སྤང་པོ་ སལ་ཧན་ ཉི་།
11
ཏེ་ནི་ ཚེད་ ཏབ་རྦེ་ ཀོལ་ཧ་ནེ་ པེར་ཧ་ཞིག་ སལ་རྡེ་ ང་ མོལ་ལེ་རག་, “སོང་འདེ་ ཀོན་འཇོག་རྒེ་ ཁང་པ་ འདང་ ཆོད་ཁྲི་ ཚད་པོ་ ནེན་, ཡང་ ཏུ་རུ་ ཅོལ་ལེན་ ཡོ་ཀན་ ཚང་མེ་ ཀྲང་ཧ་རྒུན་ ནེན་། 2 འིན་ན་ ཀོན་འཇོག་རྒེ་ ཁང་པེ་ ཕི་ལོག་ལ་ ཡོ་ཀ་ནེ་ ས་ཅ་རྦོ་ ཏབ་ མ་ཏབ་, ཅེ་ཟེར་ནི་ ངེ་ ཏོ་ ཏེ་ རྒྱལ་ཁབ་རྒུན་ལ་ ལྟེད་ཏེ་ འིན་, ཀ་རྦེ་ ཡེ་རུ་ཤ་ལེམ་མེ་ ཏམ་པེ་ རྒྱལ་ས་འབོ་ ལྡ་ ཞིབ་ཅུ་ཞག་ཉི་ཚུག་པ་ ཝང་ངེ་ ཡོག་ལ་ ནེན་འདེ་ པོ་རེན་། 3 ངེ་ ང་རང་ངེ་ སྤང་པོ་ ཉི་ལ་ ཝང་ཆ་ ཏང་ངེན་, ཁོང་རྒུ་ནི་ རྡུག་རྒོའེ་ ཀོན་འདེ་ ཞག་ ལྟོང་ཅིག་ཏང་ ཉིབ་རྒྱ་ཀྲུག་ཅུ་ ལུང་རྟན་ ཤེད་རྡེན་།”4 འི་ སྤང་པོ་ ཉ་ཧ་རྦོ་, འཇིག་རྟེན་ནི་ ཝང་སྲུལ་པ་ ཙོབོ་རྡེ་ འདུན་ལ་ ཡོ་ཀ་ནེ་ ཨོ་ལི་ཝེ་ ལྕང་མ་ ཉི་ རྡང་ འོད་རྟག་ ཉ་ཧ་ ནོག་། 5 ཀལ་ཏེ་ སུ་ཞིག་རྒེ་ ཏོ་ ཉ་ཧ་ ནོད་པ་ ཏང་ཅེ་ ཅོ་ནི་, ཏེ་ ཉ་ཧེ་ ཁ་ནེ་ མེ་ འབིང་འདེ་ འགྲ་ཝོ་རྒུན་ མེ་ཀན་ ཅོའེན་, ཡང་ ཏོ་ ཉ་ཧ་ ནོད་པ་ ཅོ་ཅེ་ ཙོན་འགྲུའི་ ཅོ་ཀན་རྒུན་ ཏེ་རྒ་ ཙོག་སེ་ ཤིན་། 6 ཁོང་རྒུ་ནི་ ལུང་རྟན་ ཤེད་རྡེ་ ཏུའི་ སོན་ཏེ་ ཆར་སྤ་ མི་པབ་ཅེ་ཕི་ ནམ་ཀ་ ཀབ་ཅེ་ ཝང་ཆ་ ཁོང་རྒུན་ལ་ སལ་ལེ་ ཛེད་། ཡང་ ཆུ་ ཚང་མ་ ཁྲག་ལ་ འགྱུར་ཤུག་ཅེ་ རྡང་ ནམ་ ཁོང་རྒུན་ ཐེད་ནང་, འཇིག་རྟེན་ནེ་ འདེད་ཀན་ མི་རྒུན་ལ་ རྡུ་ངལ་ལེ་ན་ ཚང་མ་ ཡོང་ཅུག་ཅེ་ ཝང་ཆ་ སལ་།
7 ཁོང་ ཉ་ཧེ་ ཀོན་འཇོག་རྒེ་ ཀའ་ ཤེད་ཅེ་རྒུན་ འདྲན་འདྲ་ ཀྲུབ་ ཚར་རེ་རྡང་, འཇི་ནང་ཅེན་ནེ་ སེམ་ཅེན་འབོ་ ཐིལ་ མེ་ཀ་ནེ་ ཏིང་ རྒོ་རོང་ནི་ འབིང་འདེ་, ཁོང་ ཉ་ཧེ་ཀ་ སྤུང་འགོལ་ ཅོའེན་, ཡང་ ཕམ་ཀལ་རྡེ་ སེད་རྡེན་། 8 ཁོང་ ཉ་ཧེ་ རོ་རྒུན་ འི་ རྒྱལ་ས་ མིང་ཅེན་འབེ་ སྲང་རྒུ་ནི་ན་ ལུའི་རྡེན་, ཀའོ་ལ་ ཀོན་འཇོག་རྒེ་ སོ་འདོམ་ རྡང་ ཨི་འཇིབ་ ས་ཅ་ ཙོག་སེ་ ཐེའེ་ ཛེད་། ཏེ་ ས་ཅེ་ན་ ཙོབོ་ ཡི་ཤུ་ རྐྱང་ཤིང་ངེ་ཀ་ རྐྱང་འདེ་ འིན་འབེན་། 9 ཡང་ ཞག་ སུམ་འདང་ཕེད་ཚུག་པ་ མི་རིག་, ཧད་རིག་ ཏང་ རྒྱལ་ཁབ་ ཚང་མེ་ མི་རྒུ་ནི་, ཁོང་ ཉ་ཧེ་ རོ་རྒུན་ལ་ ལྟོའེ་རྡེ་ འདེད་རྡེན་, ཡང་ ཏོ་རྒུ་ནི་ སུ་ཞི་ལ་ ཏེ་ རོ་རྒུན་ སྤུར་ཧང་ངེ་ན་ ཧུང་ མི་ཅུག་། 10 འཇིག་རྟེན་པ་ ཏེཏ་པ་ མེ་ཀན་རྒུ་ནི་, ཁོང་ ཉ་ཧ་ ཤི་ཀན་འབེ་ཀ་ ཐེད་པོ་ ཅོའེན་, ཅིག་ ཏང་ ཅིག་ལ་ ཁྱེ་མ་རྒུན་ ཏྃ་རྡེ་ རྒ་རྟོན་ ཅོའེན་, ཅེ་ཟེར་ནི་ ཏེ་ ལུང་རྟོན་པ་ ཉ་ཧེ་ འཇིག་རྟེན་པ་རྒུན་ལ་ ནག་ལྟན་འདེ་ འིན་འབེན་།
11 འིན་ན་ ཞག་ སུམ་འདང་ཕེད་རྡེ་ ལྟིང་ནི་ ཀོན་འཇོག་རྒེ་ སལ་ཧ་ནེ་ སྲོག་རྒེ་ འུག་རྦོ་ ཁོང་རྒུ་ནི་ན་ ཞུ་རྡེ་ ཁོང་ ཉ་ཧ་ ཀོའག་ ལྃ་, ཡང་ ཁོང་ ཉ་ཧ་ ཐོང་ཀན་ ཚང་མ་ ཧོཔ་ འཇིའི་། 12 ཏེ་ནི་ རྡེ་བ་ཅན་ནེ་ ཧད་ ཆོན་མོ་ཞིག་རྒེ་ ཁོང་ ཉ་ཧ་ མོལ་, “འི་རུ་ ལྟག་ལ་ ཤོག་།” ཁོང་ ཉ་ཧ་ རྡེ་བ་ཅན་ནེ་ན་ སྲིན་ནེ་ཀ་ ཞོན་འདེ་ རྐྱོད་, ནམ་ ཁོང་ ཉ་ཧེ་ འགྲ་ཝོ་རྒུན་ ལྟོའེན་ ཡོད་པེན་།
13 ཏེ་རྒ་མ་རྒ་ སང་འགུལ་ སྲན་ཀྲེ་ཞིག་ ཡོྃ་རྡེ་ རྒྱལ་སེ་ ཁག་ ཅུའི་ ནང་ནི་ ཁག་ཅིག་ ཟམ་ཤིག་ མེ་ཀན་ སོང་། མི་ ལྟོང་རྡུན་ ཤི་། སོན་པོ་ ལུའི་ཧན་རྒུན་ ཧོཔ་ འཇིའི་, ཡང་ རྡེ་བ་ཅན་ནེ་ན་ ཞུ་ཧན་ ཀོན་འཇོག་ནི་ ཀུན་ཝང་ འིན་ཀན་འབོ་ ཁ་ནི་ འཇིའི་རྡེ་ ཟེར་།
14 འཇི་སྤ་ ཉི་སྤ་རྦོ་ པུད་ཚར་, འིན་ན་ ལྟོའེ་རྡང་, འཇི་སྤ་ སུམ་པ་རྦོ་ འགྱོ་སྤ་ ལེབ་ཅེ་འདུག་།
ཏུང་ རྡུན་པ་འབོ་ ཕུའི་།
15 ཕོ་ཉ་ རྡུན་འབེ་ ཏུང་ ཕུ་རྡང་, ང་ རྡེ་བ་ཅན་ནེ་ ཧད་ ཆོན་མོ་ཞིག་རྒེ་ མོལ་ལེ་རག་, “འཇིག་རྟེན་ནེ་ རྒྱལ་སྲིད་པོ་ ཏ་ ཙོབོ་ ཀོན་འཇོག་ ཏང་ ཁོང་ངེ་ མ་ཤི་ཀེ་ རྒྱལ་སྲིད་ འགྱུར་རྡེ་ ནོག་, ཡང་ ཁོང་ངེ་ ཏུའི་རྒྱུན་ནི་ཏུའི་རྒྱུན་ ཝང་སྲུལ་ལེ་ ཛེ་རྡེན་།”
16 ཀོན་འཇོག་རྒེ་ ཧུ་འདུན་ལ་ ཁོ་རང་རྒུ་ནི་ ཞུ་ཁྲིའི་ཀ་ ཞུ་རྡེ་ ཡོ་ཀ་ནེ་ འུ་རྐྱོང་ ཉི་ཤུ་སེབ་ཞི་རྦེ་ ཀོན་འཇོག་ལ་ ཆག་པུ་ལེན་ ཁོང་ལ་ ཅོལ་། 17 ཁོང་རྒུ་ནི་ མོལ་,
“ཀྱེ་ ཙོབོ་ ཀོན་འཇོག་ ཀུན་ཝང་, ཉེ་རང་ ཏག་ས་ ཞུ་ཧན་ འདང་
ངུལ་ལ་ ཞུ་རྡེ་ ཡོ་ཀན་ ནོག་, ང་ཞ་རྒུ་ནི་ ཉེ་རང་ལ་ ཐུག་ཞེ་ཆེ་ ཞུ་ཡོད་,
ཅེ་ཟེར་ནི་ ཉེ་རང་ངེ་ རང་ངེ་ ཝང་ ཀྲག་པོ་ ཀོལ་རྡེ་
ཉེ་རང་ངེ་ ཝང་སྲུལ་རྦོ་ འགོ་ཟུག་རྒེ་ ཛེད་ཏེ་ ནོག་།
18 ཏེཏ་པ་ མེ་ཀན་རྒུན་ རྒྱལ་ཁབ་རྒུན་ སྲོའེ་ ཀང་འདེ་ ནོག་།
འིན་ན་ ཏ་ ཉེ་རང་ངེ་ ཐུག་སྲོའེ་ ཏུའི་རྦོ་ ལེབ་ཏེ་ ནོག་།
ཡང་ ཤི་ཀན་རྒུན་ལ་ ཤའ་ ཅེད་ཅེ་,
ཉེ་རང་ངེ་ ཞབ་རྟོག་པ་རྒུན་, ལུང་རྟོན་པ་རྒུན་, ཏམ་པ་ མི་རྒུན་,
འུ་ཐུག་ ཏང་ འཇིག་སྤོ་ ཉེ་རང་ང་ འཇིག་རྟེན་ ཚང་མ་ལ་,
སོལ་རེ་ སལ་ཅེ་ ཡང་ འཇིག་རྟེན་ ལྟོང་ ཅུག་ཀན་རྒུན་
ལྟོང་ཤུག་ ཛེད་ཅེ་ ཏུའི་རྦོ་ ལེབ་ཏེ་ ནོག་།”
19 ཡང་ ངེ་ རྡེ་བ་ཅན་ནེ་ན་ ཀོན་འཇོག་རྒེ་ ཁང་པ་ པེ་རྡེ་ ཡོ་ཀ་ནེ་ན་ ཁོང་ངེ་ ཆེཏ་ཏོན་ནེ་ རྒམ་འབོ་ འཇལ་། ཡང་ ལག་རྒེ་ འོད་, འཇིའི་ཤེ་ཅེན་ནེ་ ཧད་, ཆད་མེད་ལ་ འབྲུག་ཀྲག་པོ་ལྡིར་, སྃ་འགུལ་ ཡོྃ་, ཡང་ འཇི་ནང་ཅེན་ནེ་ སེ་ར་ ཆོན་མོ་ པབ་།