ངོན་ཅུག་ཀ་ནེ་ སྤེ་ཆ་ 14

མི་ འབུམ་ཅིག་ཏང་ ལྟོང་ཞིབ་ཅུ་ཞེབ་ཞི་ རྡང་ ལུ་རྒུ་།

ཏེ་ནི་ ངེ་ ལྟ་ཟ་ནི་ ཟི་ཡོན་ ཟེར་ཧ་ནེ་ རི་རྒེ་ཀ་ ཏེ་རྒ་ ལུ་རྒུ་རྦོ་ ཞྃ་རྡེ་ ཐོང་, ཡང་ ཐོད་པེ་ཀ་ ལུ་རྒུ་ རྡང་ ཁོང་ངེ་ ཡབ་རྦེ་ ཚན་ འབྲི་ཛེད་ཀ་ནེ་ མི་ འབུམ་ཅིག་ཏང་ ལྟོང་ཞིབ་ཅུ་ཞེབ་ཞི་ ཁོང་ ཉམ་པོ་ འདུག་། 2 ཡང་ ང་ རྡེ་བ་ཅན་ནེ་ ཧད་ ཀྲག་པོ་ཞིག་ ཚོར་ ཀ་འབོ་ ཤེད་ཅེན་ རྒྱུག་ཀ་ནེ་ ཆུ་ ཧད་ ཀྲག་པོ་ ཡང་ ངད་ཅེན་ འབྲུག་ཧད་ཏང་ཀན་ ཙོག་སེ་ རག་པེན་། ཏེ་ ཧད་པོ་ མི་ མང་པོ་ཞིག་རྒེ་ འགྲམ་ཉན་ རོལ་ཧན་ ཙོག་སེ་ རག་པེན་།

3 ཁོང་རྒུ་ནི་ ཞུ་ཁྲིའི་, སྲོག་ ཡོ་ཀན་ ཞི་ཀ་ རྡང་ འུ་རྐྱོང་རྒུ་ནི་ འདུན་ལ་ ལུ་ སོ་མ་ཞིག་ ཏྃ་། ཏེ་ ལུ་རྦོ་ ཀོན་འཇོག་རྒེ་ རྐྱོབ་རྦེ་ ཛེད་ཀན་ འབུམ་ཅིག་འདང་ ལྟོང་ཞིབ་ཅུ་ཞེབ་ཞི་ མི་རྒུན་ མ་ཐེ་ལ་, སུ་ལ་ ལོབ་ མི་ཉེན་། 4 ཁོང་རྒུན་ ཏམ་པ་, པོ་མོ་ ཉམ་པོ་ ལུའི་འབྲེལ་ མ་ནི་ མེ་ཀན་ འདང་ ལུ་རྒུ་ ཀ་རུ་ ཆ་ནང་ ཁོང་ངེ་ ལྟིང་འགྲྃ་ནི་ ཆ་ཡོད་པེན་། ཡང་ ཁོང་རྒུན་ མི་རྒུ་ནི་ ཕྲོ་ནི་ ཉོ་ ཛེད་ཏེ་ རྟོན་ཏོག་རྒེ་ འགྲུ་ འགོ་མ་རྦོ་ ཙོག་སེ་ ཀོན་འཇོག་ ཏང་ ལུ་རྒུ་ལ་ པུ་ལེ་ ཛེད་། 5 ཁོང་རྒུ་ནི་ ཁ་ནི་ ཟུན་ མ་ནི་ མ་འབིང་, ཡང་ ཁོང་རྒུན་ རྐྱོན་མེ་ཀན་ ནོག་།

ཕོ་ཉ་ སུམ་།

6 ཏེ་ནི་ ངེ་ ནམ་མེ་ རྐྱིལ་ལ་ ཕུར་རེན་ ཡོ་ཀ་ནེ་ ཞེན་ ཕོ་ཉ་ཞིག་ ཐོང་། ཁོའེ་ ཐ་ མ་ནི་ མེ་ཀ་ནེ་ ནེ་ཚུལ་ ཟང་པོ་, འཇིག་རྟེན་པ་ ཚང་མེ་ ཤེད་ཏུག་ ཀ་འབོ་ རྒྱལ་ཁབ་, མི་རིག་, ཧད་རིག་ ཏང་ མི་རྒུན་ ནོག་། 7 ཡང་ ཏེ་ ཕོ་ཉ་རྦེ་ ཧད་ ཆོན་མེ་ན་ མོལ་, “ཏ་ ཀོན་འཇོག་རྒེ་ ཁྲིམ་ཅེད་རྡེ་ ཏུའི་ ལེབ་པེ་, ཁོང་ལ་ འཇིའི་ཤིག་ ཡང་ སི་ཝ་ ཅོའེ་ཧེ་། ནམ་ཀ་, ས་ཀྱེཏ་, རྒྱམ་ཚོ་ རྡང་ ཆུའི་ ཆུ་མིག་རྒུན་ ཛེད་ཀ་ནེ་ ཀོན་འཇོག་ལ་ ཅོལ་ཧེ་།”

8 ཕོ་ཉ་ ཏང་པེ་ ལྟིང་འགྲྃ་ནི་ ཞེན་ཡང་ ཕོ་ཉ་ཞིག་ རྐྱོད་ཏེ་ མོལ་, “འབཱ་འབེ་ལོན་ནེ་ རྒྱལ་ས་ མིང་ཅེན་ ངན་པ་རྦོ་ ཞིག་ཏེ་ མེད་, ཀ་རྦེ་ འཇིག་རྟེན་ནེ་ རྒྱལ་ཁབ་ ཚང་མེ་ མི་རྒུན་ལ་, ཁོའེ་ ལུའི་འབྲེལ་ལེ་ འདོད་པ་ ངན་པེ་ ཆང་འབོ་ ཐུང་ཅུག་།”

9 ཁོང་རྒུ་ནི་ ལྟིང་འགྲྃ་ནི་ ཕོ་ཉ་ སུམ་པ་རྦོ་ རྐྱོད་ཏེ་ མ་ ཧད་ ཆོན་མོ་ ཉམ་པོ་ མོལ་, “སུ་ཞིག་རྒེ་ ཏེ་ འཇི་ནང་ཅེན་ནེ་ སེམ་ཅེན་ འདང་ ཁོའེ་ ཧུ་འདྲ་ ཅོལ་ནི་, ཡང་ ཁོའེ་ ཐེ་ཙེ་རྦོ་ ཁོ་རང་རྒུ་ནི་ ཐོད་པ་ ཡང་ ལག་པེ་ཀ་ ཅོ་ཅུག་ནི་, 10 ཁོང་རྒུན་ལ་ ཀོན་འཇོག་རྒེ་ ཐུག་སྲོའེ་ རྒུན་འགྲུམ་མེ་ ཆང་རྦོ་ ཐུང་རྒོའེ་རྡེན་, ཀའོ་ ཁོང་ངེ་ ཐུག་སྲོའེ་ འདོན་རྐྱོག་རྒེ་ན་ ཅང་ མ་སྲེ་ཀན་ ཀར་རྦ་ ལུག་རྒེ་ ཛེད་ཏེ་ འིན་། ཡང་ ཁོང་རྒུན་ལ་ ཀོན་འཇོག་རྒེ་ ཏམ་པེ་ ཕོ་ཉ་ རྡང་ ལུ་རྒུའི་ ཧུ་འདུན་ལ་ མེ་ རྡང་ མུ་ཟི་ མེ་ལ་ ཞེན་ནེན་ ཡོ་ཀན་རྒུ་ནི་ན་ རྡུ་ངལ་ ཐོང་ངེན་། 11 ཁོང་རྒུ་ནི་ ནག་རྒེ་ ཏུད་པ་རྦོ་ ཏུའི་རྒྱུན་ནི་ཏུའི་རྒྱུན་ འབིང་ངེན་ འདེད་རྡེན་། ངལ་ཚོ་ མ་ནི་ མེད་རྡེ་, ཁོང་རྒུན་ལ་ ཚེན་ཉིན་ སོན་ཏེ་ པར་རྡོ་ ཐོང་ངེན་, ཅེ་ཟེར་ནི་ ཁོང་རྒུ་ནི་ འཇི་ནང་ཅེན་ནེ་ སེམ་ཅེན་ འདང་ ཏོ་རྦེ་ ཧུན་འདྲ་ ཅོལ་, ཡང་ ཁོའེ་ མིང་ངེ་ ཐེ་ཙེ་རྦོ་ ཁོ་རང་རྒུ་ནི་ཀ་ ཅོ་ཅུག་།”

12 ཏེ་རྒ་རྦེ་ཕི་ལ་ ཀོན་འཇོག་རྒེ་ མི་རྒུ་ནི་ ནག་པར་རྡོ་རྒུན་ ཟོད་པ་ ཉམ་པོ་ ཁུར་རྡེ་ ཀོན་འཇོག་རྒེ་ ཀཱ་རྒུན་ ཉེན་ཅེ་ རྡང་ ཏེཏ་པ་རྦོ་ ཡི་ཤུའི་ན་ རྟེམ་པོ་ པོར་རྒོའེ་།

13 ཏེ་ནི་ ངེ་ རྡེ་བ་ཅན་ནེ་ ཧད་ཅིག་རྒེ་ ཟེ་རེན་ ཚོར་, “འི་རྦོ་ འབྲི་, ཏེ་ནི་ཕ་ལ་ ཙོབོ་རྡེ་ཀ་ ཏེཏ་པ་ ཅོ་ཅེ་རྦེ་ ཤི་རྒོའེ་ཧན་རྒུན་ ཅིན་ལབ་ཅེན་ འིན་།” ཏམ་པེ་ ཐུག་ཡིད་རྡེ་ མོལ་, “འོ་ནེ་ རྡེན་འབའ་, ཁོང་རྒུན་ལ་ ཅིན་ལབ་ ནེན་ཏེན་ ཐོབ་རྦེན་། ཁོང་རྒུན་ལ་ ལེ་ཧ་ ཀག་སྤོ་རྒུ་ནི་ ངལ་ཚོ་ ཐོབ་རྦེན་ ཅེ་ཟེར་ནི་ ཁོ་རང་རྒུ་ནི་ ལེ་ཧ་ ཟང་པེ་ འབྲེ་རྦུ་ རྡེ་བ་ཅན་ནེ་ན་ ཁོང་ ཉམ་པོ་ ལེབ་རྦེན་།”

འཇིག་རྟེན་ནེ་ ལྟོན་ཏོག་།

14 ཏེ་ནི་ ངེ་ སྲིན་ ཀར་སྤོ་ཞིག་ ཐོང་, ཡང་ ཏེ་ སྲིན་ནེ་ཀ་ ཞུ་རྡེ་ ཡོ་ཀན་འབོ་ མི་རིག་རྒེ་པུ་ ཙོག་སེ་ འདུག་། ཁོང་ངེ་ ཨུའི་ཀ་ སེར་རེ་ ཐོར་ཤོག་ རྡང་ ཆག་ལ་ ཟོ་ར་ ནོམ་པོ་ཞིག་ ནམ་འདེ་ འདུག་།

15 ཏེ་ནི་ ཞེན་ཡང་ ཕོ་ཉ་ཞིག་རྒེ་, རྡེ་བ་ཅན་ནེ་ ཀོན་འཇོག་རྒེ་ ཁང་པེ་ ནང་ནི་ འབིང་འདེ་ ཧད་ ཆོན་མོ་ ཉམ་པོ་ སྲིན་ནེ་ཀ་ ཞུ་ཧན་འབོ་ལ་ མོལ་, “ཉེ་རང་ངེ་ ཟོ་ར་ ཉམ་པོ་ ངེ་ ཛེད་, ཅེ་ཟེར་ནི་ ཏུའི་རྦོ་ རན་འདེ་ འཇིག་རྟེན་ནེ་ཀ་ ལྟོན་ཏོག་པོ་ ཚོའེ་རྡེ་ ཡོད་ཏེ་ ནོག་།” 16 སྲིན་ནེ་ཀ་ ཞུ་ཧ་ནེ་ ཁོ་རང་ངེ་ ཟོ་ར་ འཇིག་རྟེན་ནེ་ཀ་ རྒྱབ་རྦེ་རྡང་ འཇིག་རྟེན་ སོན་ཏེ་ ངེ་ཏྃ་།

17 ཏེ་ ལྟིང་ནི་ ཡང་ ཕོ་ཉ་ཞིག་ རྡེ་བ་ཅན་ནེ་ ཀོན་འཇོག་རྒེ་ ཁང་པེ་ ནང་ནི་ འབིང་འདེ་ རྐྱོད་, ཁོང་ངེ་ ལག་ལ་ ཟོ་ར་ ནོམ་པོ་ཞིག་ འདུག་། 18 ཏེ་ནི་ མེ་ཀ་ ཝང་ ཡོ་ཀན་ ཡང་ ཕོ་ཉ་ཞིག་ ཆོད་ཁྲི་ འདུན་ལ་ རྐྱོད་ཏེ་ ཟོ་ར་ ནོམ་པོ་ ནམ་འདེ་ ཡོ་ཀ་ནེ་ ཕོ་ཉ་ མོལ་, “ཉེ་རང་ལ་ ཡོ་ཀ་ནེ་ ཟོ་ར་ ནོམ་པོ་རྦོ་ ཀོལ་རྡེ་ འཇིག་རྟེན་ནེ་ རྒུན་འགྲུམ་མེ་ ལྕང་མ་རྒུན་ཀ་ནི་ ཏེ་ རྒུན་འགྲུམ་རྒུན་ རྡུའི་, ཅེ་ཟེར་ནི་ ཏོ་རྒུན་ ཚོའེ་རྡེ་ འདུག་།” 19 ཡང་ ཏེ་ ཕོ་ཉ་རྦེ་ ཁོ་རང་ངེ་ ཟོ་ར་འབོ་ འཇིག་རྟེན་ནེ་ཀ་ ཀོལ་རྡེ་ རྒུན་འགྲུམ་རྒུན་ རྡུའི་རྡེ་, ཁོའེ་ ཕིང་ངེ་ལ་ ཀོན་འཇོག་རྒེ་ ཐུག་སྲོའེ་ རྒུན་འགྲུམ་ ཙིར་ཤེ་ ས་ཅ་རྦོ་ ཆོན་མེ་ན་ ཕྃ་། 20 ཏེ་ རྒུན་འགྲུམ་ ཙིར་ཤེ་ ས་ཅ་འབོ་ རྒྱལ་ས་ནི་ ཕི་ལོག་ལ་ ཡོད་པེན་། ཁོང་རྒུ་ནི་ ཁྲག་པོ་, རྒུན་འགྲུམ་ ཙིར་ཤེ་ མལ་ནི་ ཧ་ལམ་ ཀྱེ་ལོ་མི་ཀྲར་ སུམ་རྒྱ་ཚུག་པ་ རྒྱུག་, ཡང་ ཁྲག་རྒེ་ ཐོན་འབོ་ ལྟེ་ སྲབ་ཚུག་པ་ ལེཔ་།