འབཱ་འབེ་ལོན་ནེ་ རྒྱལ་ས་ འཇིག་སྤོ་ ལྟོང་ཤུག་རྒེ་ ཛེད་།
18
ཏེ་ ལྟིང་ནི་ ངེ་ ཡང་ ཕོ་ཉ་ཞིག་ མ་ ཝང་ ཆོན་མོ་ ཉམ་པོ་ རྡེ་བ་ཅན་ནེ་ པབ་རྦེ་ ཐོང་, ཡང་ ཁོང་ངེ་ འདང་ངེ་ འཇིག་རྟེན་ སོན་ཏེ་ འོད་རྡེ་ ཀང་། 2 ཏེ་ ཕོ་ཉ་རྦེ་ ཀུ་ཅུ་ སྲན་ཀྲེ་ ས་ལེན་ མོལ་, “མིང་ཅེན་ འབཱ་འབེ་ལོན་ནེ་ རྒྱལ་ས་འབོ་ ལྟོང་རྡེ་ སོང་འདེ་། ཏོ་ རྡུད་རྒུན་ འདེད་སེ་ མལ་ལ་, འགོང་ཞུ་རྒུ་ནི་ འབྲང་ས་ ཡང་ ཀྲིཔ་ ཏང་ ཁམ་ལོག་ ཅ་རྒུ་ནི་ ཚང་ འགྱུར་། 3 འཇིག་རྟེན་པ་ ཚང་མ་ ཏེ་ པོ་མེ་ ལུའི་འབྲེལ་ ངན་པེ་ ཆང་ ཐུང་རྡེ་ ར་རོའེ་རྡེ་ འདུག་། འཇིག་རྟེན་ནེ་ རྒྱ་སྤོ་ ཚང་མེ་, ཏེ་ པོ་མོ་ ཉམ་པོ་ ལུའི་འབྲེལ་ ངན་པ་ པོར་། ཡང་ ཏེ་ པོ་མེ་ རྒྱུ་ནོར་ མང་པེ་ ཝང་འབེ་, འཇིག་རྟེན་ནི་ ཚོང་པ་རྒུན་ ཆུག་པོ་ འགྱུར་།”4 ཏེ་ནི་ ང་ རྡེ་བ་ཅན་ནེ་ ཡང་ སུང་ཧད་ཅིག་རྒེ་ མོལ་ལེན་ ཚོར་,
“ངེ་ མི་རྒུན་, ཏེ་ པོ་མེ་ རྡིག་པེ་ན་ འདྲེའེ་ མི་འདྲེའེ་ཤེ་ཕི་,
ཏེ་ རྒྱལ་སེ་ ནང་ནི་ འབིང་འདེ་ ཤོག་ཧེ་,
ཏེ་མ་ནི་ ཁྱི་ཞ་རྒུན་ལ་, ཏེ་ པོ་མོ་ ཉམ་པོ་ ཆེད་པ་ ཕོག་རྒེན་།
5 ཅེ་ཟེར་ནི་ ཏེ་ པོ་མེ་ རྡིག་པ་རྒུན་ མང་པོ་ སོང་འདེ་ རྡེ་བ་ཅན་ཚུག་པ་ལ་ ལེབ་ཏེ་ ནོག་།
ཡང་ ཀོན་འཇོག་རྒེ་ ཁོའེ་ ལེ་ཧ་ ངན་པ་རྒུན་ ཞེད་རྡེ་ མ་ཛེད་།
6 ཁོའེ་ ཞེན་མ་རྒུན་ལ་ ངན་པ་ ཅོ་ཀན་ ཙོག་སེ་, ཁོ་ ཉམ་པོ་ ཅོའེ་།
ཁོའེ་ ཅོ་ཀ་ནེ་ ཉི་ལྡབ་པོ་ ཁོ་ ཉམ་པོ་ ཅོའེ་།
ཡང་ ཁོའེ་ ནག་རྒེ་ ཀོ་རེ་ ཐུང་ཅུག་ཀན་འབོ་ ཉི་ལྡབ་ ཅོའེ་རྡེ་
ཁོ་ ཐུང་ཅུག་།
7 ཏེ་ པོ་མེ་ ཁོ་རང་ལ་ སྤལ་ རྡང་ རྒྱུ་ནོར་ ཐོབ་ཀན་
འདྲན་འདྲ་ ཁོ་ པར་རྡོ་ རྡང་ རྡུ་ངལ་ ཏོང་,
ཅེ་ཟེར་ནི་ ཏེ་ པོ་མེ་ ཁོ་རང་ངེ་ ཉིང་ངེ་ན་ ཕོ་སོ་ ཅོའེ་རྡེ་,
‘ང་ལ་ རྒྱ་མེ་ ཁྲིའི་ཀ་ འདེད་ཏེ་ འིན་།
ང་ནི་ འ་ནེ་ མ་རང་མོ་ མན་, ཡང་ ང་ མ་ནི་ ཚེར་ཧ་ ཅོ་ མི་རྒོའེ་’ ཟེར་འདུག་།
8 ཏེ་རྒ་རྦེ་ཕི་ལ་ ཞག་ཅིག་རྒེ་ན་ ངེ་ ཏེ་ རྒྱལ་སེ་ མི་རྒུན་ལ་ ཟུར་མོ་, ཤི་ཅེ་,
སེམ་ཚེར་ རྡང་ ལོར་ཧོན་རྒུ་ནི་ ཆེད་པ་ པབ་རྦེན་།
ཏེ་ རྒྱལ་ས་འབོ་ མེ་ སྲག་ ཏང་ངེན་,
ཅེ་ཟེར་ནི་ ཏེ་ རྒྱལ་ས་, ཁྲིམ་ཅེད་ སལ་ཧ་ནེ་ ཙོབོ་ ཀོན་འཇོག་རྦོ་ ཤུག་ཤེན་ འིན་།”
འབཱ་འབེ་ལོན་ནེ་ཕི་ ངུའི་།
9 ཏེ་ པོ་མོ་ ཉམ་པོ་ ལུའི་འབྲེལ་ ངན་པ་ རྡང་ ཁོའེ་ རྒྱུ་ནོར་རྒུ་ནི་ཀ་ ཐེད་པོ་ ཅོ་ཀ་ནེ་ འཇིག་རྟེན་ནེ་ རྒྱ་སྤོ་རྒུ་ནི་, འབཱ་འབེ་ལོན་ནེ་ ཏུད་པ་ འབིང་ངེན་ ཐོང་འདེ་ ཁོའེ་ཕི་ ཉ་ངན་ ཅོའེ་རྡེ་ ངུའི་། 10 ཏོ་རྒུ་ནི་ ཏེ་ པོ་མོ་རྦེ་ ཆེད་པ་ སྲན་ཀྲེའོ་ ཐོང་འདེ་ འཇིའི་རྡེ་ ཐག་རིང་ལ་ འདེད་ཏེ་ ངུའིན་ཞིག་ ཟེར་, “ཝ་ ཀྲག་པོ་ རྒྱལ་ས་ ཙམ་ཤིག་རྒེ་ འཇི་ནང་ འཇི་ནང་, འབཱ་འབེ་ལོན་ རྒྱལ་ས་ འཇིག་སྤོ་, ཏུའི་ མ་ ཉུང་ཙེ་ཞིག་རྒེ་ན་ ཀོན་འཇོག་རྒེ་ ཁྱེ་རང་ལ་ ཆེད་པ་ སལ་།”
11 འཇིག་རྟེན་ནེ་ ཚོང་པ་རྒུ་ནི་ལ་ འབཱ་འབེ་ལོན་ནེ་ཕི་ ངུའིན་, ཚེར་ཧ་ ཅོའེན་, ཅེ་ཟེར་ནི་ ཏི་ནི་ཕ་ལ་ ཁོང་རྒུ་ནི་ ཅ་ལག་ ཉོ་ཀན་ སུ་ཞི་ལ་ མི་ལུའི་། 12 སྤེར་ན་ སེར་, མུལ་, རྡོ་ རིན་ཅེན་, མུ་ཏིག་, རིན་ཅེན་ རྒྱ་སྤོ་རྒུ་ནི་ ཀོའེ་ རྡང་ ཀོ་ཤེན་, ཏྲི་ཞིམ་ ཡོ་ཀ་ནེ་ ཤིང་ངེ་ རིག་ ཚང་མ་, ལང་པོ་ཆེ་ སོ་ལ་ ཅོ་ཀ་ནེ་ ཅ་ལག་རྒུན་, རིན་ཅེན་ ཤིང་རྒུན་, ར་རྒན་, ལྕག་ རྡང་ རྡོ་ ཀ་མ་རུ་, 13 ཡང་ ཤིང་ངར་, མ་ས་ལ་, སྤོའེ་, མིར་ ཟེར་ཧ་ནེ་ ཏྲི་ཞིམ་ ཧུ་ཅེ་, ཞེན་ ཏྲི་ཞིམ་ཅེན་ནེ་ སྤོའེ་, རྒུན་འགྲུམ་མེ་ ཁོའེ་ རྡང་ ཨོ་ལི་ཝེ་ མར་, པག་པེ་ ཀར་སྤོ་ རྡང་ ཀྲོ་, པ་ལང་, ལུག་, ལྟ་ རྡང་ ལྟ་ཀྲམ་ཀྲམ་རྒུན་ འདང་, ཚེ་ཡོག་རྒུན་, འི་ ཚང་མ་ རྒྱལ་སེ་ན་ ཉོ་ཚོང་ ཏང་ཅེ་ཕི་ ཁྱོང་ངེ་ཡོད་པེན་། 14 ཡང་ ཚོང་པ་རྒུ་ནི་ ཏ་རུང་ང་ ཧད་ ཆོན་མོ་ ཉམ་པོ་ ཟེར་, “ཝ་ འབཱ་འབེ་ལོན་, ཁྱེ་རང་ངེ་ འདོད་པ་ ཅོ་ཀ་ནེ་ ཁ་ཟོའེ་རྒུན་ མེ་ཀན་ སོང་འདེ་ ནོག་། ཁྱེ་རང་ངེ་ ཆུག་ངོམ་ རྡང་ རྒྱུ་ནོར་ ཚང་མ་ རྐྱལ་རྡེ་ ཡང་ ལོག་ཏེ་ མ་ནི་ མི་ཐོབ་།”
15 ཏེ་ རྒྱལ་སེ་ན་ ཚོང་ ཏྃ་རྡེ་ ཆུག་པོ་ འགྱུར་ཧན་ ཚོང་པ་རྒུན་, འཇི་ནང་ཅེན་ནེ་ ཏེ་ རྒྱལ་སེ་ ཆེད་པ་ འཇི་སྤ་ ཐག་རིང་ལ་ འདེད་ཏེ་ ངུ་འིན་ ཉ་ངེན་ ཅོའེན་, 16 ཡང་ ཚེར་ཧ་ ཅོའེ་རྡེ་ ཟེར་རེན་, “ཝ་ ཀྲག་པོ་ རྒྱལ་ས་ ཙམ་ཤིག་རྒེ་ འཇི་ནང་ འཇི་ནང་། ཀོའེ་ལག་ རིན་ཅེན་ ཀར་སྤོ་, མར་མུག་ རྡང་ མར་སྤོ་, ཡང་ སེར་, རིན་ཅེན་ ཕྲོ་ རིག་ ཏང་ མུ་ཏིག་ ཏག་ཀ་ནེ་ པོ་མེ་ 17 རྒྱུ་ནོར་རྒུན་ སྲིབ་ཅིག་རྒེ་ན་, མེ་ཀན་ སོང་།”
ཏེ་ ཆུ་རེལ་རྒུ་ནི་ འུ་རྐྱོང་, ཏེ་ན་ འགྲུལ་ཧ་ནེ་ མི་རྒུན་, ཆུ་རེལ་ སྲུལ་ཧན་ རྡང་ ཚོ་ རྒྱུད་ཏེ་ མུལ་ ཅོ་ཀན་རྒུན་, མ་ ཐག་རིང་ཞིག་ལ་ ལྃ་རྡེ་ འདེད་རྡེན་། 18 རྒྱལ་ས་འབོ་ མེ་ ཞེན་འདེ་ ཏུད་པ་ འབིང་ངེན་ ཐོང་ཟ་ནི་, ཁོང་རྒུ་ནི་ ངུའིན་ ཟེ་རེན་, “འི་ རྒྱལ་ས་ ཙོག་སེ་ འཇིག་སྤོ་ རྒྱལ་ས་ཞིག་ མ་ནི་ མེད་ཁྲོ་།” 19 ཁོང་རྒུ་ནི་ ངུའིན་ ཚེར་ཧ་ ལྟན་ཅེ་ལ་ རང་ངེ་ འགོའེ་ཀ་ ཐལ་རྦ་ ཕྃ་རྡེ་ ཟེ་རེན་, “ཝ་ ཀྲག་པོ་ རྒྱལ་ས་ ཙམ་ཤིག་རྒེ་ འཇི་ནང་། ཆུ་རེལ་ལེ་ རྡག་པོ་ ཚང་མ་ ཏེ་ རྒྱལ་སེ་ རྒྱུ་ནོར་, ཚོ་ རྒྱུད་ཏེ་ འི་ངོ་ འ་ངོ་ རྐྱལ་ཅེ་རྦེ་ ཆུག་པོ་ འགྱུར་རྡེ་ འིན་འབེན་། ཁོའེ་ ནོར་རྒུན་ སྲིབ་ཅིག་རྒེ་ན་, མེ་ཀན་ ཛེད་།”
20 ཧད་ཅིག་རྒེ་ མོལ་, “རྡེ་བ་ཅན་ནེ་ན་ ཡོ་ཀན་རྒུན་, ཏེ་ རྒྱལ་ས་ ལྟོང་རྡེ་ ཆ་ཀན་འབེ་ཀ་ ཐེད་པོ་ ཅོའེ་ཧེ་། ཀོན་འཇོག་རྒེ་ མི་རྒུན་, ཧུ་ཚབ་རྒུན་ འདང་ ལུང་རྟོན་པ་རྒུན་ ཐེད་པོ་ ཅོའེ་ཧེ་། ཅེ་ཟེར་ནི་ ཁྱི་ཞ་ རྒྱཔ་འགལ་ ཅོ་ཅེ་རྦེ་ ཀོན་འཇོག་རྒེ་ ཁོ་ ཁྲིམ་ཅེད་ ཛེད་ཏེ་ ནོག་།”
21 ཏེ་ནི་ ཕོ་ཉ་ འཇིག་སྤོ་ཞིག་རྒེ་ རན་ཀྲག་རྒེ་ རྡོ་ ཙོག་སེ་ ཁུར་རྡེ་, ཏོ་ རྒྱམ་ཚོའེ་ན་ ཕྃ་ཏྃ་ ཡང་ མོལ་, “ཏེ་རྒ་ ཙོག་སེ་ ཤེད་ ཉམ་པོ་ འབཱ་འབེ་ལོན་ནེ་ རྒྱལ་ས་ འཇིག་སྤོ་ལ་ ཡོག་ལ་ མ་ནི་ མི་ཐོབ་ཅེ་ཕི་ ཕང་ངེན་, 22 འགྲམ་ཉན་ནེ་ ཧད་, ལུ་ཏང་ཀན་, ལིང་ངུ་ ཕུ་ཀན་, ཏུང་ ཕུ་ཀན་རྒུན་ ཏེ་ རྒྱལ་སེ་ན་ ཡང་ མ་ནི་ མི་ཚོར་། ལེ་ཧ་ ན་ཚོག་ ཅོ་ཀ་ནེ་ མི་རྒུན་ ཡང་ མ་ནི་ མི་ཐོབ་། རན་ཀྲག་རྒེ་ ཧད་རྡང་ ཡང་ མ་ནི་ མི་ཚོར་། 23 རྐྱོང་ཙེ་ འོད་པོ་ ཡང་ མ་ནི་ མི་ཐོང་། ཐེད་པོ་ཅེན་ནེ་ པག་པོ་ རྡང་ པག་མེ་ ཧད་རྒུན་ལ་ ཡང་ མི་ཚོར་། ཁྱེ་རང་ངེ་ ཚོང་པ་རྒུན་ འཇིག་རྟེན་ སོན་ཏེ་ན་ ཚང་མེ་སང་ མིང་ཅེན་ འདང་ ཝང་ཅེན་རྒུན་ འིན་འབེན་། ཡང་ ཁྱེ་རང་ངེ་ ངན་ཆོའེ་ ཅོའེ་རྡེ་, འཇིག་རྟེན་པ་ ཚང་མ་ལ་ འགོམ་ཧོར་ ཏྃ་།
24 ཁྱེ་རང་ངེ་ སྲང་རྒུ་ནི་ན་ ཀོན་འཇོག་རྒེ་ ལུང་རྟོན་པ་ རྡང་ ཁོང་ངེ་ཀ་ ཏེཏ་པ་ ཅོ་ཀན་རྒུ་ནི་ ཁྲག་ མ་ཚེད་ འཇིག་རྟེན་ནེ་ཀ་ སེད་ཀན་ ཚང་མེ་ ཁྲག་ རྒྱུག་ཏུག་།”