ངོན་ཅུག་ཀ་ནེ་ སྤེ་ཆ་ 6

ཐེ་ཙེ་ རྡུན་།

ཏེ་ནི་ ངེ་ ལུ་རྒུའི་ ཏེ་ ཐེ་ཙེ་ རྡུན་ནེ་ ནང་ནི་ ཏང་པོ་ ཅག་ཏེ་ པེ་ ཛེ་རྡེ་ལ་ ཐོང་། ཏེ་ སྲོག་ ཡོ་ཀན་ ཞི་ཀེ་ ཕྲོ་ནི་ ཅིག་རྒེ་ འབྲུག་རྒེ་ཧད་ཏང་ཀན་ ཙོག་སེ་ ཧད་རྡེ་ན་ “ཤོག་” མོལ་ལེ་རག་། 2 ངེ་ ཀྱེ་རྐྱ་ ལྟོའེ་རྦེ་, ང་ ལྟ་ ཀར་སྤོ་ཞིག་ ཐོང་, ཏོ་རྦེ་ཀ་ ཞོན་ཀན་འབེ་ ཞུ་ཞིག་ ཁུར་རྡེ་ ཡང་ ཁོའེ་ འགོའེ་ཀ་ ཐོར་ཤོག་ ཧོན་ནེ་ ཛེད་ཏེ་ འདུག་། ཁོ་ རྒྱལ་ཁ་ ཐོབ་ཚར་ཧན་ ཙོག་སེ་ རྒྱལ་ཁ་ ནེན་ནེ་ལ་ འབིང་།

3 ལུ་རྒུའི་ ཐེ་ཙེ་ ཉི་སྤ་རྦོ་ ཅག་ཏེ་ པེ་རྡང་, སྲོག་ ཡོ་ཀན་ ཉི་སྤ་རྦེ་, “ཤོག་” མོལ་ལེན་ཞིག་ ཚོར་། 4 ཏེ་ནི་ ཡང་ ལྟ་ མེ་ ཙོག་སེ་ མར་སྤོ་ཞིག་ འབིང་ངེན་ ཐོང་, ཏེ་ཀ་ ཞོན་ཀན་འབོ་ལ་ ར་ཡི་ ཆོན་མོ་ཞིག་ ཏང་ འཇིག་རྟེན་ནི་ཀ་ནི་ ཞིའི་རྡེ་ མེ་ཀན་ ཅོ་ཅེ་ ཝང་ཆ་ སལ་། ཏེ་ནི་ ནོལ་ཤེ་ འགོ་ཟུག་ཏེ་ མི་རྒུ་ནི་ མ་ ཚུལ་ ངན་པ་ ཉམ་པོ་ ཅིག་ ཏང་ ཅིག་ སེད་།

5 ལུ་རྒུའི་ ཐེ་ཙེ་ སུམ་པ་འབོ་ ཅག་ཏེ་ པེ་རྡང་, སྲོག་ ཡོ་ཀན་ སུམ་པ་རྦེ་ “ཤོག་” མོལ་ལེན་ཞིག་ ཚོར་། ངེ་ ལྟག་ལ་ ལྟོའེ་རྦེན་ ཡང་ ལྟ་ ནག་པོ་ཞིག་ ཐོང་, ཏེ་ཀ་ ཞོན་ཀན་འབེ་ ལག་པེ་ན་ ཏ་ཀ་འགྲི་ཞིག་ འདུག་། 6 ཏེ་ནི་ ངེ་ ཏེ་ སྲོག་ ཡོ་ཀན་ ཞི་ཀེ་ ཕྲོ་ནི་ ཧད་ཅིག་རྒེ་, “ཞག་ཅིག་རྒེ་ ལ་ཆ་ ཀྱི་ལོ་ ཅིག་རྒེ་ ཀྲོ་ ཡང་ ཀྱི་ལོ་ སུམ་མེ་ ནེ་ཕེ་ མ་ནི་ ཉོ་མི་ཉེན་། འིན་ན་ མར་ རྡང་ རྒུན་འགྲུམ་མེ་ ཁོའེ་རྒུན་ ཧོན་མོ་ ཆ་ མ་ཅུག་ཧེ་།” མོལ་ལེན་ཞིག་ ཚོར་།

7 ལུ་རྒུའི་ ཐེ་ཙེ་ ཞི་པ་རྦོ་ ཅག་ཏེ་ པེ་རྡང་, ངེ་ ཏེ་ སྲོག་ ཡོ་ཀན་ ཞི་པ་རྦེ་, “ཤོག་” མོལ་ལེན་ཞིག་ ཚོར་། 8 ངེ་ ལྟོའེ་རྦེ་ ང་ ཀོག་ཏལ་ ཙོག་སེ་ འདོག་ ཡོ་ཀ་ནེ་ ལྟ་ཞིག་ ཐོང་, ཏེ་ཀ་ ཞོན་ཀན་འབོ་ལ་ ཤི་ཅེ་ ཡང་ ཏོ་རྦེ་ ལྟིང་འགྲྃ་ནི་, ཡོང་ཀ་ནེ་ ཁྲོ་པ་རྦོ་ལ་ ཤི་ཀན་རྒུ་ནི་ ས་ཅ་ ཟེར་རྡུག་། ཏོ་ ཉ་ཧ་ འཇིག་རྟེན་ནེ་ ཁག་ཞི་ ནང་ནི་ ཁག་ཅིག་ལ་ ར་ཡི་, ལོར་ཧོན་, ནེད་ ཏང་ རི་ སེམ་ཅེན་རྒུན་ རྒྱུད་ཏེ་ མི་རྒུན་ སེད་ཅེ་ ཝང་ཆ་ སལ་ལེ་ ཛེད་།

9 ལུ་རྒུའི་ ཐེ་ཙེ་ ང་པ་ ཅག་ཏེ་ པེ་རྡང་, ཆོད་ཁྲི་ ཡོག་ལ་, ཀོན་འཇོག་རྒེ་ ཀའ་ ཁ་ཉེན་འདེ་ མ་ཤི་ཀེ་ཀ་ རྡེན་ཆེ་ཤེ་ ཅོ་ཀ་ནེ་ སྤང་པོ་ ཏང་ཅེ་རྦེ་ སེད་ཀ་ནེ་ སེམ་ཉིད་རྒུན་ ངེ་ ཐོང་། 10 ཏོ་རྒུ་ནི་ ཙོབོ་ལ་ ཀུ་ཅུ་ ཏང་ངེན་ ཟེར་, “ཀུན་ཝང་ ཙོབོ་ལེ་, ཏམ་པ་ རྡང་ ཀྲང་པོ་, ཉེ་རང་ངེ་ འི་ འཇིག་རྟེན་པ་ ཏེཏ་པ་ མེ་ཀན་ མི་རྒུན་ལ་, ཤའ་ མ་ཛེད་རྡེ་ ཡང་ ང་ཞི་ ཁྲག་རྒེ་ ལེན་ མ་སལ་ལེ་ ནམ་ཚུག་པ་ སྲུྃ་རྡེ་ ཞུ་ཤེན་ ལེ་?” 11 ཏེ་ནི་ ཏེ་ ཚང་མ་ལ་ ཀོའེ་ ཀར་སྤོ་ སལ་ལེ་ ཛེད་, ཡང་ ཁོང་ ཙོག་སེ་ ཁོང་རྒུ་ནི་ ཁྲོ་པ་ སྤུན་ ཡི་ཤུའི་ ཞབ་རྟོག་པ་ སེད་ཅེ་ཅེན་རྒུ་ནི་ ཀྲང་ཧ་ འདྲན་འདྲ་ ཆ་ཆ་ཚུག་པ་, ཁོང་རྒུན་ལ་ ཙི་རྦིག་ ངལ་ཚོའེ་ ཅེ་ལ་ མོལ་།

12 ལུ་རྒུའི་ ཐེ་ཙེ་ ཀྲུག་པ་རྦོ་ ཅག་ཏེ་ པེ་རྡང་, སྃ་འགུལ་ ཀྲག་པོ་ཞིག་ ཡོྃ་། ཉི་མ་རྦོ་ རེ་ ནག་པོ་ ཙོག་སེ་ མུན་ཀྲག་ ཡང་ ལྡ་ཝ་རྦོ་ ཁྲག་ ཙོག་སེ་ མར་སྤོ་ འགྱུར་། 13 ཏེ་ནི་ ལུང་ཀྲག་ ཀྲག་པེ་ ལྕང་མ་ རྒུལ་ཅེ་རྦེ་ཀ་ནི་ མིན་ མ་མིན་ཀ་ནེ་ སྤིག་རྒེ་ ཁ་ཟོའེ་ ཀྲུལ་ལེ་ ཙོག་སེ་ ནམ་ཀེ་ན་ ཡོ་ཀ་ནེ་ ཧར་མ་རྒུན་ འཇིག་རྟེན་ནེ་ཀ་ ཀྲུལ་། 14 ཡང་ ནམ་ཀ་ནི་ ཤོག་རིལ་ སྲིལ་ལེ་ ཙོག་སེ་ མེ་ཀན་ སོང་། རི་ ཚང་མ་ རྡང་ ཚོ་ལིང་རྒུན་, ཡོད་སེ་ མལ་ལེ་ཀ་ནི་ ཐེན་འདེ་ མི་འདུག་།

15 ཏེ་ནི་ འཇིག་རྟེན་ནེ་ རྒྱ་སྤོ་རྒུན་, རྒྱལ་ལུ་རྒུན་, མག་མི་ སྤོན་འབོ་ འཇིག་སྤོ་རྒུན་, ཆུག་པོ་རྒུན་, ཝང་ཅེན་རྒུན་, ཚེ་ཡོག་ ཏང་ ར་ཝང་ཅེན་ནེ་ མི་ཚང་མ་, འབའ་ཝོ་ རྡང་ རི་ ཕོ་ལོང་ངེ་ ཕྲོ་ འིཔ་ཏུག་། 16 ཡང་ ཏེ་ མི་རྒུ་ནི་ རི་ ཐོན་པོ་རྒུན་ འདང་ ཀྲག་རྒུན་ལ་, “ཞུ་ཁྲིའི་ཀ་ ཞུ་རྡེ་ ཡོ་ཀན་ ཡང་ ལུ་རྒུའི་ ཐུག་སྲོ་ནི་ འིཔ་ཅེ་ཕི་ རྡིབ་ཏེ་ ང་ཞ་རྒུན་ ཀོབ་ཤིག་ཧེ་། 17 ཅེ་ཟེར་ནི་ ཁོང་ངེ་ ཐུག་སྲོའེ་ འཇི་ནང་ཅེན་ནེ་ ཞག་པོ་ ལེཔ་ ཚར་རྡེ་ ནོག་, སུ་ལ་ ཏོ་རྒུན་ ཁུར་ ཉེན་ནེན་” ཟེར་།