སྲེ་ཀ་ ཏེཏ་པ་།
5
ཡི་ཤུ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ འིན་ཀན་འབོ་ལ་ ཏེཏ་པ་ ཅོ་ཀན་ ཚང་མ་, ཀོན་འཇོག་ནི་ རྐྱེ་རྡེ་ ནོག་, ཡང་ ཡབ་ ཀོན་འཇོག་ལ་ ཤེ་སྤ་ ཅོ་ཀན་ ཚང་མེ་, ཀོན་འཇོག་རྒེ་ ཕྲུ་རྒུ་རྒུན་ལ་ ཤེ་སྤ་ ཅོ་ནོག་། 2 ཀལ་ཏེ་ ཨ་ཧོ་རྒུ་ནི་ ཀོན་འཇོག་ལ་ ཤེ་སྤ་ ཅོའེ་རྡེ་, ཁོང་ངེ་ ཀཱ་རྒྱ་རྒུན་ ཁ་ཉེན་ནེ་ཡོད་ནི་, ཏེ་ནི་ ཨ་ཧོ་རྒུ་ནི་ ཀོན་འཇོག་རྒེ་ ཕྲུ་རྒུ་རྒུན་ལ་ ཤེ་སྤ་ ཅོ་ཀན་འབོ་ རྒྱུའི་ནོག་། 3 ཀོན་འཇོག་རྒེ་ཕི་ ཤེ་སྤ་འབོ་, ཨ་ཧོ་རྒུ་ནི་ ཁོང་ངེ་ ཀཱ་རྒུན་ལ་ ཁ་ཉེན་ཅེའོ་ ནོག་, ཡང་ ཁོང་ངེ་ ཀཱ་རྒུན་ པར་རྡོ་ཅེན་ མེ་ཀག་། 4 ཀོན་འཇོག་ནི་ རྐྱེ་ཧན་ ཚང་མ་, འཇིག་རྟེན་ནེ་ ངན་པ་ ཚང་མེ་ཀ་ རྒྱལ་ཁ་ ཐོབ་ཏེ་ ནོག་། ཡང་ ཨ་ཧོ་རྒུན་ལ་ མ་ཤི་ཀེ་ཀ་ ཏེཏ་པ་ ཡོད་ཅེ་རྦེ་, འི་ རྒྱལ་ཁ་རྦོ་ ཐོབ་ཏེ་ ནོག་། 5 འཇིག་རྟེན་ནེ་ཀ་ སུ་ལ་ རྒྱལ་ཁ་ ཐོབ་ཏེ་ ནོག་? ཏེ་རྒ་རྒུན་ལ་ ཀའོ་རྒུ་ནི་ ཡི་ཤུ་ ཀོན་འཇོག་རྒེ་ སྲེ་ འིན་ཀན་འབོ་ ཏེཏ་པ་ ཅོའེན་།6 ཆུའི་ཁྲུའི་ ནེན་ནེ་ ཛེད་ཀན་ འདང་ རྐྱང་ཤིང་ངེ་ཀ་ ཧུ་ཁྲག་ པོ་ ཛེད་ཀན་རྒུན་ རྒྱུད་ཏེ་, ཡི་ཤུ་ མ་ཤི་ཀ་རྦོ་, ཀོན་འཇོག་རྒེ་ སྲེ་ འིན་ཀན་འབོ་ ངོན་ནེ་ ཛེད་། ཆུ་ ཅིག་པོ་ མན་, ཆུ་ རྡང་ ཁྲག་ ཉ་ཧ་ རྒྱུད་ཏེ་། ཡང་ ཀྲང་པོ་ མོལ་ཧ་ནེ་ ཏམ་པེ་ ཐུག་ཡིད་རྡེ་, ཏེ་རྒ་རྦེ་ སྤང་པོ་ སལ་ལེ་ནོག་། 7 སྤང་པོ་ ཏང་ཀན་ སུམ་ ཡོད་ཏེ་ ནོག་། 8 ཏམ་པེ་ ཐུག་ཡིད་, ཡི་ཤུ་ མ་ཤི་ཀེ་ ཁྲུའི་ནེན་ཅེ་ རྡང་ ཁོང་ངེ་ རྐྱང་ཤིང་ངེ་ཀ་ ཀྲོྃ་ ཡུ་ ཚང་ཀ་ ཡི་ཤུ་ མ་ཤི་ ཀོན་འཇོག་རྒེ་ སྲེ་ འིན་ཀན་འབོ་ ལྟན་ཉེན་། 9 ཏ་ ཨ་ཧོ་རྒུ་ནི་ མི་ སྤང་པོ་ལ་ རྡེན་ཆེ་ཤེ་ ཅོ་ནི་, ཏེ་ནི་ ཀོན་འཇོག་རྒེ་ སྤང་པོ་ མང་ངེ་ ཀྲག་པོ་ ནོག་, ཅེ་ཟེར་ནི་ འི་རྦོ་ ཀོན་འཇོག་རྒེ་ སྤང་པོ་ ཁོ་རང་ངེ་ སྲེ་ ཧོར་ལ་ སལ་ཧན་འབོ་ ནོག་། 10 ཀོན་འཇོག་རྒེ་ སྲེ་ཀ་ ཏེཏ་པ་ ཅོ་ཀན་རྒུ་ནི་ ཉིང་ངེ་ན་ ཏེ་ སྤང་པོ་ ཡོད་ཏེ་ ཏོ་ ཀྲང་པོ་ འིན་ཀན་འབོ་ལ་ རྡེན་ཆེ་ཤེ་ ཅོ་ནོག་། ཡང་ འི་ སྤང་པོ་རྦེ་ཀ་ རྡེན་ཆེ་ཤེ་ མ་ཅོ་ཀན་ ཚང་མེ་, ཀོན་འཇོག་ ཟུན་བ་ ཐེའེ་ནོག་, ཅེ་ཟེར་ནི་ ཁོང་རྒུ་ནི་ ཀོན་འཇོག་རྒེ་ རང་ངེ་ སྲེ་ ཧོར་ལ་ སལ་ཧ་ནེ་ སྤང་པོ་རྦེ་ཀ་ ཏེཏ་པ་ མ་ཅོ་ལ་ ནོག་།
11 ཡང་ ཏེ་ སྤང་པོ་ནི་, ཀོན་འཇོག་རྒེ་ ཨ་ཧོ་རྒུན་ལ་ ཐ་མེད་པེ་ སྲོག་ སལ་ལེ་ ཛེད་, ཡང་ ཏེ་ སྲོག་པོ་ ཁོང་ངེ་ སྲེ་ན་ ཡོད་ཏེ་ ནོག་། 12 སྲེ་ ཡོ་ཀན་རྒུ་ནི་ ལག་ལ་ ཏེ་ ཐ་མེད་པེ་ མི་ཙེ་ ཡོད་, ཡང་ ཀོན་འཇོག་རྒེ་ སྲེ་ མེ་ཀན་རྒུ་ནི་ན་ མི་ཙེ་ལ་ མེད་།
ཐ་མེད་པེ་ མི་ཙེ་ ཧོར་ལ་ རྒྱུའི་ཆ་ཅེ་།
13 ཀོན་འཇོག་རྒེ་ སྲེ་ན་ ཏེཏ་པ་ ཅོ་ཀན་རྒུན་ལ་ ཐ་མེད་པེ་ མི་ཙེ་ ཡོ་ཀན་འབོ་ རྒྱུའི་ ཆ་ཅེ་ཕི་ ངེ་ འི་ ཡི་རྒེ་རྦོ་ འབྲི་འིན་། 14 ཡང་ ཀོན་འཇོག་རྒེ་ ཐུག་འདོད་ ནང་ཞིན་ལ་ ཀལ་ཏེ་ ཨ་ཧོ་རྒུ་ནི་ མོ་ལམ་ ཞུ་ནི་, ཁོང་ངེ་ སན་ནེ་ ཛེད་ཅེའོ་ ཨ་ཧོའེ་ ཉིང་ངེ་ན་ ལོ་ཁྱེལ་ ནེན་ཏེན་ ནོག་། 15 ཨ་ཧོའེ་ ཞུ་ཀན་རྒུན་ ཁོང་ངེ་ སན་ནེ་ ཛེད་ཅེའོ་ ཨ་ཧོ་རྒུན་ལ་ རྒྱུའི་ཡོད་ཅེ་ཀ་ནི་, ཨ་ཧོའེ་ ཞུའི་ཧན་རྒུན་ ཐོབ་ཀན་ འདང་ཙོག་སེ་ ནོག་།
16 ཀལ་ཏེ་ སུ་ཞིག་ལ་ ཁོའེ་ སྤུན་ཞིག་རྒེ་, ཉ་ཝེ་ན་ མི་ལེབ་ཅེ་ རྡིག་པ་ཞིག་ ཅོའོ་ ཐོང་ནི་, ཁོའེ་ཕི་ མོ་ལམ་ ཞུ་རྒོ་ཤེ་ ནོག་། ཏེ་ནི་ ཀོན་འཇོག་རྒེ་ ཉ་ཝེ་ན་ ལེཔ་ མི་ལེབ་ཤི་ རྡིག་པ་ ཅོ་ཀན་འབོ་ལ་ ཤག་སྤ་ སལ་རྡེ་ ཐར་པེ་ མི་ཙེ་ སལ་ལེ་ ཛེ་རྡེན་། འིན་ན་ ཉ་ཝེ་ན་ ལེབ་ཅེ་ རྡིག་པ་ཞིག་ ཡོད་ཏེ་ ནོག་། ངེ་ ཏོ་ཙོག་སེ་ མི་རྒུ་ནི་ཕི་ མོ་ལམ་ ཞུ་ཅེ་ལ་ ཟེ་རེ་མེད་། 17 འི་ཟུག་རྒེ་ ཏ་, ལེ་ཧ་ ངན་པ་ ཚང་མ་ རྡིག་པ་ ནོག་, འིན་ན་ ཉ་ཝེ་ན་ མི་ལེབ་ཅེ་ལ་ རྡིག་པ་ རིག་ ཡོད་ཏེ་ ནོག་།
18 ཨ་ཧོ་ལ་ རྒྱུའི་ནོག་, ཀོན་འཇོག་ནི་ རྐྱེ་ཀན་རྒུ་ནི་ རྡིག་པ་ ཅོའེན་ མི་འདེད་, ཅེ་ཟེར་ནི་ ཀོན་འཇོག་རྒེ་ སྲེ་ ཁོང་རྒུན་ རྐྱོབ་རྦེ་ ཛེ་རྡེ་ནོག་། ཡང་ ངན་པ་ རྡུད་རྡེ་ ཏོ་རྒུན་ལ་ ནོད་རྐྱལ་ ཉེན་ནེ་ མག་། 19 ཨ་ཧོ་རྒུན་ ཀོན་འཇོག་རྒེ་ ཕྲུ་རྒུ་རྒུན་ ཡང་ འཇིག་རྟེན་ སོན་ཏེ་ ངན་པ་ རྡུད་རྡེ་ ཡོག་ལ་ ཡོད་ཏེ་ འིན་ཀན་འབོ་ ཨ་ཧོ་རྒུན་ལ་ རྒྱུའི་ནོག་།
20 ཨ་ཧོ་རྒུན་ལ་ འི་རྦོ་ལ་ རྒྱུའི་ནོག་, ཀོན་འཇོག་རྒེ་ སྲེ་ རྐྱོད་ཏེ་ ཨ་ཧོ་རྒུན་ལ་ རྡེན་འབེ་ ཀོན་འཇོག་ སུ་ འིན་ཀན་འབོ་ ཧ་ཀོ་ཅེ་ ཤེ་རབ་ སལ་ལེ་ ཛེད་། ཏ་ ཨ་ཧོ་རྒུ་ནི་ འབྲེལ་ རྡེན་འབེ་ ཀོན་འཇོག་ ཉམ་པོ་ ཡོད་ཏེ་ ནོག་, ཅེ་ཟེར་ནི་ ཨ་ཧོ་རྒུ་ནི་ ཁོང་ངེ་ སྲེ་ ཡི་ཤུ་ མ་ཤི་ཀ་ ཉམ་པོ་ འབྲེལ་ ཡོད་ཏེ་ ནོག་། ཁོང་ནི་ རྡེན་འབེ་ ཀོན་འཇོག་ ཏང་ ཐ་མེད་པེ་ སྲོག་པོ་ འིན་།
21 ཤེ་སྤ་ ཕྲུ་རྒུ་རྒུན་, ཁྱི་ཞ་ ཧུ་འདྲ་རྒུ་ནི་སང་ ཐག་རིང་ལ་ འདོད་ཧེ་༎