ཀོན་འཇོག་ ཨ་ཧོའེ་ རྡེ་བ་ཅན་ནེ་ ཡབ་།
3
ལྟོའེ་རྡང་, ཡབ་ ཀོན་འཇོག་རྒེ་ ཨ་ཧོ་རྒུན་ལ་ ཙམ་ཤིག་རྒེ་ ཤེ་སྤ་ ཛེད་ཏེ་ ནོག་, ཁོང་ངེ་ ཨ་ཧོ་རྒུན་ལ་ ཁོ་རང་ངེ་ ཕྲུ་རྒུ་རྒུན་ མོལ་འདུག་, ཡང་ ཨ་ཧོ་ ཏོ་ འིན་ཅེ་རྦོ་ ནོག་། འིན་ན་ འཇིག་རྟེན་ནེ་ ཏེཏ་པ་ མེ་ཀན་རྒུ་ནི་ ཨ་ཧོ་རྒུན་ ཀོན་འཇོག་རྒེ་ ཕྲུ་རྒུ་རྒུན་ འིན་ཀན་འབོ་ ངོ་ཤེ་རྡེ་ མག་, ཅེ་ཟེར་ནི་ ཏོ་རྒུ་ནི་ ཀོན་འཇོག་ ངོ་ མ་ཤེ་། 2 ཤེ་སྤ་ ཡ་ཏོ་རྒུན་, ཏག་ས་ ཨ་ཧོ་ ཀོན་འཇོག་རྒེ་ ཕྲུ་རྒུ་རྒུན་ ནོག་། ཨ་ཧོ་རྒུན་ ཀ་ཟུག་ ཀྲིག་ འགྱུ་རེན་, ཏག་ས་ཚུག་པ་ ཨ་ཧོ་རྒུན་ལ་ ངོན་ཅུག་རྒེ་ མ་ཛེད་རྡེ་ ནོག་། འིན་ན་ མ་ཤི་ཀ་ ངོན་ཟ་ནི་, ཨ་ཧོ་རྒུན་ ཁོང་ ཙོག་སེ་ འགྱུར་ཤེའོ་ ཨ་ཧོ་ལ་ རྒྱུའི་ནོག་, ཅེ་ཟེར་ནི་ ཨ་ཧོ་རྒུ་ནི་ ཁོང་ ཁོ་རང་ངེ་ རྡེན་འབེ་ ཟི་ཞིད་རྡེ་ ཡིབ་ཟོ་ན་ འཇལ་ལེན་། 3 ཡང་ ཏོ་ ཐོང་ཅེ་ འདོད་པ་ པོར་ཧན་རྒུ་ནི་, ཁོ་རང་ སང་མ་ པོ་རེ་ནོག་, ཀ་ཟུག་ མ་ཤི་ཀ་ སང་མ་ འིན་།4 ཡང་ རྡིག་པ་ ཅོ་ཀན་རྒུ་ནི་ ཀོན་འཇོག་རྒེ་ ཀཱ་ཁྲིམ་པོ་ ཅག་ཏེ་ ནོག་, ངོའེ་སྤོ་ལ་ ཀཱ་ཁྲིམ་ ཅག་ཅེའོ་ ཁོ་རང་ རྡིག་པ་ ནོག་། 5 ཡང་ ཁྱི་ཞ་རྒུན་ལ་ རྒྱུའི་ནོག་, ཨ་ཧོའེ་ རྡིག་པ་རྒུན་ མེ་ཀན་ ཅོ་ཅེ་ཕི་ མ་ཤི་ཀ་ རྐྱོད་རྡེ་ ཛེད་། ཁོང་ངེ་ན་ རྡིག་པ་ མེད་པེན་། 6 ཡི་ཤུའི་ན་ ལུའི་ཧན་རྒུ་ནི་ རྡིག་པ་ ཅོའེན་ མི་འདེད་, ཡང་ རྡིག་པ་ ཅོའེན་ འདེད་ཀན་རྒུན་ལ་ མ་ཤི་ཀ་ མ་འཇལ་ལེ་, ཡང་ ངོ་ལ་ མ་ཤེ་རྡེ་ ནོག་།
7 ཤེ་སྤ་ ཕྲུ་རྒུ་རྒུན་, སུ་ཞི་ལ་ ཁྱི་ཞ་རྒུན་ལ་ འགོམ་ཧོར་ ཏང་མ་ཅུག་ཧེ་། འོའེ་སྤེ་ ལེ་ཧ་ ཅོ་ཀ་ནེ་ མིའུ་ ཀྲང་པོ་ ནོག་, ཀ་ཟུག་རྒེ་ མ་ཤི་ཀ་ འིན་། 8 རྡིག་པ་ ཅོའེན་ འདེད་ཀན་རྒུན་ རྡུད་རྡེ་ ནོག་, ཅེ་ཟེར་ནི་, རྡུད་རྡེ་ འཇིག་རྟེན་ ཚུ་རྦེ་ནི་ཕ་ལ་ རྡིག་པ་ ཅོའེན་ ཡོྃ་རྡེ་ འིན་། ཀོན་འཇོག་རྒེ་ སྲེ་, རྡུད་རྡེ་ ལེ་ཧ་རྒུན་ མེ་ཀན་ ཛེད་ཅེ་ཕི་ རྐྱོད་རྡེ་ ཛེད་། 9 ཀོན་འཇོག་ནི་ རྐྱེ་ཀན་རྒུ་ནི་ རྡིག་པ་ ཅོའེན་ འདེ་རྡེ་ མག་, ཅེ་ཟེར་ནི་ ཀོན་འཇོག་རྒེ་ ཤོད་པ་ ཏོ་རྒུ་ནི་ན་ ལུའི་རྡེ་ནོག་། ཏོ་རྒུན་ལ་ རྡིག་པ་ ཅོའེན་ འདེད་ཉེན་ནེ་ མག་, ཅེ་ཟེར་ནི་ ཏོ་རྒུན་ ཀོན་འཇོག་ནི་ རྐྱེ་རྡེ་ ནོག་། 10 ཏོ་རྦེ་ཕི་ ཨ་ཧོ་རྒུན་ལ་ སུ་ ཀོན་འཇོག་རྒེ་ ཕྲུ་རྒུ་རྒུན་ ཡང་ སུ་ རྡུད་རྡེ་ ཕྲུ་རྒུ་རྒུན་ འིན་ཀན་འབོ་ ཤེ་རྡེ་ནོག་། ལེ་ཧ་ ཟང་པོ་ ཡང་ རང་ངེ་ སྤུན་ལ་ ཤེ་སྤ་ མ་ཅོ་ཀན་རྒུན་ ཀོན་འཇོག་རྒེ་ ཕྲུ་རྒུ་ མག་།
ཅིག་ ཏང་ ཅིག་ལ་ ཤེ་སྤ་ ཅོའེ་ཧེ་།
11 ཁྱི་ཞ་རྒུ་ནི་ འགོ་མ་ནི་ཕ་ལ་ ཚོར་ཧ་ནེ་ ཁྲིན་འབོ་ ཡུ་ འིན་, “ཨ་ཧོ་རྒུ་ནི་ ཅིག་ ཏང་ ཅིག་ལ་ ཤེ་སྤ་ ཅོ་རྒོ་ཤེ་ ནོག་།” 12 ཨ་འདཱམ་མེ་ པུ་ཙ་, རྡུད་རྡེ་ འིན་ཀན་ ཀ་ཡིན་ ཙོག་སེ་ མ་འགྱུར་ཧེ་། ཁོའེ་ རང་ངེ་ ནོ་ སེད་། ཅི་ཕི་ སེད་? ཅེ་ཟེར་ནི་ ཀ་ཡིན་ནེ་ ལེ་ཧ་རྒུན་ ངན་པ་ ཡང་ ཁོའེ་ ནོའེ་ ལེ་ཧ་རྒུན་ ཀྲང་པོ་ ཡོད་པེན་། 13 སྤུན་རྒུན་, ཀལ་ཏེ་ འཇིག་རྟེན་པེ་ ཁྱི་ཞ་རྒུན་ལ་ སོག་པོ་ ཅོ་ནི་, ཏོ་ལ་ ཡམ་ཚན་ མ་ཚོར་ཧེ་།
14 ཨ་ཧོ་རྒུན་ ཤི་ཅེ་ནི་ ཐར་རྡེ་ སོན་པེ་ན་ འདེད་ཏེ་ འིན་ཀན་འབོ་ ཨ་ཧོ་རྒུན་ལ་ ཤེ་རྡེ་ནོག་, ཅེ་ཟེར་ནི་ ཨ་ཧོ་རྒུ་ནི་ ཅིག་ ཏང་ ཅིག་ལ་ ཤེ་སྤ་ ཅོ་ནོག་། ཡང་ ཤེ་སྤ་ མ་ཅོ་ཀན་རྒུན་ ཏ་རུང་ང་ ཤི་རྡེ་ ནོག་། 15 རང་ངེ་ སྤུན་ཞིག་ལ་ སོག་པོ་ ཅོ་ཀན་རྒུན་ ཀོན་འཇོག་རྒེ་ ཧུ་འདུན་ལ་ མི་སེད་ ཙོག་སེ་ ནོག་། ཡང་ མི་སེད་ཅིག་རྒེ་ན་ ཐ་མེད་པེ་ མི་ཙེ་ མེ་ཀན་འབོ་ ཨ་ཧོ་རྒུན་ལ་ རྒྱུའི་ནོག་།
16 ཤེ་སྤ་འབོ་ ཨ་ཧོ་རྒུ་ནི་ འེ་ཀ་ནི་ ཧ་ཀོ་ནོག་, ཙོབོ་ ཡི་ཤུའི་ ཨ་ཧོ་རྒུ་ནི་ཕི་, ཁོ་རང་ངེ་ སྲོག་ སལ་ལེ་ ཛེད་། ཨ་ཧོ་རྒུ་ནི་ལ་ རང་ངེ་ སྤུན་རྒུ་ནི་ཕི་ སྲོག་པོ་ ཏང་རྒོའེ་། 17 ཀལ་ཏེ་ ནོར་ ཡོ་ཀན་རྒུ་ནི་, རང་ངེ་ སྤུན་ཞིག་ལ་ མི་ཙེ་ པུད་ཅེ་ རྒོའེ་ཤེ་ ཡོ་ཀན་འབོ་ ཤེ་རྡེ་ལ་, ཁོ་ ཡ་ཏོ་ ཅོའོ་ མེད་ནི་, ཁོའེ་ན་ ཀོན་འཇོག་རྒེ་ ཤེ་སྤ་ ཀ་ཟུག་རྒེ་ ལུའི་རྡེན་?
18 ཤེ་སྤ་ ཕྲུ་རྒུ་རྒུན་, ཨ་ཧོ་རྒུ་ནི་ ཁ་ ཅིག་པོ་ནི་ ཤེ་སྤ་ ཅོའེན་ མ་ཟེར་རེ་, རྡེན་འབའ་ རང་ངེ་ ལེ་ཧ་རྒུན་ ལག་ལེན་ ཅོའེ་རྡེ་ ལྟན་ནི་, མི་རྒྱལ་ལེ་? 19 ཏོ་རྦེ་ ཨ་ཧོ་རྒུན་ རྡེན་འབེ་ ནང་ནི་ རྐྱེ་ཀ་ནེ་ ཕྲུ་རྒུ་ འིན་ཀན་འབོ་ རྒྱུའི་ ཆ་ནོག་། ཏེ་ནི་ ཀོན་འཇོག་རྒེ་ ཧུ་འདུན་ལ་ ཨ་ཧོ་རྒུ་ནི་ སེམ་མེ་ན་ ཞིའི་རྡེ་ ཡོང་ངེན་། 20 ཀལ་ཏེ་ ཨ་ཧོའེ་ ཉིང་ངེ་, ཨ་ཧོ་ རང་ལ་ ཉེད་ཀལ་རྡེ་ ཡོད་ནི་, འཇིའི་ མ་འཇིའི་ཧེ་, ཅེ་ཟེར་ནི་, ཀོན་འཇོག་ ཨ་ཧོའེ་ ཉིང་ངེ་སང་ ཝང་ཅེན་ ཞུ་རྡེ་ནོག་། ཁོང་ངེ་ ཅི་ཚང་མ་ ཁྱེན་ནེ་ ཛེ་རྡེ་ནོག་།
21 ཤེ་སྤ་ ཡ་ཏོ་རྒུན་, ཀལ་ཏེ་ ཨ་ཧོ་རང་ངེ་ ཉིང་ངེ་, ཨ་ཧོ་རྒུན་ལ་ ཉེད་ ཀ་ལེ་ མེད་ནི་, ཨ་ཧོ་རྒུ་ནི་ ཀོན་འཇོག་ལ་ མོ་ལམ་ ལོ་ཁྱེལ་ ཉམ་པོ་ ཞུ་ཉེན་ནེ་ནོག་། 22 ཡང་ ཅི་ཞིག་ ཁོང་ལ་ ཞུ་ན་, ཏོ་ ཨ་ཧོ་རྒུན་ལ་ ཀོན་འཇོག་རྒེ་ ཆོག་ནི་ ཐོབ་རྦེན་, ཅེ་ཟེར་ནི་ ཨ་ཧོ་རྒུ་ནི་ ཁོང་ངེ་ ཀཱ་རྒུན་ལ་, ཁ་ཉེན་འདེ་ ཁོང་ ཐུག་ཐེད་ཅེ་ ལེ་ཧ་རྒུན་ ཅོ་ནོག་།
23 ཁོང་ངེ་ ཀཱ་འབོ་ འི་རྦོ་ འིན་, ཨ་ཧོ་རྒུ་ནི་ ཁོང་ངེ་ སྲེ་ ཡི་ཤུ་ མ་ཤི་ཀེ་ ཚན་ནེ་ཀ་ ཏེཏ་པ་ ཅོ་རྒོའེ་, ཡང་ ཁོང་ངེ་ ཀཱ་ ནང་ཞིན་ ཅིག་ ཏང་ ཅིག་ལ་ ཤེ་སྤ་ ཅོ་རྒོའེ་། 24 ཁོང་ངེ་ ཀཱ་རྒུན་ལ་ ཁ་ཉེན་ཀན་རྒུན་ ཀོན་འཇོག་རྒེ་ན་ ལུའི་རྡེ་ ཡང་ ཀོན་འཇོག་ ཁོང་རྒུ་ནི་ན་ ལུའི་རྡེ་ ཛེད་རྡེ་ནོག་། ཀོན་འཇོག་རྒེ་ ཨ་ཧོ་རྒུན་ལ་ ཏམ་པེ་ ཐུག་ཡིད་ སལ་ལེ་ ཛེད་ཅེ་ཀ་ནི་, ཀོན་འཇོག་ ཨ་ཧོ་རྒུ་ནི་ན་ ལུའི་རྡེ་ ཛེད་ཏེ་ འིན་ཀན་འབོ་ ཨ་ཧོ་རྒུན་ལ་ རྒྱུའི་ནོག་།