ཤོག་རིལ་ རྡང་ ལུ་རྒུ་།
5
ངེ་ ཏེ་ ཞུ་ཁྲིའི་ཀ་ ཞུ་རྡེ་ ཡོ་ཀ་ནེ་ ཆག་ ཡོའེ་སྤེ་ན་, སྲིལ་ཀ་ནེ་ ཤོག་རིལ་ རྒྱབ་འདུན་ ཉ་ཧེ་ཀ་ འབྲི་རྡེ་ ཐེ་ཙེ་ རྡུན་ རྒྱབ་ཏེ་ ཡོ་ཀན་འབོ་ ཐོང་། 2 ཡང་ ངེ་ ཤུག་ཤེན་ ཕོ་ཉ་ཞིག་རྒེ་ ཧད་ ཆོན་མེ་ན་ མོ་ལེན་ ཚོར་, “འི་ སྲིལ་ཧ་ནེ་ ཤོག་རིལ་ ཐེ་ཙེ་རྒུན་ ཅག་ཏེ་ པེ་ཅེ་ འོའེ་སྤ་ སུ་ འིན་?” 3 འིན་ན་ རྡེ་བ་ཅན་, ཡང་ འཇིག་རྟེན་ནེ་ཀ་ འདེད་ཀན་, ཡང་ སེ་ ཡོག་ལ་ ཡོ་ཀན་ སུ་ཞི་ལ་ ཏེ་ ཤོག་རིལ་འབོ་ པེ་ ཡང་ ལྟ་ མ་ཉེན་། 4 ང་ ཧོཔ་ ངུའི་རྦོན་ ཅེ་ཟེར་ནི་ སུ་ཞི་ལ་, ཏེ་ ཤོག་རིལ་ པེ་ཅེ་, ཡང་ སིལ་ཤེ་ འོའེ་སྤ་ མི་འདུག་། 5 ཏེ་ནི་ འུ་རྐྱོང་རྒུ་ནི་ ཕྲོ་ནི་ ཅིག་རྒེ་ ང་ མོལ་, “མ་ངུ་, ལྟོའེ་ ཡུ་འདཱ་པེ་ མི་རིག་རྒེ་ ནང་ནི་ སིང་འགེ་ ཟེར་ཧན་, རྒྱ་སྤོ་ འདཱ་འབིད་རྡེ་ ཕར་རྒྱུད་, རྒྱལ་ཁ་ ཐོབ་ཀན་, ཁོང་ནི་ ཐེ་ཙེ་ རྡུན་ཀ་ ཅག་ཏེ་ སྤེ་ཆ་ པེ་ཅེ་ འོའེ་སྤ་ཅེན་འབོ་ ཞུ་རྡེ་ནོག་།”6 ཏེ་ནི་ ང་ སེད་ཏེ་ ཡོ་ཀན་ ཙོག་སེ་ ལུ་རྒུ་ཞིག་ ཐོང་, ཁོང་ ཏེ་ སྲོག་ ཡོ་ཀན་ ཞི་ཀ་ རྡང་ འུ་རྐྱོང་ ཉི་ཤུ་སེབ་ཞི་ ཐ་ནི་ ཧོར་རྡེ་ ཡོ་ཀ་ནེ་ ཞུ་ཁྲིའི་ འདུན་ལ་ ཞྃ་རྡེ་ འདུག་། ཏེ་ ལུ་རྒུ་ལ་ རཱ་ཅོ་ རྡུན་ འདང་ མིག་ རྡུན་ འདུག་, ཀའོ་ ཀོན་འཇོག་རྒེ་ འཇིག་རྟེན་ སོན་ཏེ་ན་ ཀལ་ལེ་ ཛེད་ཀ་ནེ་ ཐུག་ཡིད་ རྡུན་འབོ་ ནོག་། 7 ཏེ་ ལུ་རྒུ་རྦོ་ རྐྱོད་ཏེ་ ཞུ་ཁྲིའི་ཀ་ ཞུ་ཧ་ནེ་ ཆག་ ཡོའེ་སྤ་ནི་, ཏེ་ སྲིལ་ཧ་ནེ་ སྤེ་ཆ་འབོ་ ནེན་། 8 ཁོང་ངེ་ སྤེ་ཆ་འབོ་ ཁོ་རང་ངེ་ ཆག་ལ་ ནམ་མེ་རྡང་, སྲོག་ ཡོ་ཀན་ ཞི་ཀ་ རྡང་ འུ་རྐྱོང་ ཉི་ཤུ་སེབ་ཞི་རྒུ་ནི་ ལུ་རྒུའི་ འདུན་ལ་ ཆག་པུལ་། ཡང་ ཁོང་ ཚང་མེ་ ལག་ལ་ འགྲམ་ཉན་ ཡང་ སྤོའེ་ ཧང་ཀ་ནེ་ སེར་རེ་ སང་སྤོར་ རིག་ འདུག་, ཏོ་ སྤོའེ་རྒུན་ ཀོན་འཇོག་རྒེ་ མི་རྒུ་ནི་ མོ་ལམ་རྒུན་ ནོག་། 9 ཏོ་རྒུ་ནི་ ལུ་ སོ་མ་ཞིག་ ཏང་།
“ཉེ་རང་, ཏེ་ སྲིལ་ཧ་ནེ་ ཤོག་རིལ་འབོ་ ནེན་འདེ་
ཐེ་ཙེ་རྒུན་ ཅག་ཅེ་ འོའེ་སྤ་ ནོག་།
ཅེ་ཞུ་ནི་ ཉེ་རང་ ཀྲོྃ་རྡེ་, ཉེ་རང་ངེ་ ཧུ་ཁྲག་ རིན་ལ་ ཤལ་ལེ་ ཛེད་ཏེ་,
རིག་ ཚང་མ་, ཧད་རིག་ ཚང་མ་ རྡང་, རྒྱལ་ཁབ་ ཚང་མེ་ མིར་རྒྱུད་རྒུ་ནི་
ཀོན་འཇོག་རྒེ་ཕི་ མི་རྒུན་ ཉོ་ ཛེད་ཏེ་ ནོག་།
10 ཉེ་རང་ངེ་ ཏེ་ མི་རྒུན་ ཨ་ཧོ་རྒུ་ནི་ ཀོན་འཇོག་ལ་ ཞབ་ཤི་ ཞུ་ཅེ་ཕི་,
རྒྱལ་སྲིད་ ཏང་ ལ་མ་རྒུན་ ཅོའོ་ ཛེད་།
ཡང་ ཏོ་རྒུ་ནི་ འཇིག་རྟེན་ནེ་ཀ་ ཝང་སྲུལ་ལེན་།”
11 ཏེ་ནི་ ངེ་ ལྟ་རྡང་, ཕོ་ཉ་ ལྟོང་ཀྲག་ ཕྲི་ཀྲག་ མང་པེ་ ཧད་ ཚོར་, ཏེ་རྒུ་ནི་ ཞུ་ཁྲིའི་, སྲོག་ ཡོ་ཀན་ ཞི་ཀ་ རྡང་ འུ་རྐྱོང་ ཉི་ཤུ་སེབ་ཞི་རྒུན་ལ་ ཐ་ནི་ ཧོར་རྡེ་ འདུག་པེན་། 12 ཧད་ ཆོན་མེ་ན་ ཏོ་རྒུ་ནི་ ལུ་ ཏང་འདུག་པེན་།
“ཏེ་ སེད་ཀ་ནེ་ ལུ་རྒུ་རྦོ་ལ་ ཝང་, ནོར་, ཤེ་རབ་, ཤེད་,
སི་ཝ་, སྤལ་ རྡང་ རྟོད་པ་ ཐོབ་ཅེ་ འོའེ་སྤ་ འིན་།”
13 ཏེ་ནི་ ངེ་ རྡེ་བ་ཅན་, འཇིག་རྟེན་, སེ་ ཡོག་ལ་ ཡོ་ཀན་ འདང་, རྒྱམ་ཚོའེ་ན་ ཡོ་ཀ་ནེ་ སྲོག་ཅེན་ ཚང་མེ་,
“ཞུ་ཁྲིའི་ཀ་ ཞུ་ཧན་ འདང་ ལུ་རྒུ་ལ་ རྟོད་པ་, སི་ཝ་,
སྤལ་ རྡང་ ཝང་རྒུན་ ཏུའི་རྒྱུན་ནི་ཏུའི་རྒྱུན་ལ་ ཐོབ་ཤིག་”
ཟེ་རེན་ ལུ་ ཏང་ངེན་ ཚོར་།
14 ཏེ་ནི་ ཏེ་ སྲོག་ ཡོ་ཀན་ ཞི་ཀེ་ ཞུའི་ “ཨ་མེན་”, ཡང་ ཏེ་ ཉི་ཤུ་སེབ་ཞི་རྒུན་ལ་ ཐ་ནི་ འུ་རྐྱོང་རྒུ་ནི་ ཆག་པུ་ལེན་ ཁོང་རྒུན་ལ་ ཅོལ་།