ཁོ་རང་ངེ་ མི་རྒུན་ ཀོན་འཇོག་རྒེ་ རྐྱོབ་རྦེན་།
7
འི་ ལྟིང་ནི་ ང་ ཐོང་, འཇིག་རྟེན་ནེ་ ཀྲུ་ཞི་ཀེ་ཀ་ ཕོ་ཉ་ ཞི་ ལྃ་རྡེ་ ས་ཀྱེཏ་ ཡང་ རྒྱམ་ཚོ་ ཡང་ ལྕང་མ་རྒུ་ནི་ཀ་ རྒྱུག་ མི་རྒྱུག་ཅེ་ལ་, འཇིག་རྟེན་ནེ་ ལུང་སྤོ་ ཞི་ཀ་ རྒག་ཏེ་ པོ་རེ་ ཛེད་ཏེ་ འདུག་། 2 ཏེ་ནི་ ངེ་, ལག་པེ་ན་ སོན་པོ་ ཀོན་འཇོག་རྒེ་ ཐེ་ཙེ་ ཁུར་ཧ་ནེ་ ཕོ་ཉ་ ང་པ་ ཤར་ ཆོག་ནི་ འབིང་ངེ་ ཐོང་། འི་ ཕོ་ཉེ་, ས་ཀྱེཏ་ ཏང་ རྒྱམ་ཚོ་རྒུན་ལ་ ནོད་པ་ ཏང་ཅེ་ ཝང་ སལ་ཧ་ནེ་ ཕོ་ཉ་ འཇིག་རྟེན་ནེ་ ཀྲུ་ཞི་ཀེ་ཀ་ ལྃ་རྡེ་ ཡོ་ཀན་རྒུན་ལ་ ཧད་ ཆོན་མེ་ན་ མོལ་, 3 “ཨ་ཧོའེ་ ཨ་ཧོ་རང་ ཀོན་འཇོག་རྒེ་ ཡོག་པོ་རྒུ་ནི་ ཐོད་པེ་ཀ་ ཐེ་ཙེ་ ཏང་ཏང་ཚུག་པ་ ས་ཀྱེཏ་, ཡང་ རྒྱམ་ཚོ་, ཡང་ ལྕང་མ་རྒུན་ལ་ ནོད་པ་ མ་ཏང་ཧེ་།”4 ཏེ་ནི་ ང་ ཐེ་ཙེ་ ཏང་ཚར་ཧན་རྒུ་ནི་ ཀྲང་ཧ་རྦོ་ ཚོར་, ཀའོ་ འབུམ་ཅིག་ཏང་ ལྟོང་ཞིབ་ཅུ་ ཞབ་ཞི་ འདུག་, ཀའོ་རྒུན་ ཨིས་ར་ཡེལ་ལེ་ རྡེ་ ཚང་མེ་ ནང་ནི་ 5 ཡུ་འདཱེ་ མི་རིག་ནི་ ལྟོང་ཅུག་ཉི་, རུ་འབེན་ནེ་ མི་རིག་ནི་ ལྟོང་ཅུག་ཉི་, འགཱད་རྡེ་ མི་རིག་ནི་ ལྟོང་ཅུག་ཉི་, 6 ཨ་ཤེར་རེ་ མི་རིག་ནི་ ལྟོང་ཅུག་ཉི་, ནབ་ཐ་ལི་ མི་རིག་ནི་ ལྟོང་ཅུག་ཉི་, མ་ན་ཤེ་ མི་རིག་ནི་ ལྟོང་ཅུག་ཉི་, 7 ཤི་མི་ཡོན་ནེ་ མི་རིག་ནི་ ལྟོང་ཅུག་ཉི་, ལི་ཝི་ མི་རིག་ནི་ ལྟོང་ཅུག་ཉི་, ཡི་ས་འགར་རེ་ མི་རིག་ནི་ ལྟོང་ཅུག་ཉི་, 8 ཟེ་པུ་ལོན་ནེ་ མི་རིག་ནི་ ལྟོང་ཅུག་ཉི་, ཡོ་སེབ་རྦེ་ མི་རིག་ནི་ ལྟོང་ཅུག་ཉི་, ཡང་ འབེན་ཡཱ་མིན་ནེ་ མི་རིག་ནི་ ལྟོང་ཅུག་ཉི་ ནོག་།
མི་ཚོག་ ཆེན་མེ་ རྟོད་པ་།
9 ཏེ་ ལྟིང་ནི་ ངེ་ སུ་ཞིག་ལ་ སི་ མི་ཉེན་ཅེ་ མི་ཚོག་ མང་པོ་ཞིག་ ཐོང་, ཀའོ་རྒུན་ རྒྱལ་ཁབ་, རིག་, མི་ རྡང་ ཧད་རིག་ ཚང་མ་ནི་ ཞུ་ཁྲིའི་ རྡང་ ལུ་རྒུའི་ འདུན་ལ་ ལྃ་རྡེ་ འདུག་པེན་། ཏོ་རྒུ་ནི་ ཀོའེ་ ཀར་སྤོ་ ཀོན་འདེ་, ཆོང་ངར་རེ་ ལྕང་མེ་ ཡ་ལག་རྒུན་ ལག་པེ་ན་ ཁུར་རྡེ་, 10 ཧད་ ཆོན་མེ་ན་ ཟེར་, “ཐར་པ་རྦོ་ ཞུ་ཁྲིའི་ཀ་ ཞུ་ཧན་ ཀོན་འཇོག་ ཏང་ ལུ་རྒུ་ ཉ་ཧ་ནི་ ཐོབ་རྦེ་ནོག་།”
11 ཞུ་ཁྲིའི་, འུ་རྐྱོང་རྒུན་ འདང་ སྲོག་ ཡོ་ཀན་ ཞི་ཀ་ལ་ ཐ་ནི་ ཧོར་རྡེ་ ཕོ་ཉ་ ཚང་མ་ ཞྃ་རྡེ་ འདུག་། ཁོང་ ཚང་མེ་ ཞུ་ཁྲིའི་ འདུན་ལ་ ཆག་པུ་ལེན་ ཀོན་འཇོག་ལ་ ཅོལ་། 12 ཁོང་རྒུ་ནི་ མོལ་, “ཨ་མེན་། རྟོད་པ་, སྤལ་, ཤེ་རབ་, ཐུག་ཞེ་, སི་ཝ་, ཝང་ འདང་, ཤེད་རྒུན་ ཏུའི་རྒྱུན་ནི་ཏུའི་རྒྱུན་, ཨ་ཧོ་རྒུ་ནི་ ཀོན་འཇོག་རྒེ་ ནོག་, ཨ་མེན་།”
13 ཏེ་ནི་ འུ་རྐྱོང་ ཅིག་རྒེ་ ང་ འདྲི་རག་, “འི་ ཀོའེ་ ཀར་སྤོ་ ཀོན་ཀན་རྒུན་ སུ་ ནོག་? ཡང་ ཀ་ནི་ ཡོྃ་རྡེ་ ནོག་?”
14 ངེ་ ཁོང་ལ་, “སྤོན་འབོ་ལེ་, ང་ རྒྱུའི་མེད་ འིན་ན་ ཉེ་རང་ངེ་ ཁྱེན་ནེ་ནོག་” ཞུའི་རྦེན་།
ཁོང་ངེ་ མོལ་ལེ་རག་, “ཡུ་རྒུན་ རྡུ་ངལ་ མ་ ཆོན་མོ་ནི་ འབིང་འདེ་ ཡོང་ཀན་རྒུན་ ནོག་། ཁོང་རྒུ་ནི་ ཁོ་རང་རྒུ་ནི་ ཀོའེ་རྒུན་ ལུ་རྒུའི་ ཧུ་ཁྲག་རྒེ་ན་ ཁྲུའི་རྡེ་ ཀར་སྤོ་ ཅོའེ་རྡེ་ ནོག་།” 15 “ཏེ་རྒ་རྦེ་ཕི་ལ་ ཁོང་རྒུ་ནི་ ཀོན་འཇོག་རྒེ་ ཞུ་ཁྲིའི་ འདུན་ལ་ ལྃ་རྡེ་ ཀོན་འཇོག་རྒེ་ ཁང་པེ་ན་ ཚན་ཉིན་ མེད་རྡེ་ ཁོང་ལ་ ཞབ་རྟོག་ ཞུ་ནོག་། ཡང་ ཞུ་ཁྲིའི་ཀ་ ཞུ་རྡེ་ ཡོ་ཀན་འབེ་, ཀུར་ ཙོག་སེ་ ཁོང་རྒུན་ ཀབ་ཏེ་ རྐྱོབ་རྦེ་ ཛེ་རྡེན་། 16 ཁོང་རྒུན་ མ་ནི་ མི་ལྟོག་, ཡང་ མི་ཧོམ་, མ་ཚེད་ ཉི་མེ་ ཚེད་, ཡང་ ཚེད་ ཀྲག་པེ་ ཅོའེ་རྡེ་ ཁོང་རྒུན་ ཚིག་ མི་ཚིག་། 17 ཅེ་ཟེར་ནི་ ཞུ་ཁྲིའི་ རྐྱིལ་ལ་ ལྃ་རྡེ་ ཡོ་ཀ་ནེ་ ལུ་རྒུ་རྦོ་, ཁོང་རྒུན་ རྐྱོབ་ཀ་ནེ་ ལུག་ཟི་ ནོག་། ཁོང་ངེ་, ཁོང་རྒུན་ སྲོག་ སལ་ཧ་ནེ་ ཆུ་མིག་རྒུ་ནི་ འདུན་ལ་ ཁྲིད་ཏེ་ ཁྱེར་རེ་ ཛེ་རྡེན་། ཡང་ ཀོན་འཇོག་རྒེ་ ཁོང་རྒུ་ནི་ ཆི་མག་ ཕི་ ཛེད་རྡེན་།”