ངོན་ཅུག་ཀ་ནེ་ སྤེ་ཆ་ 15

མོ་ཤེ་ རྡང་ ལུ་རྒུའི་ སལ་ཧ་ནེ་ ལུ་།

ཏེ་ནི་ ང་ རྡེ་བ་ཅན་ནེ་ན་ ཧ་ལེ་ཤེ་ ལྟའ་ཞིག་ ཐོང་, ཕོ་ཉ་ རྡུན་ནེ་ ཡོང་ཅེ་ཅེན་ནེ་ རྡུ་ངལ་ རྡུན་ ཁུར་རྡེ་ འདུག་, ཏེ་རྒ་རྒུན་ ཀོན་འཇོག་རྒེ་ ལྟིང་འཇུག་རྒེ་ ཆེད་པ་རྦོ་ ནོག་། 2 ང་ མེ་ ཉམ་པོ་ འདྲེའེ་ཧ་ནེ་ ཤེལ་ལེ་ རྒྱམ་ཚོ་ ཙོག་སེ་ ཐོང་། ཡང་ ཏེ་ ཐ་མ་ ལྃ་རྡེ་ འདེད་ཀན་རྒུ་ནི་, འཇི་ནང་ཅེན་ནེ་ སེམ་ཅེན་ནེ་ཀ་ནི་ རྒྱལ་ཁ་ ཐོབ་ཀན་རྒུན་ ནོག་, ཅེ་ཟེར་ནི་ ཁོང་རྒུ་ནི་ ཏེ་ སེམ་ཅེན་, ཡང་ ཏོ་རྦེ་ ཧུ་འདྲ་ ཆག་ མ་པུལ་ ཡང་ ཏོ་རྦེ་ ཨང་ཀྲང་ངེ་ ཐེ་ཙེ་རྦོ་ ཁོ་རང་རྒུ་ནི་ཀ་ ཅོ་ མ་ཅུག་། ཁོང་རྒུ་ནི་ ལག་པེ་ན་ ཀོན་འཇོག་རྒེ་ སལ་ཧ་ནེ་ འགྲམ་ཉན་ ཁུར་རྡེ་ འདུག་། 3 ཡང་ ཁོང་རྒུ་ནི་ ཀོན་འཇོག་རྒེ་ ཞབ་རྟོག་པ་ མོ་ཤེ་ རྡང་ ལུ་རྒུའི་ སལ་ཧ་ནེ་ ལུ་ ཏང་འདུག་,

“ཀྱེ་ ཙོབོ་ ཀོན་འཇོག་ ཀུན་ཝང་

ཉེ་རང་ངེ་ ཆག་ལེ་རྒུན་ ཀྲག་པོ་ རྡང་ ཧ་ལེ་ཤེ་ ནོག་།

རྒྱལ་ཁབ་ ཚང་མེ་ རྒྱ་སྤོ་།

ཉེ་རང་ངེ་ ཛེད་ཀན་རྒུན་ འོའེ་སྤ་ རྡང་ རྡེན་འབའ་ ནོག་།

4 ཀྱེ་ ཙོབོ་, ཉེ་རང་ལ་ སུ་ མི་འཇིའི་?

ཉེ་རང་ངེ་ ཚན་ལ་ སུའི་ རྟོད་པ་ མི་པུལ་?

ཉེ་རང་ ཅིག་པོ་ ཏམ་པ་ ཞུ་རྡེ་ འིན་།

རྒྱལ་ཁབ་ ཚང་མ་ ཡོྃ་རྡེ་ ཉེ་རང་ངེ་ ཧུ་འདུན་ལ་ ཅོལ་ལེན་,

ཅེ་ཟེར་ནི་ ཉེ་རང་ངེ་ རང་ངེ་ ཆག་ལེ་ ཀྲང་པོ་རྒུན་ ངོན་ཅུག་རྒེ་ ཛེད་ཏེ་ ནོག་།”

ཕོ་ཉ་ རྡུན་ འདང་ རྡུ་ངལ་ རྡུན་།

5 ཏེ་ ལྟིང་ནི་ ངེ་ རྡེ་བ་ཅན་ནེ་ན་ ཀོན་འཇོག་རྒེ་ ཁང་པ་ ཡང་ནི་, ཀོན་འཇོག་རྒེ་ སྤང་པེ་ ཀུར་རྦོ་ པེ་རྡེ་ ཐོང་། 6 རྡུ་ངལ་ ཡོང་ཅུག་ཅེ་ ཝང་ཆ་ སལ་རྡེ་ ཡོ་ཀན་ ཕོ་ཉ་ རྡུན་ཀ་ ཀོན་འཇོག་རྒེ་ ཁང་པ་ནི་ འབིང་འདེ་ ཡོྃ་། ཏེ་ ཕོ་ཉ་རྒུ་ནི་ ལག་མོ་ ཀོའེ་ ཀར་སྤོ་ ཀོན་འདེ་ ཀྲང་ངེ་ཀ་ སེར་རེ་ རེ་ སྲིལ་རྡེ་ འདུག་། 7 ཏེ་ནི་ ཏེ་ སྲོག་ ཡོ་ཀན་ ཞི་ཀེ་ ཕྲོ་ནི་ ཅིག་རྒེ་, ཏེ་ ཕོ་ཉ་ རྡུན་ཀ་ལ་ སེར་རེ་ རྒོར་མོ་ རེ་རེ་ པུལ་, ཀ་རྦེ་ན་ ཏུའི་རྒྱུན་ནི་ཏུའི་རྒྱུན་ ཞུ་ཧ་ནེ་ ཀོན་འཇོག་རྒེ་ ཐུག་སྲོ་ ཀང་འདེ་ འདུག་། 8 ཀོན་འཇོག་རྒེ་ ཁང་པ་འབོ་ ཀོན་འཇོག་རྒེ་ ཧ་ལེ་ཤེ་ཅེན་ནེ་ ཟི་ཞིད་ ཏང་ ཁྱུད་རྡེ་ ཏུད་པེ་ ཀང་འདེ་ འདུག་། ཏམ་པེ་ ཀོན་འཇོག་རྒེ་ ཁང་པེ་ན་ སུ་ཞི་ལ་ ཞུའུ་ མི་ཉེན་ ནམ་ཚུག་པ་, ཕོ་ཉ་ རྡུན་ཀེ་ རྡུ་ངལ་ རྡུན་ཀ་ ཁྱོང་ཅེ་ ལེ་ཧ་རྦོ་ འདྲན་འདྲ་ ཀྲུབ་ མི་ཀྲུབ་།