ལོ་ ལྟོང་ཅིག་།
20
ཏེ་ནི་ ང་ ཡང་ ཕོ་ཉ་ཞིག་ རྡེ་བ་ཅན་ནི་ པབ་རྦེན་ ཐོང་, ཁོང་ངེ་ ཆག་ལ་ ཐིལ་ མེ་ཀ་ནེ་ ཏིང་ རྒོ་རོང་ ཀུ་ལིག་ ཏང་ ལྕ་རྟག་ ལྕིན་ཀྲེ་ ཆོན་མོ་ཞིག་ ནམ་འདེ་ འདུག་། 2 འབྲུག་ ཀ་འབོ་ལ་ ངུལ་མེ་ ཏུའི་ རུལ་, ཡང་ རྡུད་རྒུ་ནི་ འགོ་རྦ་ ཡང་ རྡུད་རྡེ་ ཟེར་རེ་ཡོད་, ཁོང་ངེ་ ཟུམ་འདེ་, ལོ་ ལྟོང་ཅིག་རྒེ་ཕི་ ཁོ་ ལྕ་རྟག་ ཉམ་པོ་ ཏག་། 3 ལོ་ ལྟོང་ཅིག་པོ་ ཚར་ཚར་ཚུག་པ་ རྡུད་རྡེ་ རྒྱལ་ཁབ་ ཚང་མེ་ མི་རྒུན་ལ་ འགོམ་ཧོར་ མི་ཏང་ཤེ་ཕི་, ཏེ་ ཕོ་ཉེ་ ཁོ་ ཐིལ་ མ་ནི་ མེ་ཀ་ནེ་ ཏིང་ རྒོ་རོང་ངེ་ན་ ཕྃ་, ཡང་ ཁ་ ཀབ་ཏེ་ ཐེ་ཙེ་ རྒྱབ་། ཏེ་ཏུའི་རྦོ་ ལྟིང་ནི་ ཁོ་ སྲིབ་ཅིག་རྒེ་ཕི་ ཕི་ལོག་ལ་ འབིང་ཅུག་རྒེ་ ཛེད་རྒོའེ་།4 ཏེ་ནི་ ང་ རྡེ་བ་ཅན་ནེ་ན་, ཁྲིམ་ཅེད་ཅེ་ ཝང་ སལ་ལེ་ ཛེད་ཀན་རྒུན་ ཞུ་ཁྲིའི་རྒུ་ནི་ཀ་ ཞུ་རྡེ་ ཐོང་། ཡང་ ང་ འགོ་ ཅེད་ཀན་ མི་རྒུ་ནི་ སེམ་ཉིད་རྒུན་ ཐོང་, ཅེ་ཟེར་ནི་ ཁོང་རྒུ་ནི་ ཡི་ཤུའི་ སྤང་པོ་ ཏྃ་རྡེ་ ཀོན་འཇོག་རྒེ་ ཀའ་ ཤེད་ཏེ་ འིན་འབེན་། ཁོང་རྒུ་ནི་ འཇི་ནང་ཅེན་ནེ་ སེམ་ཅེན་ ཡང་ ཁོའེ་ ཧུ་འདྲ་ ཆག་ མ་པུལ་, མ་ཚེད་ ཁོའེ་ ཐེ་ཙེའོ་ ཁོ་རང་རྒུ་ནི་ ཐོད་པ་ ཡང་ ལག་པེ་ཀ་ ཅོ་ མ་ཅུག་། ཁོང་རྒུན་ སོན་པོ་ ལྃ་, ཡང་ མ་ཤི་ཀ་ ཉམ་པོ་ ལོ་ ལྟོང་ཅིག་ ཝང་སྲུལ་།
5 ཁོང་རྒུ་ནི་, ཤི་རྡེ་ ལྃ་ཧན་ ཏང་པོ་རང་ ནོག་། ཏེ་ ལོ་ ལྟོང་ཅིག་པོ་ ཚང་འདེ་ མ་ནི་ ལུའི་རྡེ་ ཡོ་ཀ་ནེ་ ཤི་ཀན་རྒུན་ སོན་པོ་ མི་ལྃ་། 6 འགོ་མེ་ སོན་པོ་ ལྃ་ཤེ་ན་ ཐུའི་ཧ་ནེ་ མི་རྒུན་ ཅིན་ལབ་ཅེན་ འདང་ ཏམ་པ་ ནོག་, ཅེ་ཟེར་ནི་ ཁོང་རྒུ་ནི་ཀ་ ལེན་ ཉི་སྤ་ ཤི་ཅེ་རྦོ་ལ་ ཝང་ མ་ནི་ མེ་ཀག་, མ་ཚེད་ ཀོན་འཇོག་ ཏང་ མ་ཤི་ཀེ་ ལ་མ་རྒུན་ འགྱུར་རྡེ་ ལོ་ ལྟོང་ཅིག་ཚུག་པ་ མ་ཤི་ཀ་ ཉམ་པོ་ ཝང་སྲུལ་ལེན་།
རྡུད་ལ་ ཕམ་ཀལ་།
7 ལོ་ ལྟོང་ཅིག་ ཚང་ངེ་རྡང་ རྡུད་ ཙོན་ནི་ པུད་རྡེན་། 8 ཁོ་ འཇིག་རྟེན་ནེ་ ཆོག་ ཚང་མེ་ རྒྱལ་ཁབ་རྦེ་ མི་རྒུན་ལ་ འགོམ་ཧོར་ ཏང་ངེ་ལ་ འགོག་ ཏང་ མ་འགོག་ ཟེར་ཧ་ནི་ མ་ལེ་ཀ་ ཆེན་། ཁོའེ་ མི་ཚང་མ་ ཆོག་ཤིག་ལ་ མག་རྒེ་ཕི་ ཛོམ་ཅུག་རྒེན་, ཀ་འབོ་ ཚོའེ་ ཐ་མ་ ཡོ་ཀ་ནེ་ པེ་མ་ སིག་ མི་ཉེན་ཅེ་ ཙོག་སེ་ མང་པོ་ ཡོང་ངེན་། 9 འཇིག་རྟེན་ནེ་ ཆོག་ ཚང་མ་ནི་ ཁོང་རྒུན་ འབིང་འདེ་ ཀོན་འཇོག་རྒེ་ མི་རྒུན་ འདང་ ཁོང་ ཐུག་ཉེ་ ཛེད་ཀ་ནེ་ རྒྱལ་ས་རྦོ་ལ་ ཧོར་, འིན་ན་ རྡེ་བ་ཅན་ནེ་ མེ་ ཡོག་ལ་ པབ་ཏེ་, ཏེ་ མག་མི་རྒུན་ མེ་ཀན་ ཅོའོ་ ཛེད་།
10 ཏེ་ནི་ མི་ཚང་མ་ལ་ འགོམ་ཧོར་ ཏང་ཀ་ནེ་ རྡུད་རྦོ་, མུ་ཟི་ མེ་ལ་ ཞེན་ནེན་ ཡོ་ཀ་ནེ་ ཚོའེ་ན་ ཕྃ་, ཀ་རྦེ་ན་ འཇི་ནང་ཅེན་ནེ་ སེམ་ཅེན་ འདང་ ལུང་རྟོན་པ་ ཟུའི་མ་རྒུན་ ཕྃ་རྡེ་ འིན་འབེན་། ཡང་ ཁོང་རྒུན་ལ་ ཏུའི་རྒྱུན་ནི་ཏུའི་རྒྱུན་ ཚེན་ཉིན་ མེད་རྡེ་ རྡུ་ངལ་ ཐོང་ངེན་།
ཁྲིམ་ཅེད་རྡེ་ ཞག་།
11 ཏེ་ནི་ ངེ་ ཞུ་ཁྲིའི་ ཀར་སྤོ་ ཀྲག་པོ་ཞིག་ ཏང་ ཏེ་ཀ་ ཞུ་ཧན་འབོ་ ཐོང་། ཁོང་ འཇལ་ལེ་རྡང་ འཇིག་རྟེན་ འདང་ ནམ་ཀ་རྒུན་ ཁོང་ངེ་ འདུན་ནི་ ཤོར་རྡེ་ སོང་, ཡང་ ཏི་ནི་ཕ་ལ་ སུ་ཞིག་ལ་ ཏོ་རྒུན་ མ་ཐོང་། 12 ཏེ་ནི་ ང་ ཤི་ཀན་ འཇིག་སྤོ་ རྡང་ ཉམ་ཤུང་ མི་རྒུན་, ཀོན་འཇོག་རྒེ་ ཞུ་ཁྲིའི་ འདུན་ལ་ ལྃ་རྡེ་ ཐོང་། ཡང་ སྤེ་ཆ་ པེ་ཀན་རྒུ་ནི་ ཕྲོ་ ཐ་མེད་པེ་ མི་ཙེ་ སྤེ་ཆ་རྦོ་ལ་ འདུག་། སྤེ་ཆ་རྒུ་ནི་ན་ ཁོང་རྒུ་ནི་ ཅོའེ་ཧན་རྒུན་ འབྲི་ཛེད་ཏེ་ ཡོ་ཀན་ ནང་ཞིན་, ཁོང་རྒུན་ལ་ ཁྲིམ་ཅེད་ སལ་རྡུག་། 13 རྒྱམ་ཚོའེ་ ཏེ་ན་ ཤི་ཀ་ནེ་ མི་རྒུན་ པུད་, ཡང་ ཤི་ཅེ་ རྡང་ ཤི་ཀན་རྒུ་ནི་ མལ་ལེ་ཀ་ ཤི་ཀ་ནེ་ མི་རྒུན་ པུད་། ཏེ་ ཤི་ཀན་ ཚང་མ་ ཁོ་རང་རྒུ་ནི་ ལེ་ཧ་ ནང་ཞིན་ལ་ ཁྲིམ་ཅེད་ སལ་ལེ་ ཛེད་། 14 ཏེ་ནི་ ཤི་ཅེ་ རྡང་ ཤི་ཀ་ནེ་ མལ་རྒུན་ མེ་ འབའ་རེན་ ཡོ་ཀ་ནེ་ ཚོའེ་ན་ ཕྃ་, འི་ ཚོ་རྦོ་ལ་ ཤི་ཅེ་ ཉི་སྤ་ ཟེ་རེ་ནོག་། 15 ཐ་མེད་པེ་ མི་ཙེ་ སྤེ་ཆེ་ན་ མིང་ འབྲི་རྡེ་ མེ་ཀན་རྒུན་, མེ་ འབའ་རེན་ ཡོ་ཀ་ནེ་ ཚོའེ་ན་ ཕང་ངེ་ ཛེད་།