ངོན་ཅུག་ཀ་ནེ་ སྤེ་ཆ་ 4

ཟི་ཞིད་ཅེན་ནེ་ ཀོན་འཇོག་རྒེ་ ཞལ་ཟིག་།

ཏོ་རྦེ་ ལྟིང་ནི་ ངེ་ རྡེ་བ་ཅན་ནེ་ན་ པེ་རྡེ་ ཡོ་ཀ་ནེ་ རྒོ་ཞིག་ ཐོང་, ཡང་ ངུལ་ལ་ ཚོར་ཧ་ནེ་ ཏུང་ ཙོག་སེ་ ཧད་པེ་ ང་, “ལྟག་ལ་ ཤོག་, ངེ་ ཁྱེ་རང་ལ་ ལྟིང་ནི་ ཆ་རྒོ་ཤེ་ཅེན་རྒུན་ ལྟན་ནེན་” མོལ་ལེ་རག་། 2 ཏེ་རྒ་མ་རྒ་ ཀོན་འཇོག་རྒེ་ ཐུག་ཡིད་ ངེ་ཀ་ པབ་ཏེ་ ངེ་ རྡེ་བ་ཅན་ནེ་ན་ ཞུ་ཁྲིའི་ཀ་ ཞུ་རྡེ་ ཡོ་ཀན་འབོ་ ཐོང་། 3 ཏེ་རྒ་ ཞུ་རྡེ་ ཡོ་ཀན་འབོ་ མ་ འདང་ཤེན་: རིན་ཅེན་ ཡུ་ རྡང་ ཅུ་རུ་ ཙོག་སེ་ འདུག་, ཡང་ ཏེ་ ཞུ་ཁྲིའི་རྦོ་, རྡོ་ རིན་ཅེན་ ལྗང་ཀུ་ རྡང་ མར་སྤོ་ ཙོག་སེ་ ཟ་ཆུ་ཐུང་ངེ་ ཧོར་རྡེ་ འདུག་། 4 ཏེ་ ཞུ་ཁྲིའི་རྦོ་ ཡང་ ཁྲིའི་ ཉི་ཤུ་སེབ་ཞི་ ཧོར་རྡེ་ འདུག་, ཏོ་རྒུ་ནི་ཀ་ འུ་རྐྱོང་ ཉི་ཤུ་སེབ་ཞི་ ཞུ་རྡེ་ ཡོ་ཀན་རྒུ་ནི་ ནམ་ཟ་ ཀར་སྤོ་ ཡང་, ཁོང་རྒུ་ནི་ རྒོའེ་ཀ་ སེར་རེ་ ཐོར་ཤོག་ ནམ་འདེ་ ཐོང་། 5 ཡང་ ཏེ་ ཞུ་ཁྲིའི་རྦེ་ཀ་ནི་ ལོག་རྒེ་ འོད་ ཏང་ འབྲུག་ཧད་ཏང་ཀ་ནེ་ ཧད་རྒུན་ འབིང་འདུག་། ཞུ་ཁྲིའི་ འདུན་ལ་ ངད་ཅེན་ འབར་རེན་ ཡོ་ཀ་ནེ་ མར་མེ་ རྡུན་ལ་ འདུག་, ཀའོ་རྒུན་ ཀོན་འཇོག་རྒེ་ ཐུག་ཡིད་ རྡུན་འབོ་ ཞུ་རྡེ་ནོག་། 6 ཡང་ ཏོ་རྦེ་ འདུན་ལ་ ཤེལ་ལེ་ རྒྱམ་ཚོ་ཞིག་ འདུག་, ཀ་འབོ་ སལ་སྤོ་ ཁྲ་སལ་སལ་ ཐོང་འདུག་།

ཏེ་ ཞུ་ཁྲིའི་རྦོ་ལ་ སྲོག་ ཡོ་ཀན་ ཞི་ ཧོར་རྡེ་ འདུག་, ཏོ་རྒུ་ནི་ རྒྱབ་འདུན་ ཉ་ཧ་ མིག་རྒེ་ ཀང་འདེ་ འདུག་། 7 ཏེ་ སྲོག་ ཡོ་ཀན་ ཏང་པོ་ སིང་འགེ་ ཙོག་སེ་, ཉི་སྤ་རྦོ་ ལང་ཀྲོ་ ཙོག་སེ་, སུམ་པ་རྦོ་ མི་ རྡོང་ ཙོག་སེ་, ཡང་ ཞི་པ་རྦོ་ ཕུར་ཧ་ནེ་ ལག་ ཙོག་སེ་ འདུག་། 8 སྲོག་ ཡོ་ཀན་ ཞི་ཀ་ལ་ ཤོག་པ་ ཀྲུ་རུག་ འདུག་, ཏེ་ ཤོག་པ་རྒུ་ནི་ ལྟག་ཡོག་ ཚང་མ་ མིག་རྒེ་ ཀང་འདེ་ འདུག་། ཡང་ ཚེན་ཉིན་ མེད་རྡེ་ ཆེད་མེད་ལ་ ཏོ་རྒུ་ནི་ ཞུ་རུག་,

“ཏམ་པ་, ཏམ་པ་, ཏམ་པ་ ཙོབོ་ ཀོན་འཇོག་ ཀུན་ཝང་ འིན་།

ངུལ་ལ་ ཞུ་རྡེ་ ཡོ་ཀན་, ཏག་ས་ལ་ ཞུ་རྡེ་, ཡང་ རྐྱོད་ཅེ་ཅེན་ འིན་།”

9 ནམ་ སྲོག་ ཡོ་ཀན་རྒུ་ནི་ ཞུ་ཁྲིའི་ཀ་ ཞུ་ཧན་ ཀའོ་ ཏུའི་རྒྱུན་ནི་ཏུའི་རྒྱུན་ ཞུ་རྡེ་ནོག་ ཁོང་ལ་ རྟོད་པ་, སི་ཝ་ རྡང་, ཐུག་ཞེ་ཆེ་ པུལ་ཟ་ནི་, 10 འུ་རྐྱོང་ ཉི་ཤུ་སེབ་ཞི་རྦོ་ལ་ ཞུ་ཁྲིའི་ཀ་ ཞུ་རྡེ་ ཡོ་ཀན་ ཀའོ་ ཏུའི་རྒྱུན་ནི་ཏུའི་རྒྱུན་ ཞུ་རྡེ་ནོག་ ཁོང་ངེ་ འདུན་ལ་ ཆག་པུ་ལེན་ ཁོང་ལ་ ཅོལ་། ཁོང་རྒུ་ནི་ རང་རང་ངེ་ ཐོར་ཤོག་པོ་ ཞུ་ཁྲིའི་ འདུན་ལ་ པོར་རྡེ་ མོལ་།

11 “ང་ཞི་ ཙོབོ་ རྡང་ ང་ཞི་ ཀོན་འཇོག་,

ཉེ་རང་འབོ་ སྤལ་, སི་ཝ་ རྡང་ ཝང་ ཐོབ་ཅེ་ འོའེ་སྤ་,

ཅེ་ཟེར་ནི་ ཉེ་རང་ངེ་ ཅི་ཚང་མ་ ཅོའོ་ ཛེད་ཏེ་

ཉེ་རང་ངེ་ ཐུག་འདོད་ ནང་ཞིན་ ཏོ་རྒུན་ སོན་པོ་ ལུའི་ཤུག་རྒེ་ ཛེད་།”