རྒྱམ་ཚོའེ་ ནང་ནི་ འབིང་ཀ་ནེ་ སེམ་ཅེན་ འཇི་ནང་ཅེན་།
13
ཏེ་ནི་ ངེ་ འཇི་ནང་ཅེན་ནེ་ སེམ་ཅེན་འཇིག་ རྒྱམ་ཚོའེ་ ནང་ནི་ འབིང་ལ་ ཐོང་། ཏེ་ སེམ་ཅེན་འབོ་ལ་ འགོ་ རྡུན་ འདང་ རཱ་ཅོ་ ཅུ་ འདུག་། རཱ་ཅོ་ རེ་རེ་ཀ་ ཐོར་ཤོག་ ཡང་ འགོ་ རེ་རེ་ཀ་ ཀོན་འཇོག་རྒེ་ རྒྱཔ་འགལ་ལ་ ཏེཏ་ལོག་ ཞུ་ཀ་ནེ་ མིང་ འབྲི་རྡེ་ འདུག་། 2 ཏེ་ འཇི་ནང་ཅེན་ནེ་ སེམ་ཅེན་འབོ་ ཤེན་ ཙོག་སེ་, ཧང་པ་རྒུན་ ཀྲེད་མེ་ ཧང་པ་ རྡང་ ཁ་འབོ་ སིང་འགེ་ ཁ་ ཙོག་སེ་ འདུག་། འབྲུག་པེ་ ཁོ་རང་ངེ་ ཤུག་, ཁྲིའི་ རྡང་ ཝང་ ཆོན་མོ་ ཚང་མ་ ཏེ་ སེམ་ཅེན་འབོ་ལ་ ཏྃ་། 3 ཏེ་ སེམ་ཅེན་ནེ་ འགོ་ ཅིག་རྒེ་ཀ་ ཤི་ཅུག་ཅེ་ མ་ཀ་ཞིག་ ཐོང་, འིན་ན་ ཏེ་ མ་ཀའོ་ སོབ་ཏེ་ རྒྱལ་, ཡང་ འཇིག་རྟེན་པ་ ཏེཏ་པ་ མེ་ཀན་ ཚང་མེ་ ཏོ་ ཐོང་འདེ་ ཧ་ལེ་རྡེན་ ཏེ་ སེམ་ཅེན་འབེ་ ལྟིང་འགྲྃ་ནི་ སོང་། 4 འབྲུག་པེ་ རང་ངེ་ ཝང་ཆ་འབོ་ ཏེ་ སེམ་ཅེན་ལ་ ཏང་ཅེ་ཀ་ནི་, མི་རྒུ་ནི་ ཏེ་ འབྲུག་པོ་ལ་ ཅོལ་། མི་རྒུ་ནི་ སེམ་ཅེན་ལ་ ཅོལ་ལེན་ ཟེར་, “སུ་ འི་ སེམ་ཅེན་ ཙོག་སེ་ ཀྲག་པོ་ འིན་? ཁོའེ་ རྒྱཔ་འགལ་ལ་ ནོལ་ཤེ་ ཁྱུད་ སུ་ ཡོད་།”5 ཏེ་ སེམ་ཅེན་འབོ་ལ་ ཀོན་འཇོག་རྒེ་ རྒྱཔ་འགལ་ལ་ ཏེཏ་ལོག་ ཞུ་ཅེ་ རྒོང་སྤ་ ཡང་ ལྡ་ ཞིབ་ཅུ་ཞག་ཉི་ཚུག་པ་ ཁོའེ་ ཅི་ཞིག་ ཅོའེན་ སམ་ན་ ཅོ་ཅེ་ ཝང་ཆ་ སལ་། 6 ཁོའེ་ ཀོན་འཇོག་རྒེ་ ཚན་, ཁོང་ ཞུ་རྡེ་ མལ་ རྡང་ ཁོང་ ཉམ་པོ་ རྡེ་བ་ཅན་ནེ་ན་ ཞུ་ཧན་ ཚང་མེ་ རྒྱཔ་འགལ་ལ་ ཏེཏ་ལོག་རྒེ་ སྤེ་ར་ ཟེར་། 7 ཁོ་ ཀོན་འཇོག་རྒེ་ མི་རྒུན་ ཉམ་པོ་ མག་ ཏང་ཅེ་ རྡང་ ཏོ་རྒུ་ནི་ཀ་ རྒྱལ་ཁ་ ཐོབ་ཅེ་ ཁྱུད་ ཏྃ་རྡེ་ འདུག་། ཡང་ ཁོ་ མི་རིག་, མི་རྒུན་, ཧད་རིག་ ཏང་ རྒྱལ་ཁབ་ ཚང་མེ་ཀ་ ཝང་སྲུལ་ཅེ་ ཝང་ཆ་ ཏྃ་རྡེ་ འདུག་། 8 འཇིག་རྟེན་ མ་ཙུག་རྒེ་སང་ ངུལ་ལ་, སེད་ཀ་ནེ་ ལུ་རྒུའི་ ཐ་མེད་པེ་ མི་ཙེ་ སྤེ་ཆེ་ན་ མིང་ འབྲི་རྡེ་ མེ་ཀ་ནེ་ འཇིག་རྟེན་པ་རྒུ་ནི་ ཏེ་ སེམ་ཅེན་འབོ་ལ་ ཅོལ་ལེན་།
9 ནམ་ཅོག་ ཡོ་ཀན་རྒུ་ནི་ ཉོན་ཧེ་། 10 ཙོན་ལ་ ཧར་ཤུག་རྒེ་ ཛེད་ཅེ་ཅེན་རྒུན་ ཙོན་ལ་ ཧ་རེན་། ཡང་ ར་ཡི་ ཉམ་པོ་ སེད་ཅེ་ཅེན་རྒུན་ ར་ཡི་ ཉམ་པོ་ སེད་རྡེན་། ཏེ་རྒ་རྦེ་ཕི་ལ་ ཀོན་འཇོག་རྒེ་ མི་རྒུན་ ཟོད་པ་ ཉམ་པོ་ ནག་པར་རྡོ་ ཁུར་རེན་ ཏེཏ་པེ་ན་ རྟེམ་པོ་ ལུའི་རྒོའེ་རྡེན་།
སེ་ ནང་ནི་ འབིང་ཀ་ནེ་ སེམ་ཅེན་ འཇི་ནང་ཅེན་།
11 ཏེ་ནི་ ངེ་ སེ་ ནང་ནི་ ཡང་ འཇི་ནང་ཅེན་ནེ་ སེམ་ཅེན་ཞིག་ འབིང་ལ་ ཐོང་, ཁོ་ ལུ་རྒུའི་ རཱ་ཅོ་ ཙོག་སེ་ ཉི་ འདུག་, འིན་ན་ ཁོའེ་ ཧད་པོ་ འབྲུག་རྒེ་ ཧད་ ཙོག་སེ་ རག་། 12 ཁོའེ་ འཇི་ནང་ཅེན་ནེ་ སེམ་ཅེན་ ཏང་པོ་རྦེ་ ཤེད་ ཏང་ ཝང་རྒུན་ ཀོལ་རྡེ་, འཇིག་རྟེན་པ་རྒུན་ལ་ ཏེ་རྒ་ འཇི་ནང་ཅེན་ནེ་ སེམ་ཅེན་ ཏང་པོ་, ཤི་ཅེ་ཅེན་ནེ་ མ་ཀ་ ཡོད་ཏེ་ རྒྱལ་ཧན་འབོ་ལ་ ཅོལ་ཤུག་། 13 ཡང་ འཇི་ནང་ཅེན་ནེ་ སེམ་ཅེན་ ཉི་སྤེ་ མིན་འདྲ་ མིན་འདྲ་ ཧ་ལེ་ཤེ་ ལྟའ་རྒུན་ ལྟན་, སྤེར་ན་ མི་རྒུ་ནི་ མིག་རྒེ་ འདུན་ལ་ ནམ་ནི་ མེ་རྒུན་ འཇིག་རྟེན་ནེ་ཀ་ ཀྲུལ་ཤུག་ཅེ་། 14 འཇི་ནང་ཅེན་ནེ་ སེམ་ཅེན་ ཏང་པེ་ ཚབ་ལ་ ལྟའ་རྒུན་ ལྟན་འདེ་, ཁོའེ་ འཇིག་རྟེན་པ་རྒུན་ལ་ ཁོ་ ཆོའོ་ ཅོ་ཅེ་ལ་ འགོམ་ཧོར་། ཏེ་ནི་ ཏོ་རྒུན་ལ་ ར་ཡི་ རྒྱབ་ཀ་ནེ་ མ་ཀ་ ཡོད་ཏེ་ལ་ སོན་པོ་ ལུའི་རྡེ་ འིན་ཀ་ནེ་ འཇི་ནང་ཅེན་ནེ་ སེམ་ཅེན་ ཏང་པེ་ ཧུ་འདྲ་ ཅོ་ཅེ་ ཀཱ་ ཏང་། 15 སྤེ་ར་ ཏང་ཉེན་ཅེ་ཕི་ ཁོ་ ཏེ་ ཧུ་འདྲ་རྦེ་ན་ སྲོག་ ཏང་ཅེ་ ཝང་ཆ་ སལ་, ཏེ་ནི་ ཏེ་ ཧུ་འདྲ་རྦེ་ ཁོ་ མ་ཅོལ་ཧན་ ཚང་མ་ སེད་ཅེ་ལ་ ཀཱ་ ཏྃ་།
16 ཁོའེ་ ཉམ་ཤུང་ འདང་ འཇིག་སྤོ་, ཆུག་པོ་ རྡང་ ཉལ་རྦ་ཅེན་, ར་ཝང་ཅེན་ འདང་ ཚེ་ཡོག་, ཚང་མེ་ ཐོད་པ་ ཡང་ ལག་པ་ ཡོའེ་སྤེ་ཀ་ ཝང་ ཏྃ་རྡེ་ ལྟའ་ཞིག་ ཅོའེ་། 17 ཏེ་ ཐེ་ཙེ་རྦོ་ ཡོད་ཏེ་ མ་ནི་ སུ་ཞི་ལ་ ཉོ་ཚོང་ ཏང་ཉེན་ནེ་ མེད་པེན་། ཏེ་ ཐེ་ཙེ་ འཇི་ནང་ཅེན་ནེ་ སེམ་ཅེན་ ཏང་པེ་ མིང་ ཡང་ ཁོའེ་ མིང་ངེ་ ཨང་ཀྲང་ ནོག་།
18 ཏེ་ ལྟའ་རྦེ་ ཏོན་ཏག་ ཧ་ཀོ་ཅེ་ལ་ སིལ་ཧན་རྒུན་ ཤེ་རབ་ཅེན་ ཡོང་རྒོའེ་། འི་ ཐེ་ཙེ་ མི་ཞིག་རྒེ་ ཨང་ཀྲང་ ནོག་། ཡང་ ཏེ་ ཨང་ཀྲང་འབོ་ ཀྲུག་རྒྱ་རྡང་ ཀྲུག་ཅུ་རེ་རུག་ ནོག་།