ཨེ་ཕེ་སུའི་ ཆོའེ་ཚོག་ལ་ ཁྲིན་རྦོ་།
2
“ཨེ་ཕེ་སུའི་ན་ ཡོ་ཀ་ནེ་ ཆོའེ་ཚོག་རྒེ་ ཕོ་ཉ་ འི་རྦོ་ འབྲི་།”“འི་ ཁྲིན་འབོ་ ལག་པ་ ཡོའེ་སྤེ་ན་ ཧར་མ་ རྡུན་ ཁུར་རྡེ་ སེར་རེ་ འོད་རྟག་ རྡུན་ནེ་ ཕྲོ་ འགྲུ་ལེན་ ཡོ་ཀ་ནེ་ ཆོག་ནི་ འིན་། 2 ཁྱི་ཞི་ ཀག་སྤེ་ ཧབ་ལ་ ཙོན་འགྲུའི་ མང་པོ་ ཡང་ ཟོད་པ་ ཉམ་པོ་ ལེ་ཧ་ ཅོ་ཅེ་རྒུན་ ང་ རྒྱུའི་ཡོད་། ཁྱི་ཞི་ མི་ངན་རྒུན་ སྲན་ མ་ཉེན་ཀན་འབོ་ལ་, ང་ རྒྱུའི་ཡོད་, ཀའོ་རྒུ་ནི་ ཡི་ཤུའི་ ཧུ་ཚབ་ འིན་ ཟེ་འིན་ འིན་ན་ མག་། ཁྱི་ཞི་ ལྟག་ཅེད་ ཅོའེ་རྡེ་ ཏོ་རྒུན་ ཟུན་བ་ འིན་ཀན་འབོ་ ཤེ་རྡེ་ནོག་། 3 ཁྱི་ཞི་ ངེ་ཕི་ ཟོད་པ་ ཉམ་པོ་ པར་རྡོ་ ཁུར་རེན་ ཡང་ ང་ ཕང་ མ་ཕང་ངེ་ ངེ་ རྒྱབ་ནི་ འགྲུལ་།” 4 “འིན་ན་ ཁྱི་ཞ་རྒུ་ནི་ ང་ འགོ་མ་ ཙོག་སེ་ ཤེ་སྤ་ མི་ཅོ་ཤེ་ཕི་ ངེ་ ཁྱི་ཞ་རྒུ་ནི་ རྒྱཔ་འགལ་ལ་ ཉེད་ ཀ་ལེ་ཡོད་། 5 ཁྱི་ཞ་རྒུན་ མ་ ཐོན་པོ་ནི་ འདྲུལ་རྡེ་ འིན་ཀན་འབོ་ འི་ཏུ་ ཅོའེ་། སེམ་འགྱུར་ཧེ་, ཡང་ ངུལ་མ་ ཙོག་སེ་ ལེ་ཧ་རྒུན་ ཅོའེ་ཧེ་། ཀལ་ཏེ་ སེམ་ མ་འགྱུར་ནི་, ང་ ཡོྃ་རྡེ་ ཁྱི་ཞ་རྒུ་ནི་ འོད་རྟག་པོ་ མལ་ལེ་ཀ་ནི་ ཐེ་ནེན་། 6 འིན་ན་ ཁྱི་ཞ་རྒུ་ནི་ ནི་ཀོ་ལ་འི་པ་རྒུ་ནི་ ལེ་ཧ་ ངན་པ་རྒུན་ལ་ སོག་པོ་ ཅོ་རུག་, ངེ་ལ་ ཏོ་ལ་ སོག་པོ་ ཅོའེན་, ཏེ་ ལེ་ཧ་རྦོ་ལ་ རྟོད་པ་ ཐོབ་ཅེ་ འོའེ་སྤ་ ནོག་།”
7 “ནམ་ཅོག་ ཡོ་ཀན་རྒུ་ནི་ ཉོན་ཧེ་། ཀོན་འཇོག་རྒེ་ ཐུག་ཡིད་རྡེ་ ཆོའེ་ཚོག་རྒུན་ལ་ མོལ་ཧན་རྒུན་ ཉོན་ཧེ་། རྒྱལ་ཁ་ ཐོབ་ཀན་རྒུན་ལ་ ཀོན་འཇོག་རྒེ་ ཚེའེ་ན་ རྐྱེ་ཀ་ནེ་, སྲོག་རྒེ་ ལྕང་མེ་ ཤིང་ཏོག་ ཟ་ཅེ་ལ་ ཐོབ་ཏང་ ངེ་ ཏང་ངེན་།”
སི་མིར་ནཱ་ ཆོའེ་ཚོག་ལ་ ཁྲིན་རྦོ་།
8 “འི་ ཡི་རྒེ་རྦོ་ སི་མིར་ནཱེ་ན་ ཡོ་ཀན་ ཆོའེ་ཚོག་རྒེ་ ཕོ་ཉ་ འབྲི་།”
“འི་ ཁྲིན་འབོ་ ཏང་པོ་ རྡང་ ལྟིང་འཇུག་ འིན་ཀན་ ཡང་ ཤི་རྡེ་ མེད་པེན་ འིན་ན་ ཏ་ ཏག་ས་ སོན་པོ་ ཡོ་ཀན་འབེ་ ཆོག་ནི་ འིན་། 9 ཁྱི་ཞ་རྒུན་ལ་ རྡུ་ངལ་ རྡང་ རྡུག་པོ་ ཡོ་ཀན་འབོ་ ང་ རྒྱུའི་ཡོད་, འིན་ན་ སེམ་ཡིད་རྡེ་ ཐོག་ནི་ ཁྱི་ཞ་རྒུན་ ཆུག་པོ་ འདུག་། རང་འདང་རང་ ཡ་ཧུ་འདཱ་པ་ ཟེར་ཧན་རྒུ་ནི་, ཁྱི་ཞ་རྒུ་ནི་ ཧོར་ལ་ འབར་ཧན་རྦོ་ ང་ རྒྱུའི་ཡོད་། ཁོང་རྒུན་ ཀོན་འཇོག་རྒེ་ མ་ནོག་, རྡུད་རྡེ་ ཆོའེ་ཚོག་ ནོག་། 10 ཁྱི་ཞ་རྒུན་ལ་ རྡུ་ངལ་ ཐོང་ཅེ་ཅེན་འབོ་ལ་ མ་འཇིའི་ཧེ་། ངེ་ ཟེ་འིན་, རྡུད་རྡེ་ འགོ་རྦེ་ ཁྱི་ཞ་རྒུ་ནི་ ཏེཏ་པ་ ལྟག་ཅེད་ ཅོ་ཅེ་ཕི་ ཁྱི་ཞ་ ཙོན་ཁང་ངེ་ན་ ཧ་རེན་, ཡང་ ཁྱི་ཞ་, ཞག་ ཅུ་ཚུག་པ་ ནག་ ལྟན་ནེན་། ཤི་ཅེ་ ཡོད་ན་ ཀལ་ཏེ་ ཅུ་ ཚག་པ་ ནག་ ལྟན་ནེན་། ཤི་ཅེ་ ཡོད་ན་ ཀལ་ཏེ་ ཁྱི་ཞ་རྒུན་ ཏེཏ་པེ་ན་ རྟེམ་པོ་ འདེད་ནི་, ངེ་ ཁྱི་ཞ་རྒུན་ལ་ ཐ་མེད་པེ་ མི་ཙེ་ ཐོར་ཤོག་པོ་ ཏང་ངེན་།”
11 “ནམ་ཅོག་ ཡོ་ཀན་རྒུ་ནི་ ཉོན་ཧེ་, ཀོན་འཇོག་རྒེ་ ཐུག་ཡིད་རྡེ་ ཆོའེ་ཚོག་རྒུན་ལ་ མོལ་ཧན་འབོ་ ཉོན་ཧེ་།”
“རྒྱལ་ཁ་ ཐོབ་ཀན་རྒུན་ལ་ ཤི་ཅེ་ ཉི་སྤ་ ཟེར་ཧ་ནེ་ ཐ་མེད་པེ་ ཆེད་པ་ ཕོག་ཅེ་ ཐོང་ངོམ་ མི་ཡོང་།”
པེར་འགའ་མུའི་ ཆོའེ་ཚོག་ལ་ ཁྲིན་རྦོ་།
12 “འི་ ཡི་རྒེ་རྦོ་ པེར་འགའ་མུའི་ ཆོའེ་ཚོག་རྒེ་ ཕོ་ཉ་ འབྲི་།”
“འི་ ཁྲིན་འབོ་, ཁ་ ཉི་ཅེན་ནེ་ ར་ཡི་ ནོམ་པོ་ ཡོ་ཀན་འབེ་ ཆོག་ནི་ འིན་། 13 ཁྱི་ཞ་ འདེད་ཏེ་ འདེད་སེ་ ས་ཅ་ རྡུད་རྡེ་ ཁྲིའི་རྦེ་ ས་ཀྱེཏ་ འིན་ཀན་འབོ་ ང་ རྒྱུའི་ཡོད་། འིན་ན་ ཁྱི་ཞི་ ཏེཏ་པ་ མ་ཕྃ་ལ་ ངེ་ མིང་ངེ་ན་ ཀྲང་པོ་ འདོད་ ནམ་ ངེ་ ལོ་ཁྱེལ་ཅེན་ནེ་ སྤང་པོ་ ཨན་ཏི་པ་ལ་ ཁྱི་ཞི་ འགྱལ་སེ་ན་ སེད་, ཀ་རུ་ རྡུད་རྡེ་ ཝང་སྲུལ་ལེ་ཡོད་པེན་།” 14 “འིན་ན་ ང་ ཁྱི་ཞི་ རྒྱཔ་འགལ་ལ་ ཉེད་ཀལ་ཤེ་ ཁ་ཅིག་ ཡོད་། ཁྱི་ཞི་, ལུང་རྟོན་པ་ འབཱ་ལཱམ་མེ་ ལབ་ཞ་ ཏང་ཀན་ ཁྲོ་པ་ ཁ་ཅིག་རྒེ་ རྒྱཔ་འགལ་ ཅོའོ་ མི་འདུག་། འབཱ་ལཱམ་མེ་ རྒྱ་སྤོ་ འབཱ་ལག་ལ་ ཨི་ས་ར་ཡེལ་པ་རྒུན་ལ་ ཧུ་འདྲ་ ཆོད་པ་ པུལ་ཧ་ནེ་ ཁར་ཞི་རྒུན་ ཟ་ཅེ་ རྡང་ ལུའི་འབྲེལ་ ངན་པ་ ཅོ་ཅུག་ཏེ་ རྡིག་པེ་ན་ འགྱེལ་ ཤུག་ཅེའོ་ ལབ་། 15 ཏེ་རྒ་ ཙོག་སེ་, ཁྱི་ཞ་རྒུ་ནི་ ཕྲོ་ ནི་ཀོ་ལ་འི་པ་རྒུ་ནི་ ལབ་ཀ་ནེ་ ལམ་ ངན་པེ་ཀ་ འགྲུལ་ཧན་ རིག་ལ་ ཡོད་ཏེ་ ནོག་། 16 སེམ་འགྱུར་ཧེ་, ཏེ་མ་ནི་ ང་ འགྱོ་སྤ་ ཁྱི་ཞ་རྒུ་ནི་ཀ་ ཡོྃ་རྡེ་ ངེ་ ཁེ་ ནང་ནི་ འབིང་ཀ་ནེ་ ར་ཡི་ ཉམ་པོ་ ཏོ་རྒུ་ནི་ རྒྱཔ་འགལ་ལ་ ནོལ་ལེན་།”
17 “ནམ་ཅོག་ ཡོ་ཀན་རྒུ་ནི་ ཉོན་ཧེ་། ཀོན་འཇོག་རྒེ་ ཐུག་ཡིད་རྡེ་ ཆོའེ་ཚོག་རྒུན་ལ་ མོལ་ཧན་རྒུན་ ཉོན་ཧེ་། རྒྱལ་ཁ་ ཐོབ་ཀན་རྒུན་ལ་ ངེ་ སང་སྤེ་རེ་ ཏི་རྒིར་ མན་ན་ ཟེར་ཧན་འབོ་ རྡང་ མིང་ སོ་མ་ ཧོའེ་ཧ་ནེ་ རྡོ་ ཀར་སྤོ་ ཏང་ངེན་, ཏེ་རྒ་ རྡོ་ ཐོབ་ཀན་འབོ་ལ་ མ་ནི་ ཡང་སུ་ལ་ ཏེ་ མིང་འབོ་ མི་ཤེ་།”
ཐི་ཡ་ཏི་རཱེ་ ཆོའེ་ཚོག་ལ་ ཁྲིན་རྦོ་།
18 “འི་ ཡི་རྒེ་རྦོ་ ཐི་ཡ་ཏི་རཱེ་ ཆོའེ་ཚོག་རྒེ་ ཕོ་ཉ་ འབྲི་།
འི་ ཁྲིན་འབོ་, ཀོན་འཇོག་རྒེ་ པུ་ཙ་ ཀ་རྦེ་ མིག་རྒུན་ མེ་ལྗབ་ ཙོག་སེ་ ཡང་ ཧང་པ་རྒུན་, ལག་ལག་ ར་རྒན་ ཙོག་སེ་ ཡོ་ཀན་འབེ་ ཆོག་ནི་ འིན་། 19 ཁྱི་ཞ་རྒུ་ནི་ ཤེ་སྤ་, ཏེཏ་པ་, ཞབ་རྟོག་ ཅོ་ཅེ་, ཡང་ ཟོད་པ་ ཉམ་པོ་ ལེ་ཧ་ ཅོ་ཀན་རྒུན་ ང་ རྒྱུའི་ཡོད་, ཀའོ་རྒུན་ ཁྱི་ཞ་རྒུ་ནི་ ཏག་ས་ ངུ་ལེ་སང་ མང་ངེ་ ཅོའེན་ ཡོད་ཏེ་ ནོག་།” 20 “འིན་ན་ ང་ ཁྱི་ཞ་རྒུ་ནི་ རྒྱཔ་འགལ་ལ་ ཉེད་ཀལ་ཤེ་ རིག་ལ་ ཡོད་: ཁྱི་ཞ་རྒུ་ནི་ ལུང་རྟོན་མ་ འིན་ ཟེར་ཧ་ནི་ པོ་མོ་ ཡེ་ཟི་འབེལ་ལེ་ རྒྱཔ་འགལ་ ཅོའོ་ མི་འདུག་། ཁོ་རང་ངེ་ ལབ་ཞ་ རྒྱུད་ཏེ་, ཁོའེ་ ངེ་ ཞབ་རྟོག་པ་རྒུན་ལ་ ལུའི་འབྲེལ་ ངན་པ་ ཅོ་ཅེ་ རྡང་ ཧུ་འདྲ་ ཆོད་པ་ པུལ་ཧན་རྒུན་ ཟ་ཅེ་ ལབ་ཏེ་, རྡིག་པེ་ ཆོག་ལ་ ཁྲིད་ཏེ་ ཁྱེར་རྡུག་། 21 ངེ་ ཏེ་ པོ་མོ་ལ་ འགྱོད་པ་ ཅོ་ཅེ་ ཧབ་ ཏྃ་རྦེན་, འིན་ན་ ཁོ་ སེམ་འགྱུར་ཉིན་ མི་འདུག་པེན་། 22 ཏེ་རྒ་རྦེ་ཕི་ལ་ ངེ་ ཏེ་ པོ་མོ་ལ་ ཟུར་མོ་ ཡོང་ཅུག་རྒེན་, ཡང་ ཀལ་ཏེ་ ཏེ་ པོ་མོ་ ཉམ་པོ་ ལུའི་འབྲེལ་ ཅོ་ཀན་རྒུ་ནི་ སེམ་ མ་འགྱུར་ནི་, ཁོང་རྒུན་ལ་ སྲན་ཀྲེ་ ནག་པར་རྡོ་ ཐོང་ངེན་། 23 ངེ་ ཏེ་ པོ་མེ་ ལོབ་ཀྲུག་རྒུན་ལ་ ཆེད་པ་ ཏྃ་རྡེ་ ཤི་ཅུག་རྒེན་། ཏེ་ནི་ ང་, ཉིང་ འདང་ སམ་བ་རྒུན་ལ་ ལྟག་ཅེད་ ཅོ་ཀན་ ཡང་ ཚང་མ་ལ་ རང་རང་ངེ་ ལེ་ཧེ་ ནང་ཞིན་ འབྲེ་རྦུ་ ཏང་ཀན་ འིན་ཀན་འབོ་ ཆོའེ་ཚོག་རྒུ་ནི་ ཧ་ཀོ་ ཉེན་ནེན་།
24-25 འིན་ན་ ཐི་ཡ་ཏི་རཱེ་ ཆོའེ་ཚོག་རྒེ་ན་ ཡེ་ཟི་འབེལ་ལེ་ ལབ་ཞ་རྒུ་ནི་ ལམ་མེ་ཀ་ མ་འགྲུལ་ཀན་ ཡང་, རྡུད་རྡེ་ སང་སྤེ་རེ་ ལབ་ཞ་ འིན་ ཟེར་ཧ་ནེ་ ཐོང་ངོམ་ མ་ཆ་ ལུའི་རྡེ་ ཡོ་ཀན་རྒུན་ལ་ ངེ་, ང་ ཡོང་ཡོང་ཚུག་པ་ ངེ་ན་ ཏེཏ་པ་ རྟེམ་པོ་ པོར་ཤེ་སང་ ཐེ་རྦ་ ཅང་ ཟེར་རེ་མེད་།” 26 “ལྟིང་འཇུག་ཚུག་པ་ ངེ་ ལབ་ཞ་ ཁ་ཉེན་ཀན་རྒུན་ལ་ རྒྱལ་ཁ་ ཐོབ་རྦེན་། ངེ་ ཏོ་རྒུན་ལ་ མིར་རྒྱུད་ ཚང་མེ་ཀ་ ཝང་ཆ་ ཏང་ངེན་།” 27 “ཏོ་རྒུ་ནི་ ལྕག་རྡེ་ པེར་ཧ་ ཉམ་པོ་ ཝང་སྲུལ་རྡེ་ ཟ་མ་ ཙོག་སེ་ ལྟུམ་བ་ལྟུམ་པེ་ན་ ཅག་རྒེན་”