ཏུང་ ང་པ་ ཕུའི་།
9
ཕོ་ཉ་ ང་པ་རྦེ་ ཏུང་ ཕུ་རྡང་, ངེ་ ནམ་ཀ་ནི་ འཇིག་རྟེན་ནེ་ཀ་ ཀྲུལ་རྡེ་ ཡོ་ཀ་ནེ་ ཧར་མ་a ཞིག་ ཐོང་, ཀ་འབོ་ལ་ ཐིལ་ མེ་ཀ་ནེ་ ཏིང་ རྒོ་རོང་ ཀུ་ལིག་པོ་ སལ་ལེ་ ཛེད་ཏེ་ འདུག་། 2 ཁོའེ་ ཏོ་ པེ་རྡང་, ཏེ་ནང་ནི་ མེ་ ཆོན་མོ་ ཞེན་ཀན་ ཙོག་སེ་ ཏུད་པ་ འབིང་, ཏེ་ ཏུད་པ་རྦེ་ ཉི་མེ་ འོད་ ཏང་ ནམ་འབོ་ ཀབ་ཏེ་ མུན་ཀྲག་ སོང་།3 ཏེ་ ཏུད་པེ་ ནང་ནི་ ཅ་རྒེ་འབུ་ མང་པོ་ འབིང་འདེ་ འཇིག་རྟེན་ནེ་ཀ་ ཀྲུལ་, ཏོ་རྒུན་ལ་ རྡིག་པ་རཱ་ཙེ་ ཙོག་སེ་ ཐམ་ཅེ་ ཁྱུད་ སལ་རྡེ་ འདུག་། 4 ཡང་ ཏོ་རྒུན་ལ་, “ས་ ཡང་ ངོན་པོ་, ཡང་ ལྕང་མ་རྒུན་ལ་ ནོད་པ་ མ་རྐྱལ་, འིན་ན་ ཐོད་པེ་ཀ་ ཀོན་འཇོག་རྒེ་ ཐེ་ཙེ་ མེ་ཀ་ནེ་ མི་རྒུན་ལ་ ནག་ ལྟོན་”, མོལ་རྡེ་ ཀཱ་ སལ་། 5 ཏོ་རྒུན་ལ་ ཁོང་རྒུན་ སེད་མ་སེད་རྡེ་ལ་, ལྡ་ ང་, རྡུག་ངལ་ མང་པོ་ ཏྃ་རྡེ་ ནག་ ལྟན་ཅེ་ ཝང་ སལ་, ཀའོ་ རྡིག་པ་རཱ་ཙེ་ ཐམ་འདེ་ ནག་ ཐོང་ཀན་ ཙོག་སེ་ ཡོད་པེན་། 6 ཏེ་ཏུའི་ལ་ མི་རྒུ་ནི་ ཤི་ཅེ་ ཙལ་ལེན་, འིན་ན་ ཁོང་རྒུན་ལ་ མ་ནི་ མི་ཐོབ་། ཤི་ཅེ་ འདོད་པ་ ཅོའེན་, འིན་ན་ ཤི་ཅེ་པོ་ ཁོང་རྒུ་ནི་ ཐག་རིང་ལ་ ཤོར་རྡེ་ ཆེན་།
7 ཏེ་ ཅ་རྒེ་འབུ་རྒུན་ མག་རྒེ་ཕི་ ཀྲལ་འགྲིག་ ཡོ་ཀ་ནེ་ ལྟ་ ཙོག་སེ་ འདུག་, ཏེ་རྒུ་ནི་ འགོའེ་ཀ་ ཀོན་ཀན་འབོ་ སེར་རེ་ ཐོར་ཤོག་ ཙོག་སེ་ ཡང་ རྡོང་རྒུན་ མི་ རྡོང་ ཙོག་སེ་ འདུག་། 8 ཏོ་རྒུན་ལ་ པོ་མོ་ ཙོག་སེ་ སྲ་ ཡང་ སོ་རྒུན་ སིང་འགེ་ སོ་ ཙོག་སེ་ འདུག་། 9 ཏོ་རྒུ་ནི་ སྲན་ཀྲེ་ ལྕག་རྡེ་ མག་ཆེ་ ཀྲང་ངེ་ཀ་ ཀོན་འདེ་ ཁོང་ངེ་ ཤོག་པ་རྒུ་ནི་ ཧད་འབོ་ མག་རྒེ་ ཏུའི་ལ་ ཤིང་ངེ་ ལྟ་ཀྲམ་ཀྲམ་ མང་པེ་ ཧད་ ཙོག་སེ་ རག་། 10 ཏོ་རྒུ་ནི་ ང་མ་ ཐམ་ཅེའོ་, རྡིག་པ་རཱ་ཙེ་ ཐམ་ཀན་ ཙོག་སེ་ ཀ་འབོ་ལ་ ལྡ་ ང་ མི་རྒུན་ལ་ ནག་ ལྟན་ཅེ་ ཁྱུད་ འདུག་། 11 ཐིལ་ མེ་ཀ་ནེ་ ཏིང་ རྒོ་རོང་ ཕོ་ཉ་རྦོ་, ཏོ་རྒུ་ནི་ རྒྱ་སྤོ་, ཀ་རྦེ་ མིང་འབོ་ལ་ ཨིབ་རི་འབེ་ ཧད་རྡེ་ན་ “ཨ་འབད་འདོན་” འདང་ འགི་རིག་རྒེ་ ཧད་རྡེ་ན་ “ཨ་པོལ་ལི་ཨོན་” ཡང་ནི་ མེ་ཀན་ ཅོ་ཀན་ ཟེ་རེ་ནོག་།
12 འཇི་སྤ་ ཏང་པོ་རྦོ་ པུད་ཚར་, འིན་ན་ ལྟོའེ་རྡང་ ཡང་ འཇི་སྤ་ ཉི་ ལེབ་ཅེ་འདུག་།
13 ཕོ་ཉ་ ཀྲུག་པེ་ ཏུང་ ཕུ་རྡང་, ང་ ཀོན་འཇོག་རྒེ་ འདུན་ལ་ ཡོ་ཀ་ནེ་ སེར་རེ་ ཆོད་ཁྲི་ རཱ་ཅོ་ ཞི་ནི་ ཧད་ཅིག་ ཚོར་། 14 ཡང་ ཏེ་ ཧད་པེ་ ཏུང་ ཟུམ་འདེ་ ཡོ་ཀ་ནེ་ ཕོ་ཉ་ ཀྲུག་པ་རྦོ་ལ་ མོལ་, “སྃ་སྤོ་ ཆོན་མོ་ ཨུཕ་ར་ཀྲེ་ རྒྱུག་རྒེ་ མལ་ལེ་ཀ་ ཅིང་འདེ་ ཡོ་ཀ་ནེ་ ཕོ་ཉ་ ཞི་ཀ་ པུད་།” 15 ཏེ་ ཕོ་ཉ་ ཞི་ཀ་, ཏེ་རྒ་ ཏུའི་, ཞག་, ལྡ་ རྡང་ ལོའེ་ཕི་ ཀྲལ་འགྲིག་ ཛེད་ཏེ་ འཇིག་རྟེན་པ་རྒུ་ནི་ ཁག་ སུམ་མེ་ ནང་ནི་ ཁག་ཅིག་ སེད་ཅེ་ལ་ པུད་ཏེ་ འིན་། 16 ཡང་ ལྟེ་ཀ་ ཞོན་ཀ་ནེ་ མག་མི་རྒུ་ནི་ ཀྲང་ཧ་རྦོ་, ངེ་ ཚོར་ཤེ་ལ་ ཅེ་ཝ་ཉི་ཤུ་ རག་།
17 ཡང་ ངེ་ ཞལ་ཟིག་རྒེ་ན་ ལྟ་ རྡང་ ཏེ་ཀ་ ཞོན་ཀན་རྒུན་ ཐོང་, ཏོ་རྒུ་ནི་ མག་ཆ་རྒུན་ མེ་ ཙོག་སེ་ མར་སྤོ་, ངོན་པོ་ རྡང་, སེར་སྤོ་, ཡང་ ལྟ་རྒུ་ནི་ འགོ་ སིང་འགེ་ འགོ་ ཙོག་སེ་ འདུག་། ཏོ་རྒུ་ནི་ ཁ་ནི་ མེ་, ཏུད་པ་ རྡང་ མུ་ཟི་bརྒུན་ འབིང་འདུག་། 18 ཏེ་ ལྟ་རྒུ་ནི་ ཁེ་ ནང་ནི་ འབིང་ཀ་ནེ་ འཇི་ནང་ཅེན་ནེ་ ནེ་ལུག་ སུམ་ཀ་, ཀའོ་ མེ་, ཏུད་པ་ རྡང་ མུ་ཟི་རྒུ་ནི་ འཇིག་རྟེན་ནེ་ ཁག་ སུམ་མེ་ ནང་ནི་ ཁག་ ཅིག་རྒེ་ མི་རྒུན་ སེད་ཏེ་ མེ་ཀན་ ཅོའེ་། 19 ཏེ་ ལྟ་རྒུ་ནི་ ཁྱུད་འབོ་, ཁོང་རྒུ་ནི་ ཁ་ རྡང་ ང་མ་རྒུ་ནི་ན་ འདུག་། ཏོ་རྒུ་ནི་ ང་མ་ རུལ་ལེ་ འགོ་ ཙོག་སེ་ འདུག་, ཀའོ་ མི་རྒུན་ལ་ མེ་རྐྱོན་ ཅོ་ཅེ་ཕི་ ཀོལ་རྡུག་།
20 འིན་ན་ ཏེ་ ནེ་ལུག་ འཇི་སྤ་རྒུ་ནི་ན་ མ་ཤི་ཀན་ འཇིག་རྟེན་པ་རྒུ་ནི་ རང་ངེ་ ལེ་ཧ་ ངན་པ་རྒུ་ནི་ འགྱོད་པ་ མ་ཅོ་ལ་, ཏ་རུང་ང་ རྡུད་ ཡང་ སེར་, མུལ་, ར་རྒན་, རྡོ་ རྡང་ ཤིང་རྒུ་ནི་ ཅོ་ཀ་ནེ་ ཧུ་འདྲ་རྒུན་ལ་ ཅོལ་རྡུག་, ཀའོ་རྒུན་ལ་ ཐོང་ངེ་མེད་, ཡང་ ཚོར་རེ་མེད་, ཡང་ འགྲུལ་ལེ་ ཉེན་ནེ་མེད་། 21 ཁོང་རྒུ་ནི་ མི་ སེད་ཅེ་ ཡང་ ངན་ཆོའེ་ ཅོ་ཅེ་, ཡང་ ལུའི་འབྲེལ་ ངན་པ་ པོར་ཤེ་, ཡང་ ཧུ་ཅེ་རྒུ་ནི་ འགྱོད་པ་ ཅོའོ་ མི་འདུག་།