ཡོ་ཧཱ་ནན་ནེ་ ཆག་འབྲི་ སུམ་པ་།
ཡོ་ཧཱ་ནན་ནེ་ འཇུ་ ཞུའི་།
1
ཀོན་འཇོག་རྒེ་ མི་རྒུ་ནི་ ལམ་རྟོན་པེ་ ཆོག་ནེ་, འི་ ཡི་རྒེ་འབོ་ ངེ་ ཤེ་སྤ་ ཡ་ཏོ་ འགཱ་ཡུ་ལ་ འབྲི་འིན་, ཀ་འབོ་ལ་ ངེ་ རྡེན་འབའ་ ཤེ་སྤ་ ཅོའེན་།2 ཤེ་སྤ་ ཡ་ཏོ་, ངེ་ མོ་ལམ་ འིན་, ཁྱེ་རང་ ཅི་ཚང་མེ་ན་ ཡར་རྒྱེ་ ཅོ་ཅེ་ ཡང་, ཁྱེ་རང་ མ་ཤི་ཀེ་ན་ ཐུག་ཡིད་རྡེ་ ཐོག་ནི་ ཁམ་ཟང་ ལུའི་ཧན་ ཙོག་སེ་ ཟུག་སྤེ་ ཐོག་ནི་ལ་ ཁམ་ཟང་ ལུའི་ཤིག་། 3 མ་ཤི་ཀ་པེ་ སྤུན་ རིག་ ངེ་ཀ་ ཡོྃ་རྡེ་ ཁྱེ་རང་ནི་, ཀོན་འཇོག་རྒེ་ ཀེའེ་ན་ ལོ་ཁྱེལ་ཅེན་ འདང་ ཀོན་འཇོག་རྒེ་ རྡེན་འབའ་ ནང་ཞིན་ ཁྱེ་རང་ངེ་ མི་ཙེ་ པུད་ཏུག་ ཟེར་རྡེ་ སྤང་པོ་ ཏྃ་རྦེ་, ང་ མང་པོ་ ཐེད་། 4 ངེ་ ཕྲུ་རྒུ་རྒུ་ནི་ མི་ཙེ་ ཀོན་འཇོག་རྒེ་ རྡེན་འབེ་ ནང་ཞིན་ པུད་ཏུག་ ཟེར་རྡེ་ ཚོར་ཧན་འབེ་སང་ ཐེད་པོ་ཞིག་ ངེ་ཕི་ ཅི་ ཡོང་ངེན་།
ཙོབོ་རྡེ་ ཞབ་རྟོག་པ་རྒུན་ ཉ་ར་ ཅོའེ་།
5 ངེ་ ཤེ་སྤ་ ཡ་ཏོ་, ཆོའེ་ཤེད་ཀན་ སྤུན་རྒུན་ པེ་ལ་ ཡོད་ཟ་ནི་, ཁོང་རྒུན་ ངུལ་ལ་ ཡ་ཏོ་ རང་ངེ་ ཤེ་ཧན་ མན་ན་, ཁོང་རྒུན་ལ་ ཡ་ཏོ་ ཅོའེ་རྡེ་ ཀོན་འཇོག་ལ་ ལོ་ཁྱེལ་ཅེན་ཞིག་ འིན་ཀན་འབོ་ ལྟན་འདེ་ ནོག་། 6 ཁོང་རྒུ་ནི་ ཆོའེ་ཚོག་རྒེ་ འདུན་ལ་, ཁྱེ་རང་ངེ་ ཡ་ཤེ་ ཧོར་ལ་ སྤང་པོ་ ཏྃ་། ཐུག་ཞེ་ ཛེད་ཏེ་ ཀོན་འཇོག་ ཐུག་ཉེ་ཤེ་ཅེན་ནེ་ ཚུལ་ལ་, པེའེ་ན་ ཡོ་ཀ་ནེ་ ཞེན་ནེ་ མ་ཤི་ཀ་པ་ ཞབ་རྟོག་པ་རྒུན་ལ་ ཡ་ཏོ་ ཅོའེ་ཧེ་། 7 ཅེ་ཟེར་ནི་, ཁོང་རྒུན་ མ་ཤི་ཀེ་ ཚན་ནི་ཕི་ ཞབ་རྟོག་ ཞུ་ལ་ འབིང་འདེ་ ནོག་། ཡང་ ཏེཏ་པ་ མེ་ཀན་རྒུ་ནི་ཀ་ནི་ ཡ་ཏོ་ རེ་ཝ་ལ་ ཅོའོ་ མག་། 8 ཏེ་ནི་ ཨ་ཧོ་རྒུན་ལ་ ནེ་ཚུལ་ ཟང་པོ་ ཕེལ་ཤེ་ན་ ཁོང་རྒུན་ ཉམ་པོ་ འདྲེའེ་ཤེ་ཕི་ ཨ་ཧོ་ མ་ཤི་ཀ་པ་རྒུ་ནི་ ཀ་ན་མེད་, ཏེ་ མི་རྒུན་ལ་ ཡ་ཏོ་ ཅོ་རྒོ་ཤེ་ ནོག་།
9 ངེ་ ཁྱེ་རང་ངེ་ ཆོའེ་ཚོག་ལ་ འབྲི་རྦེན་, འིན་ན་ ཆོའེ་ཚོག་རྒེ་ འགོ་རྦོ་ འགྱུར་རེ་ ཐེད་ཀན་ འདི་འོ་ཏྲེ་ཕེ་, ང་ཞི་ ཝང་རྒུན་ལ་ ནྃ་མེད་ ཅོ་རུག་ ཟེར་རྡེ་ ཚོར་། 10 ཏ་ ང་ ཡོང་ངེ་རྡང་, ངེ་ ཁོའེ་ ཅོའེ་ཧ་ནེ་ ལེ་ཧ་ ཁྱི་ཞ་ ཚང་མ་ ཤེད་རྡེན་, ཀའོ་ ང་ཞི་ ཧོར་ལ་ ཟུན་ ཏྃ་རྡེ་ སྤེ་ར་ ངན་པ་ ཟེར་ཧན་ ཡང་ ང་ཞི་ སྤུན་རྒུན་ ཡོང་ཟ་ནི་, རྒ་སུའི་ མི་ཅོ་ཤེ་, མ་ཚེད་ རྒ་སུའི་ ཅོའོ་ ཐེད་ཀན་རྒུན་ རྒག་ཏེ་ ཏོ་རྒུན་ལ་ ཆོའེ་ཚོག་རྒེ་ ཕྲོ་ནི་ ཕིང་ཏྃ་རྡོག་།
11 ངེ་ ཤེ་སྤ་ ཡ་ཏོ་, ཏེ་ མི་ ངན་པེ་ སྤེ་རྡེ་ཀ་ མ་འགྲུལ་ལེ་, ཟང་པོ་ མི་རྒུ་ནི་ སྤེ་རྡེ་ཀ་ འགྲུལ་རྒོ་ཤེ་ ནོག་། ལེ་ཧ་ ཟང་པོ་ ཅོ་ཀན་རྒུ་ནི་ ཀོན་འཇོག་རྒེ་ ནོག་, ཡང་ ལེ་ཧ་ ངན་པ་ ཅོ་ཀན་རྒུ་ནི་ ཀོན་འཇོག་ མ་ནི་ མ་ཤེ་རྡེ་ ནོག་།
12 ཨ་ཧོའེ་ སྤུན་, འདེ་མེ་ཏྲི་འུ་ལ་ ཨ་ཧོའེ་ སྤུན་ ཚང་མེ་ རྟོད་ཏུག་། ཁོའེ་ རང་ངེ་ མི་ཙེ་འབོ་ ཀོན་འཇོག་རྒེ་ ཀའ་ ནང་ཞིན་ པུད་ཅེ་ཀ་ནི་, ཁོ་ ཏེ་ རྟོད་པ་རྦེ་ འོའེ་སྤ་ ནོག་། ང་ཞི་ལ་ འེ་རྒ་འབེ་ སྤང་པོ་ ཏང་ངེ་ཡོད་། ང་ཞི་ སྤང་པོ་རྒུན་ ཀྲང་པོ་ འིན་ཀན་འབོ་ ཁྱེ་རང་ལ་ རྒྱུའི་ནོག་།
ལྟིང་འཇུག་རྒེ་ འཇུ་ ཞུའི་།
13 ངེ་ ཟེར་ཤེ་ ཏ་ མ་མང་པོ་ཞིག་ རག་, འིན་ན་ ང་ ནག་ས་ རྡང་ ཉི་རྒུ་ ཉམ་པོ་ འབྲི་ཅེའོ་ རྡེ་མོ་ཞིག་ ཚོར་རེ་ མེ་རག་། 14 ང་ ཁྱེ་རང་ འདང་ འགྱོ་སྤ་ ཐུག་ཅེ་ རེ་ཝ་ འིན་, ཏེ་ནི་ ཨ་ཧོ་རྒུ་ནི་ འདུན་ལ་ འདེད་ཏེ་ སྤེ་ར་ ཏང་ངེན་།
15 ཁྱེ་རང་ལ་ ཀོན་འཇོག་རྒེ་ ཞིའི་རྡེ་ ཐོབ་ཤིག་།
ཡང་ འི་རུ་ ཡོ་ཀ་ནེ་ ཡ་ཏོ་རྒུ་ནི་ ཁྱེ་རང་ལ་ འཇུ་ ཞུ་རུག་། ཏུ་རུ་ ཡོ་ཀ་ནེ་ ཡ་ཏོ་ ཚང་མ་ ཅིག་ལ་ ལུའི་ མ་ཤུག་རྒེ་ ང་ཞི་ ཆོག་ནི་ འཇུ་ ཞུའི་༎