ངོན་ཅུག་ཀ་ནེ་ སྤེ་ཆ་ 1

ངོན་ཅུག་ཀ་ནེ་ ལུང་རྟན་ནེ་ སྤེ་ཆ་།

ཡི་ཤུ་ མ་ཤི་ཀེ་ མ་འོང་ ལུང་རྟན་ ཛེད་།

འི་ ཡི་རྒེ་, ཡི་ཤུ་ མ་ཤི་ཀེ་ མ་འོང་ ལུང་རྟན་ ཛེད་ཀན་འབོ་ ནོག་, ཀའོ་ ཀོན་འཇོག་རྒེ་ འགྱོ་སྤ་ ཆ་རྒོ་ཤེ་ཅེན་རྒུན་ མ་ཤི་ཀེ་ ཞབ་རྟོག་པ་རྒུན་ལ་ ཤེད་ཅེ་ལ་ ཡོ་ཧཱ་ནན་ལ་ སལ་ལེ་ ཛེད་ཏེ་ འིན་། ཡི་ཤུའི་ འི་ མ་འོང་ ལུང་རྟན་འབོ་, ཁོང་ངེ་ ཞབ་རྟོག་པ་ ཡོ་ཧཱ་ནན་ལ་ ལྟན་ནེ་ ཛེད་ཅེ་ལ་ ཁོ་རང་ངེ་ ཕོ་ཉ་ ཀལ་ལེ་ ཛེད་། 2 ང་ ཡོ་ཧཱ་ནན་ནེ་ འི་ ཐོང་ཀན་ ཚང་མ་ སྤང་པོ་ ཏང་ངེ་ཡོད་, ཡང་ ངེ་ ཁྱི་ཞ་རྒུན་ལ་ ཀོན་འཇོག་རྒེ་ ཀའ་ རྡང་ ཡི་ཤུ་ མ་ཤི་ཀེ་ སྤང་པོ་ སལ་ལེ་ ཛེད་ཀན་རྒུ་ནི་ ཧོར ཤེད་རྡེ་ཡོད་། 3 འི་ མ་འོང་ ལུང་རྟན་ནི་ ཀའ་ སིལ་ཧན་རྒུན་ ཅིན་ལབ་ཅེན་ ཡང་ ཁྲིན་འབོ་ལ་ ཉེན་འདེ་ ཏེ་ན་ ཟེར་རྡེ་ ཡོ་ཀན་འབེ་ཀ་ ལག་ལེན་ ཅོ་ཀན་ ཚང་མ་ལ་ ཅིན་ལབ་ཅེན་ འིན་, ཅེ་ཟེར་ནི་ ཡོང་ཅེ་ཅེན་ནེ་ འི་ ཏུའི་རྦོ་ མ་ ཉེ་མོ་ལ་ ལེབ་ཏེ་ ནོག་།

ཆོའེ་ཚོག་ རྡུན་ལ་ ཡོ་ཧཱ་ནན་ནེ་ ཁྲིན་རྦོ་།

4 ང་ ཡོ་ཧཱ་ནན་ནེ་ འི་ ཡི་རྒེ་རྦོ་ ཨ་སི་ཨཱ་ན་ ཡོ་ཀ་ནེ་ ཆོའེ་ཚོག་ རྡུན་ལ་ འབྲི་ཡོད་། ཀོན་འཇོག་ ཏག་ས་ ཞུ་རྡེ་ ཡོ་ཀན་, ངུལ་ལ་ ཞུ་རྡེ་ ཡོད་པེན་, ཡང་ རྐྱོད་ཅེ་ཅེན་ འདང་ ཁོ་རང་ངེ་ ཞུ་ཁྲིའི་ རྡུན་ལ་ ཡོ་ཀ་ནེ་ ཐུག་ཡིད་ རྡུན་རྒུ་ནི་ ཆོག་ནི་ ཁྱི་ཞ་རྒུན་ལ་ ཐུག་ཞེ་ རྡང་ ཞིའི་རྡེ་ སལ་ཧེ་, 5 ཡང་ ཡི་ཤུ་ མ་ཤི་ཀེ་ ཆོག་ནི་ལ་། ཁོང་ ལོ་ཁྱེལ་ཅེན་ སྤང་པོ་, ཏང་པོ་རང་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་ཧན་, ཡང་ འཇིག་རྟེན་ནེ་ རྒྱ་སྤོ་རྒུ་ནི་ ཝང་སྲུལ་པ་ ཞུ་རྡེ་ནོག་།

ཨ་ཧོ་རྒུན་ལ་ ཤེ་སྤ་ ཅོའོ་ ཛེད་ཀན་, ཡང་ ཁོ་རང་ངེ་ སྲོག་པོ་ ཞིན་པ་ སལ་རྡེ་ ཨ་ཧོ་རྒུན་ ཨ་ཧོ་རྒུ་ནི་ རྡིག་པ་ནི་ ཐར་ཤུག་རྒེ་ ཛེད་ཀན་, 6 ཨ་ཧོ་རྒུན་ ཁོ་རང་ངེ་ ཀོན་འཇོག་ ཏང་ ཡབ་རྦེ་ ཞབ་རྟོག་ ཞུ་ཅེ་ཕི་ ལ་མ་ རྡང་ རྒྱལ་ཁབ་རྦེ་ མི་རྒུན་ ཅོའོ་ ཛེད་ཀ་ནེ་ ཡི་ཤུ་ མ་ཤི་ཀ་ སྤལ་ རྡང་ ཝང་རྒུན་ ཏུའི་རྒྱུན་ནི་ཏུའི་རྒྱུན་ ཐོབ་ཤིག་, ཨ་མེན་།

7 ལྟོའེ་རྡང་, ཁོང་ སྲིན་ནེ་ཀ་ ཞུ་རྡེ་ ཕེབ་ཏུག་། མི་ཚང་མེ་ ཁོང་ འཇལ་ལེན་, ཡང་ ཁོང་ལ་ འདུང་ ཙུག་ཀན་རྒུ་ནི་ལ་། ཁོང་ངེ་ ཅོའེ་རྡེ་ འཇིག་རྟེན་པ་ ཚང་མེ་ རྡུག་པོ་ ཅོའེན་། ཏོ་ ནེན་ཏེན་ ཀྲུཔ་རྦེན་, ཨ་མེན་།

8 ཙོབོ་ ཀོན་འཇོག་རྒེ་ མོལ་རྡུག་, “ང་ནི་ ཨལ་སྤ་ རྡང་ ཨོ་མེ་འགཱ་: འགོ་ཟུག་ ཏང་ ལྟིང་འཇུག་འབོ་ འིན་། ང་རྦོ་ ཏག་ས་ ཡོད་, ངུལ་ལ་ ཡོད་པེན་ ཡང་ ཡོང་ཅེ་ཅེན་ འདང་ ཀུན་ཝང་ ཀོན་འཇོག་ འིན་།”

ཡི་ཤུའི་ ཆོའེ་ཚོག་རྒུན་ལ་ ཁྲིན་རྦོ་།

9 ཡི་ཤུ་ མ་ཤི་ཀེ་ཀ་ ཏེཏ་པ་ ཡོད་ཅེ་རྦེ་, ཁྱི་ཞ་རྒུ་ནི་ རྡུ་ངལ་, ཀོན་འཇོག་རྒེ་ རྒྱལ་སྲིད་ ཏང་ ཟོད་པ་ ཉམ་པོ་ རྡུ་ངལ་ ཁུར་ཤེ་ན་ ང་ ཡོ་ཧཱ་ནན་ ཁྱི་ཞི་ སྤུན་ འདང་ ཁྲོ་པ་ འིན་། ངེ་ ཀོན་འཇོག་རྒེ་ ཀའ་ ཤེད་ཅེ་ རྡང་ ཡི་ཤུའི་ ཧོར་ལ་ སྤང་པོ་ ཏང་ཅེ་རྦེ་, ང་ ཆེད་པ་ ཏྃ་རྡེ་ ཚོ་ལིང་ པད་མོ་ ཟེར་ཧ་ནེ་ཀ་ ཁྱེར་རྡེ་ པོར་། 10 ཟ་ཉི་མ་ ཀ་འབོ་ ཙོབོ་རྡེ་ ཞག་ འིན་ ཏེ་ ཞག་ལ་ ངེ་ཀ་ ཀོན་འཇོག་རྒེ་ ཏམ་པེ་ ཐུག་ཡིད་རྡེ་ ལག་ལ་ ངེ་ ང་རང་ངེ་ རྒྱབ་ནི་ ཏུང་ཧད་ ཙོག་སེ་ ཧད་ ཀྲག་པོ་ཞིག་ ཚོར་། 11 ཡང་ ཏེ་ ཧད་པེ་ ང་ མོལ་ལེ་རག་, “ཁྱེ་རང་ངེ་ ཐོང་ཅེ་ཅེན་རྒུན་ ཤོག་རིལ་ལེ་ཀ་ འབྲི་རྡེ་ ཨེ་ཕེ་སུའི་, སི་མིར་ནཱ་, པེར་འགའ་མུ་, ཐི་ཡ་ཏི་རཱ་, སཱར་འདེ་, ཕི་ལ་འདེལ་ཕི་ཨཱ་ རྡང་ ལ་འོ་འདི་ཀི་ཡཱ་ ཆོའེ་ཚོག་ རྡུན་ཀ་ལ་ ཀོལ་།”

12 ངེ་ ང་ ཞལ་ཏ་ སལ་ཧན་འབོ་ལ་ ལྟ་ཅེ་ལ་ འགྱུར་རེ་རྡང་, ང་ སེར་རེ་ འོད་རྟག་ རྡུན་ ཐོང་། 13 ཡང་ ངེ་ ཏེ་ འོད་རྟག་རྒུ་ནི་ ཕྲོ་ནི་ “མི་རིག་རྒེ་པུ་ ཙོག་སེ་ཞིག་”, ཞྃ་རྡེ་ འཇལ་། ཁོང་ངེ་ ནམ་ཟ་ མ་ རིང་མོ་ ཞབ་ཚུག་པ་ ལེབ་ཀན་ ཡང་ སེར་རེ་ ལེ་ཧན་ནེ་ ཤལ་ ཙོག་སེ་ ནམ་ཟ་ ཁོང་ངེ་ ཀྲང་ངེ་ཀ་ སྲིལ་ལེ་ ཛེད་ཏེ་ འདུག་། 14 ཁོང་ངེ་ ཨུ་ རྡང་ ཨུ་སྲ་འབོ་, པལ་ ཡང་ ཁ་ ཀར་སྤོ་ ཙོག་, ཡང་ ཁོང་ངེ་ ཤེན་འབོ་ མེ་ ཀྲག་པོ་ འབར་ཧན་ ཙོག་སེ་ འདུག་། 15 ཁོང་ངེ་ ཞབ་པོ་, མེ་ན་ འབར་ཧ་ནེ་ ར་འགན་ ཙོག་སེ་ འདང་ཤེན་ ཐོང་འདུག་, ཡང་ ཁོང་ངེ་ སུང་ཧད་པོ་ ཆུ་ ཀྲག་པོ་ རྒྱུག་ཀ་ནེ་ ཧད་ ཙོག་སེ་ རག་། 16 ཁོང་ངེ་ ཆག་ ཡོའེ་སྤེ་ན་ ཧར་མ་ རྡུན་ ནམ་འདེ་ འདུག་, ཡང་ ཁོང་ངེ་ ཞལ་ནི་ ཁ་ ཉི་ཅེན་ནེ་ ར་ཡི་ ནོམ་པོ་ འབིང་འདུག་། ཁོང་ངེ་ ཞལ་འདོང་འབོ་ ཉི་མེ་ཀུང་ངེ་ ཉི་མེ་ འོད་ཟེར་ ཙོག་སེ་ འདུག་།

17 ཁོང་ འཇལ་ལེ་རྡང་, ང་ ཁོང་ངེ་ ཞབ་རྦེ་ འདུན་ལ་ ཤི་ཀན་ ཙོག་སེ་ འགྱེལ་སོང་། འིན་ན་ ཁོང་ངེ་ ཁོ་རང་ངེ་ ཆག་ ཡོའེ་སྤ་རྦོ་ ངེ་ཀ་ པོ་རེ་ ཛེད་ཏེ་ མོལ་, “འཇིའི་ མ་འཇིའི་! ང་ནི་ ཏང་པོ་ རྡང་ ལྟིང་འཇུག་པོ་ འིན་། 18 ང་ སྲོག་ སལ་ཧན་འབོ་ འིན་, ང་ ཤི་ཚར་རྡེ་ མེད་འབེན་, ཏ་ ལྟོའེ་, ང་ ཏུའི་རྒྱུན་ནི་ཏུའི་རྒྱུན་ནི་ཕི་ སོན་པོ་ ལུའི་རྡེན་; ཡང་ ཤི་ཅེ་ རྡང་ ཤི་ཀན་རྒུ་ནི་ མལ་ལེ་ཀ་ ང་ ཝང་ ཡོད་།”

19 “ཁྱེ་རང་ངེ་ ཐོང་ཀན་, ཏག་ས་ ཆེན་ ཡོ་ཀན་ འདང་ ལྟིང་ནི་ ཆ་ཅེ་ཅེན་རྒུན་ འབྲི་། 20 ཁྱེ་རང་ངེ་ ངེ་ ལག་པ་ ཡོའེ་སྤེ་ན་ ཡོ་ཀ་ནེ་ ཧར་མ་ རྡུན་ ཐོང་ཀན་ འདང་ སེར་རེ་ འོད་རྟག་ རྡུན་ནི་ སང་སྤེར་རྦོ་ འི་རྦོ་ འིན་: ཧར་མ་ རྡུན་ཀ་རྦོ་, ཏེ་ ཆོའེ་ཚོག་ རྡུན་ནེ་ ཕོ་ཉ་རྒུན་ ཡང་ འོད་རྟག་ རྡུན་ཀ་རྦོ་, ཏེ་ ཆོའེ་ཚོག་ རྡུན་འབོ་ འིན་།”