པོ་མོ་ རྡང་ འབྲུག་།
12
ཡང་ རྡེ་བ་ཅན་ནེ་ན་ ཧ་ལེ་ཤེ་ ལྟའ་ ཆོན་མོ་ཞིག་ སོང་, ཏེ་ན་ ཉི་མ་ ཀོའེ་ ཙོག་སེ་ ཀོན་འདེ་, ཧང་པེ་ ཡོག་ལ་ ལྡ་ཝ་ རྡང་ འགོའེ་ཀ་ ཧར་མ་ ཅུ་ཉི་ ཐོར་ཤོག་ ཀོན་ཀ་ནེ་ པོ་མོ་ཞིག་ ཐོང་། 2 ཏེ་ པོ་མོ་ལ་ ཕྲུ་རྒུ་ རྐྱེ་ཅེ་ འདུག་, ཡང་ ཁོ་ ཕྲུ་རྒུ་ རྐྱེ་ཅེ་ ཟུར་མོ་ རྡང་ རྡུ་ངལ་ ཡོད་ཅེ་རྦེ་, ཁོའེ་ ཧོཔ་ ཀུ་ཅུ་ ཏང་འདུག་།3 ཏེ་ནི་ ངེ་ རྡེ་བ་ཅན་ནེ་ན་ ཡང་ ལྟའ་ཞིག་རྒེ་ན་, འགོ་ རྡུན་ འདང་ རཱ་ཅོ་ ཅུ་ ཡང་ འགོ་ རེ་རེ་ཀ་ ཐོར་ཤོག་ ཡོ་ཀ་ནེ་ འབྲུག་ ཆོན་མོ་ མར་སྤོ་ཞིག་ ཐོང་། 4 ཁོའེ་ ང་མ་རྦོ་ ནམ་ཀེ་ན་ ཧར་མ་ ཁག་ སུམ་མེ་ ནང་ནི་ ཁག་ཅིག་ལ་ རྒྱབ་ཏེ་ འཇིག་རྟེན་ནེ་ཀ་ ཕྃ་, ཡང་ ཕྲུ་རྒུ་ནི་ ཟ་ཅེ་ཕི་ ཏེ་ པོ་མོ་ ཕྲུ་རྒུ་ རྐྱེ་ཅེ་ཅེན་ནེ་ འདུན་ལ་ སོང་འདེ་ འདེད་། 5 ཏེ་ པོ་མོ་ལ་ པུ་ཙ་ཞིག་ རྐྱེ་། ཁོང་ངེ་ རྒྱལ་ཁབ་ ཚང་མེ་ཀ་ ཝང་ཆ་ ཚང་མ་ ཉམ་པོ་ ཝང་སྲུལ་ལེ་ ཛེ་རྡེན་། འབྲུག་ལ་ ཟ་ མ་ཅུག་རྒེ་ ཧུན་མེད་ལ་ ཏེ་ པོ་མེ་ ཕྲུ་རྒུ་རྦོ་ ཁོ་རང་ངེ་ ཁྲིའི་ཀ་ ཀོན་འཇོག་རྒེ་ ཧུན་འདུན་ལ་ ཁྱེར་རེ་ ཛེད་། 6 ཡང་ ཏེ་ པོ་མོ་ རི་ལྟོང་ངེ་ན་ ཤོར་རྡེ་ སོང་, ཀ་རྦེ་ན་ ཙོབོ་ ཀོན་འཇོག་རྒེ་ མལ་ཞིག་ ཀྲལ་འགྲིག་ ཛེད་ཏེ་ ཡོད་པེན་, ཀ་རུ་ ཞག་ ལྟོང་ཉི་རྡང་ ཉིབ་རྒྱ་ཀྲུག་ཅུ་ཚུག་པ་ ཁོ་ ལྟ་ཏོག་ ཅོའོ་ ཛེད་རྡེན་།
7 ཡང་ རྡེ་བ་ཅན་ནེ་ན་ མག་ ཏང་ཅེ་ འགོ་ཟུག་། ཕོ་ཉ་ མེ་ཀ་འེལ་ རྡང་ ཁོང་ངེ་ ཕོ་ཉ་རྒུ་ནི་, ཏེ་ འབྲུག་ ཏང་ ཁོའེ་ ཁྲོ་པ་ ཕོ་ཉ་རྒུ་ནི་ ནོལ་, ཡང་ འབྲུག་ ཏང་ ཁོའེ་ ཁྲོ་པ་རྒུ་ནི་ ལོག་ཏེ་ ནོལ་། 8 འིན་ན་ འབྲུག་རྒེ་ན་ འབྲུག་ ཕམ་ཅེ་ཀ་ནི་, ཁོ་ རྡང་ ཁོའེ་ ཁྲོ་པ་རྒུན་ རྡེ་བ་ཅན་ནེ་ ནང་ནི་ ཕིང་ངེ་ ཛེད་། 9 ཏེ་ འཇི་ནང་ཅེན་ནེ་ འབྲུག་, རྡུད་རྒུ་ནི་ འགོ་རྦ་ རྡུད་ ཟེར་ཧན་འབོ་, ངུལ་མེ་ ཏུའི་རྡེ་ རུལ་རྦོ་ ནོག་། ཁོའེ་ འཇིག་རྟེན་ སོན་ཏེ་ མི་རྒུན་ལ་ འགོམ་ཧོར་ ཏྃ་རྡེ་ འིན་འབེན་། ཁོ་ རྡང་ ཁོའེ་ ཁྲོ་པ་རྒུན་ འཇིག་རྟེན་ནེ་ཀ་ ཡོག་ལ་ ཕང་ངེ་ ཛེད་།
10 ཏེ་ནི་ ཡང་ ང་ རྡེ་བ་ཅན་ནེ་ ཧད་ ཆོན་མོ་ཞིག་ ཚོར་, “ཏ་ ཨ་ཧོའེ་ ཀོན་འཇོག་རྒེ་ ཐར་པ་, ཝང་ འདང་ རྒྱལ་སྲིད་ ཏང་ ཁོང་ངེ་ མ་ཤི་ཀེ་ ཝང་སྲུལ་རྦོ་ ལེཔ་ ཚར་རྡེ་ ནོག་། ཏ་ ཀོན་འཇོག་རྒེ་ ཧུན་འདུན་ལ་ ཨ་ཧོའེ་ སྤུན་རྒུན་ལ་ ཚེན་ཉིན་ མེད་རྡེ་ ཉེད་ཀལ་ཧ་ནེ་ རྡུད་འབོ་, ཡོག་ལ་ འཇིག་རྟེན་ནེ་ཀ་ ཕང་ངེ་ ཛེད་ཏེ་ འིན་། 11 ཡང་ ཨ་ཧོ་རྒུ་ནི་ སྤུན་རྒུ་ནི་ ལུ་རྒུའི་ ཧུ་ཁྲག་ ཏང་ ནེ་ཚུལ་ ཟང་པེ་ སྤང་པོ་ ཏང་ཅེ་རྦེ་, རྡུད་ལ་ ཕམ་ཀལ་། ཏེ་ སྤང་པོ་ ཏང་ཅེ་ལ་ ཁོང་རྒུན་ སྲོག་ ཏང་ཅེ་ རྡང་ ཤི་ཅེ་ལ་ འཇིའི་ མ་འཇིའི་། 12 ཏོ་རྦེ་ཕི་ རྡེ་བ་ཅན་ འདང་ ཏེ་ན་ ཞུ་ཧན་རྒུ་ནི་ རྐྱིད་པོ་ ཅོའེ་ཧེ་། འིན་ན་ ས་ཀྱེཏ་ ཏང་ རྒྱམ་ཚོའེ་ཀ་ འདེད་ཀན་རྒུན་ལ་ ཙམ་ཤིག་རྒེ་ འཇི་ནང་ མག་, ཅེ་ཟེར་ནི་ རྡུད་རྒུ་ནི་ འགོ་རྦ་ ཁྱི་ཞ་རྒུན་ས་ ཡོག་ལ་ ཡོང་འདུག་། ཁོ་ སྲོའེ་ ཀང་འདེ་ འདུག་ ཅེ་ཟེར་ནི་ ཁོའེ་ ལག་ལ་ འཇིག་རྟེན་པ་རྒུན་ལ་ འགོ་ཧོར་ཤེ་ ཏུའི་, ཉུང་ཙེ་ཞིག་ མ་ནི་ མེ་ཀན་འབོ་ ཁོ་ རྒྱུའི་ནོག་།”
13 འབྲུག་པོ་ལ་ ཁོ་རང་ ཡོག་ལ་ འཇིག་རྟེན་ནི་ཀ་ ཕྃ་རྡེ་ འིན་ཀན་འབོ་ རྒྱུའི་ཆ་རྡང་, ཁོའེ་, སྲེ་ ལྟམ་ཀ་ནེ་ པོ་མོ་ལ་ ཏེཏ་ཏེ་ ཁྱེར་། 14 འིན་ན་ ཏེ་ པོ་མོ་ལ་ རི་ལྟོང་ངེ་ན་ ཀྲལ་འགྲིག་ ཅོའོ་ ཛེད་ཀ་ནེ་ མལ་རྦེ་ཀ་ ཕུར་རྡེ་ ཆ་ཉེན་ཅེ་ལ་ ལག་ ཆོན་མེ་ ཤོག་པ་ ཙོག་སེ་ ཉི་ སལ་རྡེ་ འདུག་, ཀ་རུ་ ཀོན་འཇོག་རྒེ་ ལོ་ སུམ་འདང་ཕེད་ཚུག་པ་, ཏེ་ པོ་མོ་ལ་ འབྲུག་རྒེ་ཀ་ནི་ རྐྱོབ་རྦེ་ ཛེད་ཏེ་ ལྟ་ཏོག་ ཛེ་རྡེན་།
15 ཏེ་ནི་ ཏེ་ འབྲུག་རྒེ་ ཁོའེ་ ཁ་ནི་ འབིང་ཀ་ནེ་ ཆུ་ལོག་ ཙོག་སེ་ ཆུའི་ན་ ཏེ་ པོ་མོ་ ནུབ་ཅུག་ཏེ་ སེད་ཅེ་ ཅོའེ་། 16 འིན་ན་ ཏེ་ པོ་མོ་ལ་ ཡ་ཏོ་ ཅོ་ཅེ་ལ་ ས་ཀྱེཏ་པོ་ པེ་རྡེ་ འབྲུག་རྒེ་ ཁ་ནི་ འབིང་ཀ་ནེ་ སྃ་སྤེ་ ཆུ་ མིག་ ཏང་། 17 ཏེ་ནི་ འབྲུག་པོ་ལ་ ཏེ་ པོ་མོ་རྦེ་ཀ་ མ་སྲན་ཀྲེ་ སྲོ་ ཡོྃ་, ཡང་ པོ་མེ་ ལུའི་རྡེ་ ཡོ་ཀ་ནེ་ ཕར་རྒྱུད་, ཀོན་འཇོག་རྒེ་ ཀཱ་རྒྱ་ ཁ་ཉེན་འདེ་ ཡི་ཤུའི་ ལབ་ཞ་རྒུན་ལ་ རྟེམ་པོ་ ཐམ་འདེ་ འདེད་ཀན་རྒུ་ནི་ རྒྱཔ་འགལ་ལ་ མག་ ཏང་ཅེ་ ཐག་ཅེད་། 18 ཏེ་ནི་ འབྲུག་ རྒྱམ་ཚོའེ་ ཐ་མེ་ པེ་མེ་ཀ་ ལྃ་རྡེ་ འདེད་།