ངོན་ཅུག་ཀ་ནེ་ སྤེ་ཆ་ 10

ཕོ་ཉ་ རྡང་ ཤོག་རིལ་ ཆུང་ཙེ་།

ཏེ་ནི་ ངེ་ ཡང་ ཕོ་ཉ་ མ་ འཇིག་སྤོ་ཞིག་ རྡེ་བ་ཅན་ནི་ ཕེབ་རྦེན་ ཐོང་། ཁོང་ངེ་ སྲིན་ནེ་ ཀོའེ་ལག་ ཀོན་འདེ་ ཁོང་ངེ་ འགོ་ ཟ་ཆུ་ཐུང་ངེ་ ཧོར་རྡེ་ འདུག་། ཁོང་ངེ་ ཞལ་འདོང་འབོ་, ཉི་མ་ ཙོག་སེ་ འདང་ཤེན་ ཡང་ ཞབ་རྒུན་ མེ་ འབར་ཧ་ནེ་ ཀ་ཝ་ ཙོག་སེ་ འདུག་། 2 ཁོང་ངེ་ ཆག་ལ་ པེ་ཀ་ནེ་ ཤོག་རིལ་ ཆུང་ཙེ་ཞིག་ ནམ་འདེ་ འདུག་། ཁོང་ངེ་ ཞབ་ ཡོའེ་སྤ་རྦོ་ རྒྱམ་ཚོའེ་ཀ་ ཡང་ ཡོ་མ་རྦོ་ ས་ཀྱེཏ་ ཧམ་པེ་ཀ་ པོ་རེ་ ཛེད་ཏེ་ འདུག་། 3 ཏེ་ ཕོ་ཉ་རྦེ་ སིང་འགེ་ ཙོག་སེ་ ཀུ་ཅུ་ སྲན་ཀྲེ་ སལ་, ཡང་ ཁོང་ངེ་ ཀུ་ཅུ་ སལ་ལེ་རྡང་, འབྲུག་ཧད་ རྡུན་ཀ་འབེ་ ཀུ་ཅུ་ སལ་།

4 འབྲུག་ཧད་ རྡུན་ནེ་ མོལ་ཧན་རྒུན་ ངེ་ འབྲི་ཅེ་ ཡོད་པེན་, འིན་ན་ ངེ་ རྡེ་བ་ཅན་ནེ་ ཧད་ཅིག་རྒེ་, “ཏེ་ འབྲུག་ཧད་ རྡུན་ནེ་ མོལ་ཧན་ ཚང་མ་ སང་སྤེར་ན་ པོར་, ཏོ་རྒུན་ འབྲི་ མ་འབྲི་” མོལ་ལེན་ ཚོར་།

5 ཏེ་ནི་ རྒྱམ་ཚོ་ རྡང་ ས་ཀྱེཏ་ ཧམ་པེ་ཀ་ ཞྃ་རྡེ་ ཡོ་ཀ་ནེ་ ཕོ་ཉེ་, རང་ངེ་ ཆག་ ཡོའེ་སྤ་རྦོ་ རྡེ་བ་ཅན་ ཆོག་ལ་ ཐོན་པོ་ རྐྱང་། 6 ཡང་ ཁོའེ་ ཏུའི་རྒྱུན་ནི་ཏུའི་རྒྱུན་ ཞུ་ཧ་ནེ་ ཀོན་འཇོག་རྒེ་ ནའ་ ཁུར་, ཁོང་ངེ་ ནམ་ཀ་ རྡང་ ཏེ་ན་ ཡོ་ཀན་ ཚང་མ་, འཇིག་རྟེན་ འདང་ ཏེ་ན་ ཡོ་ཀན་ ཚང་མ་, ཡང་ ཚོ་ རྡང་ ཏེ་ན་ ཡོ་ཀན་ ཚང་མ་ ཅོའོ་ ཛེད་ཏེ་ འིན་། ཏེ་ ཕོ་ཉེ་ མོལ་, “ཏ་ ཁོང་ སྲུྃ་རྡེ་ འདེད་རྡེ་ མི་ཛེད་། 7 འིན་ན་ ཕོ་ཉ་ རྡུན་པ་རྦེ་ ཁོ་རང་ངེ་ ཏུང་ ཕུ་རྡང་, ཀོན་འཇོག་རྒེ་ སང་སྤེ་རེ་ ཐབ་པོ་ འདྲན་འདྲ་ ཀྲུབ་རྦེན་, ཀ་ཟུག་ ཁོང་ངེ་ ཁོ་རང་ངེ་ ཞབ་རྟོག་པ་ ལུང་རྟོན་པ་རྒུན་ལ་ མོལ་རྡེ་ འིན་འབེན་།”

8 ཏེ་ནི་ རྡེ་བ་ཅན་ནེ་ ཚོར་ཧ་ནེ་ ཧད་པེ་, ང་ ཡང་ མོ་ལེ་རག་, “འདུན་ལ་ སོང་འདེ་ རྒྱམ་ཚོ་ རྡང་ ས་ཀྱེཏ་ ཧམ་པེ་ཀ་ ལྃ་རྡེ་ ཡོ་ཀ་ནེ་ ཕོ་ཉ་རྦེ་ ལག་ནི་ ཏེ་ ཤོག་རིལ་ པེ་རྡེ་ ཡོ་ཀན་འབོ་ ནེན་།”

9 ཏེ་ནི་ ང་ ཏེ་ ཕོ་ཉ་རྦེ་ འདུན་ལ་ སོང་འདེ་ ཁོང་ལ་, ཏེ་ ཤོག་རིལ་ ཆུང་ཙེ་ པེ་ཀན་འབོ་ སལ་ ཟེར་རྡེ་ ཞུ་ཝ་ པུལ་རྦེན་། ཁོང་ངེ་ མོལ་ལེ་རག་, “འི་རྦོ་ ནེན་ ཡང་ ཟོའེ་ཏོང་, ཏོ་ ཁྱེ་རང་ངེ་ ཁེ་ན་ རང་སི་ ཙོག་སེ་ ངར་མོ་, འིན་ན་ ཀྲོཏ་པེ་ན་ ཁན་ཀྲེ་ འགྱུ་རེན་།” 10 ངེ་ ཏེ་ ཕོ་ཉ་རྦེ་ ཆག་ནི་ ཤོག་རིལ་རྦོ་ ནེན་འདེ་ ཟོའེ་རྦེ་, ངེ་ ཁེ་ན་ ཏོ་ ངར་མོ་ རག་པེན་, འིན་ན་ མིག་རྒེ་རྡང་, ཁན་ཀྲེ་ འགྱུར་རྡེ་ ངེ་ ཀྲོཏ་པ་ ནག་ ལྟན་།

11 ཏེ་ནི་ ང་ མོལ་ལེ་རག་, “མི་རྒུན་, མིར་རྒྱུད་རྒུན་, ཧད་རིག་རྒུན་ འདང་, རྒྱ་སྤོ་རྒུ་ནི་ ཧོར་ལ་ ཁྱེ་རང་ངེ་ ཡང་ ལུང་རྟན་ ཏང་རྒོའེ་།”