འི་རུ་ ཤོག་། ངེ་ ཁྱེ་རང་ལ་ པག་མ་, ལུ་རྒུའི་ ན་མ་རྦོ་ ལྟན་ནེན་།” 10 ཡང་ ཁོང་ངེ་ ང་ ཐུག་ཡིད་རྡེ་ན་ མ་ རི་ ཐོན་པོ་ཞིག་རྒེ་ཀ་ ཁྱེར་རེ་ ཛེད་ཏེ་ ང་ རྡེ་བ་ཅན་ནེ་ ཀོན་འཇོག་རྒེ་ ཧུ་འདུན་ནེ་ པབ་རྦེན་ ཡོ་ཀན་ རྒྱལ་ས་ ཏམ་པ་ ཡེ་རུ་ཤ་ལེམ་འབོ་ ལྟན་ནེ་ ཛེད་། 11 ཏེ་ རྒྱལ་ས་འབོ་, ཀོན་འཇོག་རྒེ་ ཟི་ཞིད་རྡེ་ན་ རྡོ་ རིན་ཅེན་ ཙོག་སེ་ ཁྲ་ཆེམ་ཆེམ་ ཅོ་རུག་, ཀའོ་ ཤེལ་ ཙོག་སེ་ སལ་སྤོ་ ཡོ་ཀན་ ཡ་ཤབ་ ཟེར་ཧ་ནེ་ རྡོ་ ཙོག་སེ་ འདུག་། 12 རྒྱལ་སེ་ ཀྱྃ་རྦོ་ མྃ་རྡེ་ ཐོན་པོ་ རྡང་ སྲན་ཀྲེ་ འདུག་, ཀ་རྦེ་ རྒྱེ་རྒོ་ ཅུག་ཉི་རྦོ་ ཕོ་ཉ་ ཅུག་ཉི་ སྲུྃ་རྡེ་ འདུག་། ཨིས་ར་ཡེལ་པེ་ མི་རིག་ ཅུ་ཉི་ མིང་རྒུན་, ཏེ་ རྒྱེ་རྒོ་རྒུ་ནི་ཀ་ འབྲི་རྡེ་ འདུག་། 13 ཤར་ ཆོག་ལ་ རྒྱེ་རྒོ་ སུམ་, ཅང་ ཆོག་ལ་ རྒྱེ་རྒོ་ སུམ་, ལོ་ ཆོག་ལ་ རྒྱེ་རྒོ་ སུམ་, ཡང་ ནུབ་ ཆོག་ལ་ རྒྱེ་རྒོ་ སུམ་ འདུག་། 14 ཡང་ ཏེ་ རྒྱལ་སེ་ ཀྱྃ་ར་ མག་རྡེན་ ཅུག་ཉི་ འདུག་, ཏོ་རྒུ་ནི་ཀ་ ལུ་རྒུའི་ ཧུ་ཚབ་ ཅུག་ཉི་ མིང་རྒུན་ འབྲི་རྡེ་ འདུག་།
15 ང་ སྤེ་ར་ ཏང་ཀ་ནེ་ ཕོ་ཉ་རྦེ་ ཁོ་རང་ངེ་ ཆག་ལ་, རྒྱལ་ས་, ཏོ་རྦེ་ རྒྱེ་རྒོ་ རྡང་ ཀྱང་རྡེ་ ཚེད་རྒུན་ ཏབ་ཅེ་ལ་, སེར་རེ་ ཚེད་ ཏབ་ཅེ་ པེར་ཧ་ཞིག་ ནམ་འདེ་ འདུག་། 16 རྒྱལ་ས་འབོ་ ཀྲུབ་ཞི་, ཀ་རྦེ་ ཞང་ འདང་ རིང་ འདང་ ཐོན་རྒུན་ འདྲན་འདྲ་ འདུག་། ཕོ་ཉེ་ རྒྱལ་ས་འབོ་ ཏབ་རྦེ་རྡང་, ཏོ་རྦེ་ ཞང་, རིང་ འདང་ ཐོན་རྒུན་ འདྲན་འདྲ་, ཀྱེ་ལོ་མི་ཀྲར་ ལྟོང་ཉི་རྡང་ ཉིབ་རྒྱ་ འབིང་། 17 ཁོང་ངེ་ ཀྱང་ར་རྦོ་ ཏབ་, ཏོ་ མི་ཀྲར་ རྡུན་ཅུ་ ཞང་ཅེན་ འདུག་པེན་, ཏོ་རྒུན་ ཏབ་ཅེ་ལ་ ཕོ་ཉེ་ མི་ ཀོལ་ཧ་ནེ་ ཚེད་ ཏབ་ཅེ་འབོ་ ཀོལ་ལེ་ ཛེད་ཏུག་། 18 ཀྱྃ་རྦོ་ རྡོ་ རིན་ཅེན་ ཡ་ཤབ་ ཟེར་ཧན་, ཡང་ རྒྱལ་ས་འབོ་ སེར་ རྐྱང་ལ་ སིག་ཏེ་ འདུག་ ཀ་འབོ་ ཤེལ་ ཙོག་སེ་ སལ་སྤོ་ འདུག་། 19 རྒྱལ་སེ་ ཀྱང་རྡེ་ མག་རྡེན་རྒུན་ རྡོ་ རིན་ཅེན་ན་ ཅུ་ཉི་ ཉམ་པོ་ སིག་ཏེ་ རྡེ་མོ་ ཅོའོ་ ཛེད་ཏེ་ འདུག་། མག་རྡེན་ནེ་ རྡོ་རྒུན་, ཏང་པོ་ ཡ་ཤབ་, ཉི་སྤ་ ནི་ལིམ་, སུམ་པ་ ཤེལ་རྡོ་, ཞི་པ་ མ་རྒད་, 20 ང་པ་ འགོ་མེད་, ཀྲུག་པ་ པད་མ་ར་ཀ་, རྡུན་པ་ ཤེལ་རྡོ་ སེར་སྤོ་, རྒྱད་པ་ ཡུ་, རྒུ་པ་ པུག་རཇ་, ཅུ་པ་འབོ་ ལ་ཧ་ས་ནི་ཡ་, ཅུག་ཅིག་པ་ འདུ་མར་ཀན་ རྡང་ ཅུག་ཉི་རྦོ་ ཅན་འདརའ་ཀ་ནེད་རྒུན་ ནོག་། 21 ཡང་ རྒྱེ་རྒོ་ ཅུག་ཉི་རྦོ་ མུ་ཏིག་ ཅུག་ཉི་, ཡང་ ཏེ་ རྒྱེ་རྒོ་ རེ་རེ་ མུ་ཏིག་ ཆོན་མོ་ ཅིག་རྒེ་ ཛེད་ཏེ་ འདུག་། ཏེ་ རྒྱལ་སེ་ ལམ་ འདང་ སྲང་རྒུན་ ཤེལ་ ཙོག་སེ་ སལ་སྤོ་ སེར་རེ་ ཛེད་ཏེ་ འདུག་།
22 ང་ ཏེ་ན་ ཀོན་འཇོག་རྒེ་ ཁང་པ་ཞིག་ མ་ནི་ མ་ཐོང་, ཅེ་ཟེར་ནི་ ཙོབོ་ ཀོན་འཇོག་ ཀུན་ཝང་ རྡང་ ལུ་རྒུ་ ཏེ་རྒུ་ནི་ ཀོན་འཇོག་རྒེ་ ཁང་པ་ ནོག་། 23 ཏེ་ རྒྱལ་ས་འབོ་ལ་ ཉི་མ་ ཡང་ ལྡ་ཝེ་ འོད་རྡེ་ རྒོའེ་ཤེ་ མི་འདུག་, ཅེ་ཟེར་ནི་ ཀོན་འཇོག་རྒེ་ ཟི་ཞིད་རྡེ་, ཏེ་ རྒྱལ་ས་འབོ་ འོད་ཅེན་ ཛེད་ཏེ་ ལུ་རྒུ་རྦོ་ ཏོ་རྦེ་ རྐྱོང་ཙེ་ ནོག་། 24 ཡང་ རྒྱལ་ཁབ་རྦེ་ མི་རྒུན་ ཏེ་ འོད་རྡེ་ན་ འགྲུ་ལེན་། འཇིག་རྟེན་ནེ་ རྒྱ་སྤོ་རྒུ་ནི་ ཁོ་རང་ངེ་ རྒྱུ་ནོར་རེ་ སྤལ་རྒུན་, ཏེ་ རྒྱལ་སེ་ན་ ཁྱོང་ངེན་། 25 ཏེ་ རྒྱལ་སེ་ རྒྱེ་རྒོ་རྒུན་ མ་ནི་ ཅུག་རྒེ་ མག་, ཅེ་ཟེར་ནི་ ཏུ་རུ་ ཚེན་ མ་ནི་ མེ་ཀག་། 26 རྒྱལ་ཁབ་ ཁོ་རང་རྒུ་ནི་ ཏེར་ རྡང་ རྒྱུ་ནོར་རེ་ སྤལ་རྒུན་, ཏེ་ རྒྱལ་སེ་ན་ ཁྱོང་ངེན་། 27 ངན་པ་ ཅིག་ལ་ ཏེ་ན་ ཆ་ མི་ཅུག་, མ་ཚེད་ ཁྲེལ་རྦེ་ ལེ་ཧ་ ཅོ་ཀན་, ཡང་ ཟུན་ ཏང་ཀན་རྒུན་ལ་། འིན་ན་ ལུ་རྒུའི་ ཐ་མེད་པེ་ མི་ཙེ་ སྤེ་ཆེ་ན་ མིང་ འབྲི་རྡེ་ ཡོ་ཀ་ནེ་ མི་རྒུན་ ཏེ་ན་ ཆ་ཉེ་ནེན་།