སཱར་འདེ་ ཆོའེ་ཚོག་ལ་ ཁྲིན་རྦོ་།
3
“འི་ ཡི་རྒེ་རྦེ་ སཱར་འདེ་ ཆོའེ་ཚོག་རྒེ་ ཕོ་ཉ་ འབྲི་།”“འི་ ཁྲིན་འབོ་, ཀོན་འཇོག་རྒེ་ ཐུག་ཡིད་ རྡུན་ འདང་ ཧར་མ་ རྡུན་ནེ་ཀ་ ཝང་ ཡོ་ཀ་ནེ་ ཆོག་ནི་ འིན་། ཁྱི་ཞ་རྒུ་ནི་ ཅོ་ཀན་ ཚང་མ་ ང་ རྒྱུའི་ཡོད་, ཞེན་མ་རྒུ་ནི་ ཁྱི་ཞ་ ཏེཏ་པེ་ན་ སོན་ཏེ་ འིན་ཀན་ ཐེའེ་ན་, སེམ་ཡིད་རྡེ་ ཐོག་ནི་ ཁྱི་ཞ་རྒུན་ ཤི་རྡེ་ ནོག་། 2 ཉིད་ནི་ ལོྃ་ཧེ་། ཁྱི་ཞ་རྒུ་ནི་ན་ ལུའི་རྡེ་ ཡོ་ཀ་ནེ་ ཏེཏ་པ་ ཤི་ཀྱི་ཅེན་འབོ་ རྟེམ་པོ་ ཅོའེ་ཧེ་། ངེ་ ཐོང་ཅེ་ལ་ ཁྱི་ཞི་ ལེ་ཧ་ ཅོ་ཀན་རྒུན་, ངེ་ ཀོན་འཇོག་ ཐུག་ཐེད་ཅེ་ ཚད་ འདྲན་འདྲ་ ལེཔ་ མ་ཉེན་ཏོག་། 3 འི་ཏུ་ ཅོའེ་ཧེ་, ཁྱི་ཞ་རྒུན་ལ་ ཐོབ་ཏེ་ ཡང་ ཚོར་རྡེ་ འིན་ཀ་ནེ་ ལབ་ཞ་རྦེ་ཀ་ ལག་ལེན་ ཅོའེ་, ཡང་ སེམ་འགྱུར་། ཀལ་ཏེ་ ཁྱི་ཞ་རྒུན་ ཉིད་ མ་ཚེད་ནི་, ང་ ཧུན་མེད་ལ་ ཧུན་མ་ ཙོག་ལ་ ཁྱི་ཞ་ ཆེད་པ་ ཅེད་རྡ་ལ་ ཡོང་ངེན་, འིན་ན་ ཏེ་ཏུའི་རྦོ་ ཁྱི་ཞ་ རྒྱུའི་ མི་ཆ་།” 4 “ཅི་འིན་ན་, ཁྱི་ཞི་ ཆོའེ་ཚོག་རྒེ་ན་ ཏ་རུང་ང་ ཁོ་རང་རྒུ་ནི་ ཀོའེ་ལག་ལ་ ལེ་ཧ་ ངན་པེ་ ཏྲི་མ་ ཕོག་ མ་ཅུག་ཀ་ནེ་ མི་ ཉུང་ཙེ་ཞིག་ འདུག་། ཏོ་རྒུན་ ཀོའེ་ལག་ ཀར་སྤོ་ ཀོན་འདེ་ ང་ ཉམ་པོ་ འགྲུལ་ལེན་, ཅེ་ཟེར་ནི་ ཏོ་རྒུན་ ཏེ་ སི་ཝེ་ འོའེ་སྤ་ ནོག་། 5 རྒྱལ་ཁ་ ཐོབ་ཀན་རྒུན་ལ་ ཟི་ཞིད་ཅེན་ནེ་ ཀོའེ་ལག་ ཀར་སྤོ་རྦོ་ ཧོན་ནེན་། ངེ་ ཁོང་རྒུ་ནི་ མིང་འབོ་ ཐ་མེད་པེ་ མི་ཙེ་ སྤེ་ཆེ་ ནང་ནི་ མ་ཞིག་ལ་ ང་རང་ངེ་ ཡབ་ ཏང་ ཁོང་ངེ་ ཕོ་ཉ་རྒུ་ནི་ འདུན་ལ་ ཡུ་རྒུན་ ངེ་ ཡིན་ ཟེར་རྡེ་ ཤེད་རྡེན་།
6 ནམ་ཅོག་ ཡོ་ཀན་རྒུ་ནི་ ཉོན་ཧེ་, ཀོན་འཇོག་རྒེ་ ཐུག་ཡིད་རྡེ་ ཆོའེ་ཚོག་རྒུན་ལ་ མོལ་ཧན་རྒུན་ ཉོན་ཧེ་།”
ཕི་ལ་འདེལ་ཕི་ཨཱེ་ ཆོའེ་ཚོག་ལ་ ཁྲིན་རྦོ་།
7 “འི་ ཡི་རྒེ་རྦོ་ ཕི་ལ་འདེལ་ཕི་ཨཱེ་ ཆོའེ་ཚོག་རྒེ་ ཕོ་ཉ་ འབྲི་།”
“འི་ ཁྲིན་འབོ་ ཏམ་པ་ རྡང་ རྡེན་འབའ་ འིན་ཀན་འབེ་ ཆོག་ནི་ འིན་, ཀ་རྦེ་ ལག་ལ་ རྒྱ་སྤོ་ འདཱ་འབིད་རྡེ་ རྒྱལ་སྲིད་རྡེ་ ཀུ་ལིག་པོ་ ཡོད་། ངེ་ པེ་ཀན་རྒུན་ སུ་ལ་ ཅུག་ མི་ཉེན་, ཡང་ ཅུག་ཀན་རྒུན་ སུ་ལ་ པེ་མི་ཉེན་། 8 ང་ ཁྱི་ཞི་ ལེ་ཧ་རྒུན་ རྒྱུའི་ཡོད་། ལྟོའེ་, ངེ་ ཁྱེ་ཞི་ འདུན་ལ་ རྒོ་ཞིག་ པེ་རྡེ་ ཡོད་, ཀའོ་ སུ་ལ་ ཅུག་ མི་ཉེན་། ཁྱི་ཞ་རྒུན་ ཤེད་མེད་ འིན་ན་ ཏ་རུང་ང་ ངེ་ ལབ་ཞ་རྒུན་ལ་ ལག་ལེན་ ཅོའེ་རྡེ་ ངེ་ཀ་ ཏེཏ་པ་ ཅོ་མེད་ མ་ཟེར་ཧན་འབོ་ལ་ ང་ རྒྱུའི་ཡོད་། 9 ལྟོའེ་རྡང་, ཀོན་འཇོག་རྒེ་ མི་ འིན་ ཟེར་ཧ་ནེ་ ཡ་ཧུ་འདཱ་པ་རྒུན་ ཟུན་ཅེན་ ནོག་, ཁོང་རྒུན་ ཀོན་འཇོག་རྒེ་ མ་ནོག་, རྡུད་རྡེ་ ཆོའེ་ཚོག་ནི་ ནོག་། ངེ་ ཁོང་རྒུན་ལ་ ཁྱི་ཞ་རྒུ་ནི་ ཧང་པེ་ན་ འགྱེལ་རྡེ་ ཁྱི་ཞ་རྒུན་ ངེ་ ཤེ་སྤ་ ཅོ་ཀ་ནེ་ མི་རྒུན་ འིན་ ཟེར་ཤུག་རྒེན་། 10 ཟོད་པ་ ཉམ་པོ་ ཁྱི་ཞ་རྒུ་ནི་ རྡུ་ངལ་རྒུན་ ཁུར་རྡེ་ ངེ་ ཀའ་ ཏང་ཀན་རྒུན་ ཉེན་ཅེ་ཀ་ནི་, ངེ་ ཁྱི་ཞ་རྒུན་ ཏེ་ ཐི་ཚོད་ལྟ་ ཏུའི་རྦེ་ ནང་ནི་ རྐྱོབ་རྦེན་, ཀའོ་ འཇིག་རྟེན་ སོན་ཏེ་ ཏེཏ་པ་ མེ་ཀན་ ཚང་མ་, ཐི་ཚོད་ལྟ་ཅེ་ལ་ ཡོང་ངེན་།” 11 “ང་ མ་ འགྱོ་སྤ་ ཡོང་ངེན་; ཁྱི་ཞ་རྒུ་ནི་ ཐོར་ཤོག་པོ་ སུ་ཞིག་ལ་ ཀོག་ཏེ་ ཁྱེར་ མི་ཉེན་ཅེ་ལ་ རང་ངེ་ ཏེཏ་པ་རྦོ་ སྲན་ཀྲེ་ ཟུམ་འདེ་ པོར་ཧེ་། 12 རྒྱལ་ཁ་ ཐོབ་ཀན་རྒུན་ ཀོན་འཇོག་རྒེ་ ཁང་པེ་ན་ ཀ་ ཙོག་སེ་ འགྱུར་རེན་, ཡང་ ཁོང་རྒུན་ ཏེ་ནང་ནི་ མ་ནི་ འབིང་འདེ་ ཆ་ མི་རྒོའེ་། ངེ་ ཀོན་འཇོག་རྒེ་ ཚན་ ཡང་ ཀོན་འཇོག་རྒེ་ རྒྱལ་ས་, ཡེ་རུ་ཤ་ལེམ་ སོ་མེ་ མིང་འབོ་ ཏོ་རྒུ་ནི་ཀ་ འབྲི་འིན་, ཀའོ་ རྡེ་བ་ཅན་ནེ་ ངེ་ ཀོན་འཇོག་ནི་ ཡོག་ལ་ པབ་ཅེ་ ནོག་། ངེ་ ཁོང་རྒུ་ནི་ཀ་ ང་རང་ངེ་ མིང་ སོ་མ་རྦོ་ལ་ འབྲི་འིན་།
13 ནམ་ཅོག་ ཡོ་ཀན་རྒུ་ནི་ ཉོན་ཧེ་, ཀོན་འཇོག་རྒེ་ ཐུག་ཡིད་རྡེ་ ཆོའེ་ཚོག་རྒུན་ལ་ མོལ་ཧན་རྒུན་ ཉོན་ཧེ་།”
ལ་འོ་འདི་ཀི་ཡཱ་ ཆོའེ་ཚོག་ལ་ ཁྲིན་རྦོ་།
14 “འི་ ཡི་རྒེ་རྦོ་ ལ་འོ་འདི་ཀི་ཡཱ་ ཆོའེ་ཚོག་རྒེ་ ཕོ་ཉ་ འབྲི་།”
“འི་ ཁྲིན་འབོ་ ང་ ཨ་མེན་ ཟེར་ཧན་, ཡང་ནི་ ཀོན་འཇོག་རྒེ་ ཞལ་ཆད་རྒུན་ ཀྲུཔ་ཅུག་ཀ་ནེ་ ཆོག་ནི་ འིན་། ང་ནི་ ཀོན་འཇོག་རྒེ་ ལོ་ཁྱེལ་ཅེན་ རྡང་ ཀྲང་པེ་ སྤང་པོ་ འིན་, ཡང་ ང་ རྒྱུད་ཏེ་ ཀོན་འཇོག་རྒེ་ ཅི་ཚང་མ་ ཅོའོ་ ཛེད་ཏེ་ འིན་། 15 ང་ ཁྱི་ཞི་ ལེ་ཧ་རྒུ་ནི་ ཧོར་ལ་ རྒྱུའི་ཡོད་, སེམ་ཡིད་རྡེ་ ཐོག་ནི་ ཁྱི་ཞ་རྒུན་ ཚན་ཏེ་ ཡང་ ཀྲང་མོ་ མི་འདུག་། ངེ་ ཁྱི་ཞ་རྒུན་ ཚན་ཏེ་ ཡང་ ཀྲང་མོ་ ཅིག་ཅིག་པོ་ འིན་ཅེ་ འདོད་པ་ ཅོ་ཡོད་། 16 ཁྱི་ཞ་རྒུན་ མ་ལ་མུ་ལེ་ འིན་ཅེ་རྦེ་ ཚན་ཏེ་ ཡང་ ཀྲང་མོ་ མེ་ཀན་ ངེ་ ཁྱི་ཞ་རྒུན་ ང་རང་ངེ་ ཁ་ནི་ རྐྱུག་རྒེན་། 17 ཁྱི་ཞི་ ཟེར་རེ་ནོག་, ‘ང་ ཆུག་པོ་ འིན་, ངེ་ ནོར་ མང་པོ་ སག་ཏེ་ ཡོད་ཅེ་ཀ་ནི་, ང་ ཅང་ རྒོའེ་ཤེ་ མེད་’, འིན་ན་ ཁྱི་ཞ་རྒུན་ ནག་ཅེན་ ནེ་ལུག་རྒེ་ན་, རྡིག་པ་རི་, ཞ་ར་ རྡང་, ལྕུ་རུ་ འིན་ཀན་འབོ་ རྒྱུའི་མེད་རྡེ་ ནོག་། 18 ངེ་ ཁྱི་ཞ་རྒུན་ལ་ ཁ་རྡ་ ཏང་ངེ་ཡོད་, ཀོན་འཇོག་རྒེ་ ཧུ་འདུན་ལ་ ཁྱི་ཞ་རྒུན་ རྡེན་འབའ་ ཆུག་པོ་ འགྱུར་ཤེ་ཕི་ ངེ་ཀ་ནི་ མེ་ནི་ ལག་མོ་ ཅོ་ཀ་ནེ་ སེར་རྦོ་ ཉོའེ་། རང་ ལྕུ་རུ་ལ་ ལུའི་རྡེ་ ཁྲེལ་རྦ་ མི་ཆ་ཤེ་ཕི་, ཟི་ཞིད་ཅེན་ནི་ རེ་ ཀར་སྤོ་ ཀོན་ཅེ་ལ་ ཡང་ ཐོང་ ཉེན་ཅེ་ཕི་ མིག་རྒེ་ན་ ལུག་ཅེ་ མན་འབོ་ ངེ་ཀ་ནི་ ཉོའེ་ཧེ་། 19 ངེ་ ཡ་ཤ་ ཅོ་ཀན་རྒུན་ལ་ ཀབ་རྐྱོན་ ཏྃ་རྡེ་ རྐྱོང་ངེ་ཡོད་། ཏེ་རྒ་རྦེ་ཕི་ལ་ ཁྱི་ཞ་རྒུ་ནི་ རྡིག་པ་ ཕྃ་རྡེ་ སེམ་འགྱུར་ཧེ་། 20 ལྟོའེ་རྡང་, ང་ རྒོའེ་ཀ་ འདེད་ཏེ་ རྒོ་ རྡུང་ངེན་ ཡོད་། ཀལ་ཏེ་ ངེ་ ཧད་ ཚོར་རྡེ་ སུ་ཞིག་རྒེ་ རྒོ་ པེ་ནི་, ང་ ནང་ཀུ་ལ་ ཡོྃ་རྡེ་ ཁོ་ ཉམ་པོ་ ཟ་ཅེ་ ཟོའེན་ ཡང་ ཁོ་ ང་ ཉམ་པོ་ ཟ་ཅེ་ ཟོའེན་། 21 རྒྱལ་ཁ་ ཐོབ་ཀན་རྒུན་ལ་ ང་རང་ ཉམ་པོ་ ངེ་ ཁྲིའི་ཀ་ འདེད་ཅེ་ སི་ཝ་ ཏང་ངེན་, ཀ་ཟུག་རྒེ་ ང་ རྒྱལ་ཁ་ ཐོབ་ཏེ་ ངེ་ ཡབ་རྦེ་ ཞུ་ཁྲིའི་ཀ་ ཁོང་ ཉམ་པོ་ འདེད་ཏེ་ ཡོད་།”
22 “ནམ་ཅོག་ ཡོ་ཀན་རྒུ་ནི་ ཉོན་ཧེ་, ཀོན་འཇོག་རྒེ་ ཐུག་ཡིད་རྡེ་ ཆོའེ་ཚོག་རྒུན་ལ་ མོལ་ཧན་རྒུན་ ཉོན་ཧེ་།”