ངོན་ཅུག་ཀ་ནེ་ ལུང་རྟན་ནེ་ སྤེ་ཆ་།
ངོན་ཅུག་ཀ་ནེ་ ལུང་རྟན་ནེ་ སྤེ་ཆེ་ ཧོར་།
ཙོབོ་ ཡི་ཤུའི་ ཧུ་ཚབ་ ཡོ་ཧཱ་ནན་ནེ་ འི་ ཆག་འབྲི་རྦོ་ ཁོང་ མ་རྒད་པོ་ ཡང་ ཙོབོ་ ཡི་ཤུ་ མ་ཤི་ཀེ་ ཧོར་ལ་ ནེ་ཚུལ་ ཟང་པོ་ ཤེད་ཅེ་ཕི་ པད་མོའེ་ ཟེར་སེ་ ཚོ་ལིང་ངེ་ཀ་ ཙོན་ལ་ ཧར་རྡེ་ ཡོད་ཏུའི་ འབྲི་ ཛེད་།
ཆོའེ་ན་ ཁེ་སྤ་ མང་པེ་ ཡོ་ཧཱ་ནན་ནེ་ འི་ ཆག་འབྲི་རྦོ་ རོམ་མེ་ རྒྱ་སྤོ་ འདོ་མི་ཤི་ཡན་ནེ་ ཝང་སྲུལ་ ངན་པེ་ ཏུའི་ལ་ ཡང་ན་ ཡི་ཤུ་ ཀྲོྃ་རྡེ་ སོན་པོ་ ཞྃ་རྡེ་ ལྟིང་ནི་, ལོ་ ཀྲུག་ཅུ་རག་ཉི་ རྡེ་ ཉེ་ཁོར་ལ་ འབྲི་ཛེད་ཏེ་ ནོག་ ཟེ་རེ་ནོག་, ནམ་ མ་ཤི་ཀ་པ་རྒུ་ནི་ཀ་ རྡུ་ངལ་ལེ་ ཏུའི་རྦོ་ རྐྱེན་ ཡོད་པེན་།
མ་འོང་ ལུང་རྟན་ནེ་ སྤེ་ཆེ་ འགོ་ཟུག་རྒེ་ཀ་, འི་ ཁྲིན་འབོ་ ཙོབོ་ ཡི་ཤུའི་ཀ་ནི་ རྐྱང་འདེ་ ཨ་སི་ཨཱེ་ ཆོའེ་ཚོག་ རྡུན་ནེ་ཕི་ འིན་ཀན་འབོ་ ཨ་ཧོ་ལ་ རྒྱུའི་ ཆ་རུག་། ཙོབོ་ ཡི་ཤུའི་ འི་ ཆོའེ་ཚོག་རྒུན་ལ་ ཁོང་རྒུ་ནི་ ལེ་ཧ་ ཁ་ཅིག་རྒེ་ཕི་ རྟོད་པ་ ཡང་ ཁ་ཅིག་རྒེ་ཕི་ ཀབ་རྐྱོན་ ཛེ་རྡེན་, ཡོང་ཅེ་ཅེན་ནེ་ རྡུ་ངལ་ལེ་ན་ ཏེཏ་པ་ ལྟན་པོ་ པོར་ཤེ་ལ་ སེམ་རུའི་ སལ་རྡུག་།
འི་ སྤེ་ཆེ་ མ་འོང་པེ་ ཏུའི་ ཧོར་ལ་ ཤེད་ཏུག་, ཀ་འབོ་ འི་ཏུའི་ལ་ མ་ཤི་ཀེ་ཀ་ ཏེཏ་པ་ ཅོ་ཀན་རྒུན་ལ་ རྡུ་ངལ་ སོང་ཀན་ ཙོག་སེ་ ཐ་མེ་ ཏུའི་ལ་ ཆ་ཅེ་རྦོ་ ནོག་། ཡོ་ཧཱ་ནན་ནེ་ ཀོན་འཇོག་རྒེ་ མི་རྒུན་ འདང་ ཙོབོ་ ཡི་ཤུ་ ཉ་ཧ་ རྒྱཔ་འགལ་ ཅོ་ཀ་ནེ་ མི་ཞིག་ ཡོང་ཅེ་ ཧོར་ལ་ མོལ་རྡུག་, ཀ་རྦེ་ ཝང་ ཉམ་པོ་ མི་ཚང་མ་ལ་ ཁོ་ ཅོལ་ཤུག་རྒེན་, ཡང་ མ་ཅོལ་ཧན་ ཚང་མ་ སེད་རྡེན་། ཁོའེ་ ཙོབོ་ ཡི་ཤུ་ རྡང་ ཁོང་ངེ་ མི་རྒུ་ནི་ རྒྱཔ་འགལ་ལ་ ནོ་ལེན་, འིན་ན་ ཙོབོ་ ཡི་ཤུ་ མ་ཤི་ཀེ་ ཁོ་ རྡང་ རྡུད་ ཉ་ཧ་ ཕམ་ཀལ་ལེ་ ཛེ་རྡེན་། ཙོབོ་ ཡི་ཤུའི་ རྒྱབ་ནི་ འགྲང་ཀན་ ཚང་མ་ འཇིག་རྟེན་ སོ་མ་ ཞང་ངེ་ ཛེད་ཀ་ནེ་ན་ ཙོབོ་ ཡི་ཤུ་ རྡང་ ཀོན་འཇོག་ ཉམ་པོ་ འདེ་རྡེན་, ཀ་རུ་ ཀོན་འཇོག་རྒེ་ ཅི་ས་ཐོག་ནི་ ཕན་ཅེ་ རྡང་ ཞིའི་རྡེ་རྒུན་ ཁྱོང་ངེ་ ཛེ་རྡེན་།
འི་ ལུང་རྟན་ནི་ན་ མ་ཤི་ཀ་པ་རྒུ་ནི་ཕི་ ཁག་ཅེན་ ལབ་ཞ་རྦོ་, ཙོབོ་ ཡི་ཤུ་ལ་ རྒྱཔ་འགལ་ ཅོ་ཀན་རྒུ་ནི་ ཝང་སྲུལ་ལེན་ ཀོན་འཇོག་རྒེ་ མི་རྒུན་ སེད་ནང་ ལྟིང་འཇུག་པེ་ཀ་ ཀོན་འཇོག་རྒེ་ ཁོང་རྒུན་ འདང་ རྡུད་ལ་ ཕམ་ཀལ་ལེ་ ཛེད་ཏེ་ ཁོང་རང་ངེ་ མི་རྒུན་ ཁམ་ཟང་ ཉམ་པོ་ ཁོང་རང་ས་ ཁྱེར་རེ་ ཛེ་རྡེན་༎