རྡེ་བ་ཅན་ནེ་ན་ རྒྱལ་ཁེ་ ལུ་ ཏྃ་།
19
ཏེ་ ལྟིང་ནི་ ངེ་ རྡེ་བ་ཅན་ནེ་ན་ མི་ཚོག་ མང་པེ་ ཀུ་ཅུ་ ཙོག་སེ་ ཚོར་ ཀའོ་རྒུ་ནི་ ཟེ་རག་, “ཙོབོ་ལ་ རྟོད་པ་ པུལ་ཧེ་, ཐར་པ་, ཟི་ཞིད་ ཏང་ ཝང་ ཨ་ཧོའེ་ ཀོན་འཇོག་རྒེ་ ནོག་། 2 ཁོང་ངེ་ ཁྲིམ་ཅེད་རྒུ་ནི་ འོའེ་སྤ་ རྡང་ ཀྲང་པོ་ ནོག་། ཁོང་ངེ་ ཏེ་ འཇང་ཙོ་མ་ འཇིག་སྤོ་ རྒྱལ་ས་ འབཱ་འབེ་ལོན་ལ་ ཁྲིམ་ཅེད་ ཛེད་, ཀ་རྦེ་ ལུའི་འབྲེལ་ ངན་པེ་ ལེ་ཧ་རྒུ་ནི་ འཇིག་རྟེན་པ་རྒུན་ལ་ རྡིག་པེ་ ལམ་མེ་ཀ་ འགྲུལ་ཤུག་། ཀོན་འཇོག་རྒེ་ ཏེ་ པོ་མོ་ལ་, ཁོང་ངེ་ ཞབ་རྟོག་པ་རྒུན་། སེད་ཅེ་ ཚབ་ལ་ ལེན་སལ་རྡེ་ ནོག་།” 3 ཁོང་རྒུ་ནི་ ཡང་ ཤེད་ ཏང་ ཟེར་, “ཙོབོ་ལ་ རྟོད་པ་ པུལ་ཧེ་, ཏེ་ རྒྱལ་སེ་ ནང་ནི་ ཏུད་པ་ ཏུའི་རྒྱུན་ནི་ཏུའི་རྒྱུན་ འབིང་ངེན་།” 4 ཏེ་ནི་ ཏེ་ འུ་རྐྱོང་ ཉི་ཤུ་སེབ་ཞི་ རྡང་ སྲོག་ ཡོ་ཀན་ ཞི་རྦེ་ ཞུ་ཁྲིའི་ཀ་ ཞུ་ཧན་ ཀོན་འཇོག་རྒེ་ ཧུ་འདུན་ལ་ ཆག་པུལ་ ཡང་ ཁོང་ལ་ ཅོལ་ལེན་ མོལ་, “ཨ་མེན་, ཙོབོ་ལ་ རྟོད་པ་ པུལ་ཧེ་།”5 ཏེ་ནི་ རྒྱལ་ཁྲིའི་ཀ་ནི་ འི་ སུང་ཧད་པོ་ ཚོར་, “ཀོན་འཇོག་རྒེ་ ཞབ་རྟོག་པ་, ཀོན་འཇོག་ལ་ འཇིའི་ཧན་, ཉམ་ཤུང་ འདང་ འཇིག་སྤོ་ ཚང་མེ་ ཨ་ཧོའེ་ ཀོན་འཇོག་ལ་ རྟོད་པ་ པུལ་ཧེ་།” 6 ཏེ་ནི་ ངེ་ མི་ཚོག་ མང་པོ་, ཆུ་ ཀྲག་པོ་ རྒྱུག་ཀན་, འབྲུག་ ཀྲག་པོ་ ལྡིར་ཧ་ནེ་ ཧད་ ཙོག་སེ་ ཧད་ཅིག་རྒེ་ མོལ་ལེན་ ཚོར་, “ཙོབོ་ལ་ རྟོད་པ་ པུལ་ཧེ་, ཙོབོ་ ཨ་ཧོའེ་ ཀོན་འཇོག་ ཀུན་ཝང་ངེ་ ཝང་སྲུལ་ལེ་ ཛེད་ཏུག་། 7 ཤོག་ཧེ་, ཨ་ཧོ་རྒུ་ནི་ ཐེད་པོ་ རྡང་ རྐྱིད་པོ་ ཅོའེན་, ཡང་ ཨ་ཧོ་རྒུ་ནི་ ཀོན་འཇོག་ལ་ སྤལ་ ཏོང་ཧེ་། ཅེ་ཞུ་ནི་ ལུ་རྒུའི་ པག་རྟོན་ནེ་ ཏུའི་རྦོ་ རན་ ཚར་རྡེ་ ཁོང་ངེ་ པག་མེ་ ཁོ་རང་ ཁོང་ངེ་ཕི་ ཀྲལ་འགྲིག་ ཛེད་ཏེ་ ནོག་། 8 པག་མ་ ཀོའེ་ལག་ རིན་ཅེན་: ཀར་སྤོ་ རྡང་ སང་མ་ ཀོན་ནེ་ལ་ སལ་།” ཀོའེ་ལག་ རིན་ཅེན་འབོ་, ཀོན་འཇོག་རྒེ་ མི་རྒུ་ནི་ ཆག་ལེ་ ཀྲང་པོ་རྒུན་ ནོག་།
9 ཏེ་ནི་ ཕོ་ཉེ་ ང་ མོལ་ལེ་རག་, “འི་རྦོ་ འབྲི་, ལུ་རྒུའི་ པག་རྟོན་ནེ་ འགྲོན་ལ་ འབོ་ཀན་རྒུན་ལ་ ཅིན་ལབ་ཅེན་ འིན་།” ཁོང་ངེ་ ཡང་ མོལ་, “ཏོ་རྒུན་ ཀོན་འཇོག་རྒེ་ མོལ་ཧ་ནེ་ ཀའ་རྒུན་ ནོག་།”
10 ཏེ་ནི་ ངེ་ ཁོང་ལ་ ཅོལ་ཤེ་ལ་ ཁོང་ངེ་ ཞབ་རྦེ་ཀ་ འགྱེལ་རྦེན་། འིན་ན་ ཁོང་ངེ་ མོལ་, “ང་ ཅོལ་ མ་ཅོལ་། ཡི་ཤུའི་ ཧོར་ལ་ སྤང་པོ་ ཏང་ཅེ་ན་ རྟེམ་པོ་ འདེད་ཀན་ ཁྱེ་རང་ འདང་ ཁྱེ་རང་ངེ་ སྤུན་རྒུན་ ཙོག་སེ་ ང་ལ་ ཀོན་འཇོག་རྒེ་ ཞབ་རྟོག་པ་ཞིག་ འིན་། ཀོན་འཇོག་ ཅིག་པོ་ལ་ ཅོལ་, ཅེ་ཟེར་ནི་ ཀོན་འཇོག་རྒེ་ ཐུག་ཡིད་རྡེ་ ཡི་ཤུའི་ ཧོར་ལ་ སྤང་པོ་ ཞེན་མ་རྒུན་ལ་ ཏང་ཅེ་ ཁྱུད་ སལ་ལེ་ནོག་།”
ལྟ་ ཀར་སྤེ་ཀ་ ཞོན་ཀན་།
11 ཏེ་ནི་ ང་ རྡེ་བ་ཅན་ པེ་རྡེ་ ཐོང་, ལྟ་ ཀར་སྤོ་ ཡང་ ཏོ་རྦེ་ཀ་ ཞོན་ཀན་འབོ་ ཚེན་ལ་ ལོ་ཁྱེལ་ཅེན་ འདང་ ཀྲང་པོ་ ཞུ་རུག་, ཅེ་ཟེར་ནི་ ཁོང་ངེ་, འོའེ་སྤ་ ཉམ་པོ་ ཁྲིམ་ཅེད་ ཛེད་ཏེ་ ཀྲང་པེ་ མག་པོ་ སལ་ལེ་ ཛེད་ཏུག་། 12 ཁོང་ངེ་ མིག་, མེ་ མེ་ལྗབ་ ཙོག་སེ་ ཡང་ ཁོང་ངེ་ ཨུའི་ཀ་ ཐོར་ཤོག་ མང་པོ་ཞིག་ འདུག་། ཁོང་ངེ་ཀ་ འབྲི་རྡེ་ ཡོ་ཀ་ནེ་ མིང་ངེ་ ཏོན་འབོ་ ཁོ་རང་ མ་ནི་ ཡང་སུ་ལ་ ཤེ་རྡེ་ མི་འདུག་། 13 ཁོང་ངེ་ ཁྲག་རྒེ་ན་ ཅུག་ཏེ་ ཡོ་ཀ་ནེ་ ནམ་ཟ་ ཀོན་འདེ་ འདུག་, ཡང་ ཁོང་ངེ་ ཚན་ལ་ ཀོན་འཇོག་རྒེ་ ཀའ་ ཞུ་རུག་། 14 རྡེ་བ་ཅན་ནེ་ མག་མི་, ལྟ་ ཀར་སྤོ་ ཞོན་འདེ་ ཀོའེ་ལག་ ཀར་སྤོ་ སང་མ་ རིན་ཅེན་ ཀོན་འདེ་ ཡོ་ཀན་རྒུན་ ཁོང་ངེ་ ལྟིང་འགྲྃ་ནི་ ཡོང་འདུག་། 15 ཡང་ ལོ་ཁྱེལ་ཅེན་ འདང་ ཀྲང་པོ་ ཞུ་ཀན་འབེ་ ཞལ་ནི་ ར་ཡི་ ནོམ་པོ་ཞིག་ འབིང་འདུག་, ཀའོ་ ཁོང་ངེ་ རྒྱལ་ཁབ་རྒུན་ལ་ ཕམ་ཀལ་ཅེ་ཕི་ ཀོལ་ལེན་། ཡང་ “ཁོང་ངེ་ ཆ་ཚང་ ཝང་ཆ་ ཉམ་པོ་ ཝང་སྲུལ་ལེ་ ཛེ་རྡེན་།” ཀུན་ཝང་ ཀོན་འཇོག་རྒེ་ ཐུག་སྲོ་ ཆོན་མེ་ མ་ལེ་ན་ ལྟ་ ཀར་སྤོ་ལ་ ཞོན་ཀན་འབེ་ ཏེ་རྒུན་ རྒུན་འགྲུམ་ ཙོག་སེ་ ཙིར་རེ་ ཛེ་རྡེན་། 16 ཁོང་ངེ་ ཤ་ལྡིར་ རྡང་ ཀོའེ་ཀ་ འི་ མིང་པོ་ འབྲི་རྡེ་ འདུག་, “རྒྱ་སྤོ་རྒུ་ནི་ རྒྱ་སྤོ་ རྡང་ ཙོབོ་རྒུ་ནི་ ཙོབོ་།”
17 ཏེ་ནི་ ངེ་ ཕོ་ཉ་ཞིག་ ཉི་མེ་ཀ་ ཞྃ་རྡེ་ ཐོང་, ཁོང་ངེ་ ནམ་ ཐོམ་པེ་ན་ ཕུརེན་ ཡོ་ཀ་ནེ་ ཅ་ཅིའུ་རྒུན་ལ་ ཧད་ ཆོན་མོ་ ཉམ་པོ་ འབོ་ ཛེད་, “ཤོག་ ཀོན་འཇོག་རྒེ་ འདོན་ཏང་ ཆོན་མེ་ཕི་ འེ་ཀ་ ཛོམ་ཧེ་། 18 རྒྱ་སྤོ་, མག་མི་ སྤོན་འབོ་, མག་མི་ ཀྲག་པོ་, ལྟ་རྒུན་ འདང་ ཏོ་རྒུན་ལ་ ཞོན་ཀན་, ར་ཝང་ཅེན་ འདང་ ཚེ་ཡོག་, ཉམ་ཤུང་ འདང་ འཇིག་སྤོ་ ཚང་མེ་ ཤ་རྒུན་ ཟ་ལ་ ཤོག་ཧེ་།”
19 ཏེ་ནི་ ངེ་ ཏེ་ འཇི་ནང་ཅེན་ནེ་ སེམ་ཅེན་, འཇིག་རྟེན་ནེ་ རྒྱ་སྤོ་རྒུན་ ཡང་ ཏོ་རྒུན་ནེ་ མག་མི་རྒུན་, ལྟ་ ཀར་སྤེ་ཀ་ ཞོན་ཀན་ འདང་ ཁོང་ངེ་ མག་མི་རྒུ་ནི་ རྒྱཔ་འགལ་ལ་ ནོལ་ཤེ་ལ་ ཛོམ་མེན་ ཐོང་། 20 འིན་ན་ ཏེ་ འཇི་ནང་ཅེན་ནེ་ སེམ་ཅེན་ འདང་ ཁོའེ་ ལུང་རྟོན་པ་ ཟུའི་མ་རྦོ་ ཟུམ་, ཀ་རྦེ་ འཇི་ནང་ཅེན་ནེ་ སེམ་ཅེན་འབེ་ ཚབ་ལ་ ཧ་ལེ་ཤེ་ ལྟའ་ མིན་འདྲ་ མིན་འདྲ་ ལྟན་ནེ་ཡོད་པེན་། ཏེ་ ལྟའ་རྒུ་ནི་ མི་རྒུན་ལ་ འགོམ་ཧོར་ ཏང་ཅེ་ཀ་ནི་, ཁོང་རྒུ་ནི་ འཇི་ནང་ཅེན་ནེ་ སེམ་ཅེན་ནེ་ ཐེ་ཙེ ནེན་འདེ་ ཁོའེ་ ཧུ་འདྲ་འབོ་ལ་ ཆག་པུལ་ ཡང་ ཅོལ་། འཇི་ནང་ཅེན་ནེ་ སེམ་ཅེན་ འདང་ ཁོའེ་ ལུང་རྟོན་པ་ ཟུའི་མ་ ཉ་ཧ་ སོན་པོ་ ཏུག་ཅེན་ནེ་ རྡོ་ མེ་ལ་ ཞེ་ནེན་ ཡོ་ཀ་ནེ་ ཚོའེ་ན་ ཕྃ་། 21 ཡང་ ལྟ་ ཀར་སྤོ་ཀ་ ཞོན་འདེ་ ཡོ་ཀན་འབེ་ ཞལ་ནི་ འབིང་ངེན་ ཡོ་ཀ་ནེ་ ར་ཡི་རྦོ་ ཉམ་པོ་ ཁོའེ་ མག་མི་ ཚང་མ་ སེད་། ཡང་ ཤ་ ཟ་ཀ་ནེ་ ཅ་ཅིའུ་ ཚང་མེ་ ཁོང་རྒུ་ནི་ རོ་རྒུན་ ཚིམ་ཚིམ་ ཟོའེ་།