འཇང་ཙོ་མ་ རྡང་ འཇི་ནང་ཅེན་ནེ་ སེམ་ཅེན་།
17
རྒོར་མོ་ ཡོ་ཀ་ནེ་ ཕོ་ཉ་ རྡུན་ནེ་ ཕྲོ་ནི་ ཅིག་ ང་ས་ རྐྱོད་ཏེ་ མོལ་, “འི་རུ་ ཤོག་, སྃ་སྤོ་ མང་པེ་ ཐ་མ་ ཆག་རྡེ་ ཡོ་ཀ་ནེ་ མིང་ཅེན་ པོ་མོ་ འཇང་ཙོང་མ་a ཆེད་པ་ ཕོག་ཅེའོ་ ཁྱེ་རང་ལ་ ངེ་ ལྟན་ནེན་། 2 འཇིག་རྟེན་ནེ་ རྒྱ་སྤོ་ ཚང་མེ་, ཏེ་ པོ་མོ་ ཉམ་པོ་ ལུའི་འབྲེལ་ ངན་པ་ ཅོའེ་, ཡང་ ར་རོའེ་ཧན་ཞིག་, ཧ་འགྲང་ འགྱུར་རེ་ ཙོག་སེ་ འཇིག་རྟེན་པ་ ཏེཏ་པ་ མེ་ཀན་རྒུན་, ཏེ་ པོ་མེ་ ཤོད་པ་ ངན་པེ་ ལྟིང་འགྲྃ་ནི་ སོང་།”3 སེམ་ཡིད་རྡེ་ན་ ང་ ཏེ་ ཕོ་ཉ་རྦེ་ རི་རྟོང་ཞིག་རྒེ་ན་ ཁྲིད་ཏེ་ ཁྱེར་རེ་ ཛེད་། ཏུ་རུ་ ང་ འཇི་ནང་ཅེན་ནེ་ སེམ་ཅེན་ མར་སྤོ་ཞིག་ལ་ ཞོན་ཀ་ནེ་ པོ་མོ་ཞིག་ ཐོང་, ཏེ་ སེམ་ཅེན་འབོ་ལ་ འགོ་ རྡུན་ འདང་ རཱ་ཅོ་ ཅུ་ འདུག་, ཡང་ ཟུྃ་སྤོ་ སོན་ཏེ་ཀ་ ཀོན་འཇོག་ལ་ ཏེཏ་ལོག་ ཞུ་ཀ་ནེ་ མིང་རྒུན་ འབྲི་རྡེ་ འདུག་། 4 ཏེ་ པོ་མེ་ མར་སྤོ་ རྡང་ མར་མུག་b འདོག་རྒེ་ ཀོའེ་ མ་ རྡེ་མོ་ཞིག་ ཀོན་འདེ་ སེར་, རིན་ཅེན་, མུ་ཏིག་, རིན་ཅེན་ ཁྲ་ཟོ་ ཡོ་ཀ་ནེ་ རྒྱེན་ཆ་ ཏག་ཏེ་ ལག་པེ་ན་ ཁོའེ་ ལུའི་འབྲེལ་ ངན་པེ་ ཁམ་ལོག་ ཏང་ ཀྲིཔ་ ལེ་ཧ་རྒུན་ ཀང་འདེ་ ཡོ་ཀ་ནེ་ སེར་རེ་ ཀོ་རེ་ ཁུར་རྡེ་ འདུག་། 5 ཏེ་ པོ་མེ་ ཐོད་པེ་ཀ་ ཧ་ཀོ་ཅེ་ལ་ མ་ ཀག་སྤོ་ ཡོ་ཀ་ནེ་, མིང་ཞིག་ འབྲི་རྡེ་ འདུག་། ཏོ་, “མིང་ཅེན་ འབཱ་འབེ་ལོན་ནི་ རྒྱལ་ས་ འཇིག་སྤོ་འབོ་ འཇང་ཙོ་མ་ པོ་མོ་རྒུན་ འདང་ འཇིག་རྟེན་པ་རྒུ་ནི་ ཁམ་ལོག་ ལེ་ཧ་རྒུ་ནི་ ཨ་མ་ ནོག་།” 6 ངེ་ ཐོང་, ཏེ་ པོ་མོ་ ཀོན་འཇོག་རྒེ་ མི་རྒུ་ནི་ ཁྲག་ ཐུང་རྡེ་ ར་རོའེ་རྡེ་ འདུག་, ཀའོ་རྒུན་ ཡི་ཤུའི་ སྤང་པོ་ ཏང་ཅེ་རྦེ་ སེད་ཏེ་ འིན་འབེན་།
ཏོ་ ཐོང་འདེ་ ང་ ཧ་ལེ་ ཡང་ ཧན་འགྲང་ སོང་། 7 ཕོ་ཉེ་ ང་ མོལ་, “ཁྱེ་རང་ ཅེ་ ཧ་ལེ་རྡེ་ ཧན་འགྲང་ སོང་? ངེ་ ཁྱེ་རང་ལ་ ཏེ་ པོ་མོ་ རྡང་ ཁོ་ ཞོན་འདེ་ ཡོ་ཀ་ནེ་ འགོ་ རྡུན་ འདང་ རཱ་ཅོ་ ཅུ་ ཡོ་ཀ་ནེ་ འཇི་ནང་ཅེན་ནེ་ སེམ་ཅེན་ ཉ་ཧོའེ་ སང་སྤེར་འབོ་ ཧ་ཀོ་ཅུག་རྒེན་། 8 ཁྱེ་རང་ངེ་ ཐོང་ཀན་ འཇི་ནང་ཅེན་ནི་ སེམ་ཅེན་འབོ་ ངུལ་མ་ཞིག་ སོན་པོ་ ཡོད་པེན་, ཏག་ས་ མེད་ཏེ་ ནོག་, འིན་ན་ ཁོ་ ཐིལ་ མེ་ཀ་ནེ་ ཏིང་ རྒོ་རོང་ ནང་ནི་ འབིང་ངེན་, ཡང་ ཀོན་འཇོག་རྒེ་ ཁོ་ ཏུའི་རྒྱུན་ནི་ཕི་ མེ་ཀན་ ཛེད་རྡེན་། འཇིག་རྟེན་ མ་ཙུག་རྒེ་སང་ ངུལ་ལ་, ཐ་མེད་པེ་ མི་ཙེ་ སྤེ་ཆེ་ན་ མིང་ འབྲི་རྡེ་ མེ་ཀན་ འཇིག་རྟེན་པ་རྒུ་ནི་ ཏེ་ འཇི་ནང་ཅེན་ནེ་ སེམ་ཅེན་འབོ་ ཐོང་ངེ་རྡང་ ཧ་ལེ་རྡེན་, ཅེ་ཟེར་ནི་ ཁོ་ ངུལ་མ་ཞིག་ ཡོད་པེན་, ཏག་ས་ མེད་ཏེ་ ནོག་, འིན་ན་ ཡང་ ཡོང་ངེན་།”
9 ཕོ་ཉེ་ ཏ་རུང་ང་ མོལ་, “ཡུ་རྒུན་ ཧ་ཀོ་ཅེ་ལ་ ཁྱི་ཞ་རྒུན་ ཤེ་རབ་ཅེན་ རིག་ ཡོང་རྒོའེ་: འཇི་ནང་ཅེན་ནེ་ སེམ་ཅེན་ནེ་ འགོ་ རྡུན་ཀ་རྦོ་ རི་ ཆུང་ཙེ་ རྡུན་ ནོག་, ཀ་རྦེ་ཀ་ ཏེ་ པོ་མོ་ འདེད་ཏེ་ ཝང་སྲུལ་ལེ་ཡོད་། ཏེ་ འགོ་ རྡུན་ཀ་རྦོ་ རྒྱ་སྤོ་ རྡུན་ལ་ ནོག་། 10 རྒྱ་སྤོ་ ང་འབོ་ ཤི་རྡེ་ ཀྲུག་པ་རྦེ་ ཝང་སྲུལ་ལེན་ ནོག་, ཡང་ རྡུན་པ་འབོ་རྦོ་ འབིང་ཅེ་ ནོག་། འིན་ན་ ཁོའེ་ ཝང་སྲུལ་ཅེ་ ཏུའི་རྦོ་ ཉུང་ཙེ་ཞིག་ མ་ནི་ མི་ཡོང་། 11 ངུལ་མ་ཞིག་ སོན་པོ་ ཡོ་ཀན་ འཇི་ནང་ཅེན་ནེ་ སེམ་ཅེན་ མར་སྤོ་, འིན་ན་ ཏག་ས་ མེ་ཀན་འབོ་ རྒྱ་སྤོ་ རྒྱེད་པ་འབོ་རྦོ་ ནོག་། ཁོའེ་ ཞེན་ རྡུན་ཀ་ ཙོག་སེ་ ཝང་སྲུལ་ལེན་, འིན་ན་ ཀོན་འཇོག་རྒེ་ ཁོ་ ལྟོང་ཤུག་རྒེ་ ཛེད་རྡེན་། 12 ཁྱེ་རང་ལ་ ཐོང་ཀ་ནེ་ རཱ་ཅོ་ ཅུ་རྦོ་ ཏ་རུང་ཚུག་པ་ ཝང་ མ་སྲུལ་ཧ་ནེ་ རྒྱ་སྤོ་ ཅུ་ ནོག་། ཡང་ ཏོ་རྒུན་ལ་ འཇི་ནང་ཅེན་ནེ་ སེམ་ཅེན་ ཉམ་པོ་ ཏུའི་ ཉུང་ཙེ་ཞིག་རྒེ་ཕི་ ཝང་སྲུལ་ཅེ་ལ་ ཝང་ཆ་ ཏང་ངེན་། 13 ཏེ་ རྒྱ་སྤོ་རྒུ་ནི་ འཇི་ནང་ཅེན་ནེ་ སེམ་ཅེན་ལ་ ཁོ་རང་རྒུ་ནི་ ཁྱུད་ ཏང་ ཝང་ཆ་རྒུན་ ཏང་ཅེ་ལ་ ཁ་ཆམ་མེན་།”
ལུ་རྒུ་ལ་ རྒྱལ་ཁ་ ཐོབ་།
14 འཇི་ནང་ཅེན་ནེ་ སེམ་ཅེན་ འདང་ རྒྱ་སྤོ་ ཅུ་ཀེ་ ལུ་རྒུ་ ཉམ་པོ་ མག་ ཏང་ངེན་, འིན་ན་ ལུག་རྒུ་ལ་ ཏོ་རྒུ་ནི་ཀ་ རྒྱལ་ཁ་ ཐོབ་རྦེན་། ཅེ་ཟེར་ནི་ ཁོང་ནི་ ཙོབོ་རྒུ་ནི་ ཙོབོ་ རྡང་ རྒྱ་སྤོ་རྒུ་ནི་ རྒྱ་སྤོ་ ཞུ་རྡེ་ནོག་། ཁོང་ངེ་ འབོ་ ཛེད་ཏེ་ འདམ་མེ་ ཛེད་ཏེ་ ཁོང་ངེ་ན་ ལོ་ཁྱེལ་ ཅོ་ཀན་རྒུན་ ཁོང་ ཉམ་པོ་ འདེད་རྡེན་། 15 ཏེ་ནི་ ཏེ་ ཕོ་ཉ་རྦེ་ ང་ མོ་ལེ་རག་, “ཏེ་ འཇང་ཙོ་མ་ འདེད་ཏེ་ ཡོ་ཀ་ནེ་ སྃ་སྤོ་རྒུ་ནི་ མི་རྒུན་, མི་ཚོག་རྒུན་, རྒྱལ་ཁབ་རྒུན་ འདང་ ཧད་རིག་རྒུན་ ནོག་། 16 རཱ་ཅོ་ ཅུ་ རྡང་ འཇི་ནང་ཅེན་ནེ་ སེམ་ཅེན་ནེ་, ཏེ་ འཇང་ཙོང་མ་ སོག་པོ་ ཅོའེན་། ཁོང་རྒུ་ནི་ ཁོའེ་ཀ་ནི་ ཅི་ཚང་མ་ ཀོག་ཏེ་ ཁོ་ ལྕུ་རུ་ ཅོའེན་, ཡང་ ཁོའེ་ ཤ་རྒུན་ ཟོའེ་རྡེ་ ལག་ལུའི་རྒུན་ མེ་ལ་ སྲག་རྒེན་། 17 ཀོན་འཇོག་རྒེ་ ཐུག་ཐེད་པོ་ ཀྲུཔ་ཅེ་ལ་, ཁོང་ངེ་ ཏེ་ ཝང་སྲུལ་པ་རྒུ་ནི་ ཉིང་ངེ་ན་ ཐབ་ཅིག་ ལྡིང་ངེ་ ཛེད་། ཀོན་འཇོག་རྒེ་ ཀའ་རྒུན་ འདྲན་འདྲ་ ཀྲུཔ་ཅེ་ཕི་ ཁོང་རྒུ་ནི་ ཝང་ཆ་རྒུན་ འཇི་ནང་ཅེན་ནེ་ སེམ་ཅེན་འབོ་ལ་ ཏང་ཅེ་ལ་ ཁ་ཆམ་ཅུག་རྒེ་ ཛེ་རྡེན་། 18 ཡང་ ཁྱེ་རང་ངེ་ ཐོང་ཀ་ནེ་ པོ་མོ་རྦོ་ འཇིག་རྟེན་ནེ་ རྒྱ་སྤོ་རྒུ་ནི་ཀ་ ཝང་སྲུལ་ལེན་ ཡོ་ཀ་ནེ་ རྒྱལ་ས་ འཇིག་སྤོ་རྦོ་ ནོག་།”