ཀོན་འཇོག་རྒེ་ ཐུག་སྲོའེ་ རྒོར་མོ་ རྡུན་།
16
ཏེ་ནི་ ངེ་ ཀོན་འཇོག་རྒེ་ ཁང་པེ་ ནང་ནི་ ཧད་ ཆོན་མོ་ཞིག་རྒེ་ ཕོ་ཉ་ རྡུན་ཀ་ལ་ ཟེར་རེ་ ཚོར་, “སོང་འདེ་ ཀོན་འཇོག་རྒེ་ ཐུག་སྲོ་ ཧང་ཀ་ནེ་ རྒོར་མོ་ རྡུན་ཀ་ འཇིག་རྟེན་ནེ་ཀ་ པོའེ་ཏོང་།”2 ཏེ་ནི་ ཕོ་ཉ་ ཏང་པོ་ སོང་འདེ་ ཁོ་རང་ངེ་ རྒོར་མེ་ན་ ཡོ་ཀན་འབོ་ འཇིག་རྟེན་ནེ་ཀ་ པོའེ་ཏྃ་། ཏེ་ འཇི་ནང་ཅེན་ནེ་ སེམ་ཅེན་ནེ་ ཐེ་ཙེ་ ཡོ་ཀན་ ཡང་ ཏོ་རྦེ་ ཧུ་འདྲ་ ཅོལ་ཧན་རྒུ་ནི་ ཟུྃ་སྤེ་ཀ་ འཇིག་ཤེ་ རྡང་ ཟུག་ཟེར་ སྲན་ཀྲེ་ཅེན་ནེ་ ཆུལ་རྒང་ འབིང་།
3 ཏེ་ནི་ ཕོ་ཉ་ ཉི་སྤེ་ རྒོར་མེ་ན་ ཡོ་ཀན་འབོ་ རྒྱམ་ཚོའེ་ཀ་ ལུག་པེ་, རྒྱམ་ཚོ་ སོན་ཏེ་ མི་ ཤི་ཀ་ནེ་ ཁྲག་ ཙོག་སེ་ འགྱུར་, ཡང་ རྒྱམ་ཚོའེ་ན་ ཡོ་ཀ་ནེ་ སྲོག་ ཡོ་ཀན་ ཚང་མ་ ཤི་།
4 ཏེ་ནི་ ཕོ་ཉ་ སུམ་པེ་ རྒོར་མེ་ན་ ཡོ་ཀན་འབོ་ སྃ་སྤོ་ རྡང་ ཆུ་མིག་རྒུ་ནི་ཀ་ ལུག་པེ་, ཏེ་ ཆུ་རྒུན་ལ་ ཁྲག་ལ་ འགྱུར་། 5 ཡང་ ངེ་ ཆུ་རྒུ་ནི་ཀ་ ཝང་ཆ་ ཡོ་ཀ་ནེ་ ཕོ་ཉ་རྦེ་ ཟེར་རེ་ ཚོར་, “ཉེ་རང་ངེ་ ཁྲིམ་ཅེད་རྒུན་ ཀྲང་པོ་ འིན་། ཉེ་རང་ ཞུ་རྡེ་ཡོད་, ཡང་ ཞུ་རྡེ་ ཡོད་པེན་། ཡང་ ཉེ་རང་ ཏམ་པ་ ཞུ་རྡེ་ འིན་, ཅེ་ཞུ་ནི་ ཉེ་རང་ངེ་ འོའེ་སྤེ་ ཁྲིམ་ཅེད་རྒུན་ ཛེད་ཏེ་ ནོག་། 6 ཁོང་རྒུ་ནི་ ཀོན་འཇོག་རྒེ་ མི་ རྡང་ ལུང་རྟོན་པ་རྒུ་ནི་ ཁྲག་ པོ་ཅེ་ཀ་ནི་, ཉེ་རང་ངེ་ ཁོང་རྒུན་ལ་ ཁྲག་ ཐུང་ལ་ སལ་, ཀའོ་ འོའེ་སྤ་ འིན་།” 7 ཏེ་ནི་ ངེ་ ཆོད་ཁྲི་ཀ་ནི་ ཧད་ཅིག་རྒེ་,
“ཀྱེ་ ཙོབོ་ ཀོན་འཇོག་ ཀུན་ཝང་ རྡེན་འབའ་ ཉེ་རང་ངེ་ ཁྲིམ་ཅེད་རྒུན་ འོའེ་སྤ་ རྡང་ ཀྲང་པོ་ ནོག་” མོ་ལེན་ ཚོར་།
8 ཏེ་ནི་ ཕོ་ཉ་ ཞི་པེ་ རྒོར་མེ་ན་ ཡོ་ཀན་འབོ་ ཉི་མེ་ཀ་ པོ་ཅེ་ཀ་ནི་, ཏོ་རྦེ་ ཚད་པོ་ མི་ཚང་མ་ མེ་ ཚིག་ཅུག་། 9 འིན་ན་ ཏེ་ ཚད་རྡེ་ ཚིག་ཀན་ ཚང་མེ་, ཁོ་རང་ངེ་ རྡིག་པ་ ཕྃ་རྡེ་ སེམ་འགྱུར་རྡེ་ འི་ རྡུ་ངལ་ ཚང་མེ་ཀ་ ཝང་ཆ་ ཡོ་ཀ་ནེ་ ཀོན་འཇོག་ལ་ སི་ཝ་ མ་ཅོ་ལ་, ཁོང་ངེ་ ཚན་འབོ་ལ་ ངན་ ཏབ་ཏུག་།
10 ཏེ་ནི་ ཕོ་ཉ་ ང་པེ་ རྒོར་མེ་ན་ ཡོ་ཀན་འབོ་ འཇི་ནང་ཅེན་ནེ་ སེམ་ཅེན་ནེ་ ཁྲིའི་ཀ་ ལུག་ཏྃ་རྦེ་ ཁོའེ་ རྒྱལ་སྲིད་ སོན་ཏེ་ མུན་ཀྲག་རྒེ་ ཀབ་ ཏྃ་། ཁོའེ་ ཁ་ཉེན་ཀན་རྒུ་ནི་ ཟུག་ཟེར་ ཆོན་མོ་ ཡོང་ཅེ་རྦེ་, རང་ངེ་ ལྕེ་རྒུན་ལ་ སོ་རྒ་ ཏབ་། 11 ཡང་ ཁོང་རྒུན་ལ་ རྡུ་ངལ་ ཆོན་མོ་ རྡང་ ཆུལ་རྒང་ ཡོད་ཅེ་རྦེ་, ཁོང་རྒུ་ནི་ རྡེ་བ་ཅན་ ཞུ་ཧ་ནེ་ ཀོན་འཇོག་ལ་ ངན་ ཏབ་, འིན་ན་ ཁོ་རང་རྒུ་ནི་ ལེ་ཧ་ ངན་པ་རྒུ་ནི་ཀ་ འགྱོད་པ་ ཅོའེ་རྡེ་ ཀོན་འཇོག་ ཆོག་ལ་ སེམ་ མ་འགྱུར་།
12 ཏེ་ནི་ ཕོ་ཉ་ ཀྲུག་པེ་ རྒོར་མེ་ན་ ཡོ་ཀན་འབོ་ ཨུཕ་ར་ཀྲེ་ སྃ་སྤོ་ ཆོན་མེ་ན་ པོ་ཅེ་ཀ་ནི་, སྃ་སྤོ་རྦོ་ ཧམ་, ཏོ་རྦེ་ ཅོའེ་རྡེ་ ཤར་ ཆོག་རྒེ་ རྒྱ་སྤོ་རྒུན་ལ་ ཁོ་རང་རྒུ་ནི་ མག་མི་རྒུན་ རྒག་རྐྱིལ་ མེད་རྡེ་, ལོ་ ཆོག་ལ་ ཁྱོང་ཉེན་། 13 ཡང་ ངེ་ འབྲུག་, འཇི་ནང་ཅེན་ནེ་ སེམ་ཅེན་ འདང་ ཟུའི་མེ་ ལུང་རྟོན་པ་ སུམ་ཀེ་ ཁ་ནི་ རྦལ་སྤ་ ཙོག་སེ་ ཀྲིཔ་ སེམ་ཉིད་རྒུན་ འབིང་ངེན་ ཐོང་། 14 ཏོ་རྒུན་ ཧ་ལེ་ཤེ་ ལྟའ་རྒུན་ ལྟན་ཅེ་ལ་ ཁྱུད་ ཡོ་ཀ་ནེ་ རྡུད་རྒུ་ནི་ སེམ་ཉིད་རྒུན་ ནོག་, ཡང་ ཏོ་རྒུན་ འཇིག་རྟེན་ནེ་ཀ་ རྒྱ་སྤོ་ ཚང་མ་ས་ སོང་འདེ་ ཙོབོ་ ཀོན་འཇོག་རྒེ་ རྒྱཔ་འགལ་ལ་ ཀོན་འཇོག་ ཀུན་ཝང་ངེ་ ཀྲག་པོ་ ཁྲིམ་ཅེད་རྡེ་ ཞག་ལ་, མག་ ཏང་ཅེ་ལ་ ཛོམ་ཅུག་། 15-16 ཁོང་རྒུ་ནི་ རྒྱ་སྤོ་ ཚང་མ་ ཨིབ་རི་པེ་ ཧད་རྡེ་ན་ ཨར་མ་འགེ་འདོན་ ཟེར་ཧ་ནེ་ མལ་རྦེ་ཀ་ ཛོམ་ཅུག་།
ཙོབོ་ ཡི་ཤུའི་ མོལ་ “ལྟོའེ་རྡང་, ང་ ཧུན་མེད་ལ་ ཧུན་མ་ ཙོག་སེ་ ཡོང་ཟ་ནི་, ལྕུ་རུ་ལ་ ཁྲེལ་རྦ་ མི་ཆ་ཤེ་ཕི་, ཤང་ ཅོའེ་རྡེ་ ཀོའེ་ལག་ ཀྲལ་འགྲིག་ པོར་ཧན་རྒུན་ ཅིན་ལབ་ཅེན་ འིན་།”
17 ཡང་ ཕོ་ཉ་ རྡུན་པེ་ རྒོར་མེ་ན་ ཡོ་ཀན་འབོ་ ལུང་སྤེ་ན་ པོའེ་རྦེ་, ཀོན་འཇོག་རྒེ་ ཁང་པེ་ ནང་ནི་ ཀོན་འཇོག་རྒེ་ ཞུ་ཁྲིའི་ཀ་ནི་ ཧད་ ཆོན་མོ་ཞིག་ ཅུང་འདེ་ མོལ་, “ཏ་ ཀྲུཔ་ ཚར་།” 18 ཏེ་ནི་ ལོག་རྒེ་ འོད་, འབྲུག་ཧད་ཏང་ཀ་ནེ་ ཧད་ ཡང་ ཏུ་ཟུག་ སྃ་འགུལ་ འཇི་སྤ་ཞིག་ འཇིག་རྟེན་ནེ་ཀ་ ཡོྃ་, ཀའོ་ འི་ འཇིག་རྟེན་ནེ་ཀ་ མི་ ཛེད་པ་ནི་ཕ་ལ་ ཏག་ས་ཚུག་པ་ མ་ནི་ མ་ཡོང་ཀན་ཞིག་། 19 མིང་ཅེན་ནེ་ འབཱ་འབེ་ལོན་ནེ་ རྒྱལ་ས་རྦོ་ པོ་སུམ་ལ་ པུད་, ཡང་ རྒྱལ་ཁབ་ ཚང་མེ་ རྒྱལ་ས་རྒུན་ལ་ ཞིག་རྡེ་ སོང་། ཀོན་འཇོག་རྒེ་ འབཱ་འབེ་ལོན་པ་རྒུ་ནི་ རྡིག་པ་རྒུན་ ཞེད་ མི་ཞེད་ཅེ་ཀ་ནི་, ཁོང་ངེ་ ཁོང་རྒུན་ལ་ ཁོང་ངེ་ མ་ ཐུག་སྲོ་ སྲན་ཀྲེ་ ཆང་ངེ་ ཧང་འདེ་ ཡོ་ཀ་ནེ་ འདོན་རྐྱོ་རྦོ་ ཐུང་ཅུག་རྒེ་ ཛེད་། 20 ཡང་ སང་འགུལ་ལེ་ ཅོའེ་རྡེ་ ཚོ་ལིང་ ཡང་ནི་ ཆུའི་ ཧོར་རྡེ་ ཡོ་ཀ་ནེ་ ས་ཅ་ ཚང་མ་ ཚོའེ་ན་ ནུབ་ཏེ་ སོང་, ཡང་ རི་རྒུན་ ཏོག་རྐྱལ་རྡེ་ མ་ནི་ མ་ཐོང་། 21 སེ་ར་ རེ་རེ་ ཧ་ལམ་ ཀྱེ་ལོ་ ཞིབ་ཅུ་ཞེ་ང་ ལྕིན་ཀྲེ་ ཡོད་ཀེན་, ནམ་ནི་ མི་རྒུ་ནི་ཀ་ པབ་། ཏེ་ སེ་ར་ འཇི་ནང་ཅེན་ནེ་ རྡུག་ངལ་ ཐོང་ཅེ་རྦེ་ ཁོང་རྒུ་ནི་ ཀོན་འཇོག་ལ་ ངན་ ཏབ་།