ཐེ་ཙེ་ རྡུན་པ་ ཅག་།
8
ལུ་རྒུའི་ ཐེ་ཙེ་ རྡུན་པ་རྦོ་ ཅག་ཏེ་ པེ་རྡང་, རྡེ་བ་ཅན་ནེ་ན་ ཆུ་ཙོད་ ཕེད་ ཟམ་ཤིག་ ཅང་ ཧད་ མེད་རྡེ་ འཇམ་ཐིང་ངེ་ ལུའི་། 2 ཏེ་ནི་ ངེ་ ཀོན་འཇོག་རྒེ་ ཧུ་འདུན་ལ་ ལྃ་རྡེ་ ཞུ་ཧ་ནེ་ ཕོ་ཉ་ རྡུན་ ཐོང་, ཡང་ ཁོང་རྒུན་ལ་ ཏུང་ རེ་རེ་ སལ་ལེ་ ཛེད་།3 སེར་རེ་ སང་སྤོར་ ནམ་ཀ་ནི་ ཞེན་ ཕོ་ཉ་ཞིག་ རྐྱོད་ཏེ་ ཆོད་ཁྲིའི་ འདུན་ལ་ ལྃ་རྡེ་ ཞུའུ་། ཁོ་ སྤོའེ་ མང་པོ་ཞིག་ ཀོན་འཇོག་རྒེ་ མི་རྒུ་ནི་ མོ་ལམ་མེ་ན་ སྲེ་རྡེ་ ཞུ་ཁྲིའི་ འདུན་ལ་ ཡོ་ཀ་ནེ་ སེར་རེ་ ཆོད་ཁྲི་ཀ་ པུལ་ སལ་། 4 སྤོའེ་ ཏྲི་ཞིམ་ཅེན་ནེ་ ཏུད་པ་རྦོ་ ཀོན་འཇོག་རྒེ་ མི་རྒུ་ནི་ མོ་ལམ་ འདང་ སྲེ་རྡེ་ ཕོ་ཉེ་ པུལ་ཧ་ནེ་ ཆོད་ཁྲི་ཀ་ནི་ ཀོན་འཇོག་ ཆོག་ལ་ ལྟག་ལ་ སོང་། 5 ཏེ་ནི་ ཏེ་ ཕོ་ཉ་རྦེ་ སེར་རེ་ སང་སྤོར་ ནམ་འདེ་ ཆོད་ཁྲི་ཀ་ནི་ སོ་ལེ་ མེ་ ཧང་འདེ་ འཇིག་རྟེན་ནེ་ཀ་ ཕྃ་རྦེ་, འཇིག་རྟེན་ནེ་ཀ་ ལོག་རྒེ་ འོད་ འབྲུག་ཧད་ཏང་ཀ་ནེ་ ཧད་ ཏང་ སང་འགུལ་ ཡོྃ་།
ཏུང་ རྡུན་།
6 ཏེ་ ལྟིང་ནི་ ཏུང་ རྡུན་ ཡོ་ཀ་ནེ་ ཕོ་ཉ་ རྡུན་ཀེ་ ཏོ་རྒུན་ ཕུ་ཅེ་ལ་ ཀྲལ་འགྲིག་ ཅོའེ་།
7 ཕོ་ཉ་ ཏང་པོ་རྦེ་ ཏུང་ ཕུ་རྡང་, ཁྲག་ འདྲེའེ་ཧ་ནེ་ སེ་ར་ རྡང་ མེ་ འཇིག་རྟེན་ནེ་ཀ་ པབ་, ཀ་རྦེ་ འཇིག་རྟེན་ནེ་ ཁག་ སུམ་མེ་ ནང་ནི་ ཁག་ ཅིག་རྒེ་ན་ ཡོ་ཀ་ནེ་ སྤང་ ངོན་པོ་ རྡང་ ལྕང་མ་ ཚང་མ་ མེ་ སྲག་ཏྃ་།
8 ཕོ་ཉ་ ཉི་སྤེ་ ཏུང་ ཕུ་རྡང་, མེ་ འབའ་རེན་ ཡོ་ཀ་ནེ་ རི་ ཆོན་མོ་ ཙོག་སེ་ རྒྱམ་ཚོའེ་ན་ ཕྃ་རྡང་, ཀ་རྦེ་ རྒྱམ་ཚོའེ་ ཁག་ སུམ་མེ་ ནང་ནི་ ཁག་ ཅིག་པོ་ ཁྲག་ལ་ འགྱུར་། 9 ཏེ་ རྒྱམ་ཚོའེ་ན་ ཡོ་ཀ་ནེ་ སེམ་ཅེན་ ཁག་ སུམ་མེ་ ནང་ནི་ ཁག་ ཅིག་པོ་ ཤི་, ཡང་ ཏེ་ རྒྱམ་ཚོའེ་ན་ ཡོ་ཀ་ནེ་ ཆུ་རེལ་ ཁག་ སུམ་མེ་ ནང་ནི་ ཁག་ཅིག་ མེ་ཀན་ སོང་།
10 ཏེ་ནི་ ཕོ་ཉ་ སུམ་པ་རྦེ་ ཏུང་ ཕུ་རྡང་, ནམ་ཀ་ནི་ མེ་ཏོག་ ཙོག་སེ་ ཡོ་ཀ་ནེ་ ཧར་མ་ ཆོན་མོ་ཞིག་, སྃ་སྤོ་ རྡང་ ཆུ་མིག་ ཁག་ སུམ་མེ་ ནང་ནི་ ཁག་ཅིག་རྒེ་ཀ་ ཀྲུལ་། 11 ཏེ་ ཧར་མ་རྦེ་ མིང་ལ་ ཁན་ཀྲེ་ ཟེར་རྡུག་, ཀ་རྦེ་ ཆུ་ ཁག་ སུམ་མེ་ ནང་ནི་ ཁག་ ཅིག་པོ་ ཁན་ཀྲེ་ འགྱུར་ཤུག་, ཡང་ ཁན་ཀྲེ་ འགྱུར་ཧན་ནེ་ ཆུ་ ཐུང་རྡེ་ མི་ མང་པོ་ཞིག་ ཤི་།
12 ཏེ་ནི་ ཕོ་ཉ་ ཞི་པེ་ ཏུང་ ཕུ་རྡང་, ཉི་མ་, ལྡ་ཝ་ རྡང་ ཧར་མེ་ ཁག་ སུམ་མེ་ ནང་ནི་ ཁག་ཅིག་ ཀབ་ ཏྃ་, ཡང་ མུན་ཀྲག་ འགྱུར་། ཉི་མ་ རྡང་ ཚན་ནི་ ཁག་ སུམ་མེ་ ནང་ནི་ ཁག་ ཅིག་པོ་ འོད་ མེད་རྡེ་ ལུའི་།
13 ཏེ་ནི་ ངེ་ ལྟོའེ་རྦེ་ ནམ་ཀེ་ རྐྱིལ་ལ་ ཕུར་རེན་ ཡོ་ཀ་ནེ་ ལག་རྒེ་, ཧད་ ཆོན་མེ་ན་ ཟེ་རེན་ ཚོར་, “འཇིག་རྟེན་ནེ་ན་ ཏེཏ་པ་ མེ་ཀ་ནེ་ མི་རྒུན་ལ་ འཇི་སྤ་, ཇི་སྤ་, ཇི་སྤ་, ལུའི་ཧ་ནེ་ ཕོ་ཉ་ སུམ་ཀེ་ ཏུང་འབོ་ ཕུ་རྡང་, ཅི་ མི་ཆ་!”