ཡོ་ཧཱ་ནན་ནེ་ ཆག་འབྲི་ ཉི་སྤ་།
ཡོ་ཧཱ་ནན་ནེ་ འཇུ་ ཞུའི་།
1
ངེ་ ཆོའེ་ཚོག་ ལམ་རྟོན་པེ་, ཀོན་འཇོག་རྒེ་ འདམ་མེ་ ཛེད་ཀ་ནེ་ པོ་མོ་ རྡང་ ཁོའེ་ ཕྲུ་རྒུ་རྒུན་ལ་ འབྲི་འིན་། ཁྱེ་རང་རྒུན་ལ་ ངེ་ རྡེན་འབའ་ ཤེ་སྤ་ ཅོའེན་, ཡང་ ང་ ཅིག་པོ་ མན་ རྡེན་འབེ་ ལབ་ཞ་རྒུན་ རྒྱུའི་ཡོ་ཀ་ནེ་ སྤུན་རྒུ་ནི་ལ་, 2 ཅེ་ཟེར་ནི་ ཀོན་འཇོག་རྒེ་ རྡེན་འབའ་འབོ་ ཨ་ཧོ་རྒུ་ནི་ན་ ལུའི་རྡེ་ ཡང་ ཏུའི་རྒྱུན་ ཨ་ཧོ་རྒུན་ ཉམ་པོ་ ལུའི་རྡེན་།3 རྡེན་འབའ་ རྡང་ ཤེ་སྤེ་ན་ མི་ཙེ་ པུད་ཟ་ནི་, ཀོན་འཇོག་ ཡབ་ ཏང་ ཁོང་ངེ་ སྲེ་ ཡི་ཤུ་ མ་ཤི་ཀ་རྒུ་ནི་ ཆོག་ནི་, ཐུག་ཞེ་, ཉིང་ཞེ་ རྡང་ ཞིའི་རྡེ་ ཨ་ཧོ་རྒུན་ལ་ ཐོབ་ཤིག་།
རྡེན་འབའ་ རྡང་ ཤེ་སྤ་།
4 ཁྱེ་རང་ངེ་ ཕྲུ་རྒུ་ ཁ་ཅིག་, ཡབ་ ཀོན་འཇོག་རྒེ་ ཨ་ཧོ་རྒུན་ལ་ ཀཱ་ སལ་ཧན་ ནང་ཞིན་, ཁོང་ངེ་ རྡེན་འབེ་ཀ་ འགྲུལ་རྡུག་ ཟེར་རྡེ་ ཚོར་རེ་རྡང་, ང་ ཧོཔ་ ཐེད་།
5 ཏ་ ངེ་ ཀཱ་ སོ་མ་ཞིག་རྒེ་ ཧོར་ལ་ མ་འབྲི་, འགོ་མ་ནི་ཕ་ལ་ ཨ་ཧོ་རྒུན་ ཉམ་པོ་ ཡོ་ཀན་འབེ་ ཧོར་ལ་ འབྲི་འིན་། ཨ་ཧོ་རྒུ་ནི་ ཅིག་ ཏང་ ཅིག་ལ་ ཤེ་སྤ་ ཅོ་རྒོ་ཤེ་ ནོག་། 6 ཡང་ ཤེ་སྤ་རྦོ་, ཨ་ཧོ་རྒུན་ ཀོན་འཇོག་རྒེ་ ཀཱ་རྒུན་ལ་ ཁ་ཉེན་འདེ་ འགྲུལ་ཤེའོ་ ནོག་། ཁྱི་ཞ་རྒུ་ནི་ འགོ་མ་ནི་ཕ་ལ་ ཚོར་ཧ་ནེ་ ཀཱ་འབོ་, ཁྱི་ཞ་རྒུན་ ཏེ་ ཤེ་སྤེ་ན་ འགྲུལ་རྒོ་ཤེའོ་ ནོག་།
7 ཡི་ཤུ་ མ་ཤི་ཀ་ ངོའེ་སྤོ་ལ་ ཟུྃ་སྤེ་ན་ ཕེབ་ཀན་འབོ་ལ་ ཏེཏ་པ་ མ་ཅོ་ཀ་ནེ་ འགོམ་ཧོར་ཧན་ མང་པོ་ཞིག་, འི་ འཇིག་རྟེན་ནེ་ན་ འབིང་འདེ་ ནོག་། ཏོ་ཙོག་སེ་ མི་རྒུན་ མི་ཚང་མ་ འགོ་ཧོར་ཧན་ འདང་ མ་ཤི་ཀེ་ འགྲ་ཝོ་རྒུན་ ནོག་། 8 ཀོན་འཇོག་རྒེ་ཕི་ ཁྱི་ཞི་ ཞབ་རྟོག་ ཞུ་ཀན་རྒུན་, ཏོན་མེད་ལ་ མ་ཆ་, ཀོན་འཇོག་རྒེ་ ཆོག་ནི་ ཚང་འགྲིག་ སོལ་རེ་ ཐོབ་ཅེ་ཕི་ ཁྱི་ཞ་རྒུན་ ཤང་ ཅོའེ་ཧེ་། 9 མ་ཤི་ཀེ་ ལབ་ཞ་རྒུ་ནི་སང་ ཐལ་རྡེ་ སོང་འདེ་, ཁོང་ངེ་ ལབ་ཞེ་ན་ མ་ལུའི་ཧན་རྒུ་ནི་ འབྲེལ་རྦོ་ ཀོན་འཇོག་ ཉམ་པོ་ མེ་ཀག་། མ་ཤི་ཀེ་ ལབ་ཞེ་ན་ ལུའི་ཧན་རྒུ་ནི་ འབྲེལ་ ཀོན་འཇོག་ ཡབ་ ཏང་ ཁོང་ངེ་ སྲེ་ ཉ་ཧ་ ཉམ་པོ་ ཡོད་ཏེ་ ནོག་།
10 ཀལ་ཏེ་ སུ་ཞིག་ ཁྱི་ཞ་རྒུ་ནི་ཀ་ ཡོྃ་རྡེ་ མ་ཤི་ཀེ་ ལབ་ཞ་ མན་ཀན་, ཡང་ ལབ་ཞ་ སོ་སོ་ རིག་ ལབ་ནི་, ཏོ་རྒུན་ རང་ངེ་ ཁང་པེ་ན་ མ་ཉེན་, མ་ཚེད་ ཁོང་རྒུན་ལ་ འཇུ་ལ་ མ་ཅོ་ཧེ་། 11 སུ་ཞིག་རྒེ་ ཡུ་ཙོག་སེ་ མི་རྒུན་ལ་ རྒ་སུའི་ ཞུ་ནི་, ཏེ་ མི་རྦོ་, ཁོའེ་ ལེ་ཧ་ ངན་པེ་ན་ འདྲེའེ་རྡེ་ ནོག་།
ལྟིང་འཇུག་རྒེ་ ཞལ་ཏ་།
12 ངེ་ ཟེར་ཤེ་ ཏ་ མང་པོ་ རག་, འིན་ན་ ང་ ནག་ས་ རྡང་ ཉི་རྒུ་ ཉམ་པོ་ འབྲི་ཅེའོ་ རྡེ་མོ་ཞིག་ ཚོར་རེ་ མེ་རག་། ཁྱི་ཞ་རྒུ་ནི་ ཕྲོ་ ཡོྃ་རྡེ་ འདུན་ལ་ སྤེ་ར་ ཏང་ཅེ་ རེ་ཝ་ ཅོའེན་། ཏེ་ནི་ ཨ་ཧོ་རྒུ་ནི་ ཐེད་པོ་ འདྲན་འདྲ་ ཀྲུབ་རྦེན་།
13 ཀོན་འཇོག་རྒེ་ འདམ་མེ་ ཛེད་ཀ་ནེ་ ཁྱེ་རང་ངེ་ སྲིང་མེ་ ཕྲུ་རྒུ་རྒུ་ནི་ ཁྱི་ཞ་རྒུན་ལ་ འཇུ་ ཞུ་རུག་༎