ཡུ་འདཱ་ 1

ཡུ་འདཱེ་ ཆོག་ནི་ ཆག་འབྲི་།

ཡུ་འདཱེ་ ཆོག་ནི་ འཇུ་།

ང་ ཡུ་འདཱ་ ཡི་ཤུ་ མ་ཤི་ཀེ་ ཞབ་རྟོག་པ་ རྡང་ ཡ་ཀུབ་རྦེ་ ནོ་ འིན་།

ངེ་ འི་ ཨི་རྒེ་རྦོ་, འབོ་ ཛེད་ཀན་, ཀོན་འཇོག་ ཡབ་རྦེ་ ཉིང་ནི་ ཤེ་སྤ་ ཛེད་ཀན་ ཡང་ ཡི་ཤུ་ མ་ཤི་ཀེ་ཕི་ རྐྱོབ་ཏེ་ པོར་རེ་ ཛེད་ཀན་རྒུན་ལ་ འབྲི་འིན་།

2 ངེ་ མོ་ལམ་ ཞུའིན་, ཀོན་འཇོག་རྒེ་ ཁྱི་ཞ་རྒུན་ལ་ ཉིང་ཞེ་, ཞིའི་རྡེ་ རྡང་ ཤེ་སྤ་རྒུན་, མང་ནེ་ མང་ངེ་ སལ་ཤིག་།

ལོབ་རྦོན་ ཟུའི་མ་རྒུ་ནི་ འཇི་ནང་།

3 ཤེ་སྤ་ སྤུན་རྒུན་, ཞེན་ཏ་ ང་ ཁྱི་ཞ་རྒུན་ལ་ ཨ་ཧོ་ ཚང་མ་ ཐོབ་ཅེ་ ཐར་པེ་ ཧོར་ལ་ འབྲི་ཅེ་ལ་ རིྃ་རྡེན་ ཡོད་, འིན་ན་ ངེ་ ཁྱི་ཞ་རྒུན་ལ་ ཀོན་འཇོག་རྒེ་ ལན་ཅིག་ ཏུའི་རྒྱུན་ནི་ཕི་ ཁོང་ངེ་ ཏམ་པ་ མི་རྒུ་ནི་ ལག་ལ་ ལྟེད་རྡེ་ ཛེད་ཀ་ནེ་ ཏེཏ་པེ་ན་ རྟེམ་པོ་ འདེད་ཅེ་ལ་ སེམ་རུའི་ ཏང་ངེན་ འབྲི་རྒོ་ཤེའོ་ ཁག་ཅེན་ ས་མེ་རག་། 4 ངེ་ ཏོ་ ཁྱི་ཞ་རྒུན་ལ་ ཟེ་འིན་, ཅེ་ཟེར་ནི་ ངན་པ་ མི་ ཁ་ཅིག་ ཁྱི་ཞ་རྒུ་ནི་ ཆོའེ་ཚོག་རྒེ་ན་ སང་སྤེར་ ཐོག་ནི་ འདྲེའེ་ ཚར་རྡེ་ འིན་། ཏོ་རྒུ་ནི་ ཀོན་འཇོག་རྒེ་ ཐུག་ཞེ་ ཏོན་འབོ་ འགྱུར་རྡེ་ ཨ་ཧོ་རྒུན་ལ་ ངན་པེ་ མི་ཙེ་ པུད་ཅེ་ ར་ཝང་ ཡོད་ཏེ་ ནོག་ ཟེ་རེ་ནོག་། ཏུའི་ མང་པོ་ཞིག་རྒེ་ ངུལ་ལ་ ཏུ་ཟུག་ མི་རྒུན་ལ་ ཆེད་པ་ ཕོག་ཅེ་ ཧོར་ལ་ འབྲི་ཛེད་ཏེ་ ནོག་, ཅེ་ཟེར་ནི་ ཁོང་རྒུ་ནི་ ཨ་ཧོ་རྒུ་ནི་ རྒྱ་སྤོ་ རྡང་ ཙོབོ་ ཅིག་པོ་ ཞུ་ཧ་ནེ་ ཡི་ཤུ་ མ་ཤི་ཀ་ ངོ་ལོག་ ཅོ་རུག་།

5 ཞེན་ཏ་ ཁྱི་ཞ་རྒུན་ལ་ ཡུ་རྒུ་ནི་ ཧོར་ལ་ ལེན་ མང་པོ་ ཚོར་རྡེ་ ནོག་། ངེ་ ཁྱི་ཞ་རྒུན་ལ་ ཙོབོ་ ཀོན་འཇོག་རྒེ་ ཨིས་ར་ཡེལ་པ་རྒུན་ ཨི་འཇིབ་ ཡུལ་ལེ་ ཚེ་ཡོག་ནི་ ཐར་ཤུག་རྒེ་ ཛེད་ཏེ་ལ་, ལྟིང་ནི་ ཁོང་ངེ་ཀ་ རྡེན་ མ་ཆེ་ཀན་རྒུན་, མེ་ཀན་ ཅོའོ་ ཛེད་ཀན་འབོ་ འི་ཏུ་ ཧུལ་ཉིན་རག་། 6 ཡང་ ཝང་ཆེ་ ཚད་ སལ་ལེ་ ཛེད་ཀན་འབོ་ལ་ མ་ཐེད་ཀ་ནེ་ ཕོ་ཉ་རྒུ་ནི་ ཏེ་ ཀོ་ས་འབོ་ ཕྃ་། ཀོན་འཇོག་རྒེ་ ཏོ་རྒུན་ མུན་ཀྲག་རྒེ་ན་ མ་ནི་ མི་ཆེད་ཅེ་ ལྕ་རྟག་ལ་ རྡམ་འདེ་ ཁྲིམ་ཅེད་རྡེ་ ཏེ་ ཞག་ ཀྲག་པེ་ཕི་ པོ་རེ་ ཛེད་། 7 སོ་འདོམ་ རྡང་ འགའ་མོ་ར་རེ་ རྒྱལ་ས་ ཡང་ ཉེ་ཁོར་རེ་ ཀྲོང་ཁྱེར་པ་རྒུན་ འི་ཏུ་ ཅོའེ་ཧེ་, ཀའོ་རྒུ་ནི་ མི་ཙེ་ ལུའི་འབྲེལ་ ངན་པ་ རྡང་ འདོད་པ་ ངན་པེ་ན་ པུད་པེ་, ཀོན་འཇོག་རྒེ་ མེ་ ཉམ་པོ་ མེ་ཀན་ ཅོའོ་ ཛེད་། ཏོ་རྒུན་, ཐ་མེད་པེ་ མེ་ ཆེད་པ་ ཕོག་ཅེ་ཅེན་རྒུ་ནི་ཕི་, སྤེ་ རྡང་ རྡམ་འཇག་ འིན་།

8 ཏེ་རྒ་ ཙོག་སེ་ ཏེ་ ཟུའི་མེ་ ལོབ་རྦོན་རྒུ་ནི་, ཀོན་འཇོག་རྒེ་ ཁོང་རྒུན་ལ་ མི་ལམ་ན་ ཤོད་ལམ་ ངན་པེ་ མི་ཙེ་ པུད་ཅེ་ ར་ཝང་ སལ་འདེ་ འིན་ ཟེ་རེ་ནོག་། ཏོ་རྒུ་ནི་ ཝང་ ཡོ་ཀན་རྒུན་ལ་ རྒྱཔ་འགལ་ ཅོའེ་རྡེ་ རྡེ་བ་ཅན་ནེ་ན་ ཞུ་ཧ་ནེ་ ཟི་ཞིད་ཅེན་རྒུན་ལ་ ངན་པ་ ཟེར་རྡེ་ནོག་། 9 འིན་ན་ ཕོ་ཉ་རྒུ་ནི་ འུ་རྐྱོང་, མེ་ཀ་འེལ་ལི་ལ་, ལུང་རྟོན་པ་ མོ་ཤེ་ སྤུར་རེ་ ཧོར་ལ་ རྡུད་ ཉམ་པོ་ ཁྲུག་པ་ ཛེད་ཏུའི་, ཁོང་ལ་ ཁོའེ་ ཧོར་ལ་ འབར་ཤེ་ ཧམ་བ་ མ་ཡོང་, འིན་ན་ ཁོང་ངེ་ མོལ་, “ཙོབོ་ ཀོན་འཇོག་རྒེ་ ཁྱོད་ལ་ ཁྲིམ་ཅེད་ ཛེད་ཤིག་།” 10 འིན་ན་ འི་ ཟུའི་མེ་ ལོབ་རྦོན་རྒུ་ནི་, ཧ་མ་ཀོ་ཀན་ ཚང་མེ་ རྒྱཔ་འགལ་ལ་ སྤེ་ར་ ངན་པ་ ཏང་ངེ་ནོག་། ཡང་ ཧ་འགྲང་ངེ་ རི་ སེམ་ཅེན་ ཙོག་སེ་, ཁོ་རང་རྒུ་ནི་ འདོད་པ་ ནང་ཞིན་ ཅོ་ཅེ་རྦེ་, ཁོ་རང་རྒུན་ མེ་ཀན་ ཆ་ཅུག་རྒེ་ནོག་། 11 ཏོ་རྒུན་ལ་ ཙམ་ཤིག་རྒེ་ འཇི་སྤ་ མི་ཡོང་, ཅེ་ཟེར་ནི་ ཏོ་རྒུན་, ཨ་འདཱམ་མེ་ པུ་ཙ་ ཀ་ཡིན་ནེ་ ལམ་ ངན་པེ་ཀ་ འགྲུལ་རྡེ་ ནོག་། ཡང་ ཏོ་རྒུ་ནི་ ནོར་རེ་ཕི་ ལུང་རྟོན་པ་ རྡིག་ཅེན་ འབཱ་ལཱམ་ ཙོག་སེ་ ནོར་ཁྲུལ་ ཅོའེ་རྡེ་ ནོག་། ཀོན་འཇོག་ལ་ ངོ་ལོག་ ཅོ་ཀན་ ཀོ་ར་ ཙོག་སེ་, ཁོང་རྒུན་ལ་ ནེན་ཏེན་ ཆེད་པ་ ཕོག་རྒེན་།

12 ཆེད་པ་ མ་འཇིའི་ཧན་ནེ་ ཏེ་ ཟུའི་མེ་ ལོབ་རྦོན་རྒུ་ནི་, ཁྱི་ཞ་ ཉམ་པོ་ ཏམ་པེ་ སོལ་རེ་རྡེ་ན་, ཁག་ ནེན་འདེ་ ཏོ་ལ་ ཁྲེལ་རྦ་ ཁྱོྃ་རྡེ་ ནོག་། ཁོང་རྒུན་ ཁོ་རང་ ཅིག་པོ་ལ་ ལྟ་ཏོག་ ཅོ་ཀ་ནེ་ ཁྲེལ་མེད་རྡེ་ ལུག་ཟི་རྒུན་ ནོག་། ཁོང་རྒུན་ ཆུ་ མེ་ཀན་ ཕན་མི་ཐོག་རྡེ་ སྲིན་ ལུང་སྤེ་ ཁྲིད་ཏེ་ ཁྱེར་ཧན་རྒུན་ ཙོག་སེ་ ནོག་། ཡང་ ཁོང་རྒུན་ ཤིང་ཏོག་ མ་ནི་ མི་མིན་ཀ་ནེ་ ལྕང་མ་ ཙོག་སེ་ འིན་, ཀའོ་ པ་ཀྲག་ནི་ཕ་ལ་ པུད་འབེ་ ཤི་ཡོད་། 13 ཁོང་རྒུན་ ཝང་སྲུལ་ མ་ཉེན་ཀ་ནེ་ རྒྱམ་ཚོའེ་ ཆུལ་རྦག་ ཙོག་སེ་ ནོག་, ཀའོ་རྒུ་ནི་ ཁྲེལ་མེད་རྡེ་ རྦོའེ་རྒུན་ ལྟག་ལ་ ཕང་ངེ་ནོག་། ཁོང་རྒུན་ ཧར་མ་ ཏོན་ཏག་ མེད་རྡེ་ འགྲུལ་ཧན་རྒུན་ ཙོག་སེ་ ནོག་། ཀོན་འཇོག་རྒེ་ ཁོང་རྒུན་ ཏུའི་རྒྱུན་ འདེད་ཅེ་ཕི་, མུན་ཀྲག་རྒེ་ མལ་ ཚང་མེ་སང་ ཐིལ་རྦོ་ འདམ་མེ་ ཛེད་ཏེ་ ནོག་།

14 ཨ་འདཱམ་ནི་ མི་རབ་ རྡུན་པ་ འིན་ཀ་ནེ་ ཨེ་ནོག་རྒེ་ ཏོ་རྒུ་ནི་ ཧོར་ལ་ མ་འོང་པེ་ ལུང་རྟན་ སལ་རྡེ་ འིན་འབེན་, “ལྟོའེ་ ཙོབོ་, ཁོ་རང་ངེ་ ཏམ་པེ་ ཕོ་ཉ་ ལྟོང་ཀྲག་ མང་པོ་ ཉམ་པོ་, 15 ཤོད་ལམ་ ངན་པ་ ཚང་མ་ ཅོའེ་རྡེ་ ཀོན་འཇོག་རྒེ་ རྒྱཔ་འགལ་ལ་ སྤེ་ར་ ངན་པ་ ཟེར་རྡེ་ ཁོང་ལ་ མ་འཇིའི་ཀན་ ཚང་མ་ལ་, ཁོ་རང་རྒུ་ནི་ ཉིང་ངེ་ན་ ཁྲེལ་རྦ་ ཚོར་ཤུག་ཅེ་ རྡང་ ཤའ་ ཛེད་ཅེ་ལ་ རྐྱོད་ཏུག་།”

16 འི་ ཟུའི་མེ་ ལོབ་རྦོན་རྒུན་ ཏུའི་རྒྱུན་ ཟེར་རྒྱུ་ ཏང་ཀན་, ཞེན་མེ་ན་ རྐྱོན་ ཙལ་ཧན་, ཁོ་རང་ངེ་ འདོད་པ་ ངན་པེ་ ལམ་མེ་ཀ་ འགྲུལ་ཧན་, ཁོ་རང་ རང་ངེ་ ཧོར་ལ་ ཕོ་སོ་ ཅོ་ཀན་ འདང་ རང་ངེ་ ཕན་ཏོག་རྡེ་ཕི་ ཞེན་མ་རྒུན་ལ་ རྟོད་པ་ ཏང་ངེ་ནོག་།

ཏེཏ་པེ་ན་ རྟེམ་པོ་ འདེད་ཅེ་།

17 འིན་ན་ ཤེ་སྤ་རྒུན་, ཨ་ཧོ་རྒུ་ནི་ ཙོབོ་ ཡི་ཤུ་ མ་ཤི་ཀེ་ ཧུ་ཚབ་རྒུ་ནི་ ལུང་རྟན་ སལ་ཧན་རྒུན་ འི་ཏུ་ ཅོའེ་ཧེ་། 18 ཁོང་རྒུ་ནི་ ཁྱི་ཞ་ ཤེད་རྡེ་ ཛེད་,

“ཐ་མེ་ ཏུའི་ལ་ ཙོབོ་ལ་ ཁྲེལ་རྦ་ ཅོའེན་,

སྤེ་ར་ ཏང་ཀ་ནེ་ མི་རྒུན་ ཡོྃ་རྡེ་

ཁོ་རང་རྒུ་ནི་ འདོད་པ་ ངན་པེ་ ལམ་མེ་ཀ་ འགྲུ་ལེན་།”

19 ཏེ་ ཟུའི་མེ་ ལོབ་རྦོན་རྒུ་ནི་, ཁྱི་ཞ་རྒུ་ནི་ ཕྲོ་ ནང་ཕྲུག་ ཆ་ཅུག་རྒེན་། ཁོང་རྒུན་ལ་ ཏམ་པེ་ ཐུག་ཡིད་ མེད་ཅེ་ཀ་ནི་, ཁོ་རང་རྒུ་ནི་ རྡིག་པེ་ འདོད་པ་ ནང་ཞིན་ལ་ མི་ཙེ་ པུད་རྡེ་ནོག་།

20 འིན་ན་ ཁྱི་ཞ་ ཤེ་སྤ་རྒུན་, ཁྱི་ཞི་ ཏམ་པེ་ ཏེཏ་པེ་ན་ ཁྱི་ཞ་རང་རྒུན་ ཤུག་ཤེན་ ཅོའེ་ཧེ་། ཡང་ ཏམ་པེ་ ཐུག་ཡིད་རྡེ་ན་ མོ་ལམ་ ཏོབ་ཧེ་། 21 ཙོབོ་ ཡི་ཤུ་ མ་ཤི་ཀེ་ ཉིང་ཞེ་ ཁྱི་ཞ་རྒུན་ལ་ ཐ་མེད་པེ་ མི་ཙེ་ སལ་ཅེ་ལ་ སྲུང་ཟ་ནི་, ཀོན་འཇོག་རྒེ་ ཤེ་སྤེ་ན་ འདོད་ཧེ་།

22 ཏེཏ་པེ་ན་ ཐེ་ཚོམ་ ཡོ་ཀན་རྒུན་ལ་ ཉིང་ཞེ་ ལྟོན་ཧེ་། 23 ཉ་ཝེ་ མེ་ ཆོག་ལ་ ཆ་ཀན་རྒུན་ ཀོག་ཏེ་ ཁྱོང་ཧེ་། ཡང་ ཞེན་མ་རྒུན་ལ་ ཉིང་ཞེ་ ལྟོན་ཧེ་, འིན་ན་ ཁྱི་ཞ་རྒུན་ ཏེ་རྒ་ རྡིག་པེ་ན་ འགྱེལ་ མི་འགྱེལ་ཤེ་ལ་ ཤང་ ཅོའེ་ཧེ་, མ་ཚེད་ ཁོང་རྒུ་ནི་ རྡིག་པེ་ ལེ་ཧ་རྒུ་ནི་ ཅོའེ་རྡེ་ ཀྲིཔ་ ཆ་ཀ་ནེ་ ཀོའེ་ལག་པོ་ལ་ སོག་པོ་ ཅོའེ་།

རྟོད་པེ་ མོ་ལམ་།

24 ཁྱི་ཞ་ རྡིག་པེ་ན་ འགྱེལ་ཤེ་ནི་ རྐྱོབ་ཏེ་ པོ་རེ་ ཛེད་ཉེན་ཀ་ནེ་ ཀོན་འཇོག་རྒེ་, ཁྱི་ཞ་རྒུ་ནི་ རྐྱོན་ ཚང་མ་ མེ་ཀན་ ཅོའོ་ ཛེད་ཏེ་, རྐྱིད་པོ་ ཉམ་པོ་ ཁོ་རང་ངེ་ ཟི་ཞིད་རྡེ་ན་ ཁོང་ངེ་ ཧུ་འདུན་ལ་ ཁྱོང་ངེ་ ཛེ་རྡེན་། 25 ཡི་ཤུ་ མ་ཤི་ཀ་ ཨ་ཧོ་རྒུ་ནི་ ཙོབོ་ རྒྱུད་ཏེ་, ཨ་ཧོ་རྒུ་ནི་ ཀོན་འཇོག་ ཏང་ རྐྱབ་འགོན་ ཅིག་པོ་ལ་, སྤལ་ རྡང་ ཟི་ཞིད་ ཏང་ ཤེད་ ཏང་ ཝང་རྒུན་, འཇིག་རྟེན་ ཙུག་རྒེ་སང་ ངུལ་ནི་ ཏག་ས་ཚུག་པ་, ཡང་ ལྟིང་ཞིན་ལ་ ཏུའི་རྒྱུན་ ཐོབ་ཤིག་, ཨ་མེན་༎